![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F45%2F89%2F4589b8e53b1aa121d4c4a0c91ce1ccc4a4ce0a67%2F4589b8e53b1aa121d4c4a0c91ce1ccc4a4ce0a67.jpeg/full/!250,/0/default)
Promesanan Grandísimo i Presioso
Tata Selestial Su gran plan di felisidat ta inkluí e doktrina, ordenansanan, i promesanan grandísimo i presioso na kua nos por bira partisipante di e naturalesa dibino.
Un dje gran desafionan ku kada un di nos ta enfrentá tur dia ta pa no laga e prekupashonnan di e mundu aki dominá nos tempu i energia ku nos ta neglishá e kosnan eterno ku ta mas importante.1Nos por wòrdu distraé muchu fásil for di rekòrdá i enfoká riba prioridatnan spiritual pa motibu di hopi di nos responsabilidatnan i skemanan drùk. Tin bia nos ta purba di kore asina lihé ku nos por lubidá unda nos tabata bai i di kon nos ta koriendo.
E Apòstel Pedro a rekòrdá nos ku pa disípulonan di JesuCristu,“su poder dibino a duna nos tur kos ku ta pertenesé na bida i deboshon, mediante e konosementu di E ku a yama nos pa gloria i birtut:
“Pa kual ta duná na nos promesanan grandísimo i presioso: ku pa esakinan boso por ta partisipante di e naturalesa dibino,i a hui di e korupshon ku ta den e mundu mediante mal deseo.”2
Mi mensahe ta enfatisá e importansia di promesanan grandísimo i presioso deskribí pa Pedro komo rekordatorio berdadero di unda nos ta bayendo den nos biahe mortal i di kon. Lo mi papia tambe di e ròlnan respektivo di e Dia di Reposo, e santu tèmpel, i nos hogarnan den yuda nos pa rekòrdá e promesanan spiritual importante aki.
Mi ta pidi honestamente ku e Spiritu Santu lo instruí kada un di nos ora nos ta konsiderá huntu e berdatnan importante aki.
Nos Identidat Dibino
Nos Tata Selestial su gran plan di felisidat ta inkluí e doktrina,e ordenansanan, e kombenionan, i e promesanan grandísimo i presioso na kua nos por bira partisipante di e naturalesa dibino. Su plan ta definí nos identidat eterno i e kaminda ku mester sigui pa siña, kambia, krese, i , finalmente, biba serka Dje pa semper.
Manera ta spliká den “E Famia: Un Proklamashon na e Mundu”:
“Tur ser humano—maskulino i femenino—ta kreá den e imágen di Dios. Kada un ta yu hòmber i i yu muhé spiritual stimá di mayornan selestial, i komo tal kada unu tin un naturalesa i destino dibino. …
“Den e esfera premortal, yunan spiritual tantu hòmber i muhé tabata konosé i adorá Dios manera nan Tata Eterno i a aseptá Su plan pa medio di kua Su yunan por a optené un kurpa físiko i haña eksperensia terenal pa progresá yega perfekshon , i finalmente realisá nan destino dibino manera herederonan di bida eterno.”3
Dios ta primintí Su yunan ku si nan sigui e preseptonan di Su plan i e ehèmpel di Su Yu Stimá, warda e mandamentunan, i soportá den fe te na fin, anto pa birtut di e Salbador su Redenshon, nan “lo tin bida eterno, kual regalo ta esun di mas grandi di tur regalo di Dios.”4 Bida eterno ta e promesa final grandísimo i presioso.
Renasementu Spiritual
Nos ta komprondé mas kompletamente e promesanan grandísimo i presioso i ta kuminsá partisipá di e naturalesa dibino dor di respondé afirmativo na e yamada di Señor na gloria i birtut. Manera deskribí pa Pedro, e yamada ta kumplí dor di hasi esfuerso pa hui e korupshon ku ta den e mundu.
Ku nos progresá padilanti ku fe den e Salbador, anto pa motibu di Su Ekspiashon i pa e poder di e Spiritu Santu, “un kambio poderoso [ta tuma lugá]den nos, òf den nos kurason, ku nos no tin deseo mas pa hasi maldat, pero pa hasi bon kontinuamente.”5 Nos ta”nase di nobo; sí, nase di Dios, kambiá for di [nos] estado karnal i kaí, na un estado di rektitut siendo redimí di Dios.”6 “P’esei si kualke hòmber ta den Cristu, e ta un kriatura nobo: kosnan bieu a pasa bai; mira, tur kos a bira nobo.”7
Un kambio asina ekstenso den nos naturalesa tipikamente no ta sosedé lihé òf diripiente. Meskos ku e Salbador, nos tambe ta risibí “no un plenitut na kuminsamentu, pero [ta risibí] grasia riba grasia.8 Señor a bisa ku E lo duna nos liña riba liña, presepto riba presepto, un poko aki i un poko aya. El a primintí ku esnan ku skucha na Su preseptonan i duna oido na Su konseho lo ta bendishoná, pasobra nan lo siña sabiduria.”9
Ordenansanan di saserdosio i kombenionan sagrado ta esensial den e proseso kontinuo di renasementu spiritual; nan ta tambe e medionan ku Dios a apuntá pa kua nos ta risibí Su promesanan grandísimo i presioso. Ordenansanan ku ta wòrdu risibí dignamente i rekordá kontinuamente ta habri e kanalnan selestial pa medio di kua e poder di dibinidat por flui den nos bida. Kombenionan ku ta wòrdu honrá firmemente i rekordá semper ta duna propósito i siguransa di bendishonnan den mortalidat i pa eternidat.
Por ehèmpel, Dios ta primintí nos, segun nos fieldat, e kompania konstante di e di tres miembro di e Deidat, hasta e Spiritu Santu,10 ku pa medio di e Ekspiashon di JesuCristu nos por risibí i semper tin un remishon di nos pikánan,11 pa nos por risibí pas den e mundu aki,12 ku e Salbador a kibra e lasonan di morto i tabata viktorioso over di e graf,13 i ku famianan por ta huntu pa tempu i pa tur eternidat.
Ta komprendibel ku, tur e promesanan grandísimo i presioso ku Tata Selestial ta ofresé tur Su yunan no por wòrdu kontá òf deskribí ampliamente. Sinembargo, hasta e lista parsial di bendishonnan primintí i djis presentá por kousa kada un di nos pa “keda tur asombrá”14 i “kai abou i adorá e Tata”15 den e nòmber di JesuCristu.
Rekòrdá e Promesanan
Presidente Lorenzo Snow a atvertí, “Nos ta muchu dispuesto pa lubidá e gran propósito di bida, e motibu di nos Tata Selestial pa manda nos aki pa pone nos den mortalidat, tambe komo e yamamentu santu ku kua nos a wòrdu yamá; i pues, na lugá di elevá riba e kosnan chikitu transitorio. … nos ta laga nos mes baha na nivel di mundu sin bai na e yudansa dibino ku Dios a instituí, kual solamente por permití nos superá[e kosnan transitorio].”16
E Dia di Reposo i e santu tèmpel ta dos fuente spesífiko di yudansa dibino instituí pa Dios pa asistí nos den lanta riba e nivel i korupshon di mundu. Inisialmente nos por pensa ku e propósitonan general di tene e Dia di Reposo sagrado i bai tèmpel ta relatá pero distintivo. Mi ta kere, sinembargo, ku e dos propósitonan aki ta presisamente meskos i ta traha huntu pa fortalesé nos spiritualmente komo individuonan den nos hogar.
E Sabat
Despues ku Dios a krea tur kos, El a sosegá riba e di shete dia i a manda pa un dia kada siman ta e tempu pa sosegá pa yuda hende rekòrd’é.17 E Sabat ta Dios su tempu, un tempu sagrado apartá espesífikamente pa ador’é i pa risibí i rekordá Su promesanan grandi i presioso.
Señor a manda den e dispensashon aki
ku pa nos por mantené nos mes sin mancha di e mundu , nos tin ku bai na e kas di orashon i ofresé nos sakramentunan riba Su dia santu.
E Sabat ta un dia asigná pa nos pa sosegá di nos trabounan, i pa duna nos deboshon na e Altísimo.18
Pues, riba e Sabat nos ta adorá e Tata den e nòmber di e Yu dor di partisipá den e ordenansanan i siña tokante, risibí, rekordá, i renobá kombenionan. Riba Su dia sagrado, nos pensamentunan, akshonnan, i komportashon ta señalnan ku nos ta duna na Dios i un indikadó di nos amor pa E.19
Un propósito adishonal di e Sabat ta pa elevá nos vishon for di e kosnan di e mundu pa e bendishonnan di eternidat. Alehá durante e tempu sagrado aki for di hopi di e rutina regular di nos bida, nos por “mira na Dios i biba”20 dor di risibí i rekordá e promesanan grandísimo i presioso mediante kua nos por bira partisipante di naturalesa dibino.
E Santu Tèmpel
Señor semper a manda Su pueblo pa edifiká tèmpelnan, lugánan santu den kua Santunan digno ta efektuá seremonianan sagrado di evangelio i ordenansanan pa nan mes i pa e mortonan. Tèmpelnan ta e lugánan di mas sagrado pa adorá. Un tèmpel literalmente ta e kas di Señor, un espasio sagrado spesífiko poné apart pa adorashon di Dios i pa risibí i kòrda Su promesanan grandísimo i presioso.
Señor a manda e Santunan den e dispensashon aki pa organisá nan mes, pa prepará lokual ta nesesario, i pa establesé un kas di orashon, un kas di ayuno, un kas di fe, un kas di siñansa un kas di gloria un kas di òrdu, un kas di Dios.21 E enfoke prinsipal di adorashon na tèmpel ta e partisipashon den ordenansanan i siñansa, risibí, i rekòrdá, kombenionan. Nos ta pensa, aktua, i bisti diferente den tèmpel ku den otro lugánan ku nos ta frekuentá.
E meta prinsipal di tèmpel ta pa elevá nos vishon for di e kosnan di mundu pa e bendishonnan di eternidat. Alehá pa un tempu kòrtiku for di kosnan mundano ku kua nos ta familiar, nos por “mira na Dios i biba”22 dor di risibí i rekordá e promesanan grandísimo i presioso pa kua nos por bira partisipante di e naturalesa dibino.
Por fabor nota ku e dia di Sabat i e tèmpel, respektivamente, ta un tempu sagrado i un espasio sagrado spesífikamente poné apart pa adorá Dios i pa risibí i rekordá Su promesanan grandísimo i presioso na Su yunan. Manera instituí pa Dios, e metanan prinsipal di e dos fuentenan dibino aki ta eksaktamente igual: pa ku poder i kada bia enfoká nos atenshon riba nos Tata Selestial, Su Yu Unigénito, e Spiritu Santu, i e promesanan asosiá ku e ordenansanan i kombenionan di e Salbador su evangelio restourá.
Nos Hogar
Importante, un hogar mester ta e mihó kombinashon di tempu i espasio den kua individuonan i famia ta rekordá mas efektivamente Dios su promesanan grandísimo i presioso. Laga nos hogar pa pasa tempu den reunionnan djadumingu i drenta e espasio sagrado di un tèmpel ta vital pero insufisiente. Solamente ora nos trese e spiritu i fortalesa derivá for di e aktividatnan santu bèk ku nos den nos hogar nos por sostené nos enfoke riba e gran propósitonan di bida mortal i vense e korupshon ku ta den e mundu. Nos eksperensianan di Sabat i tèmpel mester ta katalisadó spiritual ku ta invadí hendenan i famianan i nos hogar ku rekordatorionan kontinuo di lèsnan klave siñá, ku e presensia i poder di e Spiritu Santu, ku kombershon kontinuo i profundo na Señor JesuCristu, i ku “un puresa perfekto di speransa”23den Su promesanan eterno.
E Sabat i e tèmpel por yuda nos pa establesé den nos hogar un kaminda mas ekselente24 manera nos ta “reuní tur kos den Cristu, tantu esnan ku ta den shelu, i esnan ku ta na tera; hasta den dje.”25 Lokual nos ta hasi den nos hogar ku Su tempu sagradoi ku lokual nos por siña den Su espasio sagrado ta nesesario pa bira partisipante di e naturalesa dibino.
Promesa i Testimonio
Nos por wòrdu superá fásilmente pa rutina i e asuntunan mundano di mortalidat. Drumi, kome, bisti, traha, hunga, hasi ehersisio, i hopi otro aktividatnan usual ta nesesario i importante. Pero finalmente, lokual nos bira ta e resultado di nos konosementu di i disposishon pa siña di e Tata, e Yu, i e Spiritu Santu; no ta simplemente e suma total di nos aktividatnan diario durante nos bida.
El evangelio ta muchu mas ku un lista di chekeo di rutina di tareanan diskreto pa wòrdu kumpli; mas bien, e ta un magnífiko tapeit di bèrdat bon hinka den otro26 i di wif huntu, diseñá pa yuda nos bira manera nos Tata Selestial i Señor JesuCristu, hasta partisipante di e naturalesa dibino. Di bèrdat, nos ta wòrdu siegá dor di mira mas leu ku e marka27 ora e kópula di realidat spiritual ta lagá den sombra pa e kuidonan, prekupashonnan, kasualidatnan di e mundu.
Ora nos ta sabio i ta invitá e Spiritu Santu pa ta nos guia,28 mi ta primintí ku E lo siña nos kiko ta bèrdat. “E lo testifiká di Cristu, [i] iluminá nos mente ku bista di shelu”29 miéntras nos ta hasi esfuerso pa kumpli nos destino eterno i bira partisipantenan di e naturalesa dibino.
Mi ta duna mi testimonio ku e promesanan grandísimo i presioso asosiá ku nos ordenansanan i kombenionan ta bèrdat. Señor a deklará esaki:
El a bisa ku El a duna nos mandamentu tokante kon nos mester aktua dilanti Dje, p’asina ku e por hiba na nos salbashon.
El a deklará ku e ta obligá ora nos ta hasi lokual E ta bisa, pero ora nos no hasi esaki, E ta bisa, nos no tin promesa di Dje.30
Mi ta testifiká ku nos Tata Selestial ta biba i ta e outor di e plan di salbashon. JesuCristu ta Su Yu Unigénito, nos Salbador i Redentor. E ta biba. I mi ta testifiká ku e Tata su plan i promesanan, e Salbador su Ekspiashon, i e kompania di e Spiritu Santu ta hasi posibel pa pas den e mundu aki i bida eterno den e mundu benidero.31 Di e kosnan aki mi ta testifiká den e nòmber sagrado di Señor JesuCristu, amèn.