Un Anhelo pa Kas
Bira bo alma den direkshon di e lus. Kuminsá bo propio biahe pa kas. Ora bo hasi esaki, bo bida lo bira mihó, mas felis, i ku mas propósito.
Resientemente, miéntras nos a reuní ku Presidente Thomas S. Monson, e la ekspresá, ku gran solemnidat i un rostro di felisidat, kuantu e ta stima Señor i ku e sa ku Señor stima e. Mi kerido rumannan, mi sa ku Presidente Monson ta hopi agradesido pa boso amor, boso orashon, i boso dedikashon na Señor i Su gran evangelio.
Bobbie e Kachó Maravioso
Kasi un siglo pasa, un famia di Oregon tabata pasa fakansi na Indiana – mas ku 3.200 kilometer leu – ora nan a pèrdè nan kerido kachó, Bobbie. E famia ku ansiedat a buska pa nan kachó tur kaminda pero sin logra. No por a haña Bobbie.
Ku kurason kibra, nan a biaha bai kas, kada kilometer tabata hiba nan mas leu for di nan kerido kachó.
Seis luna despues, e famia tabata sorprendí di haña Bobbie dilanti nan porta di kas na Oregon. “Ku sarna, flaku, pianan gasta – [e] la aparentá di a kana hinter e distansia … su so.” Bobbie su historia a kaptura e imaginashon di hende de hinter Merka, i a bira konosí komo Bobbie e Kachó Maravioso.
Bobbie no ta e úniko animal ku a sorprendé sientífikonan ku e sentido inkreibel di direkshon i instinto pa kas. Algun poblashon di barbulètè Monarka ta migra 4.800 kilometer kada aña pa klimanan ku ta mihó pa nan sobrebibensia. Turtuganan ku lomba di kueru ta krusa laman Pasífiko for di Indonesia ten a kosta di California. Bayenanan ta landa for di laman friu na Polo Nort i Polo Sur pa e ekuador i bek. Kisas ainda mas inkreibel, e paranan ártiko ta bula for di e Sirkulo Ártiko pa Antártika i bek tur aña, mas o ménos 97.000 kilometer.
Ora sientífiko a studia e komportashon fasinante aki, nan ta hasi preguntanan manera “Kon nan sa unda pa bai?” i “Kon kada generashon ku ta sigui ta siña e tipo di komportashon aki?”
Ora m’a lesa di e instinto di animal poderoso aki, solamente mi por a maravia, “Ta posibel pa humano por tin anhelo similar – un sistema di guia interno, kisas – ku ta trèk nan pa nan hogar selestial?”
Mi ta kere ku kada hòmber, muhé, i mucha a sinti e yamada di shelu den un momentu den nan bida. Profundo den nos tin un anhelo pa di un manera pasa e velo i brasa nos Mayornan Selestial ku tabata konosé i apresiá.
Tin algun ku por suprimí e anhelonan ei i oprimí nan alma pa ku su yamada. Pero esnan ku no ta tapa e lus den nan mes por barka den un biahe inkreibel – un migrashon maravioso pa klimanan selestial.
Dios ta Yama Bo
E mensahe sublime di E Iglesia di JesuCristo di e Santunan di Delaster Dianan ta ku Dios ta nos Tata, e ta preokupá pa nos, i ku tin un manera pa regresá serka djE.
Dios ta yama bo.
Dios konosé tur bo pensamentunan, bo dolónan, i bo speransanan mas grandi. Dios konosé kuantu biaha bo a busk’é. E tempunan ku bo a sinti goso sin límite. E tantu tempunan ku bo a sinti bo indefenso, konfuso, i rabia. E tantu tempunan ku bo a faya.
Asina mes, no ta importá bo historia – si bo a totobiá, faya, sinti bo kibra, amargá, traishoná, or bati – sa ku bo no ta bo so. Ainda Dios ta yama bo.
E Salbador ta ekstendé Su mannan na bo. I meskos ku El a hasi ku e piskadónan ku tabata pará hopi tempu pasá na e oria di e Laman Galilea,ku amor infinito E ta papia ku bo: “Bin, sigui mi.”
Si bo lo skuch’é, E lo papia ku bo e mesun dia aki.
Ora bo kana e kaminda di disípulado – ora bo kuminsá move den direkshon di Tata Selestial – tin algu den bo ku lo konfirmá ku bo a risibí e yamada di e Salbador i ku bo a pone bo kurason den direkshon di e lus. E lo bisa bo ku bo ta riba e kaminda korekto, i ku bo ta regresando bo kas.
For di komienso di tempu, Dios su profetanan a urgi e hendenan di nan tempu pa “skucha e bos di Señor boso Dios, … warda su mandamentunan i su statutonan … , [i] bai serka [djE] ku tur bo kurason, i ku tur bo alma.”
E eskrituranan ta siña nos mil rasonnan dikon nos mester hasi esaki.
Awe, laga mi ofresé dos rason dikon nos mester bai den direkshon di Señor.
Promé: Bo bida lo ta mihó.
Segundo: Dios lo usabo pa hasi bida di otronan mas mihó.
Bo Bida Lo Ta Mihó
Mi ta testifiká ku ora bo barka riba òf kontinuá e biahe maravioso ku ta hiba bon a Dios, nos bida nan lo bira mihó.
Esaki no ta nifiká ku nos bidanan lo ta liber di doló. Nos tur sa di segundonan fiel di Kristu ku ta sufri tragedia i inhustisia – JesuCristo mes a sufri mas ku tur hende. Meskos ku e Tata ta laga “su solo subi riba e malbadonan i riba e esnan bon,” E ta permití tambe pa atversidat tèst e hustu i e inhustu. De echo, tin biaha e ta parse manera nos bidanan ta mas difísil pasobra nos ta purba na biba nos fe.
No, siguiendo e Salbador lo no kita tur nos pruebanan. Sin embargo, e lo kita e bareranan entre abo i e yudansa ku bo Tata Selestial ke duna bo. E lo ta ku bo. E lo dirigí kada paso di bo. E lo kana banda di bo i hasta karga bo ora bo nesesidat ta grandi.
Lo bo eksperensia e fruta sublime di e Espíritu: “amor, goso, pas, longanimidat, gentilesa, bondat, [i] fe.”
E frutanan spiritual no ta un produkto di prosperidat temporal, éksito i bon fortuna. Nan ta bin dor di sigui e Salbador, i nan por ta nos asistentenan fiel hasta den e tormentonan mas skur.
E kandelanan i tumulto di bida mortal por ta menasante i spantoso, pero esnan ku ta inkliná nan kurason na Dios lo wòrdu brasa dor di Su pas. Nan goso lo no disminuí. Nan lo no wòrdu bandoná ni lubidá.
Konfia den Señor ku hinter bo kurason; “skrituranan ta siña, i no konfia den bo propio entendimentu. Den tur bo kaminda rekonosé e, i e lo guia bo kaminda.”
Esnan ku skucha e yamada interno i buska Dios, esnan ku ta hasi orashon, kere, i kana den e kaminda ku e Salbador a prepará – hasta ora nan trompeká den kaminda – risibí e siguransa Konsolador ku “tur kos lo ta pa [nan] propio bon.”
Pasobra Dios “ta duna forsa na esnan kansa i ta subi e poder di esnan ku ta debil.”
“Pasobra maske e rekto kai shete biaha, nan lo subi atrobe.”
I Señor den Su bondat ta puntra
Bo ke eksperensia goso duradero?
Bo ta anhelá na sinti den bo kurason e pas ku ta surpasá tur entendimentu?
E ora ei bira bo alma pa ku e lus.
Kuminsá bo propio biahe maravioso pa kas.
Ora bo hasi esei, bo bida lo ta mas mihó, felis, i ku mas propósito.
Dios Lo Usa Bo
Riba bo biahe bek serka Tata Selestial lo bo realisá pronto ku e biahe aki no ta solamente di enfoká riba bo propio bida. No, e kaminda inevitablemente ta hibabo na ta un bendishon den bida di Dios su otro yunan – bo rumannan. I e kos interesante tokante e biahe ta ku miéntras bo ta sirbi Dios, i ora bo ta kuida i yuda pa bendishoná bida di bo próhimo, lo bo mira gran progreso den bo propio bida, den maneranan ku kasi bo no por imaginá.
Kisas bo no ta konsiderá bo mes masha di ayudo; kisas bo no ta konsiderá bo mes un bendishon den bida di un hende. Hopi biaha, ora nos wak nos mes, nos ta mira nos limitashonnan i defisiensianan. Kisas nos por pensa ku nos mester ta “mas” di algu pa Dios por usa nos – mas inteligente, mas riku, mas karismátiko, mas talentoso, mas spiritual. Bendishonnan lo bin no masha pa motibu di bo abilidatnan pero mas pa bo eskohonan. I e Dios di universo lo traha ku bo i pa medio di bo, maginifikando bo humilde esfuerso pa Su propósitonan.
Su obra semper a avansá riba e prinsipio importante aki: “For di kosnan chikitu ta sigui e kosnan ku ta grandi.”
Miéntras e tabata skibiendo na e Santunan na Korintio, Pablo a opservá ku no hopi entre e miembronan einan tabata wòrdu konsiderá sabio den stándartnan di mundu. Pero esei no a importá, pasobra, “Dios a skohe e kosnan debil di mundu pa konfundí e kosnan ku ta poderoso.”
E historia di Dios su obra ta yena ku hende ku ta konsiderá nan mes inadekuá. Pero nan a sirbi humildemente, konfiando den e grasia di Dios, i nan a risibí Su promesa: “Nan brasa lo ta mi brasa, i Ami lo ta nan eskudo … , i nan lo bringa ku kurashi p’ami; i … [Ami lo] preservá nan.”
E verano ku a pasa nos famia tabatin un oportunidat maravioso pa bishita algun sitio históriko di Iglesia na e parti Ost di Merka. Den un manera spesial, nos a rebibá e historia di e tempu ei. Hende ku ma yega di lesa ofer di nan – hende manera Martin Harris, Oliverio Cowdery, i Thomas B. Marsh – a bira mas real p’ami miéntras nos tabata kana kaminda nan a kana i meditá riba e sakrifisionan ku nan a hasi pa konstruí e reino di Dios.
Nan tabatin hopi karakterístika ku a permití nan hasi kontribushonnan signifikante na e Restourashon di e Iglesia di JesuCristo. Pero tambe nan tabata humano, i hende ku por faya – meskos ku abo i ami. Algun di nan a haña nan mes den diferensia ku e Profeta Jose Smith i a sali bai laga Iglesia. Despues, hopi di e mesun hendenan ei tabatin un kambio di kurason, nan a humiá nan mes, i un biaha mas buska e hermandat ku e Santunan.
Nos por tin e tendensia di husga e rumannan aki i otronan manera nan. Nos por bisa, “Ami nunka lo a bandoná e Profeta Jose.”
Miéntras ku esei por ta bèrdat, nos no sa berdaderamente kon e bida tabata e tempu ei, den e sirkunstansianan ei. No, nan no tabata perfekto, pero kon alentador ta pa sa ku Dios tabata por a usa nan tòg. E tabata konosé nan forsa i nan debilidat, i E la duna nan e oportunidat ekstraordinario pa kontribuí ku un verso òf un melodia na e himno glorioso di e Restourashon.
Kon alentador ta pa sa, maske nos ta imperfekto, ku si nos kurasonnan ta inkliná na Dios, E lo ta generoso i bondadoso i usa nos pa Su propósitonan.
Esnan ku stima i sirbi Dios i su próhimo, i partisipá humildemente i aktivamente den Su obra, lo mira kosnan maravioso pasa den nan bida i den bida di esnan ku nan ta stima.
Portanan ku tabata parse sera lo habri.
Angelnan lo bai dilanti nan i prepará e kaminda.
No ta importábo posishon den komunidat òf den e Iglesia, Dios lo usa bo, si bo tin e deseo. E lo magnifiká bo deseonan rekto i kambia e akshonnan ku bo planta den un kosecha amplio di bondat.
Nos No Por Yega einan Riba Piloto Outomátiko
Nos ta, kada un di nos, “estranheronan i peregrino” den e mundu aki. Den hopi manera, nos ta leu fo’i kas. Pero esei no ta nifiká ku nos mester sinti pèrdí òf nos so.
Nos kerido Tata den Shelu a duna nos e Lus di Kristu. I profundo den kada un di nos, tin un konekshon selestial ta urgi nos pa bira nos wowo i kurason na djE miéntras nos ta hasiendo nos biahe bek na nos hogar selestial.
Esaki ta rekerí esfuerso. Bo no por yega einan sin hasi esfuerso pa siña di djE, komprondé Su instrukshonnan, apliká nan, i pone un pia dilanti di e otro.
No, bida no ta manera un outo ku ta kore riba su mes. E no ta un avion riba piloto outomátiko.
Bo no por simplemente flota den e awanan di bida i konfia ku e koriente ta hiba bo kaminda bo ta spera di ta un dia. Disípulado ta rekerí pa bo landa kontra di e koriente.
Ningun hende ta responsabel pa bo biahe persona. E Salbador lo yuda bo i prepará e kaminda bo dilanti, pero e kompromiso pa sigui E i warda Su mandamentunan mester bini di bo. Esei ta bo propio karga, bo propio privilegio.
Esaki ta bo gran aventura.
Por fabor skucha e yamada di bo Salbador.
Siguié.
Señor a establesé E Iglesia di JesuCristo di e Santunan di Delaster Dianan pa yuda bo den e kompromiso pa sirbi Dios i bo próhimo. E propósito ta pa enkurashá, siña, halsa, i inspirá. E Iglesia maravioso aki ta proveé oportunidatnan pa bo ehersé kompashon, saka un man pa otronan, i renobá i mantené konvenionan sagrado. E ta diseñá pa bendishoná bo bida i mehorá bo hogar, komunidat, i nashon.
Bin, uni na nos i konfia den Señor. Entrega bo talentonan na Su obra maravioso. Saka man, enkurashá, sana, i apoyá tur esnan ku ta deseá i sinti e yamada di anhelo pa nos hogar superior. Laga nos uni huntu den e biahe pa klimanan di shelu.
E evangelio ta transendé e mensahe di speransa, felisidat, i goso. E ta e kaminda ku ta guia nos pa kas.
Ora nos ta brasa e evangelio den fe i obra, kada dia i kada ora, nos lo aserka mas serka nos Dios. Nos bida lo ta mihó, i Señor lo usa nos den maneranan remarkabel pa bendishoná esnan ku ta rondó di nos i kumpli ku Su propósitonan eterno. Di esaki mi ta testifiká i laga bo ku mi bendishon den nòmber sagrado di JesuCristo, amèn.