Nga Luhngse Liye Tempuhl
Lun tempuhl kuht kuh in eis ahkkweyeyuck muh kuhpahsr luhn sucu luhngse lasr ac som tukun kuht misac ac nwe tohk ma pahtpaht.
Tamuhlwel ac tahmtahel sacohk wiyuck, nga arulacna srui in wi kowos ke toeni se met se inge ke toeni luhlahp uh. Mwet sramsram, on, ac pruhe tuh us Nguhn—oacyacpac kahlwem ac finsrak.
Nga puhla ohinge ke nga esam pacl se met nga ilyak nuh ke Tempuhl Salt Lake. Nga tuh mukul fuhsr se. Ninac pahpah pa mwet suc wiyuc ke lwen sacn. Loac, eltahl tui fahsr ac sramsram nuh sin sie mwet orekma tempuhl. Nga fahsr met luhkwelos, muhkwena ke sie pacl.
Muhtwacn mahtuh fasrfasr aunsifac se suc nokomwacng nuknuk fasrfasr kahto tuh paingyuc. El ngwetwack nuh sihk ac isrwacsr ac na fahk fihsrwacsr, “Paing kom nuh tempuhl, Tamuhlwel Eyring.” Nga nuhnkuh ke sie pacl tuh el lipufacn se ke srihpen el etuh inek. Nga tiac akihlen tuh oasr kaht srihsrihk ma inek oasr fac ma fihliyucki nuh ke wes luhk.
Nga fahsr ahluhkwellah na tui. Nga ngwetwack nuh lucng ac liye acn lucng fasrfasr ma oruh infuhkihl se arulacna kahlwem oacna inkuhsrao. Ac ke pacl sacn, nuhnak se tuhkuh nuh sihk ke kahs inge: “Nga tuh oasr ke acn kahlwem se tari.” Tuh oacyacpac tuhkuh nuh nuhnak luhk, tiac ke puhsrwek, kahs inge: “Moh, kom sonna tuhkuh nuh acn se inge. Kom esam pacl met liki kom isuslac ah. Kom oasr ke acn muhtahl oacna ma se ingacn.”
Lihkihn tempuhl lasr, kuht fihliyac kahs “Muhtahl nuh sin Leum.” Nga etuh sihk sifacna tuh kahs ingacn pwacye. Tempuhl pa acn muhtahl se tuh fwackyuck uh fihsrwacsr in tuhkuh nuh sesr fin insiacsr ikacklah ac kuht fahsr fal nuh kac.
Piacnga ke lwen sacn nga sifilpac puhla Nguhn se pacna. Oasr kahs ke akwuck luhn tempuhl ma oruh nga puhla fihrihr insiyuck, ahkpwacyei nuh sihk lah ma ahkkahlwemyeyuck we pwacye. Ma nga puhla tuh me luhk sifacna ke pacl fahsruh luhk, ac ahkpwacyeiyuck yac 40 somlah nuh ke pahng se in kuhlwensap sin Leum.
Nga sifilpac puhla ma ingacn ke na pahyuck ke Tempuhl Logan Utah. Prestuhn Spencer W. Kimball tuh oraclah akwuck sil sacn. Ke kuhtuh kahs el sramsram, ke use kahs in kahsruh inge, “Hal ac Kathy, moul oacna ke pahng se tuhkuh, kom kuh in sa in ukwe.”
Ke el fahk kuhtuh kahs ingacn, nga liye ke nuhnak luhk, arlac kahlwem, finohl se ac inkacnek soko ma fanyak nuh fac. Kalkal fasrfasr oasr lacsac sin inkacnek soko ah ac som lucng nuh ke insack ma oasr finohl ah. Lohm fasrfasr se kuh in liyeyuck nuh ke insack ah.
Yac se tohk, nga sifilpac liye finohl ah ke pahpah tuhmwacn muhtwacn kiyuck wucn kuht ke inkacnek soko ah. Ikoeyucki kewa ma nga liye ke nuhnak luhk ke Prestuhn Kimball el sramsram nuh sesr lun tempuhl.
Ke kuht sun acn tohktohk sac, pahpah tuhmwacn muhtwacn kiyuck tui ke lohm fasrfasr se. El fahk nuh sesr muh el ac muhtwacn kiyacl tuh moli lohm sacn ac tuh el ke muhtwacn nahtuhl ac nga in muhta yohrohltahl ke lohm srihsrihk ma oasr fototo. Elos fah muhta ke lohm luhlahp se, fit ekahsr na ma lusac kac. Na, ke yac 10 ma kuh muhta we oacna sucu luhngse se, muhtwacn kiyuck ac nga ac fahk lwen nuhkwewa, “Kuht in engankihn ma inge, ke srihpen kuht ac tiac muhta paht.”
Pahng se tuhkuh sin Commissioner luhn Education luhn Alu uh, Neal A. Maxwell. Kahs in kahsruh luhn Prestuhn Kimball in “fisrwacsr in som liki” tuh sikyak napwacye. Pahng sac pa in som liki ma liyeyuck muh sie sucu engan se in kuhlwacnsap ke acn se nga tiac etuh kac. Sucu lasr ahkolah in fahsr liki pacl ac acn insewowo ke srihpen sie mwet pahluh, ke tempuhl muhtahl, acn in fwackyuck, liye ma se ke pacl fahsruh ma kuht ahkolah kac.
Nga etuh tuh tempuhl luhn Leum pa acn muhtahl. Srihpuck mihsenge in sramsram ke tempuhl pa in ahkyohkye kena lowos ac kena luhk in fahsr fal ac ahkolah nuh ke orekma luhn tempuhl yohk ma ac tuhkuh nuh sesr.
Nuh sihk, ma kahsruh yuc in fahsr fal nuh ke orekma luhn tempuhl pa Leum El fahk ke lohm muhtahl Lal:
Oacna mwet luhk oraclah lohm nuh sihk ke inen Leum, ac tiac lwelah ma fohkfohk in ilyak nuh loac, in tiac ahkfohkfohkyeyuck, wolacna luhk ac oasr fac;
Ahok, ac nga ac oasr we, tuh nga ac tuhkuh nuh loac, ac mwet inse pwacye suc ac ilyak nuh loac fah liye God.
Tuh fin fohkfohk nga ac tiac ilyak nuh loac, ac wolacna luhk ac tiac oasr we; tuh nga ac tiac utyak nuh in tempuhl semuhtahl.1
Prestuhn Russell M. Nelson el ahkkahlwemye nuh sesr tuh kuht in “liye” Mwet Lahngo ke tempuhl ke srihpen El tilac mwet se kuht tiac etuh. Prestuhn Nelson el fahk: “Kuht kahlwem Kacl. Kuht kahlwem orekma Lal ac wolacna Lal. Ac kuht muhtwacwacack puhlakihn srihpac ma pahtpaht ke moul wolacna Lal.”2
Fin kowos kuh nga som nuh lohm tempuhl tiac nwacsnwacs, kuht ac tiac kuh in liye, ke kuh luhn Nguhn Muhtahl, mwe luti ke ma luhn nguhn luhn Mwet Lahngo ma kuht eis ke lohm tempuhl.
Ke kuht nwacsnwacs in eis kain lutlut inge, ac yohkwelihk nuh ke orekma luhn tempuhl lasr finsrak, engan, ac mihslac nuh ke moul lasr nohfohn. Finsrak, engan, ac mihslac inge oasr nuh ke akwuck luhn tempuhl muhtahl muhkwena. Lun tempuhl kuht kuh in eis ahkkweyeyuck muh kuhpahsr luhn sucu luhngse lasr ac som tukun kuht misac ac nwe tohk ma pahtpaht.
Yac somlah, ke nga kuhlwacnsap oacna pisap se, mukul fuhsr el macnsiskihn nguhsr luhk in ahksuwohsyacl sifacna fal in moul yurun God oacna sucu ma pahtpaht. El sruasra in fahk nuh sihk pacr lal yurin kawuck lal. Nga fuhlwelah elacn sramsram. Na el fahk nuh sihk ke sie pacl in parti lal, inmahsrlon okahrkahr kac, el puhla muhkahimtacl na pwacye. Nga siyuck sel lah meac sikyak. El fahk nuh sihk lah el esam ke el tuhlihk fuhsr se, muhta fin niyacn ninac kiyacl, poun ninac sac raunwellah sruokilyac. Ke pacl se el sruhmuhn sramsram soko ah, el tuhngyak. Nga fahk nuh sel ma nga etuh tuh pwacye: “Ohiyac sefanna kom in puhla sruok luhngse luhn sucu tuhkweni ma pahtpaht pa ahksuwohsye kom sifacna ac kahsruh mwet sahyac in eis akwuck luhn sil luhn tempuhl.”
Kuht tiac etuh ohiyac nuhkwewa luhn kuhpahsr in sucu lasr ke facluh luhn nguhn kuh meac ac sikyak tukun sifil moulyak uh. Tuh kuht etuh lah mwet pahluh Elijah tuhkuh oacna el olwelah in furohklah insiacn pahpah uh nuh sin tuhlihk uh, ac tuhlihk uh nuh sin pahpah uh.3 Ac kuht etuh tuh engan ma pahtpaht lasr wiwina oaru lasr in sang kuh in engan inge nuh sin mwet kuht luhngse nuhkwewa.
Nga puhla luhngse sepacna ingacn in suli mwet ke sucu luhk in ahksuwosye sifacna in eis ac karihngihn akwuck luhn sil luhn tempuhl uh. Pa inge ip ke fahsrweni luhn Israel uliyuck ke lwen sahflah inge nuh sin mwet moul ac misac.
Sie pacl wo emet lasr pa pacl fuhsr luhn sucu lasr uh. Elos isuslac ke Kahlwem luhn Kraist oacna mwe sang se. El kahsrwelos in etuh ma wo liki ma koluk. Ke ma inge, in liye tempuhl kuh petsac luhn tempuhl kuh in kahsrwelos eis kena in ahknwacsnsacs ac in sie lwen ilyak nuh loac.
Lwen se kuh in tuhkuh, oacna mwet fuhsr, elos kuh in eis pwepa in lwelah nuh tempuhl in oruh pactais ahol mwet suc misac tari lun tempuhl. Ke ma sikyak kac an, elos kuh in puhla muh akwuck luhn tempuhl kwacna srihsrngiyac nuh ke Mwet Lahngo ac Iwaclah Lal. Ke elos puhla ma elos sang nuh sin mwet se suc oasr facluh luhn nguhn pacl in ahknwacsnwacsyeyucklac liki ma koluk, puhla lalos fah kapwack ke elos kahsruh Mwet Lahngo ke orekma muhtahl Lal in ahkinsewowoye tuhlihk nuhtin Pahpah Inkuhsrao.
Nga tuh liye fokokoiyacn ma inge ekuhllah moul luhn mwet fuhsr se. Yac somlah nga wi muhtwacn nuhtihk nuh ke tempuhl se ke tahfuhn lwen tok. El pa mwet sahflah se in oruh pacptais ahol mwet suc misac tari. Siyuckyuck sin tuhlihk muhtwacn se nuhtihk ah lah el kuh in orekma paht in oraclah kewa akwuck ke inen mwet nuhkwewa ma ahkolah. El fahk muh ahok.
Nga liye ke tuhlihk muhtwacn se nuhtihk ah fani nuh ke kof in pacptais. Akwuck luhn pacptais tuh muhtwacwacack. Tuhlihk muhtwacnse nuhtihk ah sroksroki kais sie pacl el otyak liki kof ah. Siyuckyuck sel pacl nuh ke pacl, “Kuh kom kuh in sulpac oruh kuhtuh?” Kais sie pacl el fahk ahok.
Ekihn pahpah fosrngah tuhmwacl, nga muhtwacwacack in finsrak tuh elan kuh in tari. Tuh nga esam kuh esac lal ke kais sie pacl siyuck el in oruh siepac ac el fahk ke puhsra srihsrihk tuh fokoko, “Ahok.” El oruh neke na sun inen mwet sahflah se ke tahk soko ah ke lwen sac ma eis mwe insewowo luhn pacptais ke inen Jisus Kraist.
Ke nga weluhl fahsr fohlohk liki tempuhl ke fong sac, nga nuhnkuh ke ma nga liye ah. Tuhlihk se tuh sruhkyuckyak nuh lucng ye muhtuhk ke el kuhlwacnsuhpuh Leum ke lohm Sel. Nga srwackna esam puhla kahlwem ac mihslac ke kuht tuhkweni fahsr fohlohk liki tempuhl ah.
Yac pucs somlah. El srwackna fahk ahok nuh ke siyuck luhn Leum lah el kuh in sulpac oruh kuhtuh nuh Sel ke arlac upac uh. Pa inge kuhlwacnsap ke tempuhl kuh in oruh ekuhllah ac sruhkkuhtyak. Pa inge finsrak luhk nuh suwos ac nuh sin sucu sacohk lowos tuh kowos in ahkyohkye kena ac oaru lowos in nwacsnwacs fal in som nuh ke lohm sin Leum fal nuh ke enenuh lowos.
El ke paing kowos we. Nga pruhe tuh kowos ac srihke in ahkyohkye luhngse ke tuhlihk nuhtin Pahpah Inkuhsrao in som nuh we, acn se ma elos kuh in puhla fototo nuh Sel, ac tuh kowos ac oacyacpac suli mwet mahtuh lowos in kuh in oasr Yohrohl ac yurum nwe tohk ma pahtpaht.
Kahs inge kuh in ma lasr:
Nga luhngse liye tempuhl.
Nga ac som nuh we sie lwen
In puhla Nguhn Muhtahl,
In porongo ac in pruhe.
Tuh tempuhl uh pa lohm sin God,
Sie acn luhn luhngse ac ma kahto.
Nga fah ahkkoeyuclac sifacna ke nga fuhsr uh;
Pa inge kunohkohn muhtahl luhk.4
Nga fahkwack luhlahlfongi muh kuht tuhlihk luhngselacna nuhtin Pahpah tuhmasr Inkuhsrao. El sulaclah Wen Kuloh Nahtuhl, Jisus Kraist, in Mwet in Molwelah lasr ac Mwet in Iwaclah lasr. Inkacnek sefanna kuht in fohlohk muhta Yohrohlos ac yurun sucu lasr pa nuh ke akwuck luhn tempuhl muhtahl. Nga fahkwack tuh Prestuhn Russell M. Nelson el sruok ac orekmakihn ki nuhkwewa luhn pristut ma oruh moul ma pahtpaht ma luhn tuhlihk nuhtin God nuhkwewa. Nga fahkwack luhlahlfongi ke ine muhtahl luhn Jisus Kraist, amen.