Señor ta Guia Su Iglesia
Señor Su liderazgo di Su Iglesia ta rekerí gran i firme fe di tur ku ta sirbiÉ na tera.
Mi rumannan hòmber stimá ku ta poseé e saserdosio di Dios, awe nochi mi ke papia tokante e manera maravioso na kual Señor ta guia Su reino riba tera. Ya kaba bo konosé e base. Mi ta resa ku e Spiritu Santu lo konfirmá nan na bo.
Promé, JesuCristu ta e kabes di e Iglesia riba henter mundu.
Di dos, E ta guia Su Iglesia awendia dor di papia ku hòmbernan yamá komo profeta i E ta hasi e por medio di revelashon.
Di très, E la duna revelashon na Su profetanan hopi tempu pasá, i lo kontinuá hasiendo esaki.
Di kuater, E ta duna revelashonnan afirmativo na esnan ku ta sirbi bou di e liderazgo di Su profetanan.
For di e base ei, nos ta rekonosé ku Señor Su liderazgo di Su Iglesia ta rekerí gran i firme fe for di tur esnan ku ta sirbiÉ na tera.
Por instante, ta tuma fe pa kere ku e Señor resusitá ta tira bista riba e detayenan diario di Su reino. Ta rekerí fe pa kere ku E ta yama hendenan imperfekto den posishonnan di konfiansa. Ta rekerí fe pa kere ku E konosé e hendenan ku e ta yama perfektamente, tur dos den nan kapasidatnan i nan potensha, i asina no ta hasi ningun fout den Su yamamentunan.
Esaki por ta trese un sonrisa of un sakudí di kabes for di algun den e oudiensia aki— tantu esnan ku ta pensa ku nan mes yamamentu pa sirbi por tabata un fout, komo esnan ku ta mira algun ku nan konosé den nan mente, ku ta parse inadekuá na nan lugá den Señor Su reino. Mi konseho pa tur dos grupo ta pa posponé huisio te ora ku bo por mira mas mihó kiko Señor ta mira. E wisio ku bo tin ku hasi, na lugá, ta ku abotin e kapasidat di risibí revelashon i áktua di akuerdo ku ne sin temor.
Ta rekeré fe pa hasi esaki. I ta rekerí hasta mas fe pa kere ku Señor a yama sirbientenan humano imperfekto pa guia abo. Mi intenshon awe nochi ta pa edifiká bo fe ku Dios ta dirigí bo den bo servisio na Dje. I hasta mas importante, mi speransa ta ba edifiká bo fe ku Señor ta inspirá e personanan imperfekto ku E a yama komo bo lidernan.
Bo por ta pensa, na promé instante, ku fe manera esei no ta importante den e suseso di Señor Su Iglesia i reino. No opstante, bo por deskubrí—no ta importá unda bo ta den e kadena di servisio di saserdosio, for di e Señor su profeta te ku e poseedor di e Saserdosio Aaróniko nobo—ku fe ta esensial.
Laga nos kuminsá ku kiko fe ta nifiká pa un presidente di e quorum di Maestronan of diákononan. Ta importante p’e pa por tin fe ku Señor a yam’é personalmente, sabiendo ku e maestro ei su debilidatnan i forsanan. E tin ku tin fe ku e hòmber ku a distribuí e yamamentu a risibí revelashon dor di e Spiritu di Dios. Su konseheronan i miembronan di su quorum tin e mes un fe pa siguiÉ ku konfiansa sin temor.
Mi a mira asina un konfiansa ora ku un mucha hòmber a sinta huntu ku su presidensha di quorum di diákononan un Djadumingu mainta. E tabata nan sekretario resien yamá. E presidensha yon ei a konsultá ku otro. Nan a papia tokante diferente manera ku nan por ehekutá e petishon di e obispu pa trese un mucha hòmber ménos aktivo bèk den iglesia. Despues di orashon i diskushon, nan a nombra e sekretario pa bai e kas di e mucha hòmber ku nunka no a bini un reunion, i pa invit’é.
E sekretario no tabata konosé e mucha hòmber, pero e tabata sa ku un di e mayornan di e mucha tabata ménos aktivo i e otro no tabata un miembro i no amistoso. E sekretario a sinti angustia, pero no temor. E tabata sa ku e profeta di Dios a puntra poseedornan di saserdosio pa trese bèk karnénan pèrdí. I el a tende e orashon di su presidensia. el a tende nan bini na akuerdo riba e nòmber di e mucha hòmber i riba Su nòmber.
Mi tabata mirando ora ku e sekretario a kana den e kaya direkshon pa e mucha hòmber ménos aktivo su kas. E tabata kana pokopoko manera e tabata bai hasi algu peligroso. Pero el a bin bèk riba e kaminda ku un mucha hòmber sonriendo ku felisidat. Mi no ta sigur si e tabata sa na e momentu ei, pero el a bai ku fe ku e tabata ta na Señor su enkargo . E fe ei a keda huntu ku ne i a krese den su añanan komo un misionero, un tata, un lider di Hombres Jovenes i un obispu.
Laga nos papia tokante kiko un fe asina ta nifiká pa un obispu. Un obispu tin biaha ta wòrdu yamá pa sirbi hendenan ku konosé le bon. Miembronan di Bario sa algu di su debilidatnan humano i su forsa spiritual, i nan sa ku otro hendenan den e bario por a wòrdu yamá—otro hendenan ku ta parse mas mihó eduká, mas eksperto, mas plasentero, of mas bunita.
E miembronan aki tin ku sa ku e yamamentu pa sirbi komo un obispu a bini for di Señor, dor di revelashon. Sin nan fe, e obispu ku a wòrdu yamá di Dios lo haña e mas difísil pa risibí e revelashon ku e mester pa yuda nan. E lo no logra sin e fe di e miembronan pa sostené.
Afortunadamente, e kontrario tambe ta bèrdat. Pensa riba e sirbiente di Señor Rei Benjamin, ku a guia su pueblo pa arepentí. E hendenan su kurason a wòrdu suavisá dor di nan fe ku e tabata yamá di Dios, a pesar di su debilidatnan humano, i ku su palabranan tabata bini di Dios. Bo ta kòrda kiko e hendenan a bisa: “Si, nos ta kere tur e palabranan ku bo a bisa nos; …nos sa di nan garantia i bèrdat, paso e Spiritu di Señor Omnipotente, ku a wèldu un kambio poderoso den nos, mihó bisá den nos kurashon, ku nos no tin mas disposishon pa hasi maldat, pero pa hasi bon kontinuamente” (Mosíah 5:2).
Pa un lider logra den e obra di Señor, e hendenan su konfiansa ku el a wòrdu yamá dor di Dios mester surpasá nan bista di su faltanan i debilidatnan mortal. Bo ta kòrda kon Rei Benjamin a splika su ròl komo lider:
“Mi no a komandá bo pa bo bini aki pa bo lo teme mi, of ku lo bo pensa ku ami di mi mes ta mas ku un hòmber mortal.
“Pero ami ta manera boso mes, suheto na tur manera di faltanan den kurpa i mente; tòg mi a wòrdu skohé dor di e pueblo aki, i konsagrá dor di mi tata, i a wòrdu permití dor di e man di Señor ku lo mi ta un soberano i un rei riba e pueblo aki; i a wòrdu wardá i preservá dor do Su poder inigualá, pa sirbi ku henter e alma, mente i forsa ku e Señor a otorgá na mi” (Mosiah 2:10–11).
Bo lider den Señor su Iglesia por parse na bo debil i humano of por parse pa bo fuerte i inspirá. E echo ta ku kada lider ta un meskla di e kalidatnan ei i mas. Loke ta yuda sirbientenan di Señor ku a wòrdu yamá pa guia nos ta ora ku nos por mira nan komo Señor a hasi ora ku el a yama nan.
Señor ta mira Su sirbientenan perfektamente. E ta mira nan potensial i nan futuro. I E sa kon nan karakter por wòrdu kambiá. Tambe E sa kon nan por wòrdu kambiá dor di nan eksperensianan ku e hendenan ku nan ta guia.
Bo por tabatin e eksperensha di a wòrdu hasí mas fuerte dor di e hendenan ku bo a wòrdu yamá pa sirbi. Un biaha mi a wòrdu yamá komo un obispu di hóbennan soltero. Mi no ta sigur si Señor su propósito tabata mas pa ki kambionan ami por a yuda E pa hasi den nan of e kambionan E tabata sa ku nan lo hasi den mi.
Te na sierto altura mi no ta komprondé, Mayoría di e hóbennan ei den e bario ei tabata hasi manera mi a wòrdu yamá di Dios spesialmente pa nan. Nan tabata mira mi debilidatnan pero tabata wak mas aleu ku nan.
Mi ta kòrda un hòmber hóben a puntra pa konseho tokante di su eskohonan edukashonal. E tabata den su promé aña na un hopi bon universidat. Un siman despues el a traha un sita ku mi.
Ora ku el a bini den mi ofisina, el a sorprendé mi dor di puntra, “Obispu, nos por hasi orashon promé ku nos papia? I nos por hasi esaki na rudia? I mi tin mag di hasi e orashon?”
Su petishon a sorprendé mi. Pero su orashon a sorprendé mi mas ainda. el a bai algu manera asina aki: “Tata Selestial, Bo sa ku Obispu Eyring a duna mi konseho siman pasá, i e no a traha. Por fabor inspir’é pa sa kiko mi tin di hasi awor.”
Awor po por hari e kos ei, pero ami no. E tabata sa kaba kiko Señor tabata ke pa e hasi. Pero el a honra e ofisina di un obispu den Señor Su Iglesia i por ta tabata ke pa mi tin un chèns pa atkerí un konfiansa mas grandi pa risibí revelashon den e yamamentu ei.
E la logra. Manera nos a lanta para i a kai sinta, e revelashon a bini na mi. Mi a bis’é kiko mi a sinti Señor lo ke pa e hasi. E tabata solamente 18 aña di edat, pero e tabata tin madures den añanan spiritual.
E tabata sa kaba ku e no tabatin di bai serka un obispu ku un problema asina. Pero el a siña pa sostené Señor su sirbientenan hasta den su debilidatnan mortal. Mas aleu el a bin bira un presidente di Staka. el a karga huntu ku ne e lès ku nos a siña huntu ku otro: si bo tin fe ku Señor ta guia Su Iglesia dor di revelashon na e sirbientenan imperfekto ku E ta yama, Señor lo habri e bentananan di shelu p’e, manera E lo hasi pa bo.
For di e eksperensha ei, mi a siña e lès ku e fe di e hendenan ku nos ta sirbi, tin biaha mas ku nos mes fe, ta trese nos revelashon den Señor su servisio.
Esaki tabata un otro lès pa mi. Si e hóben ei a husga mi pa mi fayo pa dun’é bon konseho e promé biaha, e nunka lo a bin puntra atrobe. I asina, dor di skohe pa no husga mi, el a risibí e konfirmashon ku e tabata deseá.
Un otro lès mas for di e eksperensha ei a yuda mi bon. Te mas leu ku mi sa, nunka e no a konta niun hende den e bario ku ami no a duna bon konseho inisialmente. Si el a hasi esei, e por a redusí e fe di otronan den e bario pa konfia e obispu su inspirashon.
Mi ta trata di no husga sirbientenan di Señor of di papia over di nan debilidatnan aparente. I mi ta purba di siña esaki dor di ehèmpel na mi yunan. Presidente James E. Faust a kompartí un kredo ku mi ta tratando di hasi propio. Mi ta rekomendá e na bo:
“Nos …tin ku apoyá i sostené nos lidernan lokal, paso nan… a wòrdu ‘yamá i eskohé.’ Kada miembro di e Iglesia aki por risibí konseho di un obispu of un presidente di rama, un presidente di staka of mishon, i e Presidente di e Iglesia i su kolaboradónan. Niun di e rumannan hòmber aki a pidi pa haña su yamamentu. Niun di nan no ta perfekto. Tog nan ta sirbientenan di Señor, yamá dor di Dje dor di esnan outorisá pa haña inspirashon. Esnan yamá, sostené, i apartá tin derecho di tin nos apoyo ameno.
“…Falta di respèt pa lidernan eklesiástiko a kousa hopi pa sufri debilidat spiritual i kaída. Nos lo mester mira mas aleu ku kualke imperfekshon persibí, frèt of manchanan di e hòmbernan yamá pa presidí riba nos, i mantené e ofisina ku nan ta karga” (“Yamá i Eskohé”, Liahona, Nov. 2005, 54–55).,
E konseho ei ta bendishoná sirbientenan di Dios bou di tur kondishon.
Den e promé dianan di Señor su Iglesia, lidernan serka di e Profeta José Smith a kuminsá papia di su faltanan. Hasta ku tur kos ku nan a mira i sa di su relashon ku Señor, nan spiritu di krítika i selo a plama manera un plaga. Un di e Diesdosnan a pone pa nos tur e norma di fe i lealtat ku nos mester tin si nos por ke sirbi den Señor su reino.
Esaki ta e rapòrt: “Diferente eldernan a yama un reunion den tèmpel pa tur esnan ku tabata konsiderá José Smith un profeta renegá. Nan tabata intenshoná pa apuntá David Whitmer komo e lider di Iglesia nobo. … Despues di skucha e argumentunan kontra di e Profeta, Brigham [Young] a lanta i testifiká, ‘José tabata un Profeta, i mi tabata sa, i ku nan tin mag di zundra i kalumniá kuantu ku nan ke; nan no por destruí e nombramentu di e Profeta di Dios, nan por solamente destruí nan mes outoridat, korta e hilu ku ta mara nan na e Profeta i na Dios, i senk nan mes den fièrnu” ( (Historia di Iglesia den e Plenitut di Tempu Manual di Studiante [Manual di Sistema di Edukashonal, [2003], di 2 ed., 174; mira tambe Siñansanan di Presidentenan di Iglesia: Brigham Young, [1997], 79).
Tin un hilu ku ta mara nos na Señor den nos servisio. E ta kore for di kualke kaminda ku nos ta wòrdu yamá pa sirbi den e reino, te na esnan ku ta yamá pa presidí over di nos den e saserdosio, i na e profeta, ku ta mará na Señor. E ta rekerí fe i humildat pa sirbi den e lugá kaminda nos ta wòrdu yamá, pa konfia ku Señor a yama nos i esnan ku ta presidí over di nos, i pa sostené nan ku fe kompletu.
Lo tin temporada, manera tabata tin den e dianan di Kirtland, ora ku nos mester di fe i e integridat di Brigham Young pa para na e lugá ku Señor a yama nos p’é, leal na Su profeta i na e lidernan ku El a pone na lugá.
Mi ta kompartí ku bo mi testimonio solèm pero tog yen di goso ku Señor JesuCristu ta na kabes. E ta guia su Iglesia i Su sirbientenan. Mi ta duna testimonio ku Thomas S. Monson ta e úniko hòmber ku ta ta tene i ehersitá tur e yabinan di e saserdosio sagrado riba tera na e momentu aki. I mi ta pidi bendishonnan riba tur e sirbientenan humilde ku ta sirbi tan dispuesto i bon den e Iglesia restourá di JesuCristu, di kua e guia personalmente. Mi ta tèstifiká ku José Smith a mira Dios e Tata i JesuCristu. Nan a papia ku ne. E yabinan di e saserdosio a wòrdu restourá pa e bendishon di tur Tata Selestial su yunan. Ta nos mishon i nos konfiansa pa sirbi den nos lugá den e kousa di Señor. Den e nòmber di JesuCristu, amèn.