Sea, Boso Pues Perfekto—Eventualmente
Si nos perseverá, algun momentu den eternidat nos refinamentu lo wòrdu finalisá i kompletá.
E skrituranan a wòrdu skibí pa bendishoná i kurashá nos, i sigur nan ta hasi esei. Nos ta gradesí shelu pa tur kapítulo i verso ku hamas nos a haña. Pero boso a nota ku de bes en kuando un pasashi ta aparesé ku ta kòrda nos ku nos ta imperfekto? Por ehèmpel, e Predikashi riba Seru ta kuminsá ku siñansanankalmante i amabel, pero den e versonan ku ta sigui, ta bisa nos—entre otro kosnan—no solamente pa no mata pero tambe pa hasta no rabia. Ta bisa nos pa no kometé adulterio, pero tambe pa hasta no tin pensamentunan impuro. Na esnan ku ta pidi, nos tin ku duna nos paña i despues nos mantel tambe. Nos mester stima nos enemigunan, bendishoná esnan ku ta maldishoná nos, i hasi bon na esnan ku ta odia nos.
Si esei ta boso estudio di skritura di mainta, i despues di lesa djis te asina leu boso ta bastante sigur ku boso no ta haña bon kualifikashon den e buki di evangelio, e e ora ei e delaster mandamentu den e kadena lo no laga duda serka boso: “Sea perfekto antó, meskos ku boso Tata …den shelu ta perfekto.” Ku e mandamentu konkluyente aki, nos ke bai kama bèk i tapa nos kabes ku deken. Tal metanan selestial ta parse leu for di nos alkanse. Pero ku seguridat Señor nunka lo no duna nos un mandamentu ku E sa ku nos lo no por warda. Laga nos wak unda e dilema konfuso aki ta hiba nos.
Rònt den Iglesia mi ta tende hopi ku ta lucha ku e asuntu aki: “Mi no ta sufisiente bon.” “Mi ta asina imperfekto.” “Nunka lo mi ta sufisiente digno.” Esaki mi ta tende di teenagernan, mishoneronan, esnan resien kombertí, i di esnan ku ta miembro henter nan bida. Un hermana Santu di Delaster dia ku komprendementu, Hermana Darla Isackson a opservá ku Satanas a logra pa hasi kombenionan i mandamentunan parse manera maldishon i kondenashon. Pa algun el a kambia idealnan i inspirashon di e evangelio den rabia riba nan mes i di ta miserabel.
Lokual mi ta bisa awor di ningun manera no ta ninga òf disminuí kualke mandamentu ku Dios a yega di duna nos. Mi ta kere den Su perfekshon, i mi sa ku nos ta Su yunan spiritual ku potensial dibino pa bira meskos ku E ta. Mi sa tambe ku, komo yunan di Dios, nos no tin ku ninga òf disminuí nos mes, komo si fuera ku si nos kastigá nos mes di algun moda lo hasi nos e persona ku Dios ke pa nos bira. No! Ku e disposishon pa arepentí i un deseo pa oumentá rektitut semper den nos kurason, lo mi spera ku nos por buska mehoramentu personal den un manera ku no ta inkluí pa haña úlcera òf anorexia, sinti depresivo òf disminuí nos outo-estima grandemente. Esei no ta lokual Señor ke pa muchanan di Primaria òf kualke otro hende ku honestamente te kanta , Yo trato de ser como Cristo [Mi ta purba di ta manera Cristu].
Pa pone e asuntu aki den konteksto,pèrmití mi rekòrdá nos tur ku nos ta biba den un mundu kaí i pa awor nos ta hende kaí. Nos ta den e reino telestial, esei ta wòrdu di spèl ku un t i no un s. Manera Presidente Russell M. Nelson a siña, aki den mortalidat perfekshon ta “pendiente”ainda.
Pues mi ta kere ku Jesus no a intenshoná pa Su predikashi riba e tema aki ta un martin verbal pa bati nos tokante nos defisiensianan. No, mi ta kere ku El a intenshoná pa e ta un tributo na ken i kiko Dios e Tata Eterno ta i kiko nos por logra huntu ku n’e den eternidat. Den kualke kaso, mi ta gradisí pa sa ku apesar di mi imperfekshonnan al ménos Dios ta perfekto—i ku al ménos E, por ehèmpel ta kapas pa stima Su enemigunan, pasobra hopi bia, dor di e “hòmber natural” i muhé den nos, boso i ami tin bia ta e enemigu ei. Esta gradesí mi ta ku al ménos Dios por bendishoná esnan ku ta uz’é apesar di ta odi’é pasobra sin nos ke òf intenshon pa hasi asina, nos tur ta uz’é tin bia. Mi ta gradisí ku Dios ta miserikordioso i un pasifikadó pasobra mi mester di miserikòrdia i e mundu mester di pas. Klaro, tur lokual nos ta bisa di e Tata su birtutnan nos por bisa tambe di Su Yu Unigénito, ku a biba i muri te na e mes un perfekshon.
Mi ta hasi purá pa bisa ku enfoká riba e Tata i e Yu su logronan mas bien ku nos fayonan no ta duna nos niun tiki di hustifikashon pa bida sin disiplina òf baha nos normanan. No, for di kuminsamentu e evangelio tabata “pa perfekshoná e santunan, … te ora nos … bini na un hòmber perfekto na midi dje estatura di e plenitut di Cristu.”Mi ta simplemente sugerí ku por lo ménos un propósito di un skritura òf mandamentu su meta prinsipal lo por ta pa rekòrdá nos kon magnífiko “e estatura di e plenitut di Cristuta realmente, pa inspirá den nos mas amor i atmirashon pa E i deseo mas grandi pa ta manera E.”
“Sí, bini na Cristu, i wòrdu perfekshoná den Dje… ,” Moroni ta roga. “Stima Dios ku henter boso alma, mente i forsa, despues … pa medio di su grasia boso por ta perfekto den Cristu.” Nos úniko speransa pa berdadero perfekshon ta pa risibié komo un regalo di shelu—nos no por gan’é. Pues, e grasia di Cristu no solamente ta ofresé nos salbashon for di tristesa, piká, i morto pero tambe salbashon for di nos outokrítika persistente.
Permití mi usa un di e Salbador su parabelnan pa bisa esaki na un manera diferente. Un kriá tabata debe su rei un kantidat di 10,000 talento. Skuchando e kriá su rogamentu pa pasenshi i miserikòrdia, “e doño di e kriá aki tabata konmové ku kompashon, i … a pordoná … e debe.” Pero despues e mes un kriá aki no ke a pordoná su kompañero kriá ku tabata debé 100 moneda di plaka. Skuchando di esaki, e rei a lamentá na esun ku el a pordoná, “Bo no mester a tene mizerikòrdia ku bo kompañero kriá meskos ku ami a tene mizerikòrdia ku bo?”
Tin algun diferensia di opinion entre sabionan tokante e balor monetario menshoná aki—despensa pa e referensia monetario amerikano—pero pa hasi e matemátika fásil, si e kantidat chikitu, di e debe no pordoná tabata 100 moneda di plata, laga nos bisa $100 den nos tempu, anto e 10,000 talento libremente pordoná lo por a yega $1 bion—òf mas!
Komo un debe personal, esei ta un number astronómiko; totalmente for di nos komprendementu. (Ningun hende no por kumpra asina tantu!) Awèl, pa propósito di e parabel aki, e ta suponédi ta inkomprensibel; e ta suponé di ta mas ku nos abilidat pa komprondé, pa no bisa nada for di nos kapasidat pa paga bèk. Esei ta pasobra esaki no ta un historia tokante dos kriá pleitando den e Tèstamènt Nobo. E ta un historia tokante nos, e famia humano kaí, debedornan mortal, transgresornan, i tur prisionero. Kada un di nos ta un debedor, e veredikto tabata pa bai será den prison pa kada un di nos. I ei nos tur lo a keda si no tabata pa e grasia di un Rei ku a libra nos simplemente pasobra E ta stima nos i ta konmové ku kompashon pa nos.
Jesus ta usa un midí inkomprendibel aki pasobra Su Ekspiashon ta un regalo inkomprendibel duná na un presio inkomprensibel. Esei, ta parse ami, ta al ménos parti di e nifikashon tras di Jesus su enkargo pa bira perfekto. Nos lo no ta kapas pa demostrá ainda e 10,000 talento di perfekshon ku e Tata i e Yu a logra, pero e no ta demasiado hopi pa Nan pa pidi nos pa por ta un tiki mas manera dios den kosnan chikitu, pa nos papia i aktua, stima i pordoná, arepentí i mehorá al ménos na e nivel di 100 moneda di plata di perfekshon, kual ta kla ku ta den nos kapasidat pa hasi.
Mi rumannan, eksepto pa Jesus, no tabatin ningun bida sin fayo riba e biahe terenal ku nos ta pèrsigui, asina ku miéntras den mortalidat laga nos hasi esfuerso pa mehoramentu konstante sin opseshoná riba lokual sientífikonan ta yama “perfekshon venenoso.” Nos mester evitá e delaster ekspektativa eksesivo aki di nos mes,i di otronan, i lo mi ke agregá, di esnan ku ta yamá pa sirbi den Iglesia—kua pa Santunan di Delaster dia ke men tur hende, pasobra nos tur ta yamá pa sirbi un kaminda.
Den e sentido ei, Leo Tolstoy a skibi un bia di un pastor ku a wòrdu kritiká pa un miembro di su kongregashon, pa no biba mes resoluto manera e mester a hasi, e krítiko konkluyendo ku e prinsipionan ku e predikadó erante a siña p’esei tambe mester ta eróneo.
Komo kontesta di e krítika, e pastor a bisa: “Wak na mi bida awor i kompar’é na mi bida anterior. Lo bo mira ku mi ta purbando pa biba e bèrdat ku mi ta proklamá.” Inkapas pa biba segun e idealnan haltu ku el a siña, e pastor a atmití ku el a faya. Pero el a yora bisa:
“Ataká ami, [si boso ke]mi mes ta hasi esaki,” “pero [no]ataká … e kaminda ku mi ta sigui. … Si mi konosé e kaminda pa kas[pero] ta kanando banda di dje burachi, e ta e manera ménos korekto simplemente pasobra mi ta tambaliá di un kantu pa otro?
“No grita alegremente, ‘Wak e ei! … At’e aya ta [gatia] den un lodo!’ No, no gosa, pero duna … yudansa [na kualke un ku ta purba kana den e kaminda bèk na Dios]”
Rumannan, kada un di nos ta aspirá pa un bida mas manera di Cristu ku nos hopi bia tin éksito di biba. Si nos atmití esei honestamente, i ta purba na mehorá nos no ta hipókrita; nos ta humano. Mi ta spera ku nos por ninga pa laga nos mes fayonan mortal, i e defisiensianan di hasta esnan mihó hòmbernan i muhernan rònt di nos, hasi nos síniko tokante e bèrdatnan di e evangelio,e verasidat di Iglesia, nos speransa pa nos futuro òf e posibilidat di deboshon. Si nos perseverá, e ora ei algun parti den eternidat nos refinamentu lo wòrdu finalisá i kompletá—kual ta e tèstamènt Nobo su nifikashon di perfekshon.
Mi ta testifiká di e gran destino, hasi disponibel na nos pa medio di e Ekspiashon di Señor Jesucristu, ku E mes a sigui “di grasia pa grasia” te ku den Su inmortalidat El a risibí un plenitut perfekto di gloria selestial. Mi ta testifiká ku E ta den e ora aki i tur ora, ku mannan ku sikatris di klabu, ekstendé na nos ku mes un grasia, teniendo na nos i animá nos, ninga pa laga nos lòs te ora nos ta sigur na kas den e brasa eterno di nos Mayornan Eterno. Pa tal momentu perfekto, mi ta sigui esforsá, sinembargo un poko torpe. Pa regalo asina perfekto, mi ta sigui duna danki, apesar di ta inadekuá. Mi ta hasi asina den e mesun nòmber di Perfekshon mes, di E ku nunka tabata torpe òf inadekuá pero ku ta stima nos tur ku ta, Jesucristu mes,amèn.