Mira! Un Ehersito Real
Kon un goso e lo ta pa tur poseedor di Saserdosio di Melkisedek por tin e bendishon di instruí, siña, i sirbi unu banda di otro.
Mi rumannan stimá di saserdosio, ta ku gran humildat mi ta para dilanti di boso den e okashon históriko aki, bou di asignashon di nos profeta kerí i Presidente, Russell M. Nelson. Kuantu mi ta stima i sostené e hòmber di Dios maravioso aki i nos Promé Presidensha nobo. Mi ta uni mi testimonio ku esun di Elder D. Todd Christofferson i mi otro Rumannan di e Quorum di e Diesdos Apòstelnan ku e kambionan anunsiá e anochi aki ta e boluntat di Señor.
Komo a wòrdu stipulá dor di Presidente Nelson, esaki ta un asuntu ku a wòrdu diskutí i konsiderá bou di orashon dor di e Rumannan di Iglesia mayor pa largu tempu. E deseo tabata pa buska e boluntat di Señor i fortalesé e quorumnan di e Saserdosio di Melkisedek. Inspirashon a wòrdu risibí, i e anochi aki nos profeta a laga sa e boluntat di Señor. “Sigur Señor Dios no ta hasi nada, si e no revelá su sekretonan na su sirbientenan e profetanan”!1 Kon bendishoná nos ta di tin un profeta bibiente awendia!
Durante di nos bida, ruman muhé Rasband i ami a biaha den mundu na vários asignashonnan tantu di Iglesia komo profeshonal. Mi a mira kasi tur sorto di tipo di komposishon di Unidat den Iglesia: un rama chikitu na Rusia kaminda e number di Saserdosio di Melkisedek por wòrdu kontá riba dedenan di un man, un bario nobo i kresiente na Afrika kaminda ámbos sumo saserdotenan i eldernan ta reuní manera un totalidat paso e kantidat di poseedor di Saserdosio di Melkisedek tabata abou, i barionan establesé kaminda e kantidat di elders nan ta rekerí pa dividí nan quorum den dos quorum!
Tur kaminda kaminda nos a bai, nos a mira e man di Dios bayendo dilanti di Su sirbientenan, preparando e personanan i e kaminda dilanti asina ku tur Su yunan lo por wòrdu bendishoná segun nan tur su nesesidat. E no a primintí ku E “lo bai dilanti [nos]” i “lo ta na [nos] man drechi i na [nos] man robes” i ku Su “Spiritu lo ta den boso kurason, i [Su] angelnan rònt di [nos]”?2
Pensando riba boso tur, mi ta wòrdu rekordá riba e himno “Mira! Un Ehérsito Real.”
Mira! Un ehérsito real,
Ku bandera, spada i eskudo,
Marchando pa konkistá
Riba bida su gran kampo di bataya
Su puestonan yená ku sòldatnan,
Uní, oudas, i fuerte
Ku ta sigui nan Komandante
I kanta nan himno yen di goso.3
Elder Christofferson a kontesta diferente preguntanan ku siertamento lo lanta dor di e anunsio ku gruponan di sumo saserdotenan i quorumnan di eldernan, na nivel di bario, lo wòrdu kombiná den un ehérsito poderoso, unifiká di e rumannan hòmber di Saserdosio di Melkisedek.
E adaptashonnan aki lo yuda e quorumnan di eldernan i Sosiedat di Sokoro pa harmonisá na obra. Nan tambe lo simplifiká e quorum su kordinashon ku e obispado i e konseho di bario. I nan ta laga e obispu pa delegá mas responsabilidat na e quorum di eldernan i presidentenan di Sosiedat di Sokoro asina ku e obispu i su konseheronan por enfoká nan obligashonnan primario—partikularmente presidí riba e muheres jovenes, i e hombres jovenes ku ta karga e Saserdosio Aaroniko.
Kambionan den organisashonnan i funshonnan di Iglesia no ta ekstraordinario. Na 1883 Señor a bisa e Presidente John Taylor: ‘[Konserní] e management i organisashon di mi Iglesia i Saserdosio ... Lo mi revelá na abo, de bes en kuando, sigun e kanalnan ku mi a determiná, tur kos ku lo ta nesesario pa e futuro desaroyo i perfekshon di mi Iglesia, pa e adaptashon i mehoransa di mi reino.”4
Awor, algun palabranan na boso rumannan ku ta sumo saserdotenan—sa ku nos stima boso! Nos Tata na Shelu stima boso! Boso ta un gran parti di e ehérsito real di e saserdosio, i nos no por move e obra aki dilanti sin boso bondat, servisio, eksperensha, i rektitut. Alma a siña ku hende ta wòrdu yamá pa ta sumo saserdotenan por kousa di nan fe partikular i bon obra pa instruí i sirbi otro.5 E eksperensha ei ta nesesario awor aki kisas mas ku nunka.
Den hopi barionan, nos tin sumo saserdotenan ku awor aki lo bai tin e oportunidat di lo wòrdu presidí dor di un elder komo nan presidente di quorum. Nos tin un presedente di eldernan presidiendo riba sumo saserdotenan: na e momentu aki eldernan ta sirbiendo komo presidente di rama den algun regrionnan den mundu kaminda sumo saserdotenan ta residensia den e rama, i tin ramanan kaminda solamente un quorum di eldernan ta organisá i sumo saserdotenan te presente.
Kon un gran goso e lo ta pa tur poseedornan di Saserdosio di Melkisedek pa tin e bendishonnan di instrukshon, siñansa, i sirbishi pa por sirbi huntu ku tur e miembronan di nan bario. No ta importá unda bo ta kiko bo sirkunstanshanan por ta, nos ta invitá bo pa aseptá oportunidatnan nobo bou di orashon, ku fe i goso, pa guia òf wòrdu guiá pa sirbi unifiká komo un totalidat di rumannan hòmber den saserdosio.
Awor aki lo mi dirigí palabra na asuntunan adishonal ku lo por tin mester di klarifikashon sigun nos ta move bai dilanti pa implementá e boluntat di Señor tokante e organisashon di Su quorumnan di e santu saserdosio.
Kiko ta e adaptashonnan pa un quorum di sumo saserdotenan di staka? Quorumnan di sumo saserdotenan di staka lo kontinuá di funshoná. Presidensianan di staka lo kontinuá di sirbi komo e presidensha di e quorum di sumo saserdotenan. No obstante, komo a wòrdu notá dor di Elder Christofferson, miembronan di e quorum di sumo saserdotenan di staka lo konsistí awor di e sumo saserdotenan ku ta sirbiendo awor akiden e presidensha di staka, komo miembronan di un obispado di bario, komo miembronan di e sumo konseho di staka, i e patriarka den funshon na e momentu aki. Sekretarionan di bario i di staka i sekretarionan ehekutivo no ta miembronan di e quorum di sumo saserdotenan di staka. Ora ku un hende ku ta aktivamente sirbiendo komo sumo saserdote, patriarka, Setenta, òf Apòstel ta na bishita den un bario i ta deseá di partisipá den un reunion di saserdosio, e lo enkontrá ku e quorum di eldernan.
Sigun e rumannan hòmber den e yamamentunan aki wòrdu relevá na dado momentu, nan lo regresá na nan unidatnan na kas komo miembronan di e quorum di eldernan.
Kiko ta e ròl di e quorum di sumo saserdotenan di staka? E presidensha di staka ta reuní ku miembronan di e quorum di sumo saserdotenan pa konsehá huntu, pa testifiká, i pa proveé siñansa. Reúnionan di staka manera spliká den nos manualnan lo sigui ku dos adaptashon:
Unu, barionan i stakanan lo no tene mas reunionnan di komité ehekutivo di saserdosio. Si un asuntu di bario speshal surgi, manera un asuntu delikado di famia òf un reto di bienestar ekstraordinario, e lo por wòrdu deliberá den un reunion di obispado ekstendé. Otro kasonan menos sensitivo por wòrdu deliberá den konseho di bario. Loke tabata konosí komo e reunion di komité ehekutivo di saserdosio di staka awor lo wòrdu yamá e “reunion di sumo konseho.”
Di dos, e reunion anual di tur e sumo saserdotenan den e staka no lo wòrdu tené mas. No obstante, e presidensha di staka lo kontinuá di tene un reunion anual di e quorum di sumo saserdotenan di staka manera a wòrdu anunsiá awe.
Un bario por tin mas ku un quorum di eldernan? E kontesta ta si. Den e spiritu di Doktrina i Kombenionan sekshon 107, versíkulo 89, ora ku un bario tin un kantidat ekstraordinario di poseedornan di e Sasedosio di Melkisedek aktivo, lidernan por organisá mas ku un quorum di eldernan. Den kasonan asina ei, kada quorum lo mester tin un balansa rasonabel den kosnan manera edat, eksperensha, i ofisio i forsa di saserdosio.
Mi ta tèstifika ku segun nos ta move pa dilanti ku e rekonstrukshon inspirá di quorum den nos barionan i stakanan ku nos lo mira un multitut di bendishonnan. Laga mi sita algun ehèmpelnan.
Bou di e direkshon di e obispu, mas medionan di saserdosio por asistí ku e obra di salbashon. Esaki lo inkluí e rekohementu di Israel dor di obra di tèmpel i historia familiar, trahando ku famianan i individuonan den nesesidat, i yudando e misioneronan pa trese almanan na JesuChristu.
Segun lidernan ku ta presidí anterior ta regresá ta kompartí nan eksperenshanan ku e quorum di eldernan, un miembresia mas fuerte di quorum lo ta e resultado.
Lo tin un diversidat mas grandi di donnan i kapasidatnan dentro di e quorum.
Lo tin mas fleksibilidat i disposishon pa satisfasé e nesesidatnan aktual i urgente dentro di e bario i quorum i den kumpli ku nos vários asignashonnan pa sirbi.
Lo tin un oumentu den guia i union sigun un elder nobo i un sumo saserdote ku eksperensha ta kompartí eksperenshanan, unu banda di otro, den reunionnan di quorum i asignashonnan.
Obispunan i presidentenan di rama lo ban laga nos spera wòrdu liberá pa ekspandé nan yamamentunan pa warda nan rebaño i siribi esnan ku ta den nesesidat.
Nos ta komprondé ku kada bario i staka ta diferente. Miéntras ku nos ta komprondé e diferensianan aki, nos ta spera ku boso lo sigui ku e kambionan aki mesora despues di e konferensha general aki. Nos a risibí direkshon por medio di un profeta di Dios! Kon un bendishon i responsabilidat tremendo. Laga nos kumpli ku ne ku rektitut i diligensia!
Mi ta rekòrdá bo ku outoridat di saserdosio ta bini na manera di apartashon i ordenashon, pero poder di saserdosio real, e poder pa aktua den e nòmber di Señor JesuChristu, por bini solamente por medio di hiba un bida hustu.
Señor a deklará na José Smith, e profeta di Restourashon:
“Mira, i wak, lo mi kuida bo rebaño, i lo mi lanta eldernan i mandanan serka nan.
“Mira, lo mi hasi mi obra lihé den su tempu.”6
En bèrdat, esaki ta un tempu kaminda Señor ta hasiendo Su obra mas lihé.
Laga kada unu di nos huza e oportunidat aki pa reflehá i mehorá nos bida pa punta mas mihóo ku Su boluntat di manera ku nos por meresé e hopi bendishonnan ku E la primintí na esnan hustu i fiel.
Rumannan hòmber, danki na boso tur pa tur e kosnan ku boso ta hasiendo pa ta parti di e obra maravioso aki. Ku nos lo sigui bai dilanti den e kousa grandi i honrá aki.
É, ora e bataya a kaba,
Ora ku lucha i disputa kaba
Ora ku tur ta safe serka otro
Dentro di e valei di pas,
Dilanti di e Rei eterno,
E kantidat grandi i poderoso
Lo alabá su nòmber pa semper,
I esaki lo ta nan himno:
Viktoria, viktoria,
Dor di dje ku a redimí nos!
Viktoria, viktoria,
Dor di JesuChristu , nos Señor!
Viktoria, viktoria, viktoria,
Dor di JesuChristu, nos Señor!7
Awe nos tur ta pará komo testigu di Señor ku ta revelando Su boluntat por medio di Su profeta, Presidente Russell M. Nelson. Mi ta tèstifika ku e ta Dios su profeta riba tera. Mi ta duna mi testimonio di Señor JesuChristu, ku ta nos gran Redentor i Salbador. Esaki ta Su obra; esaki ta Su boluntat, di kual mi ta duna testimonio solèm den e nòmber di JesuChristu, amèn.