![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F15%2F8e%2F158e3a67c0488c52da4e0fcda03e490cbc55373f%2F158e3a67c0488c52da4e0fcda03e490cbc55373f.jpeg/full/!250,/0/default)
E Saserdosio i e Poder Ekspiatorio di e Salbador.
Pa Tata Selestial su propósito wòrdu kumplí, Cristu su poder ekspiatorio mester wòrdu hasi disponibel na Dios su yunan. E saserdosio ta entregá e oportunidatnan aki.
Imaginá huntu ku mi un rakèt ku ta wòrdu maniobrá na un plataforma di lansamentu p’asina e por ta kla pa wòrdu lansá. Awor visualisá e sendementu. Kombustibel, den un kimamentu kontrolá, ta kombertí den gas kayente ku ta sali ku forsa, dunando e forsa pa lansa nesesario pa e manda e rakèt den espasio. Finalmente, imaginá e kargamentu òf karga ku ta sinta riba e rakèt. E kargamentu su balor ta realisá kompletamente solamente ora e yega kaminda e mester ta i ta funshoná manera mester. Bo no mester ta un sientífiko di rakèt pa apresiá, por ehèmpel, ku un satélite karu di komunikashon global ta di poko balor wardá den un mangasina. E mishon di rakèt ta simplemente pa entregá un kargamentu.
Awe nochi lo mi ke kompará e saserdosio ku nos ta poseé na un rakèt i e oportunidat pa tin benefisio for di e Salbador su poder ekspiatorio na e kargamentu ku un rakèt ta entregá.
Debí na Su sakrifisio ekspiatorio, Jesucristu tin e poder i outoridat pa salba henter humanidat. Pa hasi Su poder ekspiatorio aksesibel, El a delegá un porshon di Si poder i outoridat na hòmbernan riba mundu. E poder i outoridat delegá aki ta yama saserdosio. E ta pèrmití poseedornan di saserdosio pa yuda Tata Selestial i Jesucristu den Nan obra, pa trese e salbashon i eksaltashon di yunan di Dios. E ta hasi asina pasobra e ta duna Su yunan e oportunidat pa risibí e bendishonnan di e Salbador su poder ekspiatorio.
E poder ekspiatorio di Jesucristu ta esensial pasobra nos niun no por regresá na nos kas selestial sin yudansa. Den mortalidat, nos ta hasi fayonan semper i ta violá Dios su leinan. Nos bira manchá pa piká i no por wòrdu pèrmití bèk pa biba den Dios su presensia. Nos mester di e Salbador su poder ekspiatorio p’asina nos por rekonsiliá ku Tata Selestial. Jesucristu a kibra e lasonan di morto físiko, permitiendo resurekshon pa tur hende. E ta ofresé pordon di pikanan, ku kondishon di obedensia na e leinan i ordenansanan di Su evangelio. Pa medio di Dje, eksaltashon ta ofresé. E oportunidat pa tin benefisio di e Salbador su poder ekspiatorio ta kreashon su kargamentu mas importante.
Pa Tata Selestial su propósito wòrdu kumplí, Cristu su poder ekspiatorio mester wòrdu hasi disponibel na Dios su yunan.1 E saserdosio ta entregá e oportunidatnan aki. E ta e rakèt. Saserdosio ta esensial pasobra ordenansanan i kombenionan nesesario na mundu ta atministrá solamente pa su outoridat. Si e saserdosio faya pa entregá e oportunidat pa benefisiá for di e Salbador su poder ekspiatorio, kiko lo ta su propósito? E lo ta djis un manera kompleho pa hala atenshon? Dios su intenshon ta pa saserdosio wòrdu usá pa mas ku un lès riba djadumingu òf komo un oportunidat pa sirbi. Su intenshon ta pa entregá e kargamentu.
Defektonan chikitu den un rakèt por kousa fayo di mishon. Seyonan bieu i gastá i materialnan suak por okashoná mal funshonamentu di e rakèt. Pa protehá e saserdosio for seyonan bieu i materialnan suak figurativamente, Dios ta protehá tantu su delegashon i uso.2 Delegashon di saserdosio ta salbaguardiá pa yabinan di saserdosio, kual ta e derechonan di e presidensia duná na hòmber.3 Uso di saserdosio ta igualmente salbaguardiá pa yabinan di saserdosio, pero tambe pa kombenionan ku e poseedor di saserdosio ta hasi. E uso di saserdosio konsekuentemente ta goberná pa tantu yabinan di saserdosio i kombenionan. Un hòmber su enkargo di saserdosio ta duná individualmente i no ta eksistí independiente di dje;4 saserdosio no ta un fuente di forma indefiní di poder outónomo.
E Saserdosio Aaróniko i Melkisedek ta wòrdu risibí dor di kombenio.5 Dios ta determiná e kondishonnan i hòmber ta aseptá. Generalmente bisá, poseedornan di saserdosio ta hasi kombenio pa yuda Dios den Su obra. Na kuminsamentu di e dispensashon aki, Jesucristu a splika ku e kombenio di e saserdosio ta konfirmá riba nos pa nos bon, i no pa nos bon solamente, pero pa bon di henter mundu…pasobra nan no ta bini na mi.6
Esaki ta siña nos ku e propósito di e saserdosio ta pa invitá otronan pa bini na Cristu dor di yuda nan risibí e evangelio restourá. Nos tin e saserdosio p’asina nos por yuda e yunan di Tata Selestial wòrdu aliviá di e peso di piká i bira manera E. Pa medio di e saserdosio, e poder di dibinidat ta manifestá den e bida di tur ku hasi i mantené kombenionan di evangelio i risibí e ordenansanan asosiá.7 Esaki ta e manera, ku kada un di nos ta bini na Cristu, ta purifiká, i ta rekonsiliá na Dios. Cristu su poder ekspiatorio a wòrdu hasi aksesibel mediante di e saserdosio, kual ta entregá e kargamentu.
Kombenionan ku Dios ta serio i solemne. Un hòmber mester por prepará p’e, siña tokante dje, i drenta tal kombenionan ku e intenshon di honra nan. Un kombenio ta bira un huramentu di su mes. Parafrasiando e dramaturgo e ingles Robert Bolt, un hòmber ta hasi un kombenio solamente ora e ke komprometé su mes na un manera masha eksepshonal na un promesa. E ta hasi un identidat entre e bèrdat di e promesa i su mes birtut. Ora un hòmber ta hasi un kombenio, e ta tene su mes, meskos ku awa, den su mes kòmchi di mannan. I si e habri su dedenan, e no mester tin speransa di haña su mes atrobe. Un kibradó di kombenio no tin su mes mas pa komprometé òf garantia pa ofresé.8
Un poseedor di Saserdosio Aaróniko ta hasi kombenio pa evitá maldat, yuda otronan pa rekonsiliá ku Dios, i ta prepará pa risibí e Saserdosio di Melkisedek.9 E responsabilidatnan sagrado aki ta kumplí ora e ta siña, batisá, fortalesé miembronan di Iglesia, i invitá otronan pa aseptá e evangelio. Esakinan ta pa funshonamentu di su “rakèt.” A kambio, Dios ta primintí speransa, pordon, ministrashon di angelnan, i e yabinan di evangelio di arepentimentu i boutismo.10
Un poseedor di Saserdosio di Melkisedek ta hasi kombenio pa kumpli e responsabilidatnan asosiá ku e Saserdosio Aaróniko i ta magnifiká su ta yamamentu den e Saserdosio di Melkisedek.11 E ta hasi asina dor di warda e mandamentunan asosiá ku e kombenio. E mandamentunan aki ta inkluí hasi kaso diligente na e palabranan di bida eterno dor di biba pa kada palabra ku ta [sali] for di boka di Dios,12 dunando testimonio di Jesucristu i Su obra di delaster dia,13 sin broma di su mes,14 i bira e amigu di e Salbador, konfiando E manera un amigu lo hasi.15
A kambio, Dios ta primintí ku un poseedor di Saserdosio di Melkisedek lo risibí yabinan pa komprondé e misterionan di Dios. E lo bira perfekto p’asina e por para den e presensia di Dios. Tambe e lo ta kapas pa kumpli ku su ròl den e obra di salbashon. Jesucristu lo prepará e kaminda dilanti dje poseedor di saserdosio i lo ta huntu ku n’e. E Spiritu Santu lo ta den su kurason i e angelnan lo elev’é. Su kurpa lo wòrdu fortalesé i renobá. E lo bira heredero di e bendishonnan di Abraham i, huntu ku su esposa, heredero huntu ku Jesucristu den Tata Selestial su reino.16 Esakinan ta “promesanan grandi i presioso.”17 No por imaginá promesanan mas grandi.
Na kada hòmber ku risibí e Saserdosio di Melkisedek, Dios ta afirmá Su promesanan di kombenio ku un huramentu.18 E huramentu aki ta pèrtenesé solamente na e Saserdosio di Melkisedek,19 i ta Dios ta esun ku ta hura e huramentu, i no e poseedor di saserdosio.20 Pasobra e situashon úniko aki ta enbolbí Su poder i outoridat dibino,Dios ta usa un huramentu, usando e lenguahe di mas fuerte ku E por, pa sigurá nos di e naturalesa obligatorio i ireversibel di Su promesanan.
Konsekuensianan severo ta resultá for di kibramentu di kombenionan di saserdosio i apartando kompletamente for di nan.21 Ser kasual òf apátiko den un yamamentu di saserdosio ta manera introdusí material gastá i bieu den un komponente di rakèt. E ta pone e kombenio di saserdosio den peliger pasobra e por hiba na fayo dje mishon. Desobedensia na Dios su mandamentunan ta kibra e kombenio. Pa un kibradó di kombenio perpetuo sin arepentimentu e bendishonnan primintí ta wòrdu kitá.
Mi a yega na komprondé e relashon entre e rakèt di “saserdosio” i e “oportunidat pa benefisiá di kargamentu di Cristu su poder ekspiatorio” mas kompletu vários aña pasá. Durante un wikènt, mi tabatin dos asignashon. Un tabata p a krea e promé estaka den un pais, i e otro pa entrevistá un hòmber hóben, si tur kos tabata na òrdu, restourá su bendishonnan di saserdosio i di tèmpel. E hòmber di 30 [trinta] aña aki a uni na Iglesia den su edat lat di teenager. El a sirbi un mishon honorabel. Pero ora el a regresá kas, el a pèrdè su kaminda, i su miembresia den Iglesia. Despues di algun aña, “el a bini bei,”22 i ku yudansa di lidernan di saserdosio amoroso i miembronan kariñoso, el a arepentí i a wòrdu atmití atrobe den Iglesia dor boutismo.
Despues el a apliká pa tin su bendishonnan di saserdosio i tèmpel restourá. Nos a hasi un sita pa djasabra 10:00 or di mainta na e kapiya. Ora mi a yega pa e entrevistanan mas tempran, e tabat’ei kaba. E tabata asina ansioso pa tin su saserdosio atrobe, ku e no por a warda mas.
Durante nos entrevista, mi a mustr’é e karta splikando ku Presidente Thomas S. Monson a revisá su aplikashon personalmente i a outorisá e entrevista. E hòmber yòn ku di otro manera no sa mustra emoshon a yora. Mi a bis’é ku e fecha di nos entrevista lo no tin nifikashon ofisial den su bida. El a wak konfuso. Mi a inform’é ku despues ku mi restourá su bendishonnan, su registro di miembresia lo mustra solamente su fechanan original di boutismo, konfirmashon, ordenashon di saserdosio, i investidura. El a bira emoshonal atrobe.
Mi a pidié pa lesa for di Doctrina y Convenios.
Señor a bisa ku esun ku arepentí di su piknan, e ta wòrdu pordoná, i E, e Señor, lo no kòrda nan mas.
Di e manera aki si un hòmber arepentí di su pikánan---mira, e lo konfesá nan i bandoná nan.23
Lágrima a yena su wowonan di tres bia. Despues, mi a pone mi mannan riba su kabes i den e nòmber di Jesucristu i pa e outoridat di e Saserdosio di Melkisedek, i ku e outorisashon di e Presidente di Iglesia, mi a restourá su bendishonnan di saserdosio i di tèmpel.
E goso ku a bini riba nos tabata profundo. E tabata sa ku atrobe e tabata outorisá pa tene i ehersé e saserdosio di Dios. Tambe ku su bendishonnan di tèmpel tabata kompletamente na vigor atrobe. Su kanamentu tabata yen di alegria i ku lus radiante rònt di dje. Mi tabata asina orguyoso di dje i mi a sinti kon orguyoso Tata Selestial tabata di dje.
Despues di esaki, e estaka a wòrdu organisá. E reunionnan tur a wòrdu bon bishitá pa Santunan entusiasmá i fiel, i un presidensia di estaka maravioso a wòrdu sostené. Sinembargo, pa ami, e okashon históriko di organisá e promé estaka aki den un pais tabatin manera un sombra riba dje, pa motibu di e goso ku mi a sinti dor di restourá e bendishonnan di e hòmber yòn aki.
Mi a yega di realisá ku e propósito di organisá un estaka, òf usa e saserdosio di Dios den kualke manera, ta pa asistí Tata Selestial i Jesucristu den Nan obra, pa duna e oportunidat pa redenshon i eksaltashon na kada un di Dios su yunan. Meskos ku e rakèt kual su propósito ta pa entregá e kargamentu; e saserdosio ta entregá e evangelio di Jesucristu, permitiendo tur hende pa hasi kombenionan i risibí e ordenansanan asosiá. Di e manera aki “E sanger ekspiatorio di Cristu”24 por wòrdu apliká den nos bida ora nos eksperensiá e influensia santifikadó di e Spiritu Santu i risibí e bendishonnan ku Dios ta primintí.
Ademas di obedesé e leinan i ordenansanan di e evangelio boso mes, mi ta invitá boso pa hasi i warda e kombenionan di saserdosio. Risibí Dios su huramentu i promesa. Magnifiká boso responsabilidatnan den e saserdosio pa yuda Tata Selestial i Jesucristu. Usa e saserdosio pa yuda entregá e oportunidat pa benefisiá di e poder ekspiatorio di e Salbador na un otro hende! Ora boso hasi esei, gran bendishonnan lo bini na boso i boso famia. Mi ta testifiká ku e Redentor ta biba i ta dirigí e obra aki, den e nòmber di Jesucristu, amèn.