Pidi, Buska, i Bati
Un parti importante di Tata Selestial Su pian ta e oportunidat pa komuniká ku Né ki ora ku nos ke.
Kuater luna pasa, den mi estudio di skritura,mi tabata lesa tokante di e mishon di Alma na Ammoníah ora mi a dal den e sugErensia aki Bini, Sigui Mi: “miéntras bo ta lesa di e bendishonnan grandi ku Dios a duna e pueblo di Nefi (wak Alma 9:19–23), medita riba e bendishonnan grandi ku El a duna bo.”1 Mi a disidí di traha un lista di e bendishonnan di Dios pa mi i registrá nan den mi vershon digital di e manual. Den un par di minüt, mi a registrá 16 bendishon.
Den esnan mas importante tabata e bendishonnan mas grandi di e miserikòrdia i e sakrifisio ekspiatorio pa mi. Mi a skirbí tambe e bendishonnan ku mi a haña komo un mishonero hóben na Portugal i, mas despues, ku mi amoroso kompañera eterno, Patricia, den e Mishon Brazil Porto Algre Sur, kaminda nos a sirbi ku 522 mishonero poderoso i maravioso. Papiando di Patricia, hopi di e bendishonnan ku mi a registrá e dia ei ta bendishonnan ku nos a difrutá huntu durante di 40 aña di matrimonio—inkluyendo nos seyamentu den Tèmpel di São Paulo Brazil, nos tres maravioso yunan, nan kasánan, i nos 13 ñetunan.
Mi pensamentu ta bai riba mi mayornan honesto, kende a kria mi den e prinsipionan di e evangelio. Mi ta kòrda partíkularmente riba un okashon ku mi mama stimá a hinka rudia huntu ku mi na mi kama tempu ku mi tabain mas o ménos 10 ana. E mester por a sinti ku pa si mi orashonnan mester yega mi Tata den Shelu, nan lo mester bira mihó. El a bisa mi, “Lo mi hasi orashon promé, i despues di mi orashon, abo ta hasi orashon.” El a sigui e patronchi aki pa bastante anochi, te ora ku e tabata sigur ku mi a siña dor di prinsipio i praktiká kon pa papia ku nos Tata Selestial. Pa semper lo mi ta gradisí ku el a siña mi hasi orashon, pasó mi a siña ku mi Tata Selestial ta skucha mi orashonnan i ta kontesta nan.
Defakto, esei ta un otro bendishon ku mi a inkluí den mi lista—e don di por skucha i siña e boluntat di Señor. Un parti importante di Tata Selestial Su pian ta e oportunidat pa komuniká ku Né ki ora ku nos ke.
Un invitashon di Señor
Ora ku e Salbador a bishita Merka despues di Su Resurekshon, El a ripiti un invitashon ku El a hasi na Su disipelnan na Galilea. El a bisa:
“Pidi, i e lo wòrdu duná na boso; buska, i boso lo haña; bati, i lo wòrdu habrí pa boso.
“Pasó tur ku pidi, ta risibí; i esun ku buska ta haña; i na esun ku bati, lo wòrdu habri.” (3 Nefi 14:7–8; wak tambe Mateo 7:7–8).
Nos profeta, Presidente Russell M. Nelson, a duna un invitashon similar den nos dianan. El a bisa: “hasi orashon den nòmber di JesuCristu pa bo preokupashonnan, bo angustiánan, bo debelidatnan—si, e anhelonan mes di bo korason. I despues skucha! Skirbi e pensamentunan ku ta drenta bo mente. Nota bo sintimentunan i tuma akshon ku ta wòrdu rekeri di bo. Ora bo ta ripiti e proseso aki dia tras di dia, luna tras di luna, aña tras di aña, lo bo ‘krese den e prinsipio di revelashon.’”2
Presidente Nelson a añadí, “den e dianan benidero, lo no ta posibel pa sobrebibí spiritualmente sin e guia, direkshon, konsuelo, i influensia konstante di e Spiritu Santu.”3
Dikon revelashon ta ensensial pa nos spiritu sobrebibí? Pasó e mundu por ta konfundi i yen bochincha, yen di desepshon i distraishon. Ku komunikashon ku nos Tata Selestial nos por klasifiká lokual ta berdadero i lokual ta falsu, kiko ta relevante pa e plan di Señor pa nos i lokual no ta. E mundu por ta duru i doloroso. Ora ku nos habri nos kurason den orashon, nos ta sinti e konsuelo ku ta bini di nos Tata Selestial i seguransa ku E ta stima nos i balorá nos.
Pidi
Señor a bisa “tur ku pidi, ta risibí.” Pidi ta parse simpel, i tòg e ta poderoso pasó e ta revelá nos deseonan i nos fe. Sinembargo, e ta tuma tempu i pasenshi pa siña kompronde e bos di Señor. Nos ta pone atenshon na pensamentu i sentimentunan ku ta yega nos mente i kurason, i nos ta skirbi nan, manera nos profeta a konsehá nos. Registrá nos imprenshonnan ta un parti importante di risibí. E ta yuda nos kòrda, repasá i bolbe sinti lokual Señor ta siñando nos.
Resientemente un ser keri a bisa mi, “mi ta kere ku revelashon personal ta berdat. Mi ta kere ku e Spiritu Santu lo mustra mi tur kos ku mi tin ku hasi.4 Ta fásil pa kere ora ku mi sinti pechu kima ku un konvikshon indisputabel.5 I awor kon mi por hasi pa e Spiritu Santu por keda papia ku ni riba e nivel aki?”
Na mi sernan keri, i boso tur, lo mi ke bisa ku ami tambe ta gusta pa sinti konstantemente e imprenshonnan fuerte di e Spiritu i semper wak ku klaridat e kaminda pa siguí. Pero ami no [ta sinti esaki]. Sinembargo, lokual nos por sinti hopi biaha ta e bós ketu i suave di Señor ku ta susurá na nos mente i kurason, “Mi ta aki. Mi ta stima bo. Sigui pa dilanti; hasi bo esfuerso. Mi ta sostené bo.” Nos no tin mester di sa tur kos òf mira tur kos.
E bós chikitu i ketu, ta reafirmá, enkurashá, konsolá—i hopi biaha esaki ta nèt lokual nos tin mester pa e dia. E Spiritu Santu ta real, i Su imprenshonnan ta real—esnan grandi i esnan chikitu.
Buska
Señor a primintí lo sigiente, “Esun ku ta buska, lo haña.” Buska ta aplika esfuerso mental i spiritual—medita, tòst, purba, i studia. Nos ta busa pasó nos ta konfia den e promesa di Señor. “Pasó esun ku ta aserká Dios mester kere ku E ta, i ku E ta rekompensá esnan ku ta busk’a E” (Hebreonan 11:6). Ora ku nos ta buska, nos ta rekonosé humildemente ku te ahindaa nos tin ku siña hopi, i Señor ta amplia nos entendimientu, i ta prepará nos pa risibí mas. “Ata’ki, asina Señor Dios ta bisa: Mi ta duna e yunan di hende liña riba liña, mandato riba mandato, aki un tiki aya un tiki; … pasó esun ku ta risibí Mi lo duna [e] mas” (2 Nefi 28:30).
Bati
Finalmente, Señor a bisa, “Na esun ku ta bati, lo wòrdu habri.” Bati ta aktua den fé. Ora ku nos siguí E aktivamente, Señor lo habri e kaminda pa nos. Tin un himno bunita ku ta siña nos pa “spierta i hasi algu mas ku soña di [nos] manshon [aya] riba. Hasiendo bon ta un plaser, un goso sin midí, un bendishon di deber i amor.”6 Elder Gerrit W. Gong di Quorum di e Diesdos resientemente a splika ku revelashon ta bini na momentunan ku nos ta hasiendo bon. El a bisa: “Miéntras nos ta trata di sirbi esnan ku ta rondo di nos, mi ta pensa ku Señor ta duna nos un èkstra porshon di Su amor pa nan i p’esei pa nos. Mi ta kere ku nos ta skucha Su bos—nos ta sinti E den un manera diferente—ora nos ta hasi orashon pa yuda esnan rondó di nos pasó esei ta un di e orashonnan ku mas E ke rosponde. 7
E ehèmpel di Alma
E simpel sugerensia den Bini, Siguí Mi pa pensa riba mi bendishonnan a trese un spiritu dushi i algun idea spiritual inespera. Miéntras ku mi a sigui lesa tokante Alma i su ministrashon den Ammonihah, mi a diskubrí ku Alma a proveé un bon ehèmpel di lokual ta nifika pidi, buska i bati. Nos ta lesa ku “Alma a traha hopi den spirtu, luchando ku Dios den poderoso orashon, pa e dramá Su Spiritu riba e pueblo.” Sinembargo, e orashon aki no a wòrdu kontestá manera el a spera, i Alma a wòrdu saká for di e siudat. “Kargádi dolór,” Alma tabata kla pa entregá, ora un angel a duné e mensahge aki: “Bo ta bendishona Alma; p‘esei, hisa bo kabes i gosa, pasó bo tin hopi motibu di gosa.” E angel a bisé pa e bolbe bèk pa Ammonihah i purba atrobe, i Alma a “bolbe bèk rapidamente.”8
Kiko nos ta siña tokante Alma su petishon, búskeda, i batimentu? Nos ta siña ku orashon ta rekerí trabou spiritual, i no semper e ta kondusi nos na e resultado ku nos ta spera. Ora ku nos ta sinti nos desanimá òf tristu ku doló, Señor ta konsolá nos i fortalesé nos na diferente manera. E no ta kontesta tur nos preguntanan òf resolvé tur nos problemanan mesora; mas bien, E ta enkurashá nos pa sigui purba. Si nos aliñá lihá nos plan ku Su plan, E lo habri e kaminda pa nos, manera ku El a hasi pa Alma.
Mi testimonio ta ku esaki ta e dispensashon di e plenitut di e evangelio. Nos por disfrutá di bendishonnan di e Ekspiashon di JesuCristu den nos bida. Nos tin e skrituranan ampliamente disponibel pa nos. Nos ta wòrdu guiá pa profetanan ku ta siña nos e boluntat di Señor pa den e tempunan difisíl ku nos ta biba aden. Ademas, nos tin akseso direkto na revelashonnan propio pa Señor por konsolá i guia nos personalmente. Manera e angel a bisa Alma, nos tin “gran motibu pa regosihá” (Alma 8:15). Den e nòmber di JesuCristu, amèn.