![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fff%2Fa5%2Fffa582ec730839155c267ae4a412810406616992%2Fffa582ec730839155c267ae4a412810406616992.jpeg/full/!250,/0/default)
Tabata Tin Pan
Segun nos ta purba pa ta temporalmente prepará, nos por enfrentá e pruebanan di bida ku muchu mas konfiansa.
Promé ku e restrikshon di biahenan kousa pa e pandemia aktual mi tabata regresando kas for di un asignashon internashonal, kual debí na problemanan ku programashon a krea un retraso di buelo riba e djadumingu. Mi tabata tin tempu entre e buelonan pa asistí na un reunion sakramental lokal, kaminda mi por a kompartí un mensahe kòrtiku. Despues di e reunion un diakono entusiasmá a aserka mi i a puntra si mi tabata konosé presidente Nelson i si algun dia mi tabata tin e oportunidat pa dun’e man. Mi a kontesta ku Mi tabata konosé, ku mi a yega di dun’e man, i, komo miembro di e presidensia di Obispado, Mi tabata tin e oportunidat pa reuní ku Presidente Nelson i su konseheronan un par di bes tur siman.
E hoben diákono a sinta despues riba un stul, el a hisa su man na laira, i a grita, “ Esaki ta e miho dia di mi bida!” Rumannan, kisas mi no ta hisa man den laira i grita, pero mi ta eternamente gradesí pa un profeta bibu i pa e direkshon ku nos ta risibí di e profetanan, vidente, i reveladónan, spesialmente durante e tempunan di desafio.
For di prinsipio di tempu, Señor a proveé direkshon pa yuda Su hendenan prepará spiritualmente i temporalmente kontra di e kalamidatnan ku E sa ku lo bin komo parti di e eksperensha mortal aki. E kalamidatnan aki por ta personal o general den naturalesa, pero Señor su guia lo proveé protekshon i sosten te asina leu ku nos ta pone atenshon i aktua konforme Su konseho. Un eksperensha maravioso ta wòrdu proveé den un relato di e buki di Génesis kaminda nos ta siña di Jose na Egipto i su interpretashon inspirá di e soño di Fárao.
“I Jose a bisa Faraon, … Dios a mustra Faraon kiko e tabata bai hasi. …
“Miraki, ta bin shete aña di gran abundansia den tur e tera di Egipto:
“I despues di esakinan lo lanta 7 aña di hamber: i tur e abundansia lo pasa pa olvido den e tera di Egipto.” 1
Faraon a skucha Jose, el a respondé na loke Dios a mustr’e den un soño, i a kuminsá prepará inmediatamente pa loke tabata bin. E eskrituranan e ora ei a registrá:
“I den e shete añanan di abundansia e tera a trese man yen.
Y el a rekohé tur e kuminda di e 7 añanan. …
“I Jose a rekohé maishi manera santu di laman, … te el a stòp di konta; paso e tabata innumerabel.” 2
Despues ku e shete añanan di abundansia a pasa ta wòrdu bisa na nos ku “a kuminsá yega shete aña di skarsedat, manera Jose a bisa: i e skarsedat tabata na tur e paisnan; pero na e pais di Egipto tabata tin pan.” 3
Awendia nos tin e bendishon di wòrdu guia pa profetanan ku ta komprondé e nesesidat pa nos prepará kontra di e kalamidatnan“ku mester bin” 4 i ku tambe ta rekonosé e limitashonnan o restrikshonnan ku nos lo por topa kune den nos esfuerso pa skucha nan konseho.
Tin un komprendementu kla ku e efektonan di COVID-19, pero tambe e desasternan devastador natural no ta respetá hendenan, krusando frontera nan ètniko soshal i religioso den tur kontinente. Hendenan a pèrdè trabou i entradanan a wòrdu redusí ya ku oportunidatnan di trabou a wòrdu afektá dor di òntslag nan i e kapasidat pa traha a keda influensia dor di desafionan hurídiko i di salu.
Na tur esnan ku a keda afektá, nos ta ekspresá komprenshon i preokupashon pa boso situashon pero tambe un firme konvikshon ku dianan mihó ta na kaminda. Boso a wòrdu bendishoná ku obispunan i presidentenan di rama ku ta buska miembronan di nan kongregashon ku nesesidat di yudansa temporal i ku tin akseso na hèrmèn i rekursonan ku por yuda bo restablesé bo bida i pone bo riba e kaminda pa ta outosufisiente si bo apliká pa e prinsipionan di preparashon.
Den e ambiente aktual, ku un pandemia ku a destruí hinter ekonomia i tambe bidanan individual, e lo ta inkonsistente ku un Salbador kompasivo lo ignorá e realidat ku hopi ta luchando i pidi nan pa kuminsá konstruí un reserva di kuminda i sèn pa futuro. Sinembargo, esei no ta nifiká ku nos permanentemente mester ignorá prinsipionan di preparashon—solamente ku e prinsipionan aki mester wòrdu apliká “den sabiduria i òrdu” 5 pa asina nos por bisa den futuro, manera Jose na Egipto, “Tabata tin pan.” 6
Señor no ta ferwagt ku nos ta hasi mas di loke ku nos por hasi, pero E ta ferwagt ku nos ta hasi loke ku nos por hasi, ora ku nos por hasié. Manera Presidente Nelson a rekordá nos den nos delaster konferensha general, “Señor stima esfuerso, “ 7
Lidernan di Iglesia hopi biaha ta enkurashá Santunan di Último Dia “pa prepará pa atversidat den bida, dor di tin suministro di kuminda i awa i un tiki sèn di spar.” 8 Na e mes momentu nos ta wòrdu enkurashá “pa ta sabi” i “no bai hasi kos ekstremo” 9 den nos esfuerso pa establesé un suministro na kas i reserva finansiero. Un rekurso titulá Finansa personal pa ta outosufisiente,publiká den 2017 i aktualmente disponibel riba e wèpsait di Iglesia den 36 idioma, ta kuminsá ku un mensahe di e Promé Presidensia, kual ta sita:
“Señor a deklará, ‘Ta mi propósito pa proveé pa mi santunan’ [Doktrina i Kombenionan 104:15]. E revelashon aki ta un promesa di Señor ku E lo proveé bendishoná temporal i lo habri porta pa ta outosufisiensia. …
“… Aseptá i biba e prinsipionan aki lo permití bo risibí e mihó bendishon nan temporal ku Señor a primintí.
“Nos ta invitá bo pa studia diligentemente i apliká e prinsipionan aki i siña esakinan na bo miembronan di famia. Si bo hasi esaki, bo bida lo wòrdu bendishoná … [paso] bo ta un yu di nos Tata den Shelu. E stima bo i lo no laga bo nunka na kaya. E konosé bo i ta kla pa konsedé na bo e bendishoná spiritual i temporal di ta outosufisiente.” 10
E rekurso aki ta kontené kapítulonan dediká na krea i biba den un presupuesto, protekshon di bo famia kontra momentu nan difísil, manehá di krísis finansiero, i imbertí pa futuro i hopi mas i [esaki] ta disponibel pa tur hende riba e websait di Iglesia òf serka boso lidernan lokal.
Ora nos ta konsiderá e prinsipio di preparashon, nos por wak bek atras na e inspirashon di Jose na Egipto. Sa loke kiko lo a sosodé lo no tabata sufisiente pa nan por a pasa tur e añanan di skarsedat sin niun grado di sakrifisio durante e añanan di abundansia. Na lugá di usa tur loke e súpditonan di Farao por a produsí, nan a pone límitenan i a sigui nan, suministrando sufisiente pa nan uso inmediato, i tambe nan nesesidatnan pa futuro. No tabata sufisiente pa sa ku tempunan di desafio lo a bini. Nan mester a aktua, i dor di nan esfuerso, “tabata tin pan.” 11
Esaki ta hiba nos na un pregunta importante: “I awor kiko?” Un kaminda bon pa kuminsá ta komprondé ku tur kos ta Spiritual pa Señor, “i na ningun momentu” El a duna nos “un lei ku ta temporal. ” 12 Tur kos, e ora ei, ta mustra riba JesuCristu komo e fundamentu riba kual nos mester konstruí, asta nos preparashonnan temporal.
Ta temporalmente prepará i ta outosufisiente ta nifiká “kere ku pa medio di e grasia, òf poder aktivo, di JesuCristu i nos propio esfuerso, nos ta kapas pa optené tur e nesesidatnan spiritual i temporal di bida ku nos tin mester pa nos mes i nos famia.” 13
Aspektonan adishonal di un fundeshi spiritual pa preparashonnan temporal ta inkluí aktua “den sabiduria i òrdu,,” 14 ku ta impliká akumulashon gradual di almasen di kuminda i sèn di spar segun tempu, manera tambes, brasa medionan “chikitu i simpel” ta nifiká 15 ku ta un demostrashon di fe ku Señor lo magnífiká nos esfuerso nan chikitu pero konsistente.
Ku un fundeshi spiritual na su lugá, nos por apliká e ora ei eksitososamente dos elemento importante di preparashon temporal ku, manehá finansa i almasen.
E prinsipionan klave pa manehá finansa ta inkluí e pago di diesmo i ofrenda, eliminando i evitándo debe, preparándo i bibando denter di presupuesto, i spar pa futuro.
E prinsipio klave pa almasenamentu na kas ta inkluí almasenamentu di kuminda, almasenamentu di awa, kaminda ta posibel, tambe almasená otro nesesidatnan basá riba nesesidatnan individual i di famia, tur paso “e mihó lugá pa almasenamentu” 16 ta na kas, kua ta bira e reserva “mas asesibel den tempu di nesesidat.” 17
Si nos brasa e prinsipionan spiritual i buska inspirashon di Seño, nos lo wòrdu guiá pa sa kiko Señor ta fboluntat ta pa ns, individualmente i komo famia,i kon nos mester apliká e prinsipionan importante di preparashon temporal. E kos mas importante ta pa kuminsá.
Elder Bednar a siña e prinsipio aki ora ku el a bisa: “Tuma akshon ta e ehersisio di fe. … Fe berdadero ta enfoká den i riba Señor JesuCristu i semper ta guia na akshon.” 18
Rumannan, den un mundu ku ta sigui kambia, nos mester prepará pa kambionan. Hasta ku e mihó dianan pa bini, nos sa ku e bai bin nan di mortalidat lo sigui. Si nos buska pa ta temporalmente prepará, nos por enfrentá e prueba nan di bida ku mas konfiansa, pas den nos kurason, i manera Jose na Egipto, nos lo por bisa, asta den sirkunstansianan di strès, “Tabata tin pan.” 19 Den e nòmber di JesuCristu, amèn.