“Mi Tin un Obra pa Bo”

Pa Èlder John C. Pingree Jr.

Di e Setenta

Kada un di nos tin un ròl signifikante pa promové e obra di Dios.

Señor a deklará na Moises, “Mi tin un obra pa bo” (Moises 1:6). Boso a puntra boso mes algun bia ku Tata Selestial por tin un obra pa boso? Tin kosnan importante ku El a prepará pa boso—espesialmente pa boso—pa logra? Mi ta testifiká ku e kontesta ta si!

Konsiderá Girish Ghimire, ken a nase i a wòrdu kriá den e pais di Nepal. Komo un teenager, el a studia na China, kaminda un koestudiante a introdusí e evangelio di JesuCristu na dje. Girish a bai Universidat di Brigham Young i gradua pa obra i a konosé futuro esposa. Nan a establesé den Salt Lake Valley i adoptá dos mucha di Nepal.

Añanan despues, ora ku mas di 1500 refugiado di kampamentunan di Nepal a wòrdu trasladá pa Utah, Girish a sinti su mes inspirá pa yuda. Ku e fasilidat di e su lenguahe nativo i komprenshon kultural, Girish a sirbi komo intérprete, maestro, i mentor. Despues di restablesé den e komunidat, algun di e refugiadonan di Nepal a demostrá interes den e evangelio. Un rama ku ta papia Nepali a wòrdu organisá, i despues Girish a sirbi komo presidente di e rama. E tabata tambe un instrumènt den tradukshon di e Buki di Mormon den Nepali.

Boso por mira kon Tata Selestial a prepará i ta usando Girish?

Dios Tin Obra pa Kada Un di Nos

Hermanos i hermanas, Dios tin trabou importante pa kada un di nos. Papiando ku e hermanas pero siñando bèrdat ku ta apliká pa tur hende, Presidente Spencer W. Kimball a siñá: “Promé ku nos a bini [na mundu, nos] a risibí sierto asignashon. … Ounke nos no ta kòrda e detayenan, esaki no ta kambia e realidat glorioso di lokual nos a aseptá un bia.” Esta un bèrdat noble! Nos Tata Selestial tin kosnan spesífiko i esensial pa boso i ami por realisá (wak Efesio 2:10).

E asignashonnan dibino aki no ta reserva i privilegiá pa un poko pero ta tur—sin distinshon di sekso, edat, rasa, nashonalidat, nivel di entrada, estado sosial, òf yamamentu den Iglesia. Tur hende tin un ròl signifikativo pa aktua den progreso di Dios su obra (wak Moises 1:39).

Algun di nos ta kuestioná si Tata Selestial por usa nos pa hasi kontribushonnan importante. Pero rekordá, semper El a usa hende ordinario pa hasi kosnan ekstraordinario. (wak 1 Korintionan 1:27–28; D&C 35:13; 124:1). [Nos] ta agente”i “tin poder den [nos] pa “trese hopi hustisia”. (D&C 58:27–28).

Presidente Russell M. Nelson a spliká:

Señor tin muchu mas na mente pa boso ku boso mes tin pensá! Boso a wòrdu reservá i preservá pa e tempu i lugá aki. …

Señor ke pa boso kambia e mundu. Si boso aseptá i sigui Su boluntat pa boso, boso lo haña boso mes ta hasi kosnan imposibel.

Asina kon nos lo yega na komprondé i realisá e obra ku Dios tin intenshoná pa nos?

Enfoká riba Otronan

Promé, enfoká riba otronan. Ki ora nos por sigui Cristu, “ku a bai rònt hasiendo bon.” (Hechonan10:38; wak tambe 2 Nefi 26:24).

Despues ku mi a regresá for di un mishon di tempu kompletu, mi a sinti falta di e propósito diario ku mi a gosa di dje. Klaro ku mi mester a mantené mi kombenionan, buska un edukashon, kuminsá ku un famia, i haña obra.. Pero mi tabata puntra mi mes si no tabatin algu mas, òf mas spesial, ku Señor tabata ke pa mi hasi. Despues di meditá pa algun luna, mi a haña e versíkulo aki: “Si bo ta deseá, lo bo ta un medio pa hasi hopi bondat den e generashon aki. (D&C 11:8). E Spiritu a yuda mi komprondé e propósito prinsipal di asignashonnan dibino ta pa bendishoná otronan i pa hasi hopi bon.”

Nos por aserká puntonan di desishon den nos bida—manera kiko pa studia, kiko nos tin ku hasi pa obra, òf unda pa biba—den e konteksto pa yuda otronan.

Un famia a muda pa un siudat nobo. Enbes di buska un kas den bario riku, nan a sintínan inspirá pa lokalisá un aria ku nesesidat sosial i ekonómiko konsiderabel. Despues di añanan, Señor a traha pa medio di nan i pa sostené hopi hende i pa edifiká nan bario i estaka.

Un profeshonal médiko a mantené un práktika típiko pero a sintié guiá pa apartá un dia tur siman pa proveé kuido pòrnada na individuonan ku sin seguro di salú. Pa motibu di e hòmber aki i su kasá su disposishon pa bendishoná otronan, Señor a proveé un manera pa nan por a sostené mas di shen pashènt den nesesidat miéntras nan tabata kria nan famia grandi tambe.

Deskubrí i Desaroyá Donnan Spiritual

Dos, diskubrí i desaroyá donnan spiritual. Tata Selestial a duna nos e donnan aki pa yuda nos identifiká, ehekutá, i disfrutá di e obra ku E tin pa nos.

Algun di nos ku ta puntra nos mes, “Mi tin kualkier don?” Atrobe, e kontesta ta si! “Na tur hòmber [i muher] a duna un don di e Spiritu di Dios… di moda ku tur lo tin probecho.” (D&C 46:11–12; énfasis poné aserka). Algun don spiritual ta dokumentá den skritura (wak 1 Korintionan12:1–11, 31; Moroni 10:8–18; D&C 46:8–26), pero tin hopi otro mas. algun por inkluí pa tin kompashon, ekspresá speransa, tin bon relashon ku hende, organisá efikasmente, papia òf skirbi di manera konvinsente, siña klaramente, i traha duru.

Pues kon nos por yega na konosé nos donnan? Nos por referí na nos bendishon patriarkal, puntra esunnan ku konosé nos bon, identifiká personalmente lokual nos ta bon aden i ta gosa di un manera natural. Di mas importante ta ku nos por puntra Dios. E konosé nos donnan, ya ku ta E mes a duna nos nan. (wak Hakobo1:5; D&C 112:10). E konosé nos donnan, siendo ku E a duna nan na nos (wak D&C 46:26).

Ora nos diskubrí nos donnan, nos tin e responsabilidat pa desaroyá nan. (wakMateo 25:14–30)Hasta JesuCristu mes “no a risibí e plenitut na promé instante, pero[a desaroyá] grasia riba grasia.” (D&C 93:13).

Un hòmber hóben a produsí ilustrashonnan pa promové balornan religioso. Mi faborito ta un pintura di e Salbador, un kopia di kual ta kologá den nos hogar. E hermano aki a desaroyá i a usa su donnan artístiko. Trahando pa medio di dje, Tata Selestial a inspirá otronan pa mehora nan disipulado.

Tin bia nos ta sinti ku nos no tin ningun don partikularmente importante. Un dia, un hermana deskurashá a rogá, Señor, kua ta mi ministerio personal?” El a respondé, “Opservá otronan.” E tabata un don spiritual! For di e tempu ei, el a haña goso den opservá esnan ku regularmente ta wòrdu lubidá, i Dios a traha dor di dje pa bendishoná hopi. Miéntras algun don spiritual no ta prominente pa e normanan di mundu, nan ta esensial pa Dios i Su obra.

Hasi uso di Atversidat

Tres, hasi uso di atversidat. Nos pruebanan ta yuda nos diskubrí i prepará nos pa e obra ku nos Tata Selestial tin pa nos. Alma a splika, “Despues di hopi tribulashon, Señor … a hasi mi un instrumento den su mannan.” (Mosia 23:10). Meskos ku Señor,ken su su sakrifisio ekspiatorio a permití E pa yuda nos, (wakAlma 7:11–12), nos por usa e konosementu hañá den eksperensianan difísil pa lanta, fortalesé i bendishoná otronan.

Despues ku un ehekutivo di rekurso humanitario ku éksito a haña retiro, el a lesa su bendishon patriarkal i sintié inspirá pa kuminsá un kompania pa yuda otro profeshonalnan haña obra. (El a hasta yuda mi mes buska obra ora ku nos famia a kaba di regresá for di sirbi un mishon.) Señor a usa su prueba komo un manera pa bendishoná otronan, miéntras tantu el a wòrdu promové ku un karera signifikante.

Un pareha hóben a eksperensiá un nasementu di yu sin bida. Ku kurason kibrá nan a disidí pa honra nan yu muher dunando konseho i material di apoyo na parehanan durante situashonnan similar. Señor a traha pa medio di e pareha aki pa motibu di nan empatia spesialisá, desaroyá dor di atversidat.

Konfia den Dios

I di kuater, konfia den Señor. Ora nos puntra Señor den fe ku un intenshon berdadero, E lo revelá nos asignashon dibino na nos. Unabes ku nos diskubrí nan, E ta yuda nos kumpli ku e asignashonnan aki. “Tur kos ta presente dilanti[Su] bista,” (D&C 38:2; wak tambe Abraham 2:8), i na e momentu apropiá, E lo habri e portanan ku ta nesesario pa nos (wakRevelashon 3:8). E la manda hasta Su Yu, JesuCristu, pa asina nos por dependé riba Dje pa forsa mas leu di nos abilidatnan natural. (wak Filipensenan 4:13; Alma 26:12).

Un ruman, preokupá ku desishonnan di un gobièrnu lokal, a sinti un impreshon pa kampaña pa un asiento públiko. Apesar di un proseso di un kampaña di reto, el a ehersé fe i akumulá e rekursonan pa e kampaña. Finalmente, e no a gana pero a sinti ku Señor a dun’e guia i forsa pa trese asuntunan importante dilanti pa e komunidat.

Un mama soltero, ku ta kria yunan ku desaroyo mental i desabilidatnan, a puntra si e por satisfasé adekuadamente e nesesidatnan di su famia.Ounke tabata difísil, el a sinti su mes fortalesé dor di Señor pa kumpli ku éksito su mishon di mas importante.

Un Palabra di Atvertensia

Na mesun momentu Dios ta yuda nos kumpli ku e asignashonnan dibino, e atversario ta traha pa distraí i deskonsehá nos for di un bida ku nifikashon.

Por ehèmpel piká ta e mayor opstákulo, debilitá nos sensibilidat pa ku e Spiritu Santu i ta stroba nos akseso na e poder spiritual. Pa realisá e obra ku nos Tata Selestial tin pa nos, nos mester hasi esfuerso pa ta limpi. (wak 3 Nefi 8:1). Nos ta bibando di manera ku Dios por hasi su obra mediante nos?

Satanas tambe ta buska pa distraí nos ku kosnan ménos importante. Señor a atvertí un lider di e iglesia primitivo, “Bo mente ta na e kosnan di mundu mas ku na e asuntunan di mi … i e ministerio di kual bo a wòrdu yama p’e (D&C 30:2).Nos ta asina preokupá ku e kosnan mundano ku nos ta desviá di nos asignashonnan dibino?

Ademas, Satanas ta deskurashá nos ku sintimentunan ku nos ta inadekuá. E ta laga nos kere ku e obra ta difísil òf ta intimidante. Sinembargo, nos por konfia Dios! E ta stima nos. E ke pa nos tin éksito.E “ta bai [nos] dilanti; e lo ta ku [nos], e lo no desapuntá [nos].” (Deuteronomio 31:8; wak tambe Salmo 32:8; Proverbionan 3:5–6; Mateo 19:26; D&C 78:18).

Satanas ta purba konvensé nos pa mira nos obra komo ménos importante ku e obra asigná na otronan. Pero tur asignashon di Dios ta importante, i nos lo risibí satisfakshon si nos “gosa den lokual Señor a manda [nos].” (Alma 29:9).

Ora ku Dios ta obra mediante nos, e atversario por tenta nos pa tuma krédito pa kualkier logro. Sinembargo, nos por imitá e humildat di e Salbador dor di desviá elogio personal i glorifiká e Tata. (wak Mateo 5:16; Moises 4:2). Ora un reportero a purba di rekonosé Mama Teresa pa e mishon di su bida pa yuda e pobernan, e la kontestá; “Ta [Dios] su obra. Mi ta manera un … pòtlot den su man. … E ta pensa. E ta skirbi. E pòtlot no tin nada di aber ku n’e. Solamente tin ku permití e pòtlot pa wòrdu usá.

Konklushon

Mi rumannan stima, mi ta invitá kada unu di nos pa “rindi nos mes na Dios manera un instrumento di hustisia.” (Romanonan 6:13). Entregá nos mes ta enbolbí pa lag’e sa ku nos ke ta útil, buska Su guia, i tin akseso na Su forsa.

Manera semper, nos por wak na JesuCristu, nos ehèmpel perfekto. Den e bida pre mortal, Tata Selestial a puntra, “Ken lo mi manda?”

I Jesus a rospondé, “Ata mi aki, manda ami.” (Abraham 3:27; wak tambe Isaías 6:8).

JesuCristu a aseptá, a prepará pa, i a realisá Su ròl preordená komo nos Salbador i Redentor. El a hasi boluntat di e Tata (wakJuan 5:30; 6:38; 3 Nefi 27:13) i a kompletá Su asignashonnan dibino.

Ora nos sigui Cristu su ehèmpel i entregá nos mes na Dios, mi ta testifiká ku tambe E lo usa nos pa sigui ku Su obra pa bendishoná otronan. Den e nòmber di JesuCristu, amèn.

Notanan

1. Wak Refugee Processing Center, “Admissions and Arrivals,” ireports.wrapsnet.org/Interactive-Reporting.

2. Spencer W. Kimball, “The Role of Righteous Women,” Ensign, Nov. 1979, 102.

3. Presidente Gordon B. Hinckley a kurashá: “ Kere den boso mes. Kere den boso kapasidat pa hasi kosnan … grandi nb}… Boso ta un yu di Dios, ku kapasidat infinito” (Teachings of Presidents of the Church: Gordon B. Hinckley [2016], 77).

4. Russell M. Nelson, Accomplishing the Impossible: What God Does, What We Can Do (2015), 147.

5. Presidente Dieter F. Uchtdorf a nota:

   “Nos Tata Selestial ta mira nos potensial real. E sa kosnan tokante nos ku nos no sa di nos mes. E ta inspirá nos durante nos bida pa kumpli ku e midí di nos kreashon. …

   “Laga nos sigui e Salbador i traha ku diligensia pa por yega di ta e persona ku nos a wòrdu kreá pa ta. Laga nos skucha i obedesé e indikashonnan di e Spiritu Santu; hasiendo esei, Tata Selestial lo revelá na nos kosnan ku nos no tabata sa di nos mes. E lo iluminá e kaminda nos dilanti i lo habri nos wowonan pa nos por mira nos talentonan deskonosí i kisas nunka imaginá. (“Of Regrets and Resolutions,” Liahona, Nov. 2012, 22, 23).

6. Elder Bruce R. McConkie a splika: “ Donnan spiritual ta sin fin den kantidat i infinito den variedat. Esunnan pará den e palabra revelá ta simplemente ilustrashonnan di e deramamentu ilimitá di grasia dibino ku un Tata Selestial ku miserikòrdia ta duna esnan ku ta stim’é i ta sirbié” (A New Witness for the Articles of Faith [1985], 371).

7. Elder Marvin J. Ashton a siña:

   “Tumá arbitrariamente, permití mi menshoná poko don ku no ta semper evidente òf digno di menshoná, pero ku ta masha importante. Entre esakinan por tin boso donnan---donnan no asina evidente pero tòg di balor.

   “Ban revisá algun di e donnan ménos opvio: e don di puntra; e don di skucha; e don di tende i usa un stèm ketu, i apasibel; e don di ta kapas pa yora; e don di evitá pleitu; e don di ta agradabel; e don di evitá ripitishon vano; e don di buska lokual ta hustu; e don di no huzga; e don di wak n Dios pa guia; e don di ta un disípulo; e don di kuida otronan; e don di ta kapas pa meditá; e don di ofresé orashon; e don di duna un testimonio poderoso; i e don pa risibí e Spiritu Santu” (“There Are Many Gifts,” Ensign, Nov. 1987, 20).

8. Pablo tambe a instruí, “[Dios] ta konsolá nos den tur nos tribulashonnan, ya nos por hasi uso di e konsuelo ei, pa konsolá otro hende ku tambe ta pasa den tur sorto di tribulashon.” (2 Korintionan 1:4).

9. Elder Richard G. Scott a splika: “Dios tin un plan spesífiko pa boso bida. E lo revelá partinan di e plan aki na boso ora bos wak p’e ku fe i obedensia konsistente.” (“How to Live Well amid Increasing Evil,” Liahona, May 2004, 102).

10. Mother Teresa, in Edward W. Desmond, “Interview with Mother Teresa: A Pencil in the Hand of God,” Time, Dec. 4, 1989, time.com.