Gana e Konfiansa di Señor i Bo Famia
Hòmbernan kue tin “integridat di kurason” ta hòmbernan ku por wòrdu konfiá—pasó konfiansa ta trahá riba integridat.
Rumannan, por ta no tin un kòmplimènt mas grandi ku nos por risibí for di Señor ku pa sa ku E ta konfiá nos pa ta digno poseédornan di saserdosio i mihó esposonan i tatanan.
Un kos ta sigur: ganando Señor su konfiansa ta un bendishon ku ta bini dor di gran esfuerso di nos parti. Konfiansa ta un bendishon basá riba obediensia na Dios su leinan. Ganando Señor su konfiansa ta bini komo resultado di ta fiel na e kombenionan ku nos a hasi den e awa di boutismo i den e santu tèmpel. Ora nos ta warda nos promesanan na Señor, Su konfiansa den nos ta krese.
Mi ta stima tur dos e skrituranan antiguo i moderno ku ta usa e frase “integridat di kurason” ora di deskribí un persona hustu su karakter.1 Integridat òf e falta di integridat ta un elementu fundamental di un persona su karakter. Hòmbernan kende tin “integridat di kurason” ta hòmbernan ku por wòrdu konfiá—pasobra konfiansa ta trahá riba integridat.
Sea un hòmber di integridat simplemente kermen bo intenshonnan, i tambe bo akshonnan, ta puro i hustu den tur aspekto di bo bida, tur dos den públiko i den privá. Ku kada desishon nos tuma, nos ta òf meresé mas di Dios Su konfiansa òf disminuí Su konfiansa. E prinsipio por ta mas klaramente manifestá den nos responsabilidatnan debidamente apuntá komo esposonan i tatanan.
Komo esposonan i tatanan, nos a risibí un karga dibino for di profetanan, videntenan, i reveladónan di dia moderno den e dokumentu “E Famia: Un Proklamashon pa e Mundu.” E dokumentu aki ta siñá nos ku (1) tatanan “ta pa presidí riba nan famianan ku amor i rektitut,” (2) tatanan “ta responsabel pa proveé e nesesidatnan di bida,” i (3) tatanan ta responsabel pa protehé nan famianan.2
Pa nos gana Dios Su konfiansa, nos lo mester kumpli e tres responsabilidatnan debidamente apuntá aki na nos famianan den Señor Su manera. Manera e tambe ta deklará den e proklamashon di famia, Señor Su manera ta pa kumpli e responsabilidatnan huntu ku nos esposanan “komo sosionan igual.”3 Pa mi, esaki kier men nos no ta bai dilanti ku un desishon signifikante tokante e tres responsabilidatnan aki sin unidat kompletu ku nos esposanan.
E promé paso den nos búskeda pa gana Señor Su konfiansa ta pone nos konfiansa den djE. E profeta Nefi a tabata ehèmpel di e tipo di kompromiso aki ora el a resa: “O Señor, mi a konfiá den bo, i lo mi konfiá den bo pa semper. Lo mi no pone mi konfiansa den e brasa di karni.”4 Nefi tabata kompletamente komprometí pa hasi Señor Su boluntat. Den adikshon na bisa ku e lo “bai i hasi e kosnan ku Señor a manda,” Nefi tabata firme den su kompromiso pa kumpli su asignashon, manera ta wòrdu ilustrá den e deklarashon aki: “Manera Dios ta bibu, i manera nos ta bibu, nos no ta baha na nos tata den e desierto te ora nos kumpli e kos ku Señor a manda nos.”5
Pasó Nefi a konfia den Dios promé, Dios a pone gran konfiansa den Nefi. Señor a bendishon’é ku gran bashamentu di e Spiritu ku a bendishoná su bida, e bidanan di su famia, i e bidanan di su pueblo. Pasobra Nefi a presidí den amor i rektitut i a proveé pa i protehé su famia i pueblo, e ta nota, “Nos a biba segun e manera di felisidat.”6
Pa mi por representá un muhé su perspektiva riba e asuntu aki, mi a puntra mi dos yunan muhé kasá pa yudami. Mi a puntra si nan lo proveé un òf dos frase tokante kon nan ta mira e importansia di konfiansa manera e ta afektá nan matrimonio i bida familiar. Aki ta e pensamentunan di Lara Harris i Christina Hansen.
Promé, Lara: “Un di e kosnan mas importante pa mi ta pa sa ku miéntras mi esposo ta hasi su dia, e ta hasi eskohonan ku ta munstra rèspèt i amor pa mi. Ora nos por konfiá otro den e manera ei, e ta trese pas na nos hogar, unda nos por disfrutá lanta nos famia huntu.”
Awor Christina su pensamentunan: “Tin konfiansa den un persona ta meskos ku tin fe den un persona. Sin e konfiansa i fe ei, tin miedo i duda. Pa mi, un di e bendishonnan mas grandi ku ta bini for di por kompletamente konfiá mi esposo ta pas—pas di mente sabiendo ku e ta aktualmente hasi loke e ta bisa e lo hasi. Konfiansa ta trese pas, amor, i un ambiente unda e amor ei por krese.”
nan independientemente a konsiderá e bendishon di pas den e hogar pa ta un konsekuensia direkto di tin un esposo ku nan por konfiá. Manera a wòrdu ilustrá pa mi yunan muhé nan ehèmpel, e prinsipio di konfiansa ta hunga un ekstremamente importante ròl den e desaroyamentu di un hogar sentrá den Cristo.
Mi tambe por a disfrutá di e mesun kultura sentrá riba Cristo lantando den un hogar unda mi tata a honrá su saserdosio i a gana e konfiansa di henter e famia debido na “e integridat di su kurason.”7 Lagami kompartí ku boso un eksperensia for di mi hubentut ku ta ilustrá e duradero impakto positivo ku un tata kin ta komprendé i biba e prinsipio di konfiansa trahá riba integridat por tin riba su famia.
Ora mi tabata hopi yòn, mi tata a fundá un kompania ku a spesialisá den outomatisashon di fábrika. E negoshi a manehá, fabriká, i instalá linianan di produkshon outomatisá na henter mundu.
Ora mi tabata den e promé siklo di skol sekundario, mi tata tabata kier pa mi siña kon pa traha. E tambe tabata kier pa mi siña e negoshi for di e fundeshi. Mi promé trabou a inkluí mantené e tereno i pintá áreanan di e fasilidat no visibel na e públiko general.
Ora mi a drenta e di dos siklo di skol sekundario, mi a wòrdu promové pa traha riba e flur di fábrika. Mi a kuminsá pa siña kon pa lesa plannan i manehá mashineria di fabrikashon di stal pisa. Despues di a graduá di havo, mi a atendé universidat i despues a drenta e kampo misional. Despues di bini bèk di mi mishon, mi a bolbe di biaha na e trabou. Mi mester a gana plaka pa e gastunan di e siguiente aña di skol.
Un dia djis despues di mi mishon, mi tabata trahando den e fábrika ora mi tata a yamami den su ofisina i puntra si mi lo ker a bai ku n’e riba un biahe di negoshi na Los Angeles. Esaki tabata e promé biaha ku mi tata a invitá pan kompañ’é riba un biahe di negoshi. El a laga mi en bèrdat sali den públiko pa yuda representá e kompania.
Promé ku nos a sali riba e biahe, el a prepará mi ku un par di detayenan tokante e kliente potensial nobo. Promé, e kliente tabata un koperashon multinashonal. Di dos, nan tabata subi nan linianan di produkshon mundial ku e teknologia di outomatisashon mas nobo. Di tres, nos kompania nunka anteriormente a abastesé nan ku sirbishi òf teknologia di maneho. I finalmente, nan ofisial di koperativa di mas haltu enkargá ku kompra a yama e reunion aki pa repasá nos oferta riba un produkto nobo. E reunion aki tabata representá un oportunidat potensial nobo i importante pa nos kompania.
Despues di a yega na Los Angeles, mi tata i ami a bai e hotèl ehekutivo pa e reunion. E promé asuntu di negoshi tabata pa diskutí i analisá e spesifikashonnan di e diseño di maneho pa e proyekto. E siguiente asuntu di diskushon tabata tokante detayenan operashonal, inkluyendo logístika i fecha di entregá. E asuntu final riba e agènda a enfoká riba ponementu di preis, tèrminonan, i kondishonnan. Akinan kosnan a bira interesante.
E ofisial di e koperativa aki a splika nos ku nos propósito di preis tabata esun mas abou di esnan ku a someté ofertanan riba e proyekto. E ora ei, kuriosamente el a konta nos e preis e di dos oferta mas abou. Despues el a puntra nos si nos tabata dispuesto pa tuma nos proposishon bèk i someté di nobo. El a bisa nos preis nobo mester a bini nèt bou di e siguiente oferta mas haltu. El a sigui di splika ku nos lo parti e plaka nobo agregá 50–50 ku n’e. El a rashonalisá esaki bisando ku tur hende lo gana. Nos kompania lo gana pasobra nos lo hasi konsiderablemente mas plaka ku nos oferta original a proveé. Su kompania lo gana pasobra nan ainda lo hasi negoshi ku esun ku a hasi e oferta mas abou. I, di mes, e lo gana pa tuma su parti pasobra el a pone e gran dil huntu.
Despues el a duna nos un number di un bòks na ofisina postal unda nos por a manda e plaka ku el a pidi. Despues di tur esaki, el a wak mi tata i puntra, “Kermen nos tin un dil?” Pa su sorpresa, mi tata a lanta, sakudí su man, i bis’é nos lo lag’é sa.
Despues di a sali e reunion, nos a drenta nos outo di hür, i mi tata a puntra mi, “Awèl, kiko abo ta pensa ku nos mester hasi?”
Mi a kontestá bisando ku mi no tabata pensa nos mester akseptá e oferta aki.
Mi tata e ora ei a puntra, “Bo no ta pensa nos tin e responsabilidat pa tur nos empleadonan pa mantené un reserva di trabou?”
Miéntras mi tabata pensando riba su pregunta i promé ku mi por a kontesta, el a kontesta su mesun pregunta. El a bisa, “Skucha, Rick, una bes ku bo ta tuma un soborno òf komprometé bo integridat, e ta hopi difísil pa gan’é bèk. Nunka no hasié, ni maske un biaha.”
E hecho ku mi ta kompartí e eksperensia aki kermen ku nunka mi a lubidá kiko mi tata a siña mi riba e promé biahe di negoshi ei ku n’e. Mi ta kompartí e eksperensia aki pa ilustrá e influensia duradero ku nos tin komo tatanan. Bo por imaginá e konfiansa ku mi tabatin den mi tata debido na e integridat di su kurason. El a biba e mesun ehèmpelnan aki den su bida privá ku mi mama, su yunan, i tur ku tabata asosiá ku n’e.
Rumannan, e ta mi orashon e anochi aki ku nos tur na promé lugá lo pone nos konfiansa den Señor, manera Nefi hasi komo ehèmpel, i e ora ei, dor di e integridat di nos kurasonnan gana e konfiansa di Señor, i tambe e konfiansa di nos esposanan i yunan. Ora nos ta komprendé i apliká e sagrado prinsipio aki di konfiansa trahá riba integridat, nos lo ta fiel na nos sagrado kombenionan. Nos tambe lo logra di presidí den nos famianan ku amor i rektitut, proveyendo e nesesidatnan di bida, i protehando nos famianan for di e maldatnan di e mundu. Di e bèrdatnan aki humildemente mi ta testifiká den e nòmber di JesuCristo, amèn.