2010–2019
E Buki di Mormon: Kiko Bo Bida Lo Tabata Sin Dje?
Òktober 2017
2:3

E Buki di Mormon: Kiko Bo Bida Lo Tabata Sin Dje?

Pa Presidente Russell M. Nelson

Presidente di e Quorum di e Diesdos Apòstelnan

Di un manera mas maravioso i singular,e Buki di Mormon ta siña nos di JesuCristu i Su Evangelio.

Den 1986 mi a wòrdu invitá pa duna un presentashon na un universidat na Acora, Ghana. Einan mi a topa un kantidat di dignatario, inkluyendo un rei di un tribu Afrikano. Ora nos a papia promé ku e presentashon, e rei a papia ku mi pa medio di e lingwista, kende despues tabata tradusí pa mi, mi ta kontestá e lingwista, i e na su turno tabata tradusí mi kontestanan na e rei.

Despues di mi presentashon, e rei a kana bin dirèkt serka mi, pero e biaha aki sin e lingwista, Pa mi sorpresa e por a papia Ingles perfekto---defakto. E Ingles di Inglatera, mi ke añadí!

E rei tabata un poko konfundí. “ Ta ken abo ta?”el a puntra.

Ma kontest’é, “Ami ta un apòstel ordená di JesuCristu.”

E rei a puntra, “Kiko bo por siña mi di JesuCristu?”

Ma kontest’é ku un pregunta, “Mi por puntra kiko ya bo sa di Dje?”

E rei su kontesta a revelá ku e tabata un studiante serio di e Beibel i unu ku tabata stima Señor.

E ora ei mi a puntra si e tabata sa di e ministerio di JesuCristu na e pueblo di antiguo Amérika.

Manera mi a spera, e no tabata sa.

Mi a splika ku despues ku e Salbador Su Krusifikashon i Resurekshon, el a bin serka e pueblo di Antiguo Amérika, unda El a siña nan e Evangelio. El a Organisá Su Iglesia i a puntra Su disípulonan pa warda un registro di Su ministerio meimei di nan.

“E registro,” ma kontinuá, “ta loke nos konosé komo e Buki di Mormon. Ta un otro Tèstamènt di JesuCristu. E ta un buki ku ta kompañá e Santu Beibel.”

Na e punto aki, e rei a bira hopi interesá. Mi a bira pa e presidente di mishon ku tabata kompañá mi i puntra ku e tabatin un kopia èkstra di e Buki di Mormon huntu ku n’e. El a saka unu di su tas.

Mi a habrié na 3 Nefi kapítulo 11 i huntu e rei i ami a lesa e sermon di e Salbador na e Nefitanan. Despues mi a presentá un kopia di e Buki di Mormon na dje. Su kontestá a penetrá den mi mente i kurason pa semper: “Bo por a duna mi djamanta i rubi, pero nada ta mas presioso pa mi ku e konosementu adishonal aki tokante e Señor JesuCristu.

Despues di a eksperensiá e poder di e salbador Su palabranan den 3 Nefi, e rei a proklamá, “Si mi konbertí i uni mi mes na e Iglesia, lo mi trese hinter mi tribu ku mi.”

“O, rei,” ma kontestá, “e no ta funshoná asina. Konvenshon ta un asuntu individual. E Salbador a ministrá e Nefitanan un pa un. Kada individual ta risibí un testimonio di e evangelio di JesuCristu.”

JesuCristu ministrando e Nefitanan.

i rumannan, kon presioso e Buki di Mormon ta pa bo? Si nan ofresé djamanta i rubi òf e Buki di Mormon, kua lo bo skohe? Honestamente. Kua ta di mas balor pa bo?

(Bo ta) Kòrda den e seshon di Djadumingu mainta den e konferensia general di aprel 2017, Presidente Thomas S. Monson a supliká ku “kada un di nos pa den orashon studia i skrudiñá e Buki di Mormon tur dia.” Hopi a rospondé na e ruego di e profeta.

Laga mi bisa ku ni ami ni Riley di ocho aña tabata sa ku un hende tabata sakando nos potrèt. Nota kon Riley ta lesando e Buki di Mormon ku ayudo di un markadó ku “Soy un hijo de Dios” riba dje skirbí

Presidente Nelson i Riley studiando e skritura

Algu poderoso a pasa ora un yu di Dios ta buska pa konosé mas di Dje i di Su Yu Stimá. Niun kaminda e bèrdatnan ei ta wòrdu siñá mas kla i poderoso ku den e Buki di Mormon.

For di [tempu ku] Presidente Monson si desafio do seis luna pasá, mi a trata di sigui su konseho. Entre otro kos, mi a traha un lista di kiko e Buki i Mormon ta kiko e ta afirmá, kiko e ta refutá, kiko e ya kumpli [ku n’e], kiko e ta klarifiká, i kiko e ta revelá. Mirando e Buki di Mormon dor di e brel aki tabata un ehersisio perspikas i inspiradó! Mi ta rekomend’é na kada un di boso.

Durante e seis lunanan aki, tambe mi a invitá vários grupo – inkluyendo mi rumannan den e Quorum di e Diesdos Apòstelnan, misioneronan di Chile, i presidentenan di mishon i nan kasá, reuní na Argentina—pa konsiderá tres pregunta relashoná, ku mi ta urgi boso pa pensa riba dje awe:

Promé, Kiko bo bida lo ta sin e Buki di Mormon? Di dos. Kiko lo bo no sa? I tres, kiko lo bo no tin

Kontestanan entusiasmá di e gruponan aki a bin stret di nan kurason. Aki ta djis un par di e komentarionan:

“Sin e Buki di Mormon, lo mi ta konfundí tokante e enseñansanan i opinionnan ku ta kontradisí [otro] riba asina tantu kos. Lo mi lo ta meskos ku mi tabata promé ku mi a enkontrá e Iglesia, tempu mi tabata buskando konosementu, fe, i speransa.”

Un otro a bisa: “Lo mi no sa tokante e ròl ku e Spiritu Santu por hunga den mi bida.”

Un otro: “Lo mi no a komprondé di un manera kla mi propósito aki na mundu!”

Un otro ku a kontestá a bisa: “Lo mi no tabata sa ku tin progreso kontinuo despues di e bida aki. Dor di e Buki di Mormon , mi sa ku di bèrdat tin [bida] despues di morto. Esei ta e meta prinsipal pa kual nos ta trahando.”

E delaster komentario aki a laga mi reflekshoná riba mi bida dékadanan pasá komo un residente kirúrgiko hóben. Un di e responsabilidatnan di mas serio ku un siruhano tin, tin biaha , ta pa informá e famianan kaminda un [persona] stimá a fayesé. Den un hòspital kaminda mi tabata traha, un kamber spesial a wòrdu trahá ku muraya furá , kaminda miembronan di famia por risibí e tipo di notisia ei. Einan, algun persona tabata manifestá nan tristesa dor di bati nan kabes kontra di e muraya furá ei. Kuantu mi tabata deseá pa siña e personanan ei ku morto, maske difísil pa esnan ku a keda atras, ta un parti nesesario di nos eksistensia inmortal. Morto ta permití nos pa progresá den e siguiente mundu.

Un otro ku a kontestá mi pregunta a bisa: “Mi no tabatin un bida te ira mi a lesa e Buki di Mormon. Maske mi a resa i bai mi iglesia hinter mi bida, e Buki di Mormon a yuda mi pa realmente komuniká ku Tata Selestial pa promé biaha.”

Un otro a bisa: “sin e Buki di Mormon, mi lo no a komprondé ku e Salbador no solamente a sufri pa mi pikánan, pero ku E por sana mi dolónan i tristesanan.”

I ainda un otro: “Lo mi no tabata sa ku nos tin profetanan pa dirigí nos.”

Profundisando nos mes den e bèrdatnan di e Buki di Mormon por ta un eksperensia ku ta kambia nos bida. Un di nos ñetunan misionera, Hermana Olivia Nelson, a primintí un investigador ku si e lesa e Buki di Mormon tur dia, e resultadonan di su eksámennan na universidat lo mehorá. El a hasi esaki i e resultadonan a drecha.

Hermana Olivia Nelson

Mi rumannan, mi ta testifiká ku e Buki di Mormon di bèrdat ta e palabra di Dios. E ta kontené e kontesta riba e preguntanan di mas importante di bida. E ta siña e doktrina di Cristu. E ta ekspandé i klarifiká hopi di e bèrdatnan “simpel i presioso” ku a pèrdè den e sentenáres di tempu i numeroso tradukshonnan di e Beibel.

E Buki di Mormon ta proveé e komprondementu di e Ekspiashon di JesuCristu mas kompletu i outoritario ku bo por haña niun kaminda. E ta siña kiko realmente ker men pa ta nanse di nobo. For di e Buki di Mormon nos ta siña tokante e rekohementu di Israel plamá. Nos sa dikon nos ta na mundu. Esakinan i otro bèrdatnan ta mas poderoso i siña di un manera persuasivo den e Buki di Mormon ku den kualke otro buki. E poder kompletu di e evangelio di JesuCristu ta kontené den e Buki di Mormon. Punto.

E Buki di Mormon tantu ta iluminá e enseñansa di e Maestro komo eksponé e táktikanan di e atversario. E Buki di Mormon ta siña doktrina berdadero pa laga doktrina falsu desaparesé—manera e práktika eróneo di boutisá mucha chikitu. E Buki di Mormon ta duna propósito na bida dor di urgi nos pa reflekshoná [riba] e potensial di bida eterno i “felisidat ku nunka ta kaba.” E Buki di Mormon ta destruí kreensianan falsu ku boutismo por wòrdu hañá den maldat i ku bondat individual ta tur loke ta nesesario pa regresá den e presensia di Dios. E ta abolí pa semper e konsepto falsu ku revelashon a para ku e beibel i ku shelunan ta seyá awendia.

Ora mi pensa riba e Buki di Mormon, mi ta pensa di e palabra poder. E bèrdatnan di e Buki di Mormon tin e poder pa sana, konsolá, restourá, yuda, fortalesé, konsolá i animá nos almanan.

Mi rumannan stimá, mi ta primintí ku segun bo studia e Buki di Mormon den orashon, tur dia, lo bo tuma mihó desishonnan—tur dia. Mi ta primintí ku segun bo reflekshoná riba loke bo ta studia, e bentananan di shelu lo habri, i ku lo bo risibí kontestanan riba bo propio preguntanan i direkshon pa b bida. Mi ta primintí ku si diariamente bo profundisá en e Buki di Mormon, Bo por bira inmune kontra e maldatnan di dia, inkluyendo asta e [kontra] e plaga di pornografia ku ta abrumador, i otro adikshon ku ta kita nos for di kosnan spiritual.

Kada biaha ku mi tende kualke hende, inkluyendo mi mes, bisa, “Mi sa ku e Buki di Mormon ta bèrdat,” mi ke sklama, “esaki ta bunita, pero e no ta sufisiente!” Nos mester sintié, “te den mas profundo” di nos kurason, ku e Buki di Mormon ta inekivokabelmente e palabra di Dios. Nos mester sinti esaki asina profundo ku nunka nos lo ke pasa ni un dia sin dje. Mi lo por sita Presidente Brigham Young bisando, “mi ta deseá pa mi por tin e bos di shete bos (trueno) pa lanta e hendenan” pa e bèrdat i poder [e] poder di e Buki di Mormon.

Nos mester ta manera e hóben misionero aki sirbiendo na Oropa, kende a sinti asina profundo di e bèrdat di e Buki di Mormon ku literalmente a kore ku un kopia di e registro sagrado bai serka e hòmber den un parke ku e i su kompañero a kaba di enkontrá.

Misionero koriendo

Mi ta testifiká ku Jose Smith tabata i ta e profeta do e delaster dispensashon aki. Tabata e, ku, pa medio di e don i poder di Dios, a tradusí e buki sagrado aki. Esaki ta e buki ku lo yuda pa prepará e mundu pa e Segunda Binida di e Señor.

Mi ta testifiká ku JesuCristu ta e Yu literal i bibu di nos Dios bibu. E ta nos Salbador, nos redentor, nos gran Ehèmpel, i nos Abogado ku e Tata. E tabata e Mesias prometé, e Mesias mortal, i [E] lo ta e Mesias di milenio. Mi ta testifiká ku henter mi alma ku di un forma mas milagroso i singular, e Buki di Mormon ta siña nos di JesuCristu i Su evangelio.

Mi sa ku Presidente Thomas S. Monson ta e profeta di Dios na mundu awe. Mi stim’é i ta sosten’é ku hinter mi kurason. Asina mi ta testifiká den e sagrado nòmber di JesuCristu, amèn.

Presidente Nelson su lista di Buki di Mormon

E Buki di Mormon ta:

  • Un otro testimonio di JesuCristu. S skritornan prinsipal—Nefi, Jakob, Moroni—i su traduktor, Jose Smith, tabata turtestigu okular di e Señor.

  • Un registro di Su ministerio na e hendenan ku tabata biba na antiguo Amérika.

  • Bèrdat,manera testifiká dor di Señor Mes.

E Buki di Mormon ta afirmá:

  • E identidat individual di Tata Selestial i Su Yu Stimá, JesuCristu.

  • E nesesidat di e Kaida di Adam i e sabiduria di Eva, ku hende por tin goso.

E Buki di Mormon ta refutá noshon ku:

  • Revelashon a kaba ku e Beibel.

  • Mucha chikí mester boutisá

  • Por haña felisidat den malisia

  • Bondat individual ta adekuá pa eksaltashon (mester di ordenansa i kombenio).

  • E Kaida di Adam a’marka’ género humano ku e piká original

E Buki di Mormonta kumpli ku profesianan Bíbliko ku:

  • “Otro karné” lo tende Su bos.

  • Dios lo hasi un obra maravioso i un prodigio,” papiando, “for di tera”

  • E ”palu di Juda” i e palu di José” lo bira un u.

  • Israel esparsí lo wòrdu reuní “den e delaster dianan” i kon esei o tuma lugá.

  • E tera di herensia pa e linahe di Jose ta e Hemisfera Oksidente.

E Buki di Mormon ta klarifiká konosementu di:

  • Nos eksistensia premortal.

  • Morto. Ta un komponente nesesario den Dios Su gran plan di felisidat.

  • Eksistensia despues di morto,ku ta kuminsá den paraiso.

  • Kon e resurekshon di e kurpa, reuní ku e spiritu, ta bira un alma inmortal.

  • Kon nos huisio dor di Señor lo ta di akuerdo ku nos aktonan i e deseonan di nos kurason

  • Kon ordenansanan mester wòrdu hasí:por ehèmpel, boutismo, santa sena, konferí e Spiritu Santu.

  • E Ekspiashon di JesuCristu

  • E Resurekshon.

  • E ròl importante di angel.

  • E naturalesa eterno di e Saserdosio.

  • Kon komportashon di hende ta wòrdu influensiá mas pa e poder di e palabra ku e poder di e spada.

E Buki di Mormonta revelá informashon ku promé [nos] no tabata sa:

  • Boutismo tabata wòrdu realisá promé ku JesuCristu a nanse.

  • Tèmpelnan a wòrdu konstruí i usá pa hendenan di Antiguo Amérika..

  • Jose, e di 11 yu di Israel, a premirá e ròl profétiko di Jose Smith.

  • Nefi (den 600–592 promé ku Cristu) a premirá e deskubrimentu i kolonisashon di Amérika.

  • Partinan kla i presioso di e Beibel a wòrdu pèrdí

  • E lus di Cristu ta wòrdu duná na tur hende.

  • E importansia di albedrio individual i e nesesidat pa oposishon den tur kos.

  • Atvertensia kontra “kombinashonnan sekreto”