Kahs in Pain
Paing kom nuh ke toeni luhlahp ac pacl wowo se in lohng puhsren Leum.
Tamuhlwel ac tahmtahel ac kawuck sacohk luhk fin facluh, nga paing kowos nuh ke toeni luhlahp se inge. Kuht fahsrweni oacna sie sucu luhlahp fin facluh suc kena in ahkfuhlwactye Leum ac Mwet Lahngo lasr, Jisus Kraist. Kuloh ke kowos oasr wi kuht uh.
Yac sahflah se inge ma ac sihmlac lun puk. Pwacye tuh kuht etwaclah ma sasuc kuht tiac etuh kac. Kuhtuh lutlut nga etuh tari sihmlac insiyuck ke ohiyac wo ac sasuc.
Ke srihkasrak, nga etuh na pwacye tuh Leum El kol orekma luhn Alu Lal. El fahk muh, “Nga fah ahkkahlwemye nuh [sum] lah Nga kuh in oruh orekma Luhk sifacna.”1
Inkaiyacn pacl uh, mwet kahsruh luhk ac nga tuh liye ke sronin muhta ke El tuh kahsruh ma upac tukun kuht sang kuhiyacsr ac tiac kuh in sifil oruh upac liki. Pwacye kuht tuh fwefwelac.
Nga oacyacpac kahlwem yohk ingena ke kalmweyacn kahs Lal ke El fahk tuh El ac salkweack orekma Lal ke pacl.2 Pacl nuh ke pacl nga enganwack ke El kol ac ahkfahsrye salkweyacn orekma Lal—finne ke mas fin facluh nohfohn.
Tamuhlwel ac tahmtahel sacohk wiyuck, fokokoiyacn Alu uh oasr ke orekma ac luhlahlfongi yohkwelihk luhn mempucr la. Luhlahlfongi uh kapwack wo emet e lohm ah. Nuh ke yac sahflah se inge, pucs suwos tuh ahkyohkye lutlutkihn wosasuc lun lohm suwos an. Kuloh nuh suwohs, ac tuhlihk nuhtuwos fah tarilacna suwos.
Orekma yohk se in ahksasucye Tempuhl Salt Lake srwackna fahsr. Ke ofuhs luhk nga kuh in liye ke winto luhk orekma ma sikyak ke tempuhl.
Ke nga liye mwet orekma puhkanwack sahk mah, kuhfa mahtuh, ac eislah pwelucng muhnahslah, nga nuhnkuh ke enenuh lasr kais sie in eislah, wi kahsruh luhn Mwet Lahngo, ma koluk mahtuh ke moul lasr.
Wosasuc luhn Jisus Kraist pa wosasuc luhn auliyak.3 Ke srihpen Iwaclah luhn Mwet Lahngo, wosasuc Lal suli kuht in eklac, kapwack, ac nwacsnwacslah. El pa wosasuc luhn finsrak, ahkkweyeyuck, ac kapkapwack. Oruh, pweng luhn wosasuc pa ma luhn engan! Nguhn lasr enganwack ke kais sie step kuht fahsr kac nuh met.
Ipin fahsrweni luhn mwet Israel, ac ip yohk srihpac se, pa sap se nuh sesr oacna mwet lal in suwohs ac kena in ahkolah facluh nuh ke Tuhkuh Ahkluo luhn Leum.
Ke kuht porongo sramsram ma ahkolah sin mwet kol lasr ye kohkoh luhn Nguhn Muhtahl, nga suli kowos in pruhe in akihlen ma koluk kowos enenuh in eislah liki moul lowos kowos in kuh in suwos liki met ah.
Nga luhngse kowos, tamuhlwel ac tahmtahel sacohk wiyuck, ac fahkwelihk tuh Pahpah tuhmasr Inkuhsrao ac Wen Kuloh Nahtuhl etwekowos ac luhngse kowos kais sie. Elos sano in kahsrwe kowos ke step nuhkwewa kowos fahsr kac nuh met. Paing kom nuh ke toeni luhlahp se ac ke pacl wowo se in prorongo puhsra luhn Leum. Ke inen Jisus Kraist, amen.