Infuckihl lun Lohm
Ke pacl Istuh se inge, Jisus Kraist el suli kuht in tuhkuh, oacna El, sie mwet Samaria wowo, in oraclah lohm Sel (Alu Lal) in sie nien karihngihnyuck nuh sin nuhkwewa liki futun ac pahkah luhn moul.
Tamuhlwel ac tahmtahel sacohk, el ne wacngihnlac ke yac 20 somlah ah, oasr na pacl nga ahsroelah pahpah tuhmuhk. Istuh olwelah muh Nga fah sifilpac sonol.
Ke nga ac srolah liki lutlut luhk fin acn England, pahpah tuhmuhk ah tuhkuh in muhtwacta yuruk. Lun insiacl pahpah el etuh lah nga ahsrwelah lohm ah.
Pahpah tuhmuhk el luhngse forfor muhtwacta liki na mongo. Finne fin acn France, etweyuck ke muhtwacta uh, el ac fahk muh, “Kuht kang mongo Sacini.” Kuhlwacnsap ekihn patriarch se ke lusen pacl na loes se ke Alu uh, pahpah tuhmuhk el moulkihn nguhn ac arulacna pahkotwen. Sie fong ah, acmpuhlacns ah wohwohn elyah yuwot yume fin acn Paris, el fahk, “Gerrit, wohwohn ingoh pa kihnet ke siti se.”
Ke muhtwacta sac, nga puhlakihn tuhng ac ngal. Sie muhtwacn fuhsr el kuhkwackihn aes kihrim ke sie mwe pahtpaht srihsrihk. Kuhp in aes kihrim lal ah luhpan na supun in aes kihrim se. Ke kuhtuh srihpac, sie mwet fuhlwact el tulac yurin muhtwacn sac. Kohu nuh sel ac pahtoklah, el ekuhlwack mwe pahtpaht srihsrihk soko ah, okwaclah kuhp in aes kihrim se luhn muhtwacn sac. Wacngihn ma nga kuh in oruh ke el longlongyac kuhp ah ke fahluhk lal ah. Nga kuh in srwackna liye muhtwacn fuhsr sac ke el muhta ke niacl ke acn sac, srihke in sruhkwack ipin kuhp ma muhsahllah ah, sronin muhta emtuhng kahklah liki muhtahl. Luhmahl ukweyuc na, mwe acsmakihn se ke insefuhlwact, tiac liyacacng, nuhkanlah kuht wacna sang ahkkolukye mwet sahyac.
Ke sie pac infulwacn lwen ah, siskacn acn Paris, nga ac pahpah tuhmuhk ah som muhtwacta eke acn ma siah luhlahp e Chartres. Malcolm Miller,1 mwet pihsrlac se fin siah luhlahp sac, srihsrngiyac ip tolu ke winto kuhlahs-tuhnlah se ke Chartres ah. El fahk muh eltahl sruhmuhn sramsram soko.
Winto se met ah ahkkahlwemye ke Adam ac Eve som liki Imac Eden.
Ma ahkluo sac ahkacsmakihnye puhpuhlyuck soko kacn mwet Samaria wowo sac.
Ma ahk tolu sac palyei Tuhkuh Ahkluo luhn Leum.
Oracni nuh sie, winto kuhlahs-tuhnlah inge ahkuhtweyac fuhfahsryucsr nuhke moul ma pahtpaht lasr. Eltahl suli kuht in pain mwet nuhkwewa wi infuckihl lun lohm Sel.2
iStock.com/digitalimagination
Oacna Adam ac Eve, kuht tuhkuh nuh ke facluh se luhn ma kohsroh ac fakfuck.3
iStock.com/digitalimagination
Fin kacnwek lasr nuh Jericho, rauniyucklac kuht, kihneta, ac fliyucki kuht oan ngal.4
Kuht ne enenuh in kahsruh akacsruhi, kuht sa na kihlucklac som nuh siskacn inkacnwek ah, ke kuhtwena srihpac.
Ne ohinge, ke pahkotwen, Mwet Samaria Wowo se tui ac kapriyac kihnet kacsr ke wain ac oacl. Kalmeyacn kuhfa luhn Leum ac kuhtuh akwuck muhtahl sahyac, wain ac oacl ahkkahlwemye nuh sesr nguhn in onwelah ke Jisus Kraist5 Mwet Samaria Wowo sac sruhk kuht yak nuh fin tohngki okwacl sifacna kuh, ke kuhlahs-tuhnlac se, us kuht fin Pihsacl. El us kuht ne lun lohm se, ma kuh in ekihn Alu lal. Ke lohm sac, Mwet Samaria Wowo sac fahk, “Liyaclacng; … ke nga sulpac fohlohk, nga fah moli.”6 Mwet Samaria Wowo se, sie srihkasrak ke Mwet Lango lasr, olwelah in sulpac fohlohk, pacl se inge ke fuhlwactlacna ac wolacna.
iStock.com/digitalimagination
Ke pacl Istuh se inge, Jisus Kraist el suli kuht in tuhkuh, oacna El, sie mwet Samaria wowo, in oraclah lohm Sel (Alu Lal) in sie nien karihngihnyuck nuh sin nuhkwewa liki futun ac pahkah luhn moul.7 Kuht ahkolah nuh ke olwelah Lal nuh ke Tuhkuh Ahkluo Lal ke kais sie lwen ma kuht oruh ma “finne srihk inge”8 oacna ke kuht fah oruh nuh Sel. “Ma srihsrihk ke ma inge” ma nuh sesr kais sie.
Ke kuht tuhkuh wi Mwet Samaria Wowo se nuh lun lohm sel, kuht etwaclah ma lihmekohsr kacl Jisus Kraist ac kacsr sifacna.
Ma se met, kuht tuhkuh nuh ke lohm sac oacna kuht sifacna, ke ma suhfal ac sesuwohs lasr sifacna. Tuhsruhk, oasr ma lasr kais sie ma enenuh kuht in akacsruhi kac. Fuhfahsryucsr lasr nuh yurin God kwacna tuhkweni konweyuckyak. Kuht ma ke u se ke acn se ke kuht tuhkweni—lah kuht sun mas upac, pahkah, fihrihr upac, paholah luhn acn, kuh mihslac na sun mwe enenuh ke kais sie lwen. Kuht eis ahkkweyeyuck ke kuht akacsruhi sramsram nuh sin sie, porongo puhsren kais sie, weacng kais sie tahmtahel, ac nuh sin Nguhn.
Ke insiacsr eklac ac kuht eis luhmah Lal ke ohiyac kuht sun,9 kuht Liyacl ac kuht sifacna ke Alu Lal. Kacl, kuht konwacack kahlwem, tiac fohs. Kacl, kuht konwacack srihpac in oruh wo, srihpac in wo, ac ahkyohkye kuhiyac in woyak liki met ah. Kacl, kuht sokwack usyacn luhlahlfongi, ahkwacngihnyelah nuhnkuh kac sifacna, elyah in eklac, ac luhlahlfongi ke God. Ke lohm Sel, kuht konwacack ac ahkyohkye kuhpahsr lasr sifacna nuh sin God Pahpah tuhmasr ac Jisus Kraist.
El luhlahlfongi kuht in oruh lohm Sel in acn se ma El enenuh in oasr we. Ke kuht sang talan ac kuhiyacsr kwewa, mwe ahkinsewowo luhn nguhn Lal oacyacpac ahkkweye ac ahkinsewowoye.10
Sie mwet lweng ke acn Spanish tuh fahk nuh sihk, “Elder Gong, nga etuh ke Nguhn ma kom ahkolah in sruhmuhn uh pwacnwacng nga kuh in luhngaslah,” tamuhlwel luhlahlfongi se inge fahk, “ke mwe sang luhn loh.”
Mwe sang luhn luhlahlfongi ac ahkkweye tuhkuh, ahkkweyelah siena ke kuhtwena ohiyac sahyac. Sie tahmtahel sacohk eis ahkkweyeyuck luhn nguhn ke mukul tuhmwacl tuh wacngihnlac ke mas se COVID-19. El fahk, “Nga etuh lah mukul sacohk tuhmuhk ac nga fah sifil tuhkweni sie pacl tok.” Ke sie pacna ma sikyak sahyac ke COVID, sie pac tahmtahel sacohk el fahk, “Nga puhla muh nga enenuh in siyuck sin Leum ac taktuh ma in sang sie pacl srihsrihk luhlah ah luhn mukul tuhmuhk uh.”
Ahkluo, El oruh kuht in oraclah lohm Sel in oacna acn in kuhlwacng ac mwesahs, acn yac kais se kuh in tuhkweni we, oasr infuckihl nuh sin nuhkwewa. Ke mwet fahsr tukun Jisus Kraist, nohfohn na oacna sie, wacngihn u oreklac nuh ke kais sie kuhlahs.
Nohfohn na mwesahs in wi tuhkweni luhn sackramacn, miting sahyac ke lwen Sacnri, ac tuhkweni ohrohr sahyac.11 Kuht ahkfuhlwactye Mwet Lahngo lasr mihs, etuh nuhnak ac nuhnkuh kacn kais sie sin sie. Kuht liye ac akihlen kais sie mwet. Kuht isracsr, wi elos suc muhkwena muhta, etwaclah inelos, weacng mwet sasuc, tamuhlwel ac tahmtahel sifil fohlohkoh, muhtwacn ac mukul fuhsr, kais sie tuhlihk srihsrihk sacohk ke Primary.
Petsaci kuht lac sifacna lun lohm selos, kuht pain kawuck, mwet muhtwacta, mwet tuhlan sasuc, mwet kahfofo kohfwack ke yen puhkantwen. Kuht ahsorkihn, engan, ac oasr we in weluhlos. Ke kuht fototolac ke ohiyac lasr ac suhlahklahk, wacngihn etuh la, nuhnuhnkuh, kuh nuhnak koluk, kuht suk nuhnak muhnahs luhn kais sie ac in oruh wo liki met ah.
Oacna ke sie sucu Africa muhta fin acn Macrike ingena tuh fahk, “Ke lwen se emet ah, mempucr ke Alu uh arulacna wo ac kuhlwacng. Mwet nuhkwewa oruh in muh kuht ma na nge. Wacngihn sie mwet ahksrihkyactwen.” Pahpah sac fahk, “Bible Muhtahl luti fahko luhn wosasuc uh tuhkuh ke okah luhn wosasuc.” “Ac misinacri ah,” pahpah ac ninac sac fahk, “kuht ke tuhlihk mukul se ac tuhlihk muhtwacn se nahtuhsr inge in mahtuhlah te oacna misinacri ngacn.” Tamuhlwel ac tahmtahel, lwelah tuh kuht in kuhlwacng in pain mwet nuhkwewa nuh ke lohm Sel.
Ahktolu, kuht lotwelah lah suwohswohs uh oasr sel Jisus Kraist, tiac ke ohiyacn suwohswohs luhn facluh. Kikiacp, kuh ma tiac pwacye, “se-suwohs” luhn facluh lihklihkiyac ohiyacn suwohswohs kuh in oruh kuht puhla suhfal, sruohktwen nuh ke mwe muhnahs, ma luhngse, kuh eis kais luo. In kapsruh siena, Mwet Lahngo lasr Jisus Kraist El etuh ma nuhkwewa kacsr ma kuht tiac luhngse kuhtwena mwet sahyac in etuh, ac El srwackna luhngse kuht. El pa wosasuc luhn pacl ahk luo ac tolu, el sikyak ke Iwaclah Lal.12 El suli kuht kais sie in pa sie mwet Samaria wowo, wacngihn nuhnuhnkuh la ac yohk nuhnak muhnahs kacsr sifacna ac kais sie sahyac, finne ke kuht srihke in ahkos masap Lal in wo.
Kuht kahsrwe kuht sifacna ke kuht kahsruh mwet sahyac. Sie sucu nga etuh kac muhta siskacna inkacnek kahfofo se. Mwet forfor ah wacna tui in siyuck ke kahsruh. Sie litutacng ah sucu sacn lohngwack kihmkihm na yohk puhsra se ke sruhnguhl laltahl ah. Ullac ac sensen muh suc kuh in tongtong ke ao 2:00 a.m., elos nuhnkuh lah fin, pacl se fanna ingacn, sie mwet kuh in kahsruh. Ke tongtong sac tiac fuhlweack in som soko lacna, elos lohngwack, “E—e se pa fihrihryak tukun lohm sumtacl uh ngi.” Mwet Samaria Wowo kahsruh sie sin sie.
Ahkahkosr, ke lohm Sel, kuht tuhkuh oasr ke ip luhn wosasuc akwucki ke mura se ke inen Jisus Kraist, kawucki ke ma pwacye fohlohkihnyuckyak, mwet pahluh moul ac mwet sap, ac sie pac mwe fahkwack kacl Jisus Kraist—Puk luhn Mormon. El uskuhtyak nuh lun lohm Sel—tempuhl muhtahl. Lohm sin Leum pa lohm se ma, oacna ke mukul kihnet se oan fin kacnwek nuh Jericho, Mwet Samaria Wowo sac kuh in ahknwacsnwacsye ac nukum kuhtyang, ahkoe kuhtlac in fohlohkihn kuhtlac nuh yurin God, a orekuhtweni nuh in sie sucu ma pahtpaht. Tempuhl Lal ikack nuh sin mwet nuhkwewa suc moulkihn wosasuc Lal ke luhlahlfongi ac ahkostwen.
Engankihn tempuhl enenuh in oasr tuhkweni luhn wosasuc inmahsrlon kain in usru puhkantwen, facsin, kahs, ac fihl. Ke kuhnanuclac luhn fohk ke tempuhl Taylorsville Utah ah, yac 17 se Max Harker el akacsruhi sie sramsram ke luhlahlfongi luhn sucu se muhtwacwacack ke fihl ohnkohsr met kuhtuh sin pahpah tuhmwacn pahpah mahtuh tuhmwacl Joseph Harker ac muhtwacn kiyacl Susannah Sneath. Ke wosasuc sifil fohlohkyak lal Jisus Kraist, kuht kuh in eklac sie kuhpahsr fokoko nuh ke fihl luhn sucu lasr uh.
Ahksahflah, ahklimekohsr, kuht engan lah God El luhngse tuhlihk nahtuhl ke sie lacna luhn ahkuhtweyac la ac ma sikyak, ke muhtuhnfacl nuhkwewa, kain nuhkwewa, ac loh, ke infuckihl nuh sin nuhkwewa lun lohm Sel.
Yac 40 somlah ah, mempucr ke Alu uh tuh yohkwelihk ke kain acn puhkantwen. Ke 1988, puhs mempucr ke Alu uh muhta lihk liki na lun acn Macrike ac Canada. Ke 2025, kuht oruh in puhs mempuc ke Alu uh in muhta fin acn Latin oacna fin acn Macrike ac Canada. Fahsrweni luhn fihl tahklac ke tuhlihk luhlahlfongi nahtuhl Pahpah Lehi ah ahkfalyelah ma palyeiyuck ah. Mwet Luhlahlfongi, wi acn fahsr luhn mwet met ke alu uh, sruokyacna luhlahlfongi ac kuhlwacnsap nuh ke Alu fin facluh.
Oacyacpac, puhsiyacn mempucr mahtuh ke Alu uh ingena tiac pahyuck, katin mas lac, ac pahyuck fahsrwelihk. Eklac yohk se pa inge. Weacng pacna sun tahfuhn muhtwacn ke Relief Society ac puhs liki tahfuh tamuhlwel mahtuh ke pristut lasr uh. Ohiyacn pactuhn se inge sikyak ke Alu uh fin facluh eke 1992 ac ke Alu uh fin acn Macrike ac Canada ke 2019.
Nwacsnwacs lasr ye muhtuhn God uh tiac elyah lah srihpac pahyuck lasr uh tuhsruhk ekihn lasr in Mwet fahsr Tohkohl Jisus Kraist ke luhlahlfongi ac fokoko.13 Mwet mahtuh ke in liyeyuck eltahl muh mwet mahtuh ac in oasr kunwac ac kahsrweacng ekihn mwet mahtuh. Mwet fahsr tukun Jisus Kraist uh tuhkuh yen nuhkwewa, ke luhmah nuhkwewa, luhpah, tuhn, matwac, kais sie ke luhlahlfongi, kena suwohs la, talan, ac luhpah yohk in ahkinsewowoye ac kuhlwacnsap. Kuht suk in ukwe Jisus Kraist lwen nuhkwewa ke luhlahlfongi nuh ke auliyak14ac engan muhtwenglah
Ke moul se inge, kuhtuh pacl uh kuht tuhpanuhl Leum. Kuht ac sahp sonna oasr ke acn ma kuht finsrak nuh kac ac luhngse nuh ke pacl fahsruh uh. Sie mempucr insacnweacng el fahk, “Luhlahlfongi tuhpan mwe insewowo luhn Leum uh El kunohkohn muhtahl se. Tiac enenuh in sun pahkomuhta, ahkkolukye, kuh nuhnuhnkuh tuhsruhktuh in orek ke ahkfuhlwact muhtahl.”15 Ke pacl se pacna inge, kuht inge moul, tiac sano moul se in muhtwacwacack.
Isaiah el olwelah, “Elos suc sano Leum fah ahksasucye kuhiyaclos; elos suc sokwack ke paho insohksohk lalos oacna ikihl uh; elos suc kahsruhsr, ac tiac tahpuhl; ac elos suc fahsr ac tiac ikori.”16
Mwet Samaria wowo lasr el olwaclah muh elac sifilpac fohlohkoh. Usrnguck sikyak ke kuht karihngihn kais sie oacna ke el ac oruh uh. Ke kuht suc puhl mulkihnyucklac, ke puhluhn ahsor kuh tong,17 tuhkuh ke insiyac muhsahlah ac nguhn puhsisacl,17 kuht konwacack puhsrwacn Jisus Kraist, rauniyucklac ke paho kahlwem ac sef Lal.18 Akwuck muhtahl ase owaclah in wi ac “kuh nuhke ohiacn god”20in ahkmuhtahlye kwena insiyac ac orekma tok. Ke kuhlwacng na pwacye ac pahko muhta Lal, Alu Lal ekihn lom sesr.
Ke kuht oraclah infuckihl lun lohm Sel, pain mwet nuhkwewa, Mwet Samaria Wowo sac kuh in ahkkweye kuht lac fin inkacnek tuhs suhkawihl. Ke luhngse suwohswohs, Pahpah tuhmasr ac Wen nahtuhl, olwelah “mihs nuh fin facluh, ac moul ma pahtpaht fin facluh in tuhkuh”20—“lah acn nga asr we kom e oacyacpac asr we.”21 Nga srui kaksakihn ma luhlahp ac fahkwack ke ine suhnakihnyuck ac muhtahl luhn Jisus Kraist, amen.