Wardando riba Señor.
Fe ta nifiká konfia Dios den bon i mal tempu, asta si esei ta inkluí algun sufrimentu te ora nos mira Su brasa revelá na nos fabor.
Mi rumannan stimá, nos tur ta ansioso—ningun mas ku ami—pa skucha e remarkenan di klousura di nos profeta stimá, Presidente Russell M. Nelson. Esaki tabata un konferensia maravioso, pero ta e di dos biaha ku COVID-19 a alterá nos proseduranan tradishonal. Nos ta asina kansá di e kontagio aki, ku nos ta sinti manera gana di ranka nos kabei afó. I aparentemente, algun di mi Rumannan a tuma e akshon aki kaba. Sa por fabor ku nos ta hasi orashon konstantemente pa esnan ku a wòrdu afektá di kualke manera, spesialmente pa kualke persona ku a pèrde sernan kerí. Tur hende ta di akuerdo ku e kos aki a dura demasoado demasiado largu
Kuantu tempu nos ta warda pa alivio di difikultat ku ta bini riba nos? Kiko tokante soportá desafionan personal miéntras nos ta warda i warda, i yudansa ta parse di ta bini asina pokopoko? Di kon e tardansa ora ku e karganan ta parse mas di lokual nos por soportá?
Miéntras nos ta hasi e preguntanan aki, nos por, si nos purba, skucha un otro gritu resonando [for] di un sèl di un prizòn skur, skur durante un invierno di mas friu ku a wòrdu registrá den e lugá ei.
“O Dios, unda Bo ta?” nos ta skucha for di profundidat den prizòn di Liberty. “I unda e pabeyon ta ku ta tapa bo lugá pa skonde? Kon largu bo man lo keda wantá?”1 Kon largu, O Señor, kon largu ?
Pues, nos no ta esnan di promé ni lo ta esnan delaster pa hasi tal preguntanan ora tristesa baha riba nos òf un doló den nos kurason ta sigui kontinuamente. Mi no ta papiando awor aki di pandemia ni prizònnan pero di boso, boso famia, i boso bisiñanan ku ta enfrentá kualke kantidat di desafio. Mi ta papia tokante e anhelo ku hopi ku lo gusta di ta kasá i no ta òf ku ta kasá i ta deseá pa e relashon ta un tiki mas selestial. Mi ta papia di esnan ku tin ku lidia ku un aparensia no deseá di un kondishon médiko serio—kisas inkurabel—òf ku ta enfrentá un bataya di bida largu ku defekto genétiko ku no tin remedi. Mi ta papia di e lucha ku desafionan emoshonal i salú mental ku ta pisa hopi riba e almanan di asina tantu ku ta sufri ku nan, i riba e kurason di esnan ku ta stima i ta sufri huntu ku nan. Mi ta papia di e pobernan, di ken e Salbador a bisa nos pa no lubidá nunka, i mi ta papia di abo ku ta wardando riba regreso di un yu, sin importá su edat, ku a skohe un kaminda diferente for di esun ku bo a hasi orashon ku e lo tuma.
Ademas, mi ta rekonosé ku hasta e lista largu aki di kosnan ku nos por ta warda ariba personalmente no ta purba pa trata e prekupashonnan grandi ekonómiko, polítiko, i sosial ku ta konfrontá nos kolektivamente. Nos Tata Selestial ta spera klaramente di nos pa trata e problemanan públiko angusiosto aki, meskos ku esnan personal, pero lo bai tin tempunan den nos bida ora ku hasta nos mihó esfuerso spiritual i orashonnan ferviente i di súplika no ta produsí e viktorianan ku nos a anhelá, sea ku e ta relashoná ku e problemanan grandi global òf esnan ckikitu personal. Pues miéntras nos ta traha i ta warda huntu pa e kontestanan na algun di nos orashonnan, mi ta ofresé boso mi promesa apostóliko ku nan ta wòrdu skuchá i kontestá, kisas no na e tempu òf na e manera ku nos tabata ke. Pero nan semper ta wòrdu kontestá na e tempu i den e manera ku un mayor omnisiente i eternamente kompasivo mester kontestá nan. Mi rumannan stimá, komprondé por fabor ku E ku nunka no ta drumi ni kabishá2 ta preokupá pa e felisidat i eksaltashon final di Su yunan riba tur otro kos ku un ser divino por tin pa hasi. E ta amor puru, personifiká gloriosamente, i Tata Miserikordioso ta Su nòmber.
“Bon, si esei ta e kaso,” boso por bisa, “Su amor i miserikòrdia lo no mester a simplemente parti nos Lamannan Kòrá peronal i pèrmití nos kana pasa dor di nos problemanan riba tera seku? E lo no mester a manda meuchi di siglo 21 bulando for di un lugá pa guli tur nos krikinan fèrfelu di siglo 21?”
E kontesta na tal preguntanan ta “Si, Dios por proveé milagernan instantaniamente, pero trempan òf lat nos ta siña ku e tempunan i temporadanan di nos biahe mortal ta di DjE i di DjE so pa dirigí.” E ta atministrá e kalènder aki pa kada un di nos individualmente. Pa kada hòmber malu ku a kura instantaniamente miéntras e ta warda pa drenta e Tanki di Betesda,3 un otro persona lo dura 40 aña den desierto wardando pa drenta e tera primintí.4 Pa kada Nefi i Lehi protehá divinamente dor di un sirkulo di flam di kandela pa nan fe,5 tin un Abinadi ku a muri na un staka di flam di kandela pa su fe.6 I nos ta kòrda ku e mes un Elías ku den un instante a yama kandela for i shelu pa duna testimonio kontra di e saserdotenan di Baal7 tia e mesun Elías ku a soportá un periodo ku no tabatin awaseru pa hopi aña i ku, pa un tempu, el a wòrdu alimentá pa kuminda skars ku por a wòrdu kargá den e gara di un raf.8 Na mi opinion, esei no por tabtata nada ku nos por yama un “happy meal.”
E punto? E punto ta ku fe ta nifiká pa kkonfia Dios den bon i mal tempu, hasta si esei ta inkluí algun sufrimentu te ora nos mira Su brasa revelá na nos fabor.9 Esei por ta difísil den nos mundu moderno ora hopi a yega di kere ku e mihó kos den bida ta pa evitá tur sufrimentu, ku ningun hende nunka lo no tin ku angustia pa nada.10 Pero e kreensia ei nunka lo no hiba nos na “un mifi di e sestatura di e plenitut di Cristu.”11
Ku diskulpa na Elder Neal A. Maxwell pa tribi na modifiká i ekstendé algu ku el a yega di bisa, mi tambe ta sugerí ku “bida di un pesona … no por ta yená di fe i liber di strès.” Simplemente e lo no fushoná “pa skùif ingenuo den bida,” bisando segun nos ta bebe un otro glas di limonada: “Señor, duna mi bo mihó virtutnan, pero ta sigur pa no duna mi pena, ni tristesa, nni doló, ni oposishon. Por fabor no laga ningun hende keda sin gusta mi òf traishoná mi, i riba tur kos, nunka no laga mi sinti mi bandoná pa Bo òf esnan ku mi ta stima. De hecho, Señor tene kuidou pa tene mi leu for di tur e eksperensianan ku a hasi Abo divino. I era ei, ora e skùifmentu duru di otronan a pasa, por fabor laga mi bini i biba ku Bo, kaminda mi por broma tokante kon similar nos ta ora mi ta pasa kontentu riba mi nubia kómodo di Cristianismo.”12
Mi kerido rumannan, Cristianismo ta konsolá, pero hopi biaha e no ta konfortabel. E kaminda pa santidat i felisidat aki i despues ta largu i tin biaha manera un baranka. Ta tuma tempu i tenasidat pa kana riba dje. Pero, klaro, e rekompensa pa hasi esaki ta grandioso. E bèrdat aki ta wòrdu siñá den kla i konvinsente den e di 32 kapítulo di Alma den e Buki di Mormon. Aki e gran sumo saserdote ta siña ku si e palabra di Dios wòrdu plantá den nos kurason komo únikamente un simía, i nos prekupá sufisiente pa duné awa, ranka yerba, nutrié, kurashé, den futuro e lo karga fruta, ku ta mas presioso, … dushi riba tur loke ta dushi, e konsumo di dje ku lo hiba na un kondishon di no tin set ni hamber mas.13
Hopi lès ta wòrdu siñá den e kapítulo remarkabel aki, pero sentral den tur ta e aksioma ku e simía mester wòrdu nutrí i nos mester warda pa e madurá, “[mirando] dilanti ku wowo di fe riba e fruta di dje.”14 Nos kosecha,A lma ta bisa, ta yega “poko poko.”15 No ta straño ku e ta konkluí su instrukshonnan remarkabel dor di ripití tres biaha un yamada pa diligensia i pasenshi den nutri e palabra di Dios den nos kurason, “wardando” manera e ta bisa, ku “longanimidat … pa e palu duna fruta na boso.”16
COVID i kanser, duda i konsternashon, problemanan finansiero i pruebanan familiar. Ki ora e karganan aki ta wòrdu lantá? E kontesta ta “poko poko.”17 I si esei lo ta un periodo kòrtiku òf largu no semper ta na nos pa bisa, pero pa e grasia di Dios, e bendishonnan lo bini na esnan ku ta tene duru na e evangelio di JesuCristu. E problema aki a wòrdu resolvé den un hardin privá riba un seru masha públiko na Yerusalèm hopi tempu pasá.
Awor ku nos ta skucha nos profeta stimá sera e konferensia aki, laga nos kòrda, manera Russell Nelson a demonstrá henter su bida, ku esnan ku “warda riba Señor lo renobá nan forsa [i] lo lanta ariba ku alanan manera aguila: nan lo kore, i lo no kansi; … nan lo kana, i lo no desmayá.”18 Mi ta hasi orashon pa ““poko poko“—pronto òf lat—e bendishonnan ei lo yega na kada un di boso ku ta buska alivio for di boso tristesanan i libertat di boso doló. Mi ta duna testimonio di Dios Su amor i di e Restourashon di Su evangelio glorioso, ku ta, di un manera òf ptro, ie kontesta pa kada problema ku nos ta enfrentá den bida. Den e nòmber ku ya redimí di Señor JesuCristu, amèn.