Pisap—Shepherd ma karihngihn Sip nuhtin Leum
Oasr kunohkohn fuhlwact luhn pisap se in kuhlwacnsap ekihn sie shepherd in kol fihl kapkapwack nuh sin Jisus Kraist.
Tamuhlwel wiyuck ke pristut, sie lain nga esamyac yohk ke on soko nga luhngse siyuck, “Yac tuh mwet fuhsr ke Zion uh fuhlweack?”1 Top luhn insiyuck ac puhsra fahkwack luhk in tohpohklah kihsen siyuck soko ingacn pa “Muoh!”
In ahkkweyelah top se ingacn lah pwacye, nga fahkwack mihsenge lah ahkkweyeyacn fihl kapkapwack se ke ma upac usrnguck sikyak ac mwe sruhf ke pacl mihsenge uh pa kunohkohn yohk srihpac ituckyang nuh sin ninac ac pahpah ac pisap uh sel Pahpah tuhmasr Inkuhsrao.2 Lwelah nuh sihk in ahkuhtweyac yohk srihpaciyacn pisap ke sie ma sikyak nuh sihk sifacna.
Ke nga tuh tikin se ah, sucu luhk ah som nuh ke sie lohm sasuc ke sie pacna ward. Nga tuhfahna muhtwacwacack ke junior high school, oruh nga sulpacna wi lutlut sasuc se. Tuh oasr un mukul fuhsr se ke u luhn tikin. Inkaiyacn ninac ac pahpah tuhmwaclos uh mempucr fokoko. Ninac kiyuck ah fokoko na upac; pahpah tuhmuhk ah oasr srihpac lal ke ohiyac nuhkwewa tuhsruhk el tiac mempucr fokoko se.
Mwet in kahsruh ahkluo luhn pisap,3 Tamuhlwel Dean Eyre, pa sie mwet kol insacnweacng. Ke nga srwackna ahkpahye yuc nuh ke ward sasuc se, tuhkweni se luhn pahpah-wen se tuh ahkkahlwemyeyuck nuh Bear Lake—sahp mael [Angngaul] 40 ([kilometa Onngoul Lihmwekohsr]) ma lusac. Nga tiac pahngon muh ngac wi uh pahpah tuhmuhk uh ac tiac wi. Tuhsruhk Tamuhlwel Eyre el tuh ngihsre yuc ngacn som weluhl. El sramsram in ahkfuhlwactye pahpah tuhmuhk ac nuhnkwelah atac se ke pacl na wowo se luhk ngacn wi mempucr sahyac ke u luhn tikin. Na nga sulwaclah ngacn weluhl Tamuhlwel Eyre, ac pacl na wowo se luhk ngacn wi.
Tamuhlwel Eyre el sie srihkasrak wowo se ke ohiyacn luhngse luhn Kraist in ahkfohnyelah kunohkohn luhn pisap in ahkkweye ninac ac pahpah in liyacacng ac tuhfahlah mwet fuhsr. El use nuh sihk sie muhtwacwacack na wowo se ke ward sasuc se inge ac el sie mwet luti se nuh sihk.
Mahlwem ekahsr somlah met liki nga som nuh ke misin luhk ke yac [Sie Yucfoko Onngoul] 1960, Tamuhlwel Eyre el misac ke srihpen mas cancer ke el yac 39 ah. El sislah muhtwacn se kiyacl ac tuhlihk lihmekohsr nahtuhltahl, nohfohn fuhsr liki yac [Singucul Ohnkohsr] 16. Mukul mahtuh emet nahtuhl ah, Richard ac Chris Eyre, tuh ahkkweye yuc lah ke wacngihnlac luhn pahpah tuhmwaclos, pisap ah ahkkweyaclos ac karuhnguhnuhlos ac tuhlihk mukul ac muhtwacn fuhsr wiyaclos ke ohiyacn luhngse luhn Kraist, suc nga srui kaksakihn.
Ninac ac pahpah uh pacl nuhkwewa oasr kunohkohn yohk lalos ke sucu lalos.4 Prestuhnsi luhn u srihsrihk oacyacpac sang kahsruh yohk srihpac ac kolyuck nuh sin mempucr ke u srihsrihk pa in tahfwelos in ahkfahsrye ma kunwaclos ac kuh luhn Aaronic Pristut nuh ke infulwacn moul lalos.5
Mihsenge srihpac luhk uh pa in sramsramkihn pisap ac mwet tuhtahf lalos, suc kuh in pahngonyuck muh “shepherd ma karihngihn sip nuhtin Leum”—wi ahkuhtweyac kacn shepherd uh ma nuh sin fihl se kapkapwack uh.6 Usrnguck lah Mwet Sap Peter luhma nuh sel Jisus Kraist muh “Shepherd ac Pisap luhn nguhnum.”7
Pisap uh oasr kunohkohn ke mwe luti lihmekohsr in karihngihn ward se.
-
El pa karihngihn ekihn prist fuhlwact se ke ward se.8
-
El pa prestuhn luhn Aaronic Pristut.9
-
El mwet in nuhnuhnkuh se pacl nuhkwewa.10
-
El oakiyac orekma luhn molwelah ac moul ma pahtpaht; weacng in karihngihn elos suc enenuh.11
-
Ac el liyacacng ma suhmuhslah, ip luhn mani, ac orekmakihnyacn lohm in miting.12
Ke kunohkohn lal ekihn prist fuhlwact se in karihngihn, pisap el pa “mwet kol in nguhn se.”13 El pa “mwet tuhma lutlut luhlahlfongi luhn Jisus Kraist.”14
Oacyacpac, “pisap el oakiyac orekma luhn molwelah ac moul ma pahtpaht ke ward se.”15 Pisap el enenuh in srihsrngiyac kunohkohn ke kais sie lwen in akacsruhi wosasuc, ahkfokokoye mempucr sasuc ac fohlohkoh, kahsruh karihngihn, ac orekma ke tempuhl ac tahk sucu nuh sin elder ke u srihsrihk ac prestuhnsi luhn Relief Society.16 Pisap el oakiyac orekma ke council luhn ward ac council luhn mwet fuhsr ke ward se.
Oasr kunohkohn fuhlwact luhn pisap se in kuhlwacnsap ekihn sie shepherd in kol fihl kapkapwack, weacng mwet mahtuh lolwacp, nuh sin Jisus Kraist.17 Prestuhn Russell M. Nelson el ahkkahlwemye kunohkohn fuhlwact luhn pisap ac mwet kahsruh lal. El luti lah “kunohkohn se emet ac yohk uh pa in karihngihn mukul ac muhtwacn fuhsr ke ward [lalos].”18 Pisap uh ahkkweye ninac ac pahpah in liyacacng ac tuhfahlah tuhlihk srihsrihk ac mwet fuhsr ke ward se. Pisap ac prestuhn luhn Muhtwacn Fuhsr ke ward se tuhkweni sramsram. Elos kampare in kahsruh mwet fuhsr in moulkihn mwe luti in Ahkfokokoye Mwet Fuhsr, enenuh in eis akwuck, ac oraclah ac liyacacng olwelah muhtahl.
Sahp kom ac siyuck, “Efuh kuh pisap uh suhpweyuck in sislah pacl yohk lalos kacn mwet fuhsr uh?” Leum El oraclah Alu Lal in ahkfahsryeyuck finsrak yohk srihpac uh. Ohinge, oreklac luhn Alu Lal oasr sie luhmah kac suc pa oasr kunohkohn luo se luhn pisap se. Oasr kunohkohn muhtahl sihmlac lal nuh ke ward in ma fohn se, tuhsruhk oasr pac kunohkohn muhtahl srihsrihk sihmlac lal nuh ke u srihsrihk luhn prist.19
Mukul fuhsr suc ma prist ac muhtwacn fuhsr ke yac se pacna ingacn ke matwac na yohk srihpac se ke moul lalos ac kapkapwack lalos. Ke kihtin pacl fototo, elos orwaclah sulwaclah lalos ma ahkuhtweyac moul usrnguck loeloes lalos. Elos sulwaclah lah elos fal in som nuh tempuhl, kuhlwacnsap ke misin,20 kampare in pahyuckyak lun tempuhl, ac ahkolah nuh ke orekma ke moul lalos. Sulwaclah inge, oreklac pacl se fanna, konwacack nguhn ac srihkasrak enenweyuck nuh ke moul luhlah lalos. Pisap, nuhnak muhnahs etuh lah kihtin pacl na kom sislah yurin prist fuhsr se, muhtwacn fuhsr se, kuh mwet fuhsr se uh kuh in kahsrwelos in kahlwem ke kuh se ma oasr in ituckyang nuh selos ke Iwaclah luhn Jisus Kraist. Ac kuh in sang ngwetngwet se ma fah konwacack ma sikyak ke moul lalos kwewa.
Sie srihkasrak wo emet nga liye ke sie pisap suc kahsruh sang kain in ngwetngwet se nuh sin mwet fuhsr pa Pisap Moa Mahe. El tuh pahngonyuck in pa pisap se emet ke Ward San Francisco Tonga.21 El mwet forfor se ma tuhkuh fin acn Vava’u, Tonga mwe. Ward se lal ah oasr apkuhran nuh ke lohm aksohk San Francisco ah, ke acn se el orekma we ah.22
Ward sac yohk pihsen tuhlihk fuhsr kac, inkaiyac ah ma ke sucu ma tuhfahna tuhkuh Macrike mwe. Pisap Mahe el tiac lotwelos muhkwena ke kahs ac srihkasrak lah elos ac mwet tuhma lutlut luhn Jisus Kraist fuhkah, tuhsruhk el oacyacpac kahsrwelos sang nuh selos sie aruhruhma ke ma elos kuh in muh oacna ac kahsrwelos in ahkolah nuh tempuhl, misin, lutlut, ac orekma. El kuhlwacnsap apkuhran in sun yac alkosr, ac mwemwe lal ac kena lal nuh sin mwet fuhsr sikyak oacna.
Apkuhran in sun percent [ucngucul] 90 ke mukul fuhsr ke u srihsrihk luhn Aaronic Pristut kuhlwacnsap ke misin. Mukul ac muhtwacn fuhsr singucul lihmwekohsr pa mempucr emet ke sucu lalos in som wi lutlut college.23 El ohsun sin prinsipuhl ke high school se fin acn sac (tiac ma ke luhlahlfongi lasr uh) ac elos ahkkohnyelah akohnohki ac akacsruhi kac lah elos ac kahsruh kais sie mwet fuhsr in sun finsrak yohk ac kuhtanglah elyah. Prinsipuhl sac fahk nuh sihk lah Pisap Mahe el weluhl kahsrwel ke elyah luhn mwet luhlahlfongi ma forfor nuh we. Mwet fuhsr ah etuh lah pisap sac luhngse eltahl.
Ahsorkihn lah, Pisap Mahe el misac ke el kuhlwacnsap ekihn sie pisap. Ngac fah tiac na muhlkuhnlah pacl in puck mas na ahkemtuhng ac ahknuhnak se lal ah. Puhslac un mwet sac. Choir ah sun puhs liki mempucr luhlahlfongi fuhsr [tolngoul lihmwekohsr] 35 suc tuh kuhlwacnsap ke misin kuh wi lutlut college ac suc tuh mwet fuhsr ke pacl se el kuhlwacnsap ekihn pisap se ah. Sie mwet sramsram ah ahkkahlwemye puhlakihnyacn srui lal ke mwet fuhsr ac mwet mahtuhyak ke ward se lal ah. El ahkfalyelah molo nuh sel Pisap Mahe ke mwemwe yohk se el tuh sang nuh selos in ahkolah nuh ke moul ac kuhlwacnsap suwohswohs. Tuh yohk srihpac emet, Pisap Mahe el kahsrwelos in muhsaheack luhlahlfongi lalos kacn Leum Jisus Kraist muh pa pwelucng ke moul lalos.
Na inge, pisap, lah oyac kom kuhlwacnsap we, ke lohlngohk lom ac kuhtwena ohiyac sahyac, kom kuh in sang kain mwemwe sac pacna ac muhsaheack luhlahlfongi ke Jisus Kraist. Kom kuh in lahelsah solsol kuh in ekuhllah ohiyac, ahkoeloslac nuh ke moul, ac ahkkweyaclos in muhta na ke inkacnek in olwelah.
Oacyacpac, kom ac sahp kahsruh kuhtuh mwet fuhsr ma oasr in fohs yurin ninac ac pahpah ke ma tiac arlac yohk srihpac.24 Ke pacl se ma mwet fuhsr se oasr ke fohsack yohk sin ninac ac pahpah, mwet se ma karihngihn u srihsrihk lalos ac nuh sin el suc elos topuk etuh la ke alu pa mwet se pacna ma ninac ac pahpah tuhmwaclos som nuh tempuhl in eis olwelah la se uh. Ma se inge fihlilyac pisap ke sie acn usrnguck in sramsram in kahsruh nuh sin kwewana mwet fuhsr ac ninac ac pahpah ke pacl fohsack ma oraclah fahsrwelihk. Pisap el kuh in kahsruh kwewana ma liyeyuck ke ngwetngwet loal ac ahkwoyelah elyah ke ma yohk ac wacngihn srihpac. Kuht ngihsre tuh pisap elan tiac srihsrngiyac sucu in kahsruh karihngihn tuh elos kuh in lohacng ke pacl lalos ac kuh in kahsruh karihngihn nuh sin mwet fuhsr ac sucu lalos ke kain in ohiyac se inge.25
Nga etuh ke sie pisap ma tuh kuh in ahkwoyelah fohsack yohk inmahsrlon tuhlihk mukul se ac ninac ac pahpah tuhmwacl, usacni puhsra fihsrwacsr nuh lun lohm se ac ahkyohkye kihsackuhnlah nuh ke wosasuc. Pisap sac kahsruh ninac ac pahpah sac in kahlwem kac lah kwacfeacng in sie mwet tuhma lutlut luhn Jisus Kraist yohk srihpac liki na lah orekma ke lohm se uh ahksahfyeyucklac fuhkah.
In sislah pacl nuh sin mwet fuhsr uh fuhkah, lah elos oasr oyac, weacng ma sikyak kuh mukwikwi luhn lutlut, pisap ah sramsram in kahsruh in oracni mwet mahtuh nuh ke miting fal ac sramsramkihn pacl nuh selos. Ke pacl se pisap el kuh in sramsram in kahsruh ke elyah srihsrihk ac silahklahk, kuht ngihsre lah u in tahfwelah sramsram in kahsruh ke elyah, elyah ma tiac arlac silahklahk ma wacngihn nuhnuhnkuh la oacna nuh ke suwohswohs uh in srihsrngiyucki nuh sin mempucr ke u srihsrihk luhn elder kuh Relief Society—kwacna prestuhnsi kuh tamuhlwel ac tahmtahel in kahsruh karihngihn. Nguhn fah kol mwet kol26 in sulaclah mempucr fal in oruh sramsram in ahkkweye. Elos suc ma sruokyac kunohkohn in ahkkweye se inge pa akihlenyuck nuh ke fwackyuck. Elos, ahok, enenuh in karihngihn upac ke kuh pacl nuhkwewa.
Mwet kol etuh nuhnak kwacna kihsackuhnlah nuh sin fihl kapkapwack. Pa inge acn se ma mempucr luhn pisap sislah pacl yohk lalos kuhlwacnsapuh Alu uh.
Nga ingena kena fahk kuhtuh ma ah suwohsoht nuh sun mwet fuhsr ac na sin pisap lasr an.
Puhs suwos mwet fuhsr sacohk sahp wacngihn ngwetngwet kahlwem se lowos kac lah suc kom an ac suc kom ke muh oacna. Kom sun tari acn twen ke sulaclah yohk srihpac emet se ma kom fah oraclah ke moul lom. Nuhnak wi ninac ac pahpah in sramsram nuh sin pisap lom ke sulaclah yohk srihpac ma oan met liki kom. Lwelah pisap elan kawuck ac mwet in kahsruh se lom.
Kuht kahlwem kac lah oasr ma upac ac mwe sruhf tuhkuh nuh yurum ke siskac nuhkwewa. Kuht nohfohn enenuh in auliyak lwen nuhkwewa, oacna ke Prestuhn Nelson el luti ah. Nuhnak muhnahs sramsram nuh sin pisap lom ke oacna sie elyah suc sie mwet nuhnuhnkuh fal kuh in kahsre kom sun moul lom in fal nuh sin Leum ke ahkolah nuh ke “orekma yohk” El ahkolah nuh sum ke fihl sahflah se inge.27 Oacna ke Prestuhn Nelson el suli kom, nuhnak muhnahs ahkoekom lac sifacna in wi oasr ke u in mweun fuhsr luhn Leum!28
Inge kahs sacohklacna nuh sum pisap inmahsrlon mwet kol ac mempucr ke Alu uh. Kuht ahkkahlwemye srui kaksak yohk lasr nuh sum. Ke nahweyuck ma kom ngihsre in oreklac ke yac sasuc inge, pisap sacohk, nuhnak muhnahs etuh luhpan luhngse ac tarilac lasr keim. Kahsruh lom nuh ke tohkohsrahi uh apkuhran in koflah ahkuhtweyucki. Alu uh oasr pisap 30,900 kac ac pracns prestuhn ma kuhlwacnsap fin facluh nohfohn.29 Kuht ahkfuhlwactye kom.
Kuhtuh sin kahs ac kunohkohn muhtahl elos ahkuhtweyac uh akucliyucki ke apkuhran sie nguhn, ahluhkwelah usrnguckiyac. Kunohkohn luhn pisap pwacyena lucng liki fihl ke kuhtuh kahs uh. In kuhlwacnsapuh Leum ke kuhiyac se inge pa akihlenyuck ke ohiyac puhkantwen uh. Pahng, ahkkahlwemyeyuck, ac akmuhsra lah luhn pisap se fah wacngihn sie pacl ac muhlkihnyucklac. Nuh sihk, fihliyucki ke sie nacmpuh srihsrihk luhn ohiyac fuhlwact ke lusac sroalwacp ac loal se puhlakihnyuck ke ac pahngonyuck uh. Puhlakihn woiyac ke ohiyac fuhlwact sacohk se kain luhn macruht ac ohiyacn pahpah se ma tiac kuh in ahkuhtweyucki ke kuhtuh kahs.30
Pisap, kuht ahkkweye kom! Pisap, kuht luhngse kowos! Kom mwet shepherd pwacye se luhn Leum karihngihn sip Nahtuhl. Mwet Lahngo el ac fah tiac som liki kom ke kunohkohn muhtahl inge. Ke ma inge nga fahkwack, ke kapihn wik in Istuh se inge, ke inen Jisus Kraist, amen.