![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F53%2F5e%2F535e6ad74cf9be44ea6f335ee0085eff740ed027%2F535e6ad74cf9be44ea6f335ee0085eff740ed027.jpeg/full/!250,/0/default)
Arepentimentu Ta Semper Positivo
Na e momentu ku nos pone pia riba e kaminda di arepentimentu, nos ta invitá e Salbador su poder pa salba den nos bida.
Algun aña pasá, Presidente Gordon B. Hinckley tabata na un wega di futbòl amerikano di un universidat. E tabata einan pa anunsiá ku e stadion lo bai wòrdu yamá meskos ku e team su coach stimá di hopi tempu, ku ta kasi bai baha ku penshun. E team desesperadamente ker a gana e wega pa honra nan coach. Presidente Hinckley a wòrdu invitá pa bishitá den kamber pa kambia paña i kompartí algun palabranan di enkurashamentu. Inspirá dor di su palabranan, e team e dia ei a bai i gana e wega ei i kaba e periodo ku éksito.
Awe, lo mi tin gana di papia ku esnan ku por ta wòri ku nan no ta ganando den bida. E bèrdat ta , naturalmente ku nos “tur a kometé piká, i ta falta pa optené e gloria di Dios.”1 Miéntras ku por tin temporadanan sin derota den spòrt, esaki no ta konta den bida. Pero mi ta testifiká ku e Salbador JesuCristu a efektuá un Ekspiashon perfekto i a duna nos e don di arepentimentu—nos kaminda pa yega bèk na un puresa perfekto di speransa i un bida vensedó.
Arepentimentu ta Trese Felisidat
Demasiado biaha nos ta pensa over di arepentimentu manera algu miserabel i depreshonante. Pero Dios su plan ta e plan di felisidat, no e plan di miseria! Arepentimentu ta lanta i elevá. Ta piká ta esun ku ta trese infidelidat.2 Arepentimentu ta nos ruta pa skapa! Manera Elder D. Todd Christofferson a splika: “Sin arepentimentu, no tin progreso real òf mehoransa den bida. … Solamente dor di arepentimentu nos ta gana akseso na e miserikòrdia ekspiatorio di JesuCristu i salbashon. Arepentimentu … ta dirigí nos na libertat, konfiansa propio i pas.”3 Mi mensahe pa tur—spesialmente e hòbinan—ta ku arepentimentu semper ta positivo.
Ora nos ta papia di arepentimentu, nos no ta solamente papiando tokante di esfuersonan di mehoransa propio. Arepentimentu real ta mas ku esei—e ta inspirá dor di fe den Señor JesuCristu i Su poder pa pordoná nos pikánan. Manera Elder Dale G. Renlund a siña nos, “sin e Redentor, … arepentimentu ta bira simplemente miserabel modifikashon di kondukta.”4 Nos por trata di kambia nos kondukta riba nos mes, pero solamente e Salbador por kita nos manchanan i lanta nos karganan, hasiendo posibel pa nos por persiguí e kaminda di obediensia ku konfia i fòrsa. E goso di arepentimentu ta mas ku e goso di biba un bida desente. Ta e goso di pordon, di ta limpi atrobe, i yega mas serka di Dios. Un biaha ku bo eksperenshá e goso ei, niun reemplaso mas abou lo ta sufisiente.
Arepentimentu real ta inspirá nos pa hasi obediensia un kompromiso—un kombenio, kuminsando ku boutismo i ta wòrdu renobá tur siman na e sena di Señor, e santa sena. Einan nos ta risibí e promesa ku nos por “semper tin su Spiritu huntu ku [nos],”5 huntu ku tur e goso i pas ku ta bini for di Su kompania konstante. Esaki ta e fruta di arepentimentu, i esaki ta loke ta hasi arepentimentu plasentero!
Arepentimentu ta Rekerí Insistensia
Mi ta stima e parabel di e yu pródigo.6 Tin algu intenso tokante e momentu krusial ei ora ku e pèrdí “ta realisá.” Sintando den un kurá di porko, deseando ku e por “a yena su barika ku e kaskanan ku e porkonan tabata kome,” finalmente el a realisá su mes ku e a gasta no solamente su tata su herensia pero tambe su propio bida. Ku fe ku su tata por asept’é bèk—si no komo yu hòmber e ora ei sikiera komo sirbiente—e la determiná pa pone su pasado rebelde tras di dje i bai kas.
Hopi biaha mi a puntra mi mes over di e yu hòmber su kaminda largu pa kas. Tabatin momentunan kaminda el a duda i puntra su mes, “Kon lo mi wòrdu risibí dor di mi tata?” Porta el a hasta tuma un par di stap bèk direkshon di e porkonan. Imaginá kon e historia lo tabata diferente si el a renunsiá. Pero fe a pon’é keda move, i fe a pone su tata keda wak i warda ku pasenshi, te ora ku finalmente:
“Ora ku ainda e tabata un gran distansha leu, su tata a mir’é, i tabatin kompashon ku n’e, i a kore, i a bras’é, i a sunché.
“I e yu a bis’é, Tata, mi a pika kontra di shelu, i den bo bista, i no mas ta digno pa ta wòrdu yamá bo yu.
“Pero e tata a bisa su sirbientenan, trese e mihó paña, i bisti’éle; i pone un renchi na su dede, i sapatu na su pia:..
“Paso esaki mi yu tabata morto, i ta bibu atrobe; e tabata pèrdí i a wòrdu hañá.”
Arepentimentu Ta pa Tur Hende
Rumannan hòmber i muhé, nos tur ta pródigo. Nos tur tin ku “realisá pa nos mes” —pa regla mas ku un biaha—i skohe e kaminda ku ta guia pa bai bèk kas. Ta un eskogensia ku nos ta hasi diariamente durante di nos bida.
Hopi biaha nos ta asosiá arepentimentu ku pikánan doloroso ku ta rekerí “un kambio poderoso.”7 Pero arepentimentu ta pa tur hende—esnan ku ta kanando den “kamindanan prohibí i [ta] pèrdí”8 tantu komo esnan ku “a drenta den [e] kaminda stret i smal” i awor tin ku “ sigui bai dilanti.”9 Arepentimentu ta tantu pone nos riba e kaminda korekto komo ta mantené nos riba e kaminda korekto. E ta pa esnan ku a kaba di kuminsá di kere, esnan ku tabata kere sèmper, i esnan ku tin ku kuminsá kere atrobe. Manera Elder David A. Bednar a siña: “Mayoría di nos klaramente ta komprondé ku e Ekspiashon ta pa pekadornan. Mi no ta asina konfidente, sinembargo , ku nos sa i komprondé ku e Ekspiashon tambe ta pa santunan—pa bon hòmbernan i muhénan ku ta obediente, digno, i … esforsando pa bira mihó.”10
Resientemente mi a bishitá un Sentro di Kapasitashon Misional ora ku un grupo di misioneronan nobo a kaba di yega. Mi tabata profundamente konmoví segun mi tabata wak nan i opservá e lus den nan wowonan. Nan tabata parse asina briante i felis i entusiasmá. Na e momentu ei un pensamentu a drenta den mi kabes: “Nan a eksperenshá fe pa ku arepentimentu. Esaki ta pa kiko nan ta yená ku goso i speransa.”
Mi no ta pensa ku esei ta nifiká nan tur tabatin transkripshonnan serio den nan pasado, pero mi ta kere ku nan tabata sa kon pa arepentí; nan a siña ku arepentimentu ta positivo, i nan tabata kla i ku anhelo pa kompartí e mensahe plasentero aki ku mundu.
Esaki ta loke ta pasa ora ku nos sinti e goso di arepentimentu. Konsiderá e ehèmpel di Enos. E tabatin su propio momentu “ di realisashon”, i despues ku su “kulpa a wòrdu kitá,” su kurashon a bira mesora pa e bienestar di otro. Enos a pasa henter su bida invitando tur hende pa arepentí i “negoshá den dje mas ku riba esun di mundu.”11 Arepentimentu ta hasi esei; e ta bira nos kurasonnan direkshon di nos próhimo, paso nos sa ku e goso ku nos ta sinti ta intenshoná pa tur hende.
Arepentimentu Ta un Aspirashon di Bida Largu
Mi tin un amigu ku a krese den un famia di Santunan di último dia ménos aktivo. Ora ku e tabata hóben, e tambe a “realisá” i a disidí di prepará pa bai ku mishon.
El a bin bira un mishonero ekselente. Riba e delaster dia promé ku el a bin bèk kas, e presidente di mishon a entrevista i a punt’é pa e kompartí su testimonio. El a hasi esaki, i despues di un brasa tierno, e presidente a bisa, “Elder, lo bo por lubidá i ninga tur loke ku bo a kaba di testifiká di dje den algun luna si bo no sigui hasi e kosnan ku a krese bo testimonio na promé lugá.”
Mi amigu a konta mi despues ku el a hasi orashon i lesa e skrituranan diariamente for di ku e la regresá di su mishon. Wòrdu kontinuamente “alimentá dor di e bon palabra di Dios” a ten’é “riba e kaminda korekto.”12
Bosonan ku ta preparando pa sirbi un mishon di regla i boso ku ta regresando, tuma nota! No ta sufisiente pa djis gana un testimonio; boso tin ku manten’é i fortifik’é. Manera tur mishonero sa, si bo stòp di kore un baiskel, e lo kai, i si bo stòp di alimentá bo testimonio, e lo debilitá. E mesun prinsipio ta apliká pa ku arepentimentu—ta un aspirashon pa bida largu, no un eksperensha di un biaha den bida.
Na tur esnan ku ta buska pordon—hòbinan, hóbennan soltero, mayornan, welanan, i si, hasta bisawelonan—mi ta invitá bo pa bini kas. Esaki ta e tempu pa kuminsá. No posponé e dia di arepentimentu.13
E ora ei, ora ku bo a tuma e desishon ei, keda sigui e kaminda. Nos Tata ta wardando, ansioso pa risibí bo. Su man ta ekstendé “henter dia largu” pa bo.14 E rekompensa ta bal e esfuerso.
Kòrda e palabranan aki di Nefi: “Boso mester sigui bai dilanti ku un firmesa den Cristu, mustrando un puresa perfekto di speransa, i un amor pa Dios i pa tur hende. Di manera ku, si boso pusha dilanti, alimentando boso mes ku e palabra di Cristu, i perseverá te na final, mira, asina e Tata ta bisa: Boso lo tin bida eterno.”15
Tin biaha e biahe lo mustra largu—al final, e ta e biahe ku direkshon pa bida eterno. Pero e por ta un biahe plasentero si nos persiguí’ é ku fe den JesuCristu i speransa den Su Ekspiashon. Mi ta testifiká ku e momentu ku nos pone pia riba e kaminda di arepentimentu, nos ta invitá e Salbador su poder pa salba den nos bida. E poder ei lo tene nos pia firme, ekstendé nos bista, i profundisá nos resolushon pa sigui bai dilanti, stap pa stap, te e dia glorioso ei ora ku finalmente nos regresá na nos kas selestial i tende nos Tata na Shelu bisa nos, “Bon hasí.”16 Den e nòmber di JesuCristu, amèn.