![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F5c%2Fc2%2F5cc2746d615b48c726cfb376633550e9fa7eccb5%2F5cc2746d615b48c726cfb376633550e9fa7eccb5.jpeg/full/!250,/0/default)
Stima Otro manera El a Stima Nos
Pa medio di sirbi i pordoná otronan ku amor berdadero, nos por wòrdu kurá i fortalesé pa vense nos mes desafionan.
Durante di e Último Sena, e Salbador a duna un mandamentu nobo na Su disípulonan, bisando:
“Mi ta duna boso un mandamentu nobo. Pa boso stima otro; manera ami a stima boso, asina boso tambe mester stima otro.
“Pa medio di esaki, tur hende lo sa ku boso ta mi disípulonan, si boso stima otro.”1
E disípulonan di e Salbador a haña un mandamentu nobo pa hasi algu mas, algu mas grandi i mas dibino. E mandamentu i invitashon nobo aki ta resumí den e frase klave “manera ami a stima boso.”
Amor Ta Akshon;Amor Ta Sirbishi
“Amor ta un sentimentu di deboshon profundo, prekupashon, i afekshon. E ehèmpel di mas grandi di Dios su amor pa Su yunan ta hañá den e Ekspiashon infinito di JesuCristu.”2 “Pasobra Dios a stima e mundu asina tantu,” Juan a registrá “ku El a duna su úniko Yu, pa tur esnan ku kere den Dje no bai pèrdí, pero haña bida eterno.”3 “Amor pa Dios i próhimo ta un karakterístika di disípulonan di JesuCristu.”4
Algun aña pasá, tempu nos ñetu mas grandi, Jose, tabatin kuater aña, e tabata hunga ku mi kasá. Miéntras nan tabata hari i pasa un bon tempu huntu, nos ñetu a puntr’é, “Wela, bo ta stima mi?”
El a respondé, “Si, Jose, Mi ta stima bo.”
Despues el a hasi un otro pregunta: “Kon bo sa ku bo ta stima mi?”
El a splik’é su sentimentunan i a bisé tambe tur kos ku el a hasi i tabata dispuesto pa hasi p’e.
Despues mi kasá a puntra Jose e mes un preguntanan, inkluso e investigashon penetrante aki: “Kon bo sa ku bo ta stima mi?”
Ku un kontesta inosente pero sinsero, el a bisa, “Mi ta stima bo pasobra mi ta sinti esei den mi kurason.” Jose su komportashon amoroso pa su wela e dia aki i semper a demostrá ku amor ta un kombinashon di akshonnan i di sentimentunan profundo.
Rei Benjamin a siña, “I ata awor, mi ta bisa boso e kosnan aki pa boso por siña sabiduria; pa boso por siña ku ora boso ta den sirbishi di bo próhimo bo ta únikamente den sirbishi di bo Dios.”5
Den mundu di awendia di tantu sufrimentu pa motibu di diferente sirkunstansia, manda un mensahe di teksto ku un emoji grasioso òf pone un potrèt bunita ku e palabranan “mi ta stima bo” ta bon i di balor. Pero loke hopi di nos mester hasi ta pa laga nos aparatonan mobil atras i, ku nos mannan i pianan, yuda otronan den gran nesesidat. Amor sin sirbishi ta meskos ku fe sin obra; e ta enbèrdat morto.
Amor ta Pordonamentu
E amor puru di Cristu, ku ta karidat,6 ta inspirá nos no solamente pa aktua i duna sirbishi pero tambe pa tin forsa pa pordoná, independiente dje situashon. Pèrmití mi kompartí ku boso un eksperensia ku a hasi impakto i a kambia mi bida. Ted i Sharon, mayornan di Cooper, ku ta aki awe, a duna mi pèrmit pa kompartí loke a pasa ku nan famia mas ku nuebe aña pasá. Lo mi relatá e eksperensia for di e perspektiva di Ted, Cooper su tata:
21di ougùstùs 2008, tabata e promé dia di skol, i Cooper su tres rumannan hòmber mas grandi, Ivan, Garrett, i Logan, tabata na e parada di bus wardando pa subi bus. Cooper, ku tabatin kuater aña, tabata riba su baiskel; mi kasá, Sharon , a kaba di kana.
Mi kasá tabata otro banda di kaya i a hasi seña ku Cooper pa krusa. Na mes momentu, un outo a bira masha poko poko pa man robes i a kore riba Cooper.
Mi a risibí un yamada di telefon di e bisiña bisando mi ku Cooper a wòrdu heridá pa un outo. Mi a kore masha lihé bai abou na e parada di bus pa wak e. Cooper tabata drumi riba e yerba, ku problema pa hala rosea, pero e no tabatin herida visibel.
Mi a hinka rudia serka Cooper i a bisé palabranan di animo manera “Tur kos lo ta oké. Keda trankil.” Na e momentu ei e lider di mi grupo di sumo saserdote, Nahtan a aparesé ku su kasá, ku a sugerí pa nos duna Cooper un bendishon di saserdosio. Nos a pone nos mannan riba Cooper su kabes. Mi no por kòrda mas kiko mi a bisa den e bendishon, pero mi ta kòrda kla e presensia di otronan rondó di nos, i tabata na e momentu ei ku mi a sa ku Cooper lo fayesé.
Cooper a bula ku helikòpter pa hospital pero enbèrdat a fayesé. Mi a sinti ku Tata Selestial tabata bisando mi ku mi responsabilidat terenal pa Cooper a kaba i ku awor Cooper tabata den Su kuido.
Nos por a pasa algun tempu ku Cooper na hòspital. E trahadónan tabata preparando e pa nos por a tené i tuma despedida i pèrmití nos pa pasa mes tantu tempu huntu ku n’e ku nos a deseá.
Na kaminda pa kas, mi kasá ku hopi tristesa i ami a wak otro i a kuminsá papia tokante e mucha hòmber ku tabata kore e outo. Nos no tabata konosé, ounke e tabata biba djis un kaya mas leu i tabata den e límite di nos bario.
E siguiente dia tabata masha difísil pa nos pasobra nos tabata kompletamente aplastá ku tristesa. Mi a kai na rudia i a hasi e orashon di mas sinsero ku mi a yega di ofresé. Mi a puntra Tata Selestial den e nòmber di mi Salbador pa kita e tristesa aplastante. El a hasi asina.
Mas lat den dia un di e konseheronan den presidensia di nos estaka a regla pa nos topa ku e hóben—e shofùr dje outo—i su mayornan na kas di e konsehero. Sharon i ami a warda pa e hóben i su mayornan yega. Ora e porta a habri, nos a topa ku n’e pa promé bia. Mi obispu a susurá den mi orea, “Bai serka dje.” Sharon i ami a bras’é den un brasa grandi. Nos a yora huntu pa loke ta parse un tempu largu. Nos a bisé ku nos tabata sa ku lokual a pasa tabata definishon di un aksidente.
Tabata milagroso na Sharon i ami, tantu e manera ku nos a sinti e tempu ei i ku te ainda nos ta sinti awe. Pa medio di e grasia di Dios, nos por a tuma e kaminda grandi, e kaminda opvio, i a stima e hóben bon aki.
Nos a bira hopi será ku e i su famia durante dje añanan. El a kompartí su momentunan importante ku nos. Nos a hasta bai tèmpel ku n’e ora e tabata prepará pa su mishon.7
Rumannan, Ted sa sin ningun duda ku nos Tata Selestial ta stima nos. E sa ku di ta kapas pa pordoná, i pa aliviá su karga di e manera aki, ta mes plasentero ku wòrdu pordoná. E plaser aki ta bini for di sigui e ehèmpel di nos gran Ehèmpel. Den e Buki di Mormon, Alma a deklará ku e Salbador lo sali, sufriendo doló i aflikshonnan i tentashonnan di tur sorto, i lo E hasi esaki p’asina e palabra por wòrdu kumplí ku ta bisa ku E lo tuma e dolónan i enfermedatnan di Su pueblo.”8
Rumannan, esta un historia maravioso di bèrdadero amor i pordonamentu. Nos, di mes manera, por tin goso i felisidat ora nos sirbi i pordoná otronan. Georgy, un otro di nos ñetunan, ta bisa hopi bia, “Ki sorto di famia nos ta?” I e ta respondé, “Nos ta un famia felis!”
Presidente Thomas S. Monson a konsehá nos, bisando, “Laga nos eksaminá nos bida i determiná pa sigui e Salbador su ehèmpel dor di ta amabel, amoroso, i ta karitativo.”9
Mi sa ku nos Tata Selestial i Su Yu, JesuCristu, ta stima nos i ta dispuesto pa yuda nos pa aktua ora nos ta stima otro meskos ku Nan a stima nos. I mi sa ku dor di sirbishi i pordoná otronan ku amor berdadero, nos por wòrdu kurá i risibí e forsa pa vense nos mes desafionan. I asina mi ta deklará den e nòmber di JesuCristu,amèn.