![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F1e%2F28%2F1e2890be8058979164eefc1d69e0679f3f0f1186%2F1e2890be8058979164eefc1d69e0679f3f0f1186.jpeg/full/!250,/0/default)
Di Tèst, Probá, i di Pòlish
E bendishon di mas grandi ku lo bini despues ku nos proba nos mes fiel na tur nos kombenionan durante nos pruebanan lo ta e kambio den nos naturalesa.
Mi kerido rumannan, mi ta gradesido pa papia ku boso awe. Mi speransa ta pa duna kurashi ora bida ta parse di ta spesialmente difísil i insigur. Pa algun di boso, e tempu ei ta awor aki. Si no ta asina, e tempu aki lo bini.
Esei no ta un bista pesimista. E ta realístiko—pero optimista—pa motibu di Dios Su propósito den e Kreashon di e mundu aki. E propósito tabata pa duna Su yunan e oportunidat pa proba nan mes kapas i dispuesto pa skohe e bon ora ta difísil. Hasiendo esei, nan naturalesa lo kambia i nan por bira mas manera E. E tabata sa ku esei lo rekerí fe ku no por kibra den DjE.
Hopi di lokual mi sa a bini di mi famia. Tempu mi tabatin un ocho aña asina, mi mama sabí a pidi mi ruman hòmber i ami pa kita yerba huntu ku n’e den hardin di nos famia parti patras. Awor, esei ta parse un tarea fásil, pero nos tabata biba na New Jersey. Awaseru tabata kai frekuentemente. E tera tabata klei pisá. E anglonan tabata krese mas lihé ku e bèrduranan.
Mi ta kòrda mi frustrashon ora ku e anglonan a kibra den mi mannan, nan rais a keda duru pegá den e lodo pisá. Mi mama i mi ruman djis despues tabata mas leu den nan reinan. Mas duru mi a purba, mas patras mi tabata kai.
“Esaki ta hopi difísil!” Mi a sklama.
Enbes di tene duele di mi, mi mama a smail i a bisa, “O, Hal, klaro ku e ta difísil. Ta suponé di ta asina. Bida ta un tèst.”
Na e momentu ei, mi a sa ku su palabranan tabata bèrdat i lo sigui di ta bèrdat den mi futuro.
E motibu pa Mama su smail amoroso a bira kla añanan despues ora mi a lesa di Tata Selestial i Su Yu Stimá papiando di Nan propósito den krea e mundu aki i duna yunan spiritual e oportunidat di bida mortal:
“I nos lo proba nan ku esaki, pa wak si nan lo hasi tur e kosnan ku Señor nan Dios lo manda nan;
“I esnan ku warda nan promé estado [na nan] lo wòrdu añadí; i nan ku no warda nan promé estado lo no haña gloria den e mesun reino ku esnan ku a warda nan promé estado; i esnan ku warda nan di dos estado lo haña gloria añadí riba nan kabes pa semper den eternidat.”1
Boso i ami a aseptá e invitashon aki pa wòrdu di tèst i wòrdu probá ku nos lo skohe pa warda e mandamentunan di Dios ora nos lo no ta mas den e presensia di nos Tata Selestial.
Hasta ku un invitashon asina amoroso di nos Tata Selestial, Lucifer a kombensé un tersera parti di e yunan spiritual pa siguié i rechasá e Tata Su plan pa nos kresementu i felisidat eterno. Pa Satanas su rebelion, el a wòrdu bentá pafó huntu ku su siguidornan. Awor, e ta purba mes tantu ku e por pa kita bai for di Dios durante e bida mortal aki.
Esnan di nos ku a aseptá e plan a hasi esaki pa motibu di nos fe den JesuCristu, ku a ofresé pa bira nos Salbador i Redentor. Nos mester a kere e tempu ei ku loke sea e debilidatnan mortal [ta] ku nos lo por tin, i loke sea e forsanan maligno ku lo ta kontra nos, e forsanan di bon lo ta muchu mas grandi.
Tata Selestial i JesuCristu, konosé boso i ta stima boso. Nan ke pa boso regresá serka Nan i pa bira meskos ku Nan. Boso èksito ta Nan èksito. Boso a sinti e amor ei wòrdu konfirmá pa e Spiritu Santu ora boso a lesa òf skucha e palabranan aki: “Paso ata ki, esaki ta mi obra i mi gloria—trese inmortalidat i bida eterno pa hòmber.”2
Dios tin e poder pa hasi nos kaminda mas fásil. El a duna mana na e yunan di Israel ora nan tabata dual pa [bai] e tera primintí. Señor den Su ministrashon mortal, a kura esnan ku ta malu, lanta morto, kalma laman. Despues di Su Resurekshon, El a habri “e prizòn pa esnan ku tabata prezu.” 3
No opstante e Profeta Jpsé Smith, un di e mas grandi di Su profetanan, a sufri den prizòn i a siña e lès ku nos tur tin probecho di dje i tin mester den nos tèstnan di fe ku ta bolbe: “I si bo wòrdu bentá den e pos, òf den mannan di asesino, i e sentensia di morto wòrdu pasá riba bo; si bo wòrdu tirá den e profundidat; si e olanan brutu konspirá kontra di bo; si e bientunan fuerte bira bo enemigu; si e shelunan bira skur, i si tur e elementonan kombiná pa opstruí bo kaminda; i riba tur kos, si e bokanan di fiernu lo habri hanchu tras di bo, sá, mi yu, ku tur e kosnan aki lo duna bo eksperensia, i lo ta pa bo propio bon.”4
Ta rasonabel ku boso por puntra di kon un Dios amoroso i todopoderoso ta pèrmití nos tèst mortal pa ta asina difísil. Ta pasó E sa ku nos mester krese den llimpiesa i estatura spiritual pa ta kapas pa biba den Su presensia den famianan pa semper. Pa hasi esaki posibel, Tata Selestial a duna nos un Salbador i e poder pa skohe pa nos mes dor di fe pa warda Su mandamentunan i pa arepentí i asina bini naDjE.
E Tata Su plan di felisidat tin komo su sentro pa nos bira kada biaha meskos ku Su Yu Stimá, JesuCristu. Den tur kos, e Salbador Su ehèmpel ta nos mihó guia. E no tabatin eksonerashon di e nesesidat pa proba Su Mes. El a soportá pa tur e yunan di Tata Selestial, pagando e preis pa tur nos pikánan. El a sinti sufrimentu di tur ku a bini lo bini den mortalidat.
Ora bo ta puntra bo mes kuantu dolor bo por soportá bon, kòrda riba DjE. El a sufri lokual abo ta sufri pa asina E por sa kon pa lanta bo. Kisas E no ta kita e karga, pero E lo duna bo forsa, konsuelo, i speransa. E konosé e kaminda. El a bebe e kopa marga. El a soportá e sufrimentu di tur hende.
Boso ta wòrdu alimentá i konsolá pa un Salbador amoroso, ku sa kon pa yuda boso den kualke tèst ku boso ta eksperensiá. Alma a siña nos:
E lo bai dilanti, sufriendo dolónan i aflikshonnan i tentashonnan di tur sorto; i esaki lo sosedé pa asina e palabra por wòrdu kumplí ku ta bisa: E lo tuma e dolónan i e enfermedatnan di Su pueblo riba Dje.
“I e lo tuma morto riba Dje, ku E lo por libra e lasonan di morto kual ta mara Su pueblo, I lo e tuma nan enfermedatnan riba Dje, te ku Su entrañanan por ta yená ku miserikòrdia, segun e karni, ku E por sa segun e karni kon pa yuda Su pueblo konforme nan enfermedatnan.”5
Un manera ku E lo yuda bo lo ta pa invitá bo pa kòrda E semper i pa bini na Dje. El a kurashá nos:
“Bini serka Mi, tur ku ta kansá i kargá, i Ami lo duna boso sosiegu.”
“Tuma Mi yugo riba bo, i siña di Mi; pasó Mi ta mansu i humilde di kurason: i lo bo haña deskanso den bo alma.”6
E manera pa bini na DjE ta pa fiesta riba Su palabranan, pa ehersé fe pa arepentimentu, pa skohe pa wòrdu boutisá i konfirmá pa Su sirbidó outorisá, i despues pa warda bo kombenionan. E ta manda e Spiritu Santu pa ta bo kompañero, konsolador, i guia.
Si bo biba digno di e don di e Spiritu Santu, Señor lo guia bo na seguridat hasta na momento ku bo no por mira e kaminda. Pa ami, hopi biaha El a mustra mi e siguiente paso òf dos pa tuma. Poko biaha El a duna mi un sombra di e futuru distante, pero hasta e sombranan skars aki a guia lokual mi a skohe pa hasi den bida diario.
Señor a splika:
Pa awor, bo no por mira ku bo wowonan natural, e plann di bo Dios tokante e kosnan ku lo bini mas dilanti, i e gloria ku lo bini mas dilanti, ni e gloria ku lo sigui despues di hopi tribulashon.
“Pasó despues di hopi tribulashon e bendishonnan ta bini. ”7
E bendishon di mas grandi ku lo bini despues ku nos proba nos mes fiel na tur nos kombenionan durante nos pruebanan lo ta e kambio den nos naturalesa. Pa nos eskoho pa warda e mandamentunan, e poder di JesuCristu i e bendishonnan di Su Ekspiashon por traha den nos. Nos kurason por wòrdu suavisá pa stima, pa pordoná, i pa invitá otronan pa bini na e Salbador. Nos konfiansa den Señor i den otro lo oumnentá. Nos miedu ta mengua.
Awor, asta ku tal bendishonnan primintí pa medio di tribulashon, nos no ta buska tribulashon. Den e eksperensha mortal, nos lo tin hopi oportunidat pa prueba nos mes, pa pasa e tèstnan sufisientemente difísil pa bira mas ainda manera ku e Salbador i nos Tata Selestial.
Ademas, nos mester nota e tribulashon di otronan i purba pa yuda. Esaki lo ta speshalmente difísil ora nos mes ta wòrdu di tèst ku severidat. Pero nos lo deskubrí ku ora nos aliviá un otro su karga, maske ta un tiki, ku nos lomba ta wòrdu fortalesé i nos ta sinti un lus den skuridat.
Den esaki, Señor ta nos Ehèmpel. Riba e krus riba Golgota, despues di a sufri doló asina grandi ku E lo a muri si E no tabata e Yu Unigénito di Dios, El a mira na Su burdugunan i a bisa na Su Tata, “Pordoná nan; pasó nan no sa kiko nan ta hasi.” 8 Miéntras E tabata sufri pa tur ku lo biba, El a mira for di e krus, na Juan i na Su mes mama den tristesa i a ministrá na dje den su prueba:
“P’esei ora Jesus a mira Su mama, i e disípulo pará einan, ku e tabata stima, El a bisa na su mama, Muhé, ata bo yu hòmber!
“Despues el a bisa e disípulo, Ata bo mama! I for di e ora ei e disípulo a tumé den su kas.”9
Pa Su akshonan riba un di e dianan di mas sagrado, E boluntariamente a duna Su bida pa kada un di nos, ofresiendo no solamente pa yuda den e bida aki pero pa bida eterno den e tempu futuro.
Mi a mira hendenan elevá nan mes na gran haltura pa medio di proba di ta fiel den pruebanan teribel. Awe rònt den Iglesia tin ehèmpelnan. Hende ta pone nan mes na rudia den atversidat. Mediante nan perseveransia i esfuersonan fiel, nan ta bira mas manera e Salbador i nos Tata Selestial.
Mi a siña un otro lès di mi mama. Komo mucha, el a haña difteria i a kasi muri. Despues e tabatin meningitis espinal. Su tata a muri yòn, i pues mi mama i su rumannan hòmber a yuda mantené nan mama.
Henter su bida, el a sinti e efektonan di e pruebanan di malesa. Den su delaster 10 añanan di bida, el a rekerí vários operashon. Pero apesar di tur kos, el a proba di ta fiel na Señor, asta na kama. E úniko potrèt na muraya den su kamber tabata unu di e Salbador. Su delaster palabranan na mi riba su kama di morto tabata esaki nan: “Hal, bo ta zona manera bo ta verkout. Bo mester kuida bo mes.”
Na su entiero, e delaster diskursante tabata Elder Spencer W. Kimball. Despues di bisa algu di su pruebanan i su fieldat, el a bisa esensialmente esaki: “Algun di boso lo puntra boso mes di kon Milfred mester a sufri tantu asina i asina tantu tempu. Lo mi bisa boso di kon. Ta pasó Señor tabata kier a pòlish e un tiki mas.”
Mi ta ekspresá mi gratitut pa hopi miembronan fiel di E Iglesia di JesuCristu ku ta karga pesonan ku fe firme i ku ta yuda otronan pa karga di nan segun Señor ta buska pa pòlish nan un tiki mas. Mi ta ekspresá tambe amor i atmirashon pa e dunadónan di kuido i lidernan rònt mundu ku ta sirbi otronan miéntras nan i nan famia ta soportá tal pòlish.
Mi testifiká ku nos ta yunan di un Tata Selestial, ku ta stima nos. Mi ta sinti Presidente Russell M. Nelson su amor pa nos tur. E ta e profeta di Señor den e mundu awe. Asina mi ta testifiká den e nòmber sagrado di Señor JesuCristu, amèn.