Meac Leum El Oraclah nuh Sesr?
Jisus Kraist El oraclah ma nuhkwewa ma yohk srihpac nuh ke fuhfahsryucsr lasr ke moul suhkawihl nuh ke finsrak ma ahkoeyucklac ke plwacn luhn Pahpah tuhmasr Inkuhsrao.
Ke sie ekuhn miting in Sactte ke sie toeni luhn stek ke yac puhs somlah ah, nga tuh ohsun nuh sin muhtwacn se suc fahk lah kawuck lal tuh siyuck sel in fohlohk nuh ke alu ah tukun yac puhs el soaruyak, tuhsruhk el tiac kuh in nuhnkuh ke kuhtwena srihpac lah efuh el enenuh in som. In ahkkweiyacl, nga fahk, “Ke kom nuhnkuh nohfohn ma Mwet Lahngo el oraclah nuh sum uh, oasr srihpac na puhs lom in fohlohkoh in alu ac kuhlwacnsap nuh Sel.” Nga lut ke el topuk fahk muh, “Meac El oraclah nuh sihk uh?”
Meac Jisus El oraclah nuh sesr kais sie? El oraclah ma nuhkwewa ma yohk srihpac nuh ke fuhfahsryucsr lasr ke moul suhkawihl nuh ke finsrak ma ahkoeyucklac ke plwacn luhn Pahpah tuhmasr Inkuhsrao. Ngac sramsramkihn atacn mwe luti ahkosr ke plwacn sacn. Ke kais sie ma ingacn Wen Sacohk Sefanna Nahtuhl, Jisus Kraist, pa mwet se infulwac uh. Moklweyacn ma nuhkwewa inge pa “luhngse luhn God, suc sifacna maelihk nuh ke insiacn tuhlihk nuhtin mwet; ohinge, ma se inge pa luhngkihnyuck emet liki ma nuhkwewa” (1 Nephi 11:22).
I.
Met liki na Sacnri in Istuh, pacl pacna in sramsramkihn met Sifil Moulyak luhn Jisus Kraist. Sifil Moulyak liki misac pa mwe ahkkweyelah usren luhlahlfongi lasr sifacna uh. Ac ituckyang kalmac nuh ke ma suhmuhslah muhtahl, moklweyuck nuh ke ohiyacsr, ac finsrak nuh ke pacl fahsruh lasr uh.
Ke srihpen kuht luhlahlfongi ke ahkuhtweyac ke Bible ac Puk luhn Mormon ke Sifil Moulyak lal Jisus Kraist, kuht oacyacpac eis luti puhkantwen ke ma suhmuhslah ma sifil moulyak se oacpacna fah tuhkuh nuh sin mwet suc ma moul muhta fin facluh se inge.1 Oacna ke Jisus El luti, “ke sripen nga moul, kowos fah oayapa moul” (John 14:19). Ac Mwet Sap Lal luti lah “mwet misa ac fah akmoulyeyukyak ac tia sifil misa” ac “ma su misa ac kulawi ekla tari nu ke ma ac tia ku in misa ku kulawi” (Sie Corinth 15:52, 54).
Tuhsruhk Sifil Moulyak use nuh sesr yohk liki na ma kahlwem ke ma moul kawihl. Ekuhllah ohiyac kuht liye ke moul suhkawihl.
Sifil Moulyak uh use nuh sesr ngwetngwet se ac kuhiyac in muhtwacnglah ma upac ke moul suhkawihl kuht kais sie sun ac elos suc kuht luhngse. Use nuh sesr atac sasuc se in liye ma elyah ke mahno, nuhnak, kuh puhla oasr sesr ke kuht tuh isuslac ah kuh eis ke na moul se kuht oasr kac inge. Use nuh sesr kuh se in muhtwacnglah ahsor, tahfonglac, ac fohsack. Ke srihpen kais sie sesr oasr sifil moulyak in ahkkweye kuht, kuht etuh lah ma suhfal ke moul fin facluh lasr inge ac ma lain kuht uh ma nuh na ke kihtin pacl.
Sifil Moulyak uh use molo na fokoko se in liyacacng masap luhn God ke moul in mahno lasr uh. Ke kuht moulyak liki misac ac som nuh ke Nuhnuhnkuh Sahflah palyeiyuck, kuht ke na in sulaclah fal ke mwe insewowo ma uliyucki nuh ke sifil moulyak luhn mwet.2
Oacyacpac, olwelah ma Sifil Moulyak uh kuh in oasr pacl se in wi mwet ke sucu lasr—mukul tuhma, muhtwacn kiyac, tuhlihk srihsrihk, ninac ac pahpah, ac kasrpaclos—mwe ahkkweye na fokoko se in ahkfahsryelah kunohkohn luhn sucu ke moul se fin facluh inge. Oacyacpac kahsrwe kuht in tuhkweni moulkihn luhngse ke moul se inge, ac ahkkweye kuht ke misac luhn mwet sacohk lasr. Kuht etuh lah fahsrwelihk ke moul se inge ma nuh na ke kihtin pacl, ac kuht finsrak nuh ke tuhkweni engan ke pacl fahsruh uh. Sifil Moulyak uh use finsrak nuh sesr ac kuhiyac in muhtweng oacna ke kuht sano. Oacyacpac ahkoekuhtlac ke puhlaik ac inse pwacye in sun misac lasr sifacna—finne misac se ma sahp pahngpahng misac se met.
Ma sikyak ke Sifil Moulyak inge nuhkwewa ma ke ipin top se emet nuh ke kihsensiyuck soko “Meac Jisus Kraist El oraclah nuh sihk?”
II.
Inkaiyacsr, pacl se in nuhnak muhnahskihnyuck ma koluk lasr pa srihpac yohk se ke Iwaclah luhn Jisus Kraist. In ahkfuhlwactyacl, kuht efahl in on:
Srah sacohk lal el fuhlwelah in kahklah;
Moul lal el fuhlwelah in sang,
Kihsac wacngihn ma koluk la nuh sin mwet puhlakihn,
Facluh muhnahslah se in moliyucklac.3
Mwet Lahngo ac Mwet in Molwelah lasr muhtwacnglah kweok upac in kahlwem kac se in tuhkuh oacna sie kihsac nuh ke ma koluk luhn mwet uh suc fah auliyak. Kihsac in iwaclah se inge sang wolacna yohk, lahm nwacsnwacs wacngihn ma koluk la, nuh ke luhpah yohk luhn ma koluk, ma koluk ke facluh se nohfohn. Ikucslah sruhnguhl nuh sesr kais sie in ahknwacsnwacsyeyuck lac ke ma koluk lasr sifacna tuh kuht kuh in sifil utyak nuh yurin God, Pahpah Ma Pahtpaht tuhmwacsr. Sruhnguhl ikacklah se inge mwesahs nuh sin tuhlihk nuhkwewa nuhtin God. In ahkfuhlwactye, kuht on:
Nga lut tuh elan oactui liki tron wolacna lal
In molwelah sie nguhn suc arlac lihkkeke ac fuhlwact oacna ma luhk,
Tuh el enenuh in tahfwelah luhngse yohk lal nuh sin kain mwet se nga uh.4
Fuhlwactiyac ac ma sikyak upac in kahlwem kac ke Iwaclah luhn Jisus Kraist tuhkuh ke luhngse luhn God nuh sesr kais sie. Ahkkweye lah na pwacye mwe fahkwack Lal lah suwohswohs luhn nguhna—ma nuhkwewa—pa yohk ye muhtuhn God (Doctrine and Covenants 18:10). Ke Bible ah, Jisus Kraist El ahkuhtweyac ma inge ke luhngse luhn Pahpah tuhmasr Inkuhsrao: “Tuh God el lungse faclu ouinge, El ase Wen sefanna natul, tuh elos nukewa su lulalfongi in el fah tia misa, tuh elos fah eis moul ma pahtpat” (John 3:16). Fwackyuck mihsenge ma Mwet in Molwelah lasr Jisus Kraist el fahk lah El luhngse facluh lah el acse moul lal sifacna, lah puhs suhnuhn mwet fah luhlahlfongwel sahp eklac wen nuhtin God (Doctrine and Covenants 34:3
Oacna motkweyuck, tuh, lah Puk luhn Mormon, “Sie Wuhlweacng ke Jisus Kraist,” ahksahfye ke sie luti ma tuhkuh tuh “suwohs” ac “nwacsnwacslah kacl Kraist” kuht enenuh in “luhngse God” ke kuh [lasr] kewa, nuhnkacsr ac kuhiyacsr.Moroni 10:32–33). Plwacn Lal moklweyuck ke luhngse ma enenuh in eisyuck ke luhngse.
III.
Meac pac sahyac Mwet Lahngo lasr, Jisus Kraist, El oraclah nuh sesr? Ke luti luhn mwet pahluh Lal ac ke karihngihn Lal sifacna, Jisus El luti kuht ke plwacn in molwelah. Plwacn se inge oasr kac Oreklac luhn ma nuhkwewa, srihpac luhn moul, ma yohk srihpac luhn ma siena, ac mwe sang luhn sukohsohk in sulaclah. El oacyacpac luti kuht ke masap ac olwelah muhtahl kuht enenuh in ahkos ac akwuck ma kuht moulkihn in us kuht fohlohk nuh yurin ninac ac pahpah inkuhsrao.
Ke Bible kuht riti mwe luti Lal, “Kuhtwena mwet su fahsr tukuk fah oasr kalem lun moul yorol, ac el fah tiana fahsr in lohsr” (John 8:12). Ac ke fwackyuck mihsenge uh kuht riti, Liye, Nga pa Jisus Kraist, kahlwem se ma tiac kuhi n wihklac ke lohsr (Doctrine and Covenants 14:9 Fin kuht ukwe luti Lal, El tohlwack innek lasr ke moul se inge ac ahkkweye kuht ke finsrak se tok lasr uh.
Ke srihpen El luhngse kuht, El srihke kuht in lohacng nuh Sel, tiac ke ma luhn facluh se inge. Ke luti yohk Lal ke bread luhn moul, Jisus El luti lah kuht enenuh in tiac oasr inmahsrlon elos suc ma lohsrlah ke ma luhn facluh—ma ahkkweye moul fin facluh tuh tiac sang ahkkweye nuh ke moul ma pahtpaht.5 Ke Jisus El sifil suli kuht na suli kuht, “fahsr tukuk.”6
IV.
Ahksahfye, Puk luhn Mormon luti lah ipin Iwaclah luhn Jisus Kraist “kweok ke kain in waek ac ma koluk ac mwe sruhf nuhkwewa; ac ohinge tuh kahs uh in ahkpwacyeiyucklac suc fahk lah El fah eis nuh Facl kweok ac mas luhn mwet Lal” (Alma 7:11).
Efuh Mwet Lahngo lasr El kweokkihn ma upac ke “kain nuh kwewa” ke moul in mahno se inge? Alma el ahkuhtweyac, “El fah eis nuh Facl mas lalos, tuh insiacl in sesseslah ke pahkotwen, fal nuh ke mahno, tuh Elan kuh in etuh fal nuh ke mahno lah El ac kahsruh fuhkah [kalmac pa in sang mongi kuh kahsruh nuh sin] mwet Lal fal nuh ke mas lalos” (Alma 7:12).
Mwet Lahngo El puhlakihn ac etuh mwe sruhf lasr, mwe tihkuclkucl lasr, ma ahkngalye insiacsr, ac kweok lasr, tuh El kena sun ma inge nuhkwewa pa ipin Iwaclah Lal. Ma suhmuhslah sahyac ahkkweyelah ma se inge. Wuhlweacng Sasuc fahk lah, “Ac inge el ku in kasrelos su srifeyuk, mweyen el wi pac srifeyuk ac keok.” (Hebrew 2:18). Isaiah el luti, “Nimet sangeng; tuh nga wi kowos. … Nga fah oru kowos in ku; aok, Nga fah kasrekowos” (Isaiah 41:10). Elos nuhkwewa ma kweok ke kain in ma koluk ke moul se inge fah esam lah Mwet Lahngo lasr El tuh moulkihn kain waek ngal se pacna inge, ac lah ke srihpen Iwaclah Lal, El use nuh sesr kais sie kuh in orekmakihn.
Mwet Pahluh Joseph Smith el ahkfototoye lah ma inge nuhkwewa ke Ip Yohk ke Luhlahlfongi ahktolu lasr: “Kuht luhlahlfongi lah ke Iwaclah luhn Kraist, mwet nuhkwewa fah moul lac, ke ahkostwen nuh ke masap ac akwuck luhn Wosasuc”
“Meac Jisus Kraist El oraclah nuh sesr?” tamuhlwel sac siyuck. Ye plwacn luhn Pahpah tuhmwacsr Inkuhsrao, El oraclah inkuhsrao ac facluh (liye Doctrine and Covenants 14:9) tuh lah kais sie sesr kuh in moulkihn ma enenuh ke moul suhkawihl in suk finsrak muhtahl. Ke ipin plwacn luhn Pahpah, Sifil Moulyak luhn Jisus Kraist kuhtanglah misac in ahkkweyelah moul kawihl lasr kais sie. Iwaclah in kihsackuhnlah luhn Jisus Kraist use nuh sesr kais sie pacl wowo se in auliyak ke ma koluk lasr ac nwacsnwacslah in fohlohk nuh ke lohm inkuhsrao sesr. Masap ac olwelah Lal ahkkahlwemye inkacnek nuh sesr, ac pristut Lal use kuh ac wal in ahkfahsrye akwuck ma yohk srihpac in sun finsrak sacn. Ac Mwet Lahngo lasr kena moulkihn kweok ac ma koluk nuhkwewa luhn moul in mahno tuh El fah etuh luhpan kuhiyacsr ke ma koluk lasr.
Jisus Kraist El oraclah ma inge nuhkwewa mweyen El luhngse kuht nohfohn tuhlihk nuhtin God. Luhngse pa mokle ma nuhkwewa kac, ac pa muhtwacwacackiyac ah. God El fahk nuh sesr ke fwackyuck mihsenge uh lah el oraclah mukul ac muhtwacn tukun luhmah lal sifacna ac use nuh selos masap lah elos enenuh in luhngse ac kuhlwacnsapwacl (Doctrine and Covenants 20:18–19).
Nga fahkwack ke ma inge ac pruhe tuh kuht nuhkwewa fah esam ma Mwet Lahngo El oraclah nuh sesr ac lah kuht nuhkwewa fah luhngse ac kuhlwacnsap nuh Sel, ke inen Jisus Kraist, amen.