Kosnan Chikitu i Símpel
Nos mester di wòrdu rekordá ku na final di un periodo signifikante, kosnan ku ta parse chikí lo hasi ku gran kos lo pasa.
I.
Mi rumannan stimá, manera boso, mi a wòrdu profundamente afektá i lantá i inspirá dor di e mensahenan i músika i e sentimentunan di e tempu aki huntu ku otro. Mi tin sigur ku mi ta papia pa boso den ekspresá un danki na nos rumannan hòmber i muhé di ken, komo instrumentonan den e man di Señor, a duna nos e efektonan di fortifikashon di e tempu huntu aki.
Mi ta gradesido di papia den e oudiensia aki riba Djadumingu di Pasku di Resurekshon. Awe nos ta djòin otro Christiánnan den e selebrashon di e Resurekshon di e Señor JesuCristu. Pa miembronan di e Iglesia di JesuCristu di e Santunan di e Delaster Dianan, e Resurekshon literal di JesuCristu ta e pilar di nos kerensha.
Dor ku nos ta kere e relatonan den tur dos e Beibel i e Buki di Mormòn tokante di e Resurekshon literal di JesuCristu, nos ta kere tambe den e kantidat di siñansanan di skritura ku un resurekshon similar lo bini pa tur hendenan ku hamas a biba riba e mundu aki. E resurekshon ei ta duna nos loke e Apòstel Pedro ta yama “un speransa bibu” (1 Pedro1:3). E speransa bibu ei ta nos konvikshon ku morto no ta e konklushon di nos identidat pero solamente un stap nesesario den nos Tata Selestial su plan miserikordioso pa e salbashon di Su yunan. E plan ei ta basa su mes riba e transishon di mortalidat pa inmortalidat. Sentral den e transishon ei ta e skuridat di morto i e glorioso mainta ku ta wòrdu hasí posibel dor di e Resurekshon di nos Señor i Salbador ku nos ta selebrá riba e Djadumingu di Pasku di Resurekshon aki.
II.
Den un gran himno di kende palabranan a wòrdu skibí dor di Eliza R. Now, nos ta kanta:
Den promoshon di e diseño i harmonia divino ei, nos ta bini huntu den reunionnan, inkluso e konferensha aki, pa siña i kurashá un ke otro.
E mainta aki mi a sinti pa husa komo mi teksto Alma su siñansa na su yu hòmber Heleman, apuntá den e Buki di Mormón: “Dor di kosnan chikitu i simpel kosnan grandi ta wòrdu lográ” (Alma37:6).
Nos ta wòrdu siñá hopi kosnan chikitu i simpel den e evangelio di JesuCristu. Nos tin ku wòrdu rekòrdá ku na final despues di un periodo signifikante e kosnan ku ta parse kosnan chikitu ta bin logra gran kosnan. Tabatin hopi diskursonan tokante di e tópiko aki dor di Outoridatnan General i dor di otro maestronan respetá. E tópiko ta asina importante ku nos ta sinti pa papia over di dje atrobe.
Mi a wòrdu rekòrdá di e poder di kosnan chikitu i simpel durante tempu dor di algu ku mi a mira ora mi tabata kana un mainta. Esaki ta e potrèt ku mi a saka. E stupi di betòn diki i fuerte ta kibrando. Ta resultado di algu grandi i poderoso ku ta pusha e? Nò, e sker aki ta wòrdu kousá dor di u kresementu poko poko i chikitu di e rais di e palu ku ta serka aki bandanan ku ta krese sali pafó. Esaki ta un ehèmpel similar ku mi a mira den un otro kaya.
E poder ku ta pusha ku a sker e stupinan di betòn pisá aki tabata demasiado chikí pa midi diariamente òf hasta mensualmente, pero e efekto sigun tempu ta pasa tabata inkreiblemente poderoso.
Asina tambe ta e efekto poderoso dor di tempu di e kosnan chikitu i simpel ku nos ta wòrdu siñá den skrituranan i dor di profetanan bibiente. Konsiderá e estudio di skritura ku nos a wòrdu siñá pa inkorporá den nos bida diario. Òf konsiderá e orashonnan personal i e orashonnan familiar na rudia ku regularmente ta wòrdu praktiká dor fiel Santunan di Delaster dianan. Konsiderá partisipashon na seminario pa hóbennan òf instituto pa hóbennan adulto. Apesar ku kada unu di e práktikanan aki por parse chikitu i simpel, despues di tempu nan ta resultá den un lift spiritual poderoso i den kresementu. Esaki ta pasa dor ku kada unu di e kosnan chikitu i simpel aki ta invitá e kompaño di e Spiritu Santu, e Testifikadó ku ta aklará i guia nos pa yega na bèrdat, manera Presidente Eyring a splika nos.
Un otro fuente di lift spiritual i kresementu ta un práktika kontinuo di arepentimentu, hasta di transgreshonnan ku ta parse chikitu. Nos mes su evaluashon propio inspirá por yuda nos mira kon nos a kai chikí i kon nos por hasi mihó. Un arepentimentu asina lo mester presedé nos partisipashon semanal di e santa sena. Algun tópikonan pa konsiderá den e proseso aki di arepentimentu ta wòrdu sugerí den e himno “Mi a Hasi Algu Bon?”
Mi a hasi algu bon den mundu awe?
Mi a yuda kualke hende den nesesidat?
Mi a deleitá esun tristu i laga un hende sinti su mes felis?
Si nò, mi a faya di bèrdat.
Tin un hende ku su karga a bira mas suave awe
Paso mi tabata dispuesto na kompartí?
Esun malu i esun kansá a wòrdu yudá riba nan kaminda?
Sigur esaki ta kosnan chikitu, pero sigur nan ta bon ehèmpelnan di loke Alma a siña su yu hòmber Heleman: “I Señor ta traha di maneranan pa logra su gran i eterno propósitonan; i dor di maneranan masha chikitu Señor ta logra e salbashon di hopi almanan” (Alma 37:7).
Presidente Steven C. Wheelwright a duna un oudiensia na e Universidat di Brigham Young –Hawaii e deskripshon inspirá aki di Alma su instrukshon: “Alma ta konfirmá na su yu hòmber ku en bèrdat e patronchi ku Señor ta sigui ora ku nos ehersitá fe den Dje i sigui su konseho den kosnan chikitu i simpel, ta ku e ta bendishoná nos ku milagernan chikitu kada dia, i despues di tempu, ku obranan maravioso.”
Presidemte Howard W. Hunter a siña ku “ frekuentemente ta e mandatonan ordinario … ku tin e efektonan di mas positivo den e bida di otro, kompará ku e kosnan ku mundu asina tantu biaha ta mira komo grandesa.”
Un enseñansa no religioso konvinsente di e mesun prinsipio aki ta bini di Dan Coats un Senadó anterior di Indiana, ku a skibi: “E úniko preparashon pa e un desishon profundo ku por kambia un bida, òf hasta un nashon, ta e shen i mil desishonnan ku ta semi kasual, ku ta mustra ken nos ta i ku ta parse insignifikante tumá den privá.”
E desishonnan privá “ku ta parse insignifikante” ta inkluí kon nos ta hasi uso di nos tempu, kiko nos ta mira na televishon i Internet, kiko nos ta lesa, e arte i músika ku kual nos ta rondoná nos mes na trabou i na kas, kiko nos ta buska komo dibertishon, i kon nos ta apliká nos kombenio pa ta honesto i sinsero. Un otro kos ku ta parse chikitu i simpel ta ser sivilisá i alegre den nos interakshonnan personal.
Niun di e kosnan chikitu i simpel deseá aki lo lanta nos pa yega grandesa a nos ser ku nan ta wòrdu poné den práktika konsistentemente i kontinuamente. Presidente Brigham Young a yega di bisa: “Nos bida ta trahá dor di sirkunstanshanan simpel chikí ku ta oumentá te bira un gran kos ora ku nan wòrdu kontá serka otro, i ta komprobá e bida kompletu di un hòmber òf muhé.”
Nos ta rondoná dor di influenshanan di media i deterioro kultural ku ta hiba nos abou den nos balornan si nos no ta kontinuamente resistiendo. Pa move bai dilanti rumbo pa nos meta eterno, nos mester keda move kontinuamente. E ta yuda si nos ta parti ti un team ku ta traha huntu, manera ta wòrdu demostrá dor di bista aki di un team den akshon. Pa ekstendé e ehèmpel ei mas aleu, e koriente ta asina fuerte ku si nos stòp di move, lo nos bai atras rumbo di un destinashon ku nos no lo buska pero ku lo bira inevitabel si nos no trata di move bai dilanti kontinuamente.
Despues di sita un evento ku tabata parse chikí pero tabatin gran konsekuenshanan, Nefí a skibi, “I asina nos ta mira ku por medio di maneranan chikitu Señor ta logra gran kosnan” (1 Nephi 16:29). E Tèstamènt Bieu ta inkluí un ehèmpel memorabel di esaki. Eiden nos ta lesa kon e Israelitanan a wòrdu molestiá dor di kolebranan venenoso. Hopi hende a muri dor di nan mordé (miraNumbers 21:6). Ora ku Moisés a hasi orashon pa haña sosiegu, e la wòrdu inspirá pa traha “un kolebra di bròns, i pega esaki na un palu.” E ora ei, “si un kolebra morde kualke hende, ora e mira e kolebra di bròns, e lo biba” (versíkulo 9).Asina un kos chikitu pa asina un resultado mirakuloso! Pero, manera Nefí a splika ora ku e la siña e ehèmpel aki na esnan ku tabata rebeldiá kontra di Señor, hasta ora ku Señor a prepará un manera símpel di manera ku nan por a wòrdu saná, “dor di e simplesa di e kaminda, òf pasó e tabata fásil, tabatin hopi ku a pèrdè nan bida” (1 Nefi 17:41).
E ehèmpel i e siñansa ei ta rekordá nos ku e komodidat di e kaminda òf e simplesa di e mandato no por nifiká ku e ta insignifikante pa adkerí nos deseonan hustu.
Similarmente, hasta aktonan chikí di desobedensia òf faltanan menor di sigui práktikanan hustu por trese nos asina leu serka di un resultado ku nos a wòrdu advertí pa evitá. E Palabra di Sabiduria ta proveé un ehèmpel di esaki. Kasi sigur e efekto riba nos kurpa di un sigaria òf un bibida alkohóliko òf un dósis di un otro droga no por wòrdu midí. Pero segun tempu ta pasa, e efekto ta poderoso i por ta hasta ireversibel. Kòrda e skermentu di e stupi dor di ekspanshon gradual chikí di e rais di e palu. Un kos ta sigur, e konsekuensha teribel di partisipá di kualke kos ku ta adiktivo, manera droga ku ta ataká nos kurpa òf material pornográfiko ku ta degradá nos pensamentunan, ta henteramente evitabel si nos nunka partisipá pa e di promé biaha---ni sikiera un biaha.
Hopi aña pasá, Elder M. Russell Ballard a deskribí na un oudiensia di konferensha general “ kon kosnan chikitu i simpel por ta negativo i destruktivo pa ku salbashon di un persona.” E la instruí: “Manera fibra suak ku ta forma un klòshi, despues un drachi, anto finalmente un kabuya, e kosnan chikitu aki kombiná huntu ku otro por bira demasiado fuerte pa por wòrdu kibrá. Nos mester ta semper konsiente di e poder ku kosnan chikitu i simpel por tin den kresementu spiritual. Mes un kos, nos mester ta konsiente ku Satanans lo husa kosnan chikitu i simpel pa hiba nos den desesperashon i miseria.”
Presidente Wheelwright a duna un advertensia similar na su oudiensia na BYU-Hawaii: “Ta den faya di hasi e kosnan chikitu simpel ku ta pone ku fe ta tambaliá, milagernan ta stòp, i progreso rumbo pa Señor i Su reino ta kuminsá wòrdu poné na banda, i despues ta kuminsá kai den otro sigun búskeda di e reino di Dios ta wòrdu remplasá dor di okupashonnan temporal i ambishonnan di mundu.”
Pa protehé kontra di e efektonan akumulativo negativo ku ta destruktivo pa nos progreso spiritual, nos tin ku sigui e patronchi spiritual di kosnan chikitu i simpel. Elder David A. Bednar a deskribí na un Konferensha di hende muhé na BYU: “Nos por siña hopi kos tokante e karakter i importansia di e patronchi spiritual aki for di e téknikanan di … awa ku ta kai poko poko riba tera na un paso hopi abou,” kontraste ku inundashon òf spùitmentu di gran kantidat di awa kaminda portá e no ta nesesario.
E ta splika: “E gotanan kontinuo di awa ku ta senk hundu den e tera ta proveé un nivel haltu di humedat den e tera kaminda matanan por floresé. Na mesun manera, si abo i ami ta enfoká i kontinuo den obtené kontinuamente gotanan di nutrishon spiritual, e ora ei e raisnan di evangelio por senk hundu den nos alma, por bira firmemente establesé i profundo, i por produsí fruta ekstraordinario i dushi.
Kontinuando, e la bisa, “E patronchi spiritual di kosnan chikitu i simpel ku ta trese afó kosnan grandi ta produsí firmesa inmovibel, deboshon profundo, i kombershon mas kompletu na Señor JesuCristu i Su evangelio.”
E Profeta José Smith a siña e prinsipio aki den palabranan ku awor aki a wòrdu inkluí den Doktrina i Kombenio: “No laga niun hende konta nan komo kosnan chikitu; paso tin hopi kos … ku ta pertenesé na e santunan, ku ta dependé di e kosnan aki” (DyC 123:15).
Den konekshon ku e intentonan anterior pa establesé e Iglesia na Missouri, Señor a konsehá pasenshi paso “tur kos tin di pasa den nan tempu” (DyC 64:32). Despues e la duna e gran siñansa aki: “Asina ta, no keda kansá den hasi kos bon, paso bo ta trahando e fundashon di un gran obra. I for di kosnan chikitu ta logra esun ku ta grandi” (DyC 64:33).
Mi ta kere ku nos tur ta deseá di sigui Presidente Russell M. Nelson su reto pa sigui bai dilanti “ riba e kaminda di kombenio” Nos kompromiso pa hasi esaki ta wòrdu fortifiká dor di konsekuentemente sigui e “kosnan chikitu” ku nos ta wòrdu siñá dor di e evangelio di JesuCristu i e lidernan di Su Iglesia. Mi ta duna testimonio di Dje i mi ta invoká Su bendishonnan riba tur ku ta buska Su kaminda di kombenio, den e nòmber di JesuCristu, amèn.