Jisus Kraist: Mwet se suc Karihngihn Moul Lasr uh
Ke kuht auliyak ke ma koluk lasr, kuht lwelah iwaclah luhn Kraist in oreklac ke moul lasr.
Tamuhlwel ac tahmtahel sacohk wiyuck, ke litutacng in Istuh na sahromrom se inge insiyuck enganwack ke nga esamwack sie mukwikwi na wolacna, fuhlwactlacna emeet, ma wolacna ma sikyak emeet me nuh misenge—kihsackuhnlah luhn Leum lasr, Jisus Kraist. Kahs lal mwet pahluh Isaiah ahkyohkye wolacna ac luhngse luhn Mwet Lango lasr ac ke kihsackuhnlah lal in ahollah nohfohn tuhlihk nahtuhl God:
“Pwacyena El us ahsor lasr, ac us suhpwacr lasr: tuhsruhk kuht nuhnkuh tuh El kweok, ac uniyuck sin God, ac ahkkweokyeyuck.
“Tuh El kantweyucki ke ma koluk lasr, El itucngyucki ke mwe muhnahs lasr: uni luhn mislac lasr oan facl; ac ke srihngsrihng Lal kuht ahkkweyeyucklac.”1
Ke El sifacna eisaclwacng nuhke ma koluk luhn mwet nuhkwewa, patpuhti nuhke sahksin ah, ac kuhtanglah misac ke lwen ahktolu sac,2 Jisus El sang kalmeac muhtahl se nuhke akwuck in passover pa ituckyang nuh fin Israel ke pacl mahtuh ah.3 In akfahsryelah ma palyeiyuck, El sang mahnol ac srah sacohk Lal in pa kihsackuhlah wolacna ac kihsackuhnlah sahflah,4 ahkfalyelah akucl in facsin ma orekmakihnyuhk ke ahkfuhlwactyeyacn Passover lal Leum.5 Ke El oruh ma se inge, Kraist el puhlakihn kwewana kweok ke mahno ac nguhn suc ma tiac kuh in etweyuck kuh kahlwem sin mwet uh. Mwet Lahngo Sifacna El fahk:
Tuh liye, nga, God, kweok ke ma inge luhn nohfohn, …
Kweok se inge oruh tuh nga, ac finne God, fuhlwactlacna liki nuhkwewa, in rarar ke sripen ngal, ac in srah kahklah ke pat nuhkwewa, ac in kweok ke kwewana mahno ac nguhn—tuh nga in tiac nihm ke kuhp se inge, ac lokweni—
Ne ohinge, wolacna nuh sin Pahpah, ac nga oraclah ac ahkfalye ma ahkolah nuh sin tuhlihk luhn mwet.6
Kraist El ahkfalyelah luhngse luhn Pahpah7 ke kihsackuhnlac pahkomuhta ac wacngihn sahflahiyac. El kuhtanglah kweok ke misac ke mahno ac nguhn,8 ikucslah nuhsin facluh ke puhtatlac,9 use nuh sesr wolacna se in kuh in moullac ma pahtpaht.10
Jisus muhkwena mwet se kuh in etuh ke kihsackuhnlah na wowo se nuhsesr nohfohn.11 El suleyuhcklac ac aluyucklac emeet me ke miting Luhlahp se Inkuhsrao ah, finne nuhke facluh soenna oreklac ah.12 Sifilpac, ke El isusiyucklac sin ninac fin facluh se, El eis misac ke mahno, tuhsruhk sin God, El ekihn Wen Kuloh sefanna nuhtin God, El eis kuh in fihliyac moul Lal sifacna ac sifilpacna eis moul Lal.13 In weacng pac, Kraist El moulkihn moul na wowo se, pwacnwacng El tiac an ke mwe nuhnuhnkuh.14 Ke kuhtuh pacl uh Mwet Pahluh Joseph Smith el luti:
“Molwelah tiac kuh in tuhkuh nuh facluh fin tiac ke iwaclah luhn Jisus Kraist.
“God El … ahkolah sie kihsac ke mwe sang luhn Wen Nahtuhl, suc fah … ikacslah sruhnguhl sac mwet fah utyak nuh yurin Luem.”15
Ke kihsackuhnlah lal Mwet in Molwelah el eislah ma tuhkuh ke misac in mahno,16 El tiac ahkwacngihyelah kunohkohn lasr in auliyak ke ma koluk lasr.17 Tuh, el use nuh sesr solsol sacohk se in muh sifilpac fohlohkyang nuhsin Pahpah tuhmasr Inkuhsrao. Kacl Jisus Kraist ac ke iwaclah Lal, kuht kuh in puhlakihn eklac yohk luhn nuhnak ac insiacsr, ma use atac sasuc se, kwewana nuh sin God nuhke moul.18 Ke kuht auliyak ke ma koluk lasr ke insiyacsr kwewa ac furohkwacng insiacsr ac luhngse lasr nuhsin God ac msap Lal, kuht kuh in eis nuhnakmuhnahs Lal ac puhlah Nguhn Muhtahl Lal yohk. Ke pahkotwen Lal, kuht kahingkihn in tiac puhla kweok se ma Mwet in Molwelah lasr El puhlakihn.19
Mwe sang luhn auliyak El ahkkahlwemye kuhlwacng luhn God nuhsin tuhlihk Nahtuhl, ac oruh kuh Lal ma in kahsrwe kuht kuhtanglah ma koluk ma kuht orwaclah ah. El oacyacpac mwe ahkpwacyei mongfihsrwacsr ac muhtweng luhn Pahpah na luhngse se tuhmasr nuhke muhnahs lasr ke moul se inge. Prestuhn Russell M. Nelson, mwet pahluh sacohk lasr, sruhmuhn ke mwe sang se inge muh “pa ki nuhke engan ac mislac in nuhnak.“20
Kawuhck sacohk luhk, nga fahkwack nuh sum lah fin kuht auliyak ke ma koluk lasr,21 kuht lwelah iwaclah luhn Kraist in kuh in mokle nohfohn moul lasr.22 Kuht e fah sukohsohklah liki mwe kapihr luhn ma koluk, sokwack engan ke fuhfahsryuhsr lasr fin facluh se inge, ac eklac wi in fal in eis moul la ma pahtpaht, ma ahkweyucklac ke pwelucng luhn facluh se inge nuhsin nohfohn mna mwet ma luhlahlfongi kacl Jisus Kraist ac fahsr nuh sel uh.23
In weacng oraclah mwe sang in molwelah na wolacna se, Mwet in Molwelah el ahkwoyekuht ac ahkkweyekuht ke kuht sun ma upac lasr, mwe sruhf, ac muhahs ke moul in mahno, wi pacna ma sikyak suc kuht puhlakihn ingena ke mas se ma fahsrwelihk fin facluh nohfohn inge. Nga kuh in ahkkweye kom lah Kraist E etuh ke ma nuhkwewa ma lain kuht ke moul se inge. El kahlwem ke ahsor nuhkwewa, kweok, ac ngal wi pac ma upac kuht puhlakihn ke puhla lasr ac ke nguhn. Isiacl nwacnwaclah ke pahkomuhta, ac El ahkolah pacl nuhkwewa in kahsrwe kuht. Ma se inge kuh in sikyak ke sripen El sifacna puhlakihn ac sifacna eisaclwacng sifacna nuhke mahno in kweok ke muhnahs ac ma suhfal lasr.24
Ke insepwacye ac insemuhlahlah luhn insiac, El puhtati ye ma nuhkwewa ac mwet uh ahngyahng Sel, sruhngwacl, ac ahkkoluyeyuhk el sin mwet uh, ac el kihnetuh ke tahfonglac ac ma koluk lasr. El kweokihn ma inge luhn nohfohn na, eisaclwacng nuhke ma koluk nuhkwewa fin facluh se inge,25 ohinge el pa mwet in karingihn kuhlwacna lasr uh.
Ke kuht fotoyang Nuhsel uh, sang nguhnasr nuhke karihngihyuhk Lal, kuht e fah kuh in eisaclwacng nuh facsr, suc pa arlac fihsrwacsr, ac ma toasr Lal, suc pa arlac muhlahlah, ohinge kuht e fah sokwack olwelah nuhke ahkkweye ac monglac. In tahfwelah pacna, kuht e eis kuh se ma kuht nohfohn enenuh in kuhtanglah ma upac, mwe muhnahs, ac mwe ahsor luhn moul, ma arulacna upac in kuhtangyuhklac fin wacngihn kahsruh Lal ac kuh in onwelah.26 Ma suhmuhslah luti kuht in “sang toasr lom nuhsin Leum, ac el ac fah ahkkweye kom.”27 Ac na lwelah God Elan acsot nuh suwos tuh ma toasr lowos in kuh in ahkmuhlahlahyeyucklac, ke engan luhn Wen nahtuhl.28
Ke apkuhran nuhke kapihn yac ke yac tari ah, nga etwacack ke siyacnyacn sacohk se elos misac, Mario ac Regina Emerick, suc arulacna wo ac elos misac lwen ahkosr inmahsrloltahl ke srihpen COVID‑19.
Sie sin tuhlihk mukul nahtuhlos, suc ekihn sie pisrap fin acn Brazil ingena, fahk ma inge nuh sihk: “Arulacna upac nuh sihk in liye ke ninac ac pahpah tuhmuhtk som liki facluh se inge ke ohiyac sac, tuhsruhk nga kuh in puhlah pahol Leum ke moul luhk uh ke upac nga puhlakihn inge, mweyen nga eis kuh ac mislac ma ahkkohnye kahlwem luhk. Ke luhlahlfongi luhk ke Jisus Kraist ac ke Iwaclah lal, nga eis kahsruh wolacna in ahkfokokoye ac ahkkweye sucu luhk ac nohfohn na mwet ma kahsrwe kuht ke pacl upac se inge. Finne ma usrnguhk se ma mwet nuhkwewa finsrak nuhkac ah tiac sikyak, nga mwet lohoh ke ma usrnguck pucs sahyac ke moul luhk uh sifacna ac ke moul luhn mempuhr wiyuhk inge. Nga puhla mislac na upac se ma puhtwaclah som loal ke insiyuhk, suc use nuh sihk finsrak ac nuhnak fokoko ke luhngse luhn Mwet in Molwelah nuh sihk ac ke plwacn in engan luhn God nuhsin tuhlihk Nahtuhl. Nga lotwelah lah ke lwen ma ahsor emeet uh, poun Mwet Lahngo ahsrweyucklac pacl nuhkwewa ke kuht sokuhl ke insiacsr nohfohn, kuh, nuhnak, ac kuhiyacsr.”
Tamuhlwel ac tahmtahel sacohk wiyuck, ke Sacnri in Istuh se inge, nga fahkwack mwe lohoh pwacye luhk lah Jisus el fohlohkyak liki misac ac El moul. Nga fahkwack nuh sum lah Sripacl ac ke Iwaclah Lal, Mwet in Molwelah El use nuh sesr inkacnek in kuhtanglah misac, kwewana ke mahno ac nguhn. In weacng mwe insewowo yohk inge, El oacyacpac use nuh sesr mihslac ac ahkkweyeyuck ke pacl upac inge. Nga ahkpwacyei nuh sum lah ke kuht e sang luhlahlfongi lasr nuh sel Jisus Kraist ac ke kihsac in iwaclah wolacna Lal, kampare ke luhlahlfongi lasr neke sahflah, kuht e fah puhlakihn olwelah luhn Pahpah tuhmasr Inkosrao, suc oruh ma nuhkwewa ke kuh Lal in kahsrwe kuht in fohlohk nuh yohrohl sie lwen. Pa inge orekma Lal ac wolacna Lal!29 Nga fahkwack nuh sum lah Jisus pa Kraist, Mwet Lahngo ke facluh se inge, Messiah se suc olwelah nuh sesr, Sifilpac Moulyak ac Moul.30 Nga fahk ma inge nuh sum ke Ine muhtahl Lal, Wen Kuloh se fanna nahtuhl Pahpah, Leum lasr, Jisus Kraist, amen.