God El Oasr Inmahsrlosr
God El oasr inmahsrlosr—ac El eisaclwacng sifacna nuh ke moul lasr ac oaru in kol tuhihk Nahtuhl.
Tamuhlwel ac tahmtahel sacohk wiyuck, ke lusen yac fahfahsruh, God El sramsram nuh sin mwet kuhlwacnsap Lal, mwet pahluh.1 Olutu, kuht engan in lohng sin mwet pahluh se luhn God sramsram nuh sin facluh nohfohn. Kuht luhngse kom, Prestuhn Nelson, ac nga kacfwe mwet nuhkwewa yen nuhkwewa in lutlut ac loacng kahs lom.
Met liki nga sun puhtte ahk 12 luhk, sapkihnyuck ke kuh nuh sin sucu luhk in som liki acn sesr ac sifil pac muhtwacwacack sasuc ke pacl ongaiyac upac sikyak, sahngweng, ac nuhkanlah ma sikyak ke mweun ac fohs ke ip luhn wal ac acn. In pacl sacn nga puhla rahrah, tuhsruhk ahkelyahyei ninac pahpah tuhmuhk.
Ninac ac pahpah tuhmuhk tuhkweni wi kuht tuhlihk ahkosr nahtuhltahl ke ma upac toasr se inge. Elos puhlakihn pacl upac ac kweok ke kuhiyaclos. Sahngweng lalos kuh in arulacna upac, kanglah pacl lalos, ac uniyac finsrak lalos.
Ke pacl se tukun Mweun Ahk Luo sahflah fihliyac akucl se nuh fin facluh. Fihliyac akucl se nuh feik.
Met liki na, ke muhtwacngwacn pacl in muhkwena luhk, nga kwacna nuhnkuh lah, “Kuh oacna asr finsrak luhlah fin facluh se inge?”
Lipufacn inmahsrlosr
Ke nga motko kihsensiyuck inge, nga nuhnkuh ke misineri fuhsr Macrike lasr suc kuhlwacnsap inmahsrlosr ke yac ekasr inge. Elos som liki lohm wowo ac sef selos som aluhkwelah tahfuhn facluh ac som nuh Germany—acn luhn mwet lokoalok lalos in pacl sac—in sang finsrak muhtahl nuh sin mwet lasr. Elos tuhkuh tiac in tuh nuhnuhnkuh, luti, kuh mwekihn. Elos luhngse in sang kewa moul fuhsr lalos wacngihn nuhnkweyacn ma luhn facluh elos in eis, luhngse in kahsruh mwet sahyac muhkwena in konwacack engan ac mihs elos tuh puhlakihn.
Sihk, mukul ac muhtwacn fuhsr inge suwohs. Nga etuh suwohs muh oasr ma suhfal lalos, tuh tiac ma nuh sihk. Ngac fah nuhnkacltahl pacl nuhkwewa oacna in yohk liki moul—lipufacn luhn kahlwem ac wolacna, mwet luti pahkotwen, wolacna, ac pwacye.
Ke facluh nwacnwaclah ke ma suhlahlahlfongiyuck, ma mwen, srahngwesra, ac sahngweng, srikasrak ac luti luhn mwet fuhsr inge nwekyuclac ke finsrak. Pweng luhn wosasuc elos use tahkelihk ip luhn karihngihnyacn acn se, ma mahtuh, ma tulokihnyuck, mwe ahsor, ac elyah luhn kais sie mwet. Sang top muhtahl se nuh ke kihsensiyuck yohk srihpac oasr sesr ke pacl upac inge.
Pweng sac pa lah God El moul ac elyah sesr, finne ke ao in tihkuclkucl, fohsack, ac upac sikyak in pacl inge. Lah El sikyak na pwacye ke pacl lasr in sifil fohlohkohnwack ma pwacye ac kahlwem—wosasuc Lal ac Alu Lal. Lah El sifil pac sramsram nuh sin mwet pahluh; lah God El oasr inmahsrlosr—ac ohiyacn kuhpahsr nuh ke moul lasr ac oaru in kol tuhlihk Nahtuhl.
Mwe lut se lah kuht kuh in lotwelah ke kuht lohacng in yohk kuhtuh nuh ke plwacn in molwelah ac moul ma pahtpaht luhn Pahpah tuhmasr Inkuhsrao, plwacn in engan, nuh sin tuhlihk Nahtuhl. Ke kuht puhlakihn muh wacngihn srihpacsr, lihsyucklac, ac muhlkihnyucklac, kuht lotwelah lah kuht ac kuh in ahkkweyeyuck kac lah God el tiacna muhlkihnkuhtlac—ma na pwacye an, lah El sang nuh sin tuhlihk nuhkwewa Nahtuhl kuhtuh ma elos tiac pahngon elos ac eis: in ekihn “mwet usru luhn God, ac wi-usru-weluhl Kraist.”2
Meac kalmacn ma se inge?
Tuh kuht fah moul ne tok ma pahtpaht eis fohnlah luhn engan,3 ac oasr finsrak la in “eis siah, tohkohsrah, mwe luti muhtahl, ac kuh.”4
Inse puhsisacl in etuh lah pacl wolacna ac usrnguck se fahsruh uh ac fihsrwacsr—tiac ke srihpen ma kacsr tuhsruhk ke srihpen God pa oruh uh.
Etweyacn ma se inge, kuht ac tohrkahskahs fuhkah kuh puhlakihn mwen? Kuht ac ngweti liye infohkuh fuhkah ke Tohkohsrah luhn tohkohsrah suli kuht in som nuh ke sie pacl kuht tiac kuh in nuhnkuh kac ke wolacnaiyacn engan la.5
Molwelah inmahsrlosr
Ke srihpen luhngse suwohs luhn God nuh sesr ac kihsackuhnlah ma pahtpaht lal Jisus Kraist, ma koluk lasr—kewana ma yohk ac srihk—kuh in eflah tuhna ac tiac sifil esamyuck.6 Kuht kuh in tulac ye Muhtahl ke nwacsnwacs, suwohswohs, ac muhtahl.
Insiuck nwacnwaclah ke kaksak luhk nuh sin Pahpah tuhmuhk Inkuhsrao. Nga etwacack lah El tiac ahkelyahi tuhlihk Nahtuhl in tihkuclkucl ke moul in mahno ac ikoac lalos in wacngihn finsrak nuh ke pacl kahlwem ac ma pahtpaht se fahsruh uh. El use mwe ahkuhtweyac in ahkkahlwemye inkacnek in fohlohk nuh Yohrohl. Ac ke infulwacn ma nuhkwewa ingacn pa Wen Sacohk Nahtuhl, Jisus Kraist,7 ac kihsackuhnlah Lal kacsr.
Iwaclah ma pahtpaht luhn Mwet Lahngo liksrweni na ekuhllah ohiyac ma kuht liye ke eklac ac sesuwohswohs. Likina in moulkihn ma inge ac puhla muh tiac kuh in ahkwoyeyucklac, kuht kuh in lotwelah kaclos ac puhlakihn finsrak.8 Mwe sang in ahknwacsnwacsyelah luhn auliyak lwelah nuh sesr in som liki ma koluk lasr ac ilyak nuh ke sie luhmah sasuc.9
Ke sripen Jisus Kraist, ma tahfonglac lasr uh tiac kuh in ahkuhtwekuhti. Ma ingacn kuh in ahkwoyekuhtlac.
Oacna ke sie mwet on srihke in ahkpahyacl ke sritacl lal, kuht kuh in lie acn kuht sislah, ma suhfas lasr, ac ma koluk lasr pa pacl wowo se in muh mwe etwacack yohk lasr sifacna se, koanong ac yohk suwohs in luhngse nuh sin mwet sahyac, ac ahkwoyelah ke auilyak.
Kuht fin auliyak, ma koluk lasr tiacna ahktahfongye kuht lac. Elos ipin pacna kapwack lasr uh.
Kuht nuhkwewa oacna sie ahwowo fuhsr kapsrweyuck nuh ke luhmah wolacna ac fuhlwactlacna kuht oreklac nuh kac in oacna. Wacngin sie mwet kuh in pihsrlac ke orahk som nuh ke fahsr som kuh ke kahsrusr uh el tiac puhtatlac, tuktuki, ac futunlac. Pa ingacn atac se kuht ac lotwelah uh.
Fin kuht insacnweacng in sikalweni lutlut kac, kampare in sruokyacna masap luhn God pacl nuhkwewa, ac kihsackuhnlah kuhiyacsr in auliyak, kampare, ac orekmakihn ma kuht lotwelah, lain fin lain, kuht ac fah oracni kahlwem nuh lun nguhnasr.10 Ac kuht ne tiac arlac kahlwem napacye ke finsrak yohk lasr ingena, “Kuht etuh lah, ke [Mwet Lahngo] Elac fah sikmwe,” kuht fah liye ohiyac Lal kacsr, ac “fah liyacl oacna el.”11
Fuhkah kaksahkihnyacn olwelah uh!
Ahok, facluh el fohsack. Ac ahok, oasr mwe muhnahs lasr. Tuhsruhk kuht tiac enenuh in srukyac insifacsr in kweok, mweyen kuht kuh in luhlahlfongi God, kuht kuh in luhlahlfongi Wen Nahtuhl, Jisus Kraist, ac kuht kuh in eis mwe sang luhn Nguhn in kol kuht ke inkacnek nuh ke moul se ma sesseslah ke pwacr ac engan muhtahl.12
Jisus El oasr inmahsrlosr
Nga kwacna nuhnkuh lah, meac Jisus El ac fah luti ac oruh fin El oasr inmahsrlosr mihsenge?
Tukun Sifil Fohlohkyak, Jisus Kraist El ahkfahsryelah olwelah Lal in muhtwacta yurin “sip sahyac” Nahtuhl.13
Puk luhn Moromon: Sie pac Wuhlweacng luhn Jisus Kraist fahkwack ke sie ohiyac nuh sin mwet fin acn Macrike. Oasr nahtuhsr ma sihmlac sacohk se inge suc sie mwe ahkkweyelah orekma luhn Mwet Lahngo.
Mwet ke Puk luhn Mormon moul muhta ke lacyacn se sahyac fin falcuh—ma mahtuh lalos, facsin, ac puhlan pacl ke acn lalos sie lacna nuh sin mwet ma Jisus el tuh luti ke pacl El moul muhta fin facluh luti ah. Ac El lotwelos tari ma puhtkantwen oacpacna ma El luti ke Acn Muhtahl.
Efuh kuh El oruh ohingacn?
Mwet Lahngo El luti ma pwacye wangihn sahflahiyac pacl nuhkwewa. Mwe luti pwacye ingacn ma nuh sin mwet ke matwac nuhkwewa ac oacna sie ma sikyak.
Mwe luti Lal oan met ac pa mwe luti se nuh ke finsrak ac in wi—testimoni se lah God Pahpah tuhmasr Inkuhsrao Elac fah tiac sislah tuhlihk Nahtuhl.
Lah God El oasr inmahsrlosr!
Yac tausin luo somlah ah, Mwet Lahngo El tuh sifil fohlohk nuh Facluh. Tuhkweni weluhl Pahpah God El sikyak nuh sin sie mwet yac-14 Joseph Smith ac tahfweyucklac sel ke Fohlohkyak luhn wosasuc ac Alu luhn Jisus Kraist. Ke na len sacn ac tohkohyang, inkuhsrao ikacklah, ac mwet tuhtahf luhn inkuhsrao puhtati liki wolacna luhn moul in nguhn. Kahlwem ac etwacack ukiyucklac tuhkuh lucng mwe liki siah fuhlwact.
Leum Jisus Kraist el sifil sramsram nuh sin mwet facluh.
Meac El tuh fahk ah?
Nuh ke mwe insewowo lasr, puhs sin kahs Lal sihmlac lun Doctrine and Covenants—lweyucklac nuh sin oacna sie mwet fin falcuh in wi etuh kac suc luhngse in riti ac lutlut kac. Fuhkah wolacnaiyacn wacngihn molin kahs inge nuh sesr mihsenge!
Ac kuht tiac oruh muh kuht lut kac lah Mwet Lahngo El sifil luti kuht ke yohkiyacn mwe luti ke wosasuc Lal: “Kom fah luhngse Leum God ke insiom kewa, ke nguhnum kewa, ke nuhnkom kewa, ac ke kuhiyom kewa, ac ke inen Jisus Kraist kom fah kuhlwacnsapwacl.”14 El ahknuhnakye kuht in suk God15 ac moulkihn luti Lal El ahkkahlwemye nuh sin mwet kuhlwacnsap Lal, mwet pahluh.16
El luti kuht in luhngse sie sin sie17 ac in “sesseslah ke luhngse pwacye nuh sin mwet nuhkwewa.”18
El suli kuht in ekihn paho Lal, in som ac oruh ma wo.19 “Lwelah kuht in tiac luhngse ke kahs … tuh ke ohiyac ac pwacye.”20
El srihke kuht in porongo nguhsr yohk Lal; in luhngse, in akacsruhi, in suli mwet nuhkwewa nuh ke wosasuc Lal ac Alu Lal.21
El sapkihn nuh sesr in muhsaheack tempuhl muhtahl ac in utyak ac kuhlwacnsap loac.22
El luti kuht in muh oacna mwet tuhma lutlut Lal—tuh inisacsr in tiac kuhflah nuh ke kuh lasr sifacna, kahsruhp, wal, kuh kunohkohn lasr. El luti kuht in “srwelah nuh sahyac ma luhn facluh, ac suk ma ac wo in ahkwoye.”23
El kacfwe kuht in suk pwacr, kahlwem, mihs, pwacye, ac engan,24 ac olwelah luhn moul in nguhn ac moul ma pahtpaht.25
Lwelah nuh sesr in fahsr nuh met kuhtuh. Oraclah muh Jisus el tuhkuh nuh ke ward lom an, pracns, kuh nuh ke lohm sum an mihsenge. Oacna e fuhkah atac uh?
El ac fah ngetoht lie kanon siom. Luhkuhn ngwetngwetacn mwet se fah wangihnlac srihpac. El ac etwekom oana ke ma kom fal kac an. El ac etuh kewa kena luhn insiom.
Mongfihsrwacsr ac puhsisacl El ac fah sruhkwack.
Mwet mas El ac fah ahkkweyelah.
Mwet tahfuh luo El ac fah furohklah nuh ke luhlahlfongi ac puhlaik in luhlahlfongi.
El ac fah luti kuht in ikucslah insiacsr nuh sin God ac suk in tahfwelah nuh sin mwet sahyac.
El ac fah akihlwen ac ahkfuhlwactye mwet suwohs, mwet mongfihsrwacsr, insacnweacng, luhlahlfongi, pahkotwen, ac luhngse pwacye.
Pacl se na ngwetwacng liye Muhtahl uh ac kuht fah tiac oacna met ah. Kuht fah eklac ma pahtpaht. Eklac ke kuht tuhfah konwacack lah, pwacyena, God El oasr inmahsrlosr.
Meac Kuht Fah Oruh?26
Nga ngwetlah esamack kuhlwacngiyac ke nga tuh sie mukul fuhsr ke nga kapkapwack luhk. Fuhnuh nga kuh in fohlohkohnma pacl uh, nga fah ahkwoyacl ac fahk nuh sel elan tahfwelah in suk. Ac ngac siyuck sel tuh elan solwacl Jisus Kraist nuh in moul lal, tuh God El oasr inmahsrlosr!
Nuh suwos, tamuhlwel ac tahmtahel, ac nuh suwos suc sukok top, ma pwacye, ac engan, nga ac oraclah pac kahs in kahsruh se inge pacna: Sikalweni in suk ke luhlahfongi ac muhtweng.27
Siyuck, ac kom fah eis. Tongol, ac fah ikacklah nuh sum.28 Luhlahlfongi Leum.29
Ke moul lasr penga na lwen ma kunwacsr yohk ac ahkinsewowoyeyuck pacl wowo lasr in ohsun nuh sin God.
Ke kuht srwelah nuh sahyac fuhwact lasr ac apkuhran nuh ke siah Lal ke insiyac muhsahllah ac nguhn auli,30 El ac fah ahkfototoye kuht nuh Sel.31
Ke kuht suk in ukwe Jisus Kraist ac fahsr ke inkacnek luhn mwet luhlahlfongi, lain fin lain, len sac fah tuhkuh ma kuht ac fah sun mwe sang se ma kuht tiac pahngon kuht ac tiac eis suc pa fohnlah luhn engan uh.
Kawuck sacohk luhk, Pahpah tomowos Inkuhsrao El luhngse kowos ke luhngse pwacye. El ahkpwacyelah luhngse Lal wangihn ohiyac in tulokihnyac, tuhsruhk lucng liki nuhkwewa pa El sang Wen Sacohk Sefanna Nahtuhl in mwe kihsackihnyucklac se ac mwe sang se nuh sin tuhlihk Nahtuhl in oraclah inkacnek lalos in fohlohk nuh yurin pahpah ac ninac inkuhsrao napwacye lalos.
Nga akacsruhi lohoh lah Pahpah tuhmasr Inkuhsrao El moul, lah Jisus Kraist pa kol Alu Lal, ac lah Prestuhn Russell M. Nelson pa mwet pahluh Lal.
Nga tahfweoht nuh suwos luhngse ac mwe insewowo luhk ke puhlan pacl in Istuh engan se inge. Ikucslah insiom nuh sin Mwet Lahngo ac Mwet in Molwelah lasr, finne mac ma sikyak nuh sum, mwe srihkasrak, kweok, kuh tahfonglac, kom kuh in etu lah El moul, lah El luhngse kom, ac ke Srihpacl, kom fah tiac na kuh in muhkwena.
God El oasr inmahsrlosr.
Ke ma inge nga fahkwack ke ine muhtahl luhn Jisus Kraist, amen.