Kedando ku Dios i Drechando e Infrakshon
Cristo tin e poder pa trese nos den e hermandat amoroso ku e Tata i di un ku otro.
Nos mester profundisá kontinuamente nos konosementu di i obediensia na Tata Selestial. Nos relashon ku n’E ta eterno. Nos ta Su yunan, i esei no lo kambia. Kon nos ta bai akseptá ku henter nos kurason Su invitashon pa hala serka di djE i asina gosa e bendishonnan E ta anhelá pa duna nos den e bida aki i den e mundu benidero?
Señor a bisa na antiguo Israel, i E ta bisa nos, “Si, Ku amor eterno mi a stima bo: p’esei Mi a atraé bo ku miserikòrdia.” Papiando manera e Tata lo hasi, semper E a bisa na nos ku nos mester keda ku n’E, i E ku nos, i ku p’esei nos mester kana ku n’E. Nos ta konfi’É sufisiente pa keda ku n’E i kana ku n’E?
Nos ta aki riba e tera aki pa siñá i krese, i e siñansa i kresementu mas importante lo bini for di nos konekshon di kombenio ku Tata Selestial i JesuCristu. For di nos relashon fiel ku Nan ta bini konosementu dibino, amor, poder, i kapasidat pa sirbi.
“Nos tin e deber pa siña tur loke Dios a revelá tokante su mes.” Nos mester komprendé ku Dios e Tata a dirigí Su Yu Hòmber, JesuCristu, pa kreá e tera pa nos kresementu, ku Tata Selestial a duna Su Yu Hòmber pa paga e demanda di hustisia pa nos salbashon, i ku e Tata su poder di saserdosio i e Yu Hòmber su Iglesia berdadero ku e ordenansanan nesesario a wòrdu restorá pa nos bendishonnan. Bo por sinti e profundidat di amor koriendo dor di Nan preparashonnan pa nos goso i kresementu? Nos mester sa ku Tata Selestial su plan di salbashon ta ku nos ta obedesé e leinan i ordenansanan di e evangelio i gana bida eterno i asina bira manera Dios ta. Esaki ta e felisidat berdadero i duradero Tata Selestial ta ofresé nos. No tin niun otro felisidat berdadero i duradero.
Nos retonan por hala nos for di e kurso di felisidat aki. Nos por pèrdè nos konekshon konfiando ku Dios si pruebanan ta fòrsá nos na distraishon en bes di manda nos riba nos rudiá.
E simpel kuplèt aki ta rogá nos pa evaluá nos prioridatnan:
Rumannan, kiko ta importá boso? Kiko ta duradero pa boso? Un asuntu di balor duradero pa e Tata ta ku nos ta siña di djE, humiliá nos mes, i krese den obediensia na djE dor di eksperensianan terenal. E kier pa nos kambia nos egoismo pa sirbishi, nos miedonan pa fe. E asuntunan duradero aki por ta un prueba hopi difísil pa nos.
E ta awor, ku nos limitashonnan mortal, ku e Tata ta pidi nos pa stima ora stima ta asina difísil, pa sirbi ora sirbi ta inkómodo, pa pordoná ora pordoná ta rèk nos alma. Kon? Kon nos lo hasié? Nos ta pidi sinseramente pa Tata Selestial su yudansa, den e nòmber di Su Yu Hòmber, i hasi kosnan na Su manera en bes di afirmá nos boluntat propio.
Mi a atmití mi orguyo ora Presidente Ezra Taft Benson a papia tokante purifiká e glas di paden. Mi a imaginá mi mes komo un kanika. Kon lo mi por kita e sobrá di orguyo for di mi kanika? Independientemente fòrsando nos mes pa tin humildat i trata di forsa nos mes pa stima otronan ta insinsero i bachi, i e simplemente no ta funshoná. Nos pikánan i orguyo ta krea un infrakshon—òf un habrí—entre nos i e fuente di tur amor, nos Tata Selestial.
Solamente e Salbador su Ekspiashon por purifiká nos di nos pikánan i sera e habrí òf infrakshon ei.
Nos kier ta sirkulá den e brasanan di nos Tata Selestial su amor i guiá, i asina nos ta poné Su boluntat promé i ku un kurason kibrá rogá ku Cristo ta basha roinan di awa purifikadó den nos kanika. Na promé por ta e ta bini drùp pa drùp, pero miéntras nos ta buska, pidi, i obedesé, e lo bini abundantemente. E awa bibu aki lo kuminsá pa yena nos, i yená ku Su amor nos por bòlter e kanika di nos alma i kompartí su kontenido ku otronan ku tin set pa kuramentu, speransa, i un sentido di pertenesé. Miéntras nos kanika ta birando limpi, nos relashonnan terenal ta kuminsá kura.
Sakrifisio di nos agènda personal ta rekerí pa traha lugá pa e plannan eterno di Dios. E Salbador, ken ta papia pa e Tata, ta roga nos pa hala serka di djE i e lo hala serka di nos. Hala serka di e Tata por kier men siña di Su bèrdat dor di e skrituranan, sigui konseho profétiko, i lucha di hasi su boluntat mas kompletamente.
Nos ta komprendé ku Cristo tin e poder pa trese nos den e amoroso hermandat ku e Tata i un ku otro? E, pa e poder di e Spiritu Santu, por duná nos disernimentu nesesario paden nos relashonnan.
Un maestro di Primaria a konta mi tokante un eksperensia poderoso ku su klas di muchanan hòmber di 11 aña. Un di nan, ken mi lo yama Jimmy, tabata un mucha ku no tabata koperá su so den e klas. Un Djadumingu e maestro tabata inspirá pa pone su lès na banda i konta pakiko e la stima Jimmy. E la papia di su gratitut i su fe den e hòmber hóben aki. E ora e maestro a pidi e miembronan di klas pa konta Jimmy algu nan a apresiá tokante e. Miéntras miembronan di klas, un pa un, a konta Jimmy dikon e tabata spesial pa nan, e mucha hòmber a baha su kabes i lágrima a kuminsá basha di su wowo. E maestro i klas aki a traha un brùg na Jimmy su kurason solitario. Amor simpel, honestamente ekspresá, ta duna speransa i balor na otronan. Mi ta yama esei “drecha e infrakshon òf e habrí.”
Por ta nos bida den un mundu premortal amoroso a e kousa nos anhelo pa amor berdadero i duradero aki riba tera. Nos ta divinamente diseñá pa duna amor i pa ta stimá, i e amor mas hundu ta bini ora nos ta unu ku Dios. E Buki di Mormon ta invitá nos pa “rekonsiliá ku Dios dor di e Ekspiashon di Cristo.”
Isaías a papia di nan ken fielmente biba e lei di e ayuno i asina a bira pa nan mes un posteridat un drechadó di e kamindanan kibrá. Nan ta nan ken, Isaías ta primintí, lo “bolbe pobla e pais.” Den un manera similar, e Salbador ta drecha e infrakshon, òf distansia, entre nos i Tata Selestial. E, dor di Su gran sakrifisio ekspiatorio, ta habri e kaminda pa nos tuma parti di Dios su amoroso poder, i e ora ei nos ta kapasitá pa drecha e “lugánan [no kultivá]” den nos bidanan personal. Sanamentu distansia emoshonal entre un ku otro lo rekerí nos akseptashon di Dios Su amor, huntu ku un sakrifisio di nos tendensianan natural di ta egoista i miedoso.
Un anochi memorabel un famia i ami a pleita tokante un asuntu polítiko. E la kritiká i debatí mi opservashonnan, tratando di prueba ku ta mi robes na distansia di skucha di miembronan di famia. Mi a sinti mi bobo i no informá—i mas tantu mi tabata ta. E anochi ei mi a hinka rudia pa hasi orashon, mi a pura di spliká na Tata Selestial kon difísil e famia aki tabata! Mi a papia i papia. Por ta mi a pousa den mi kehamentu i e Spiritu Santu tabatin un chèns pa hala mi atenshon, pasobra, na mi sorpresa, mi a skucha mi mes bisa diripiente, “Mas tantu bo ker pa mi stim’é.” Stim’é? Mi a sigui resa, bisando algu manera, “Kon mi por stim’é? Mi ni ta pensa mi ta gust’é. Mi kurason ta duru; mi sintimentunan ta heridá. Mi no por hasi esei.”
E ora ei, siguramente ku yudansa for di e Spiritu, mi tabatin un pensamentu nobo ora mi a bisa, “Pero Abo ta stim’é, Tata Selestial. Lo Bo duna mi un porshon di Bo amor p’e—asina mi tambe por stim’é? Mi sintimentunan duru a suavisá, mi kurason a kuminsá kambia, i mi a kuminsá pa wak e persona aki diferente. Mi a kuminsá sinti su balor real ku Tata Selestial a wak. Isaías ta skirbi, “…Señor mara herida di su pueblo i kura yaga di sla.”
Ku tempu e habrí entre nos a sera. Pero asta si e no a akseptá mi kurason kambiá, mi a siñá ku Tata Selestial lo yuda nos pa stima asta nan ken nos por pensa ta difísil pa stimá, si nos rogá pa Su yudansa. E Salbador su Ekspiashon ta un kanal pa e fluho konstante di karidat for di nos Tata na Shelu. Nos mester skohe pa keda den e amor ei pa nos por tin karidat pa tur.
Ora nos ta duna nos kurason na e Tata i e Yu Hòmber, nos ta kambia nos mundu—asta si sirkunstansianan rònt di nos no ta kambia. Nos ta hala mas serka di Tata Selestial i sinti Su aseptashon tierno di nos esfuerso pa ta berdadero disipelnan di Cristo. Nos bon huisio, konfiansa, i fe ta oumentá.
Mormon ta bisa nos pa hasi orashon ku tur energia di kurason pa e amor ei i e lo wòrdu regalá nos for di su fuente—Tata Selestial. Solamente e ora ei nos por bira drechadónan di e infrakshon di nos relashonnan terenal.
Nos Tata su infinito amor ta ekstendé na nos, pa trese nos bèk den Su gloria i goso. E la duna Su Yu Hòmber Unígenito, JesuCristu, pa drecha e infrakshon ku ta hopi habri entre nos i E. Reunion ku Tata na Shelu ta e esensia di amor duradero i propósito eterno. Nos mester hasi e konekshon ku n’E awor pa siñá loke berdaderamente importá, pa stima manera E ta stima, i pa krese pa bira mas manera E. Mi ta testifiká ku nos relashon fiel ku Tata Selestial i e Salbador importá eternamente pa Nan i pa nos. Den e nòmber di JesuCristu, amèn.