Insewowo ke Inel
Srihpac se oruh utuckuh pristut nuh sesr uh pa in fuhlwelah nuh sesr in ahkinsewowoye mwet nuh sin Leum, oruh oacna ke Inel.
Tamuhlwel sacohk wiyuck, mwet kuhlwacnsap ke pristut luhn God, nga srui kaksakihn pacl se inge in sramsram nuh sum oyekuh. Nga usot ahkfuhlwact ac kaksak yohk luhk nuh sum. Ke nga sramsram nuh sum ac porongo luhlahlfongi yohk lom, luhlahlfongi luhk lah oasr yohkwelihk ke kuh luhn pristut fin facluh, ke kapwack luhn u srihsrihk ac oacyacpac mwet luhlahlfongi ma sruok kuh luhn pristut.
Ke kihtin pacl luhk nga wi kowos ofong uh, ngac fah sramsram nuh suwos suc ma luhngse finne in ahkyohkye kuhlwacnsap lom sifacna ke pristut. Kom etuh ke kunohkohn se ma kom ac ahkyohkye pahng lom in kuhlwacnsap uh.1 Tuh sahp kom ac nuhnkuh lah meac kalmacn pahng sacn nuh sum.
Ngac fah muhtwacwacack ke tikin sasuc emeet mweyen elos pa oacna in puhla nuhkanlah emet kac in ahkyohkye lah meac kalmacn kuhlwacnsap ke pristut. Elder sasuc ma akmuhsralah uh fah oacyacpac luhngse in porongo. Sahp pisap se ma kuhlwacnsap ke wik se emeet la e luhngse pac in wi lohng.
Moklweyuc in fohlohklac nuhnkuh pacl nga tuh ekihn sie tikin ah. Nga finsrak tuh in oasr mwet se ke pacl sac in fahk ma ngac fah fahk ingena nge. Ac kuh in kahsrweacng nuh sihk ke kunohkohn nuhkwewa ke pristut ma tuhkuh nuh sihk ke pacl sacn—finne elos ma nga eis ke pacl mihsenge uh pacna.
Nga tuh akmuhsraelah sie tikin ke sie pracns na srihsrihk se ke nga pa tuh tikin se fanna ac tamuhlwel luhk Ted pa mwet luti se fanna ah. Kuht pa muhkwena in sucu lasr ah ke pracns sac. Inkaiyacn mwet ke pracns lasr ah ohsun lun lohm sesr. Mwet kol se ke pristut luhk ac tamuhlwel luhk ah pa mempucr sasuc se suc fahna in eis pristut nuh sel sifacna. Nga luhlahlfongi muh ma kunuck ke pristut ah pa in tahfwelah sackramacn nuh sin mwet lun lohm sihk sifacna.
Ke sucu luhk ah som nuh Utah, nga konweyucyak sifacna ke sie ward luhlahp wi tikin puhkantwen. Ke alu in sackramacn se luhk emeet we ah, nga liye tikin forfor ke suwohs ke elos tahfwelah sackramacn oacna sie u ma ahkpahyeyuck.
Sacnri se tohkoh ah nga sa na som nuh ke lohm ke ward sac in muhkwena muhta wacngihn mwet kuh in liye yuc. Nga esam lah acn se inge pa Wohrt luhn Yalecrest fin acn Salt Lake Siti, ac oasr ma sruhlwaclah se oan lukunumac. Nga muhta tukun ma sruhlwaclah se inge ac pruhe kwacfeacng siyuck ke kahsruh in tiac tahfonglac ke ngac eis pacl luhk in tahfwelah sackramacn uh. Pruhe sac topukyucklac.
Tuh nga etuh lah oasr ohiyac wowo se sahyac in pruhe ac in nuhnkuh ke kuht srihke in kapkapwack ke orekma luhn pristut. Nga kahlwemwack kac lah efuh mwet uh ituckyang nuh se pristut uh. Srihpac se lah efuh utuckuh pristut nuh sesr uh pa in fuhlwelah nuh sesr in ahkinsewowoye mwet nuh sin Leum, oruh oacna ke Inel.2
Sun yac ekahsr tukun nga sie tikin fah nga lotwelah lah meac kalmeyac. Yac somlah ah, nga sie prist fuhlwact, nga tuh srihsrngiyucki in som muhtwacta ke sie toeni ke sackramacn ke nien karihngihnyuck se. Ngihsrweyuck nga ngacn kihtaclihk sackramacn. Liki na in nuhnkuh ke ohiyac kuh suwohswohsiyac uh nga tahfwelah na sackramacn sac, nga ngwetwacng liye muhtuhn kais sie mwet mahtuh. Nga liye puhkantwen selos tuhng. Sie muhtwacn ah sruokyac poun fohrohk luhk ah, ngwetwack, ac lihksrweni fahk, “We, kuloh nuh sum, kuloh nuh sum.”
Leum El ahkinsewowoye orekma luhk, orekma ituckyang ke Inel. Lwen sac nga pruhe siyuck ke sie ma usrnguck in tuhkuh liki na in pruhe kac lah nga oraclah fuhkah ke ngac oruh ip luhk uh. Nga pruhe tuh mwet uh fah puhlakihn luhngse luhn Leum ke luhngkuhlwacng in kuhlwacnsap luhk. Nga lotwelah ki in kuhlwacnsap se inge ac ahkinsewowoye mwet sahyac ke Inel.
Nga lohng ohiyac sikyak ma ahkacsmakihnye yuc ke kain luhngse se. Ke miting nuhkwewa luhn Alu uh tuh tulokuh ke srihpen mas se ke COVID-19, oasr sie tamuhlwel in karihngihn se eis kunohkohn se sin prestuhn ke u srihsrihk luhn elder in ahkinsewowoye ac ahkmuhtahlye sackramacn nuh sin sie tahmtahel el oruh kahsruh la nuh se. Ke el pahnglolwack siyuck elacn uslah sackramacn nuh sel, el ahokiyac, sruhnga elacn tifoklac liki lohm sel ke sie pacl sensen ac oacyacpac luhlahlfongi lah ma uh fah sa na fohlohklac oacna met ah.
Ke el sun lohm sel ke litutacng in Sacnri se ingacn, oasr siyuck se lal. Kuh elos kuh in som nuh ke lohm se siskacl ah ac akacsruhi sackramacn nuh sin mwet atuhlani yac 87 se lal ngi? Ke lwelah kuh luhn pisap sac, el insese.
Ke wik puhs, puhkantwen, ac ke upac karihngihnyacn lusac inmahsrlon mwet uh ac luhpan ohiyac in karihngihn luhn mwet sahyac, u srihsrihk se luhn Mwet Luhlahlfongi inge fahsrweni ke kais sie Sacnri in oruh kihtin kunohkohn se luhn sackramacn. Ip srihsrihk na ekahsr ke bread ac kuhp in kof—tuhsruhk ahksohrohryelah sronin muhtuhn mwet ke wolacna luhn God kuhlwacng.
Ke pacl, tamuhlwel in karihngihn sac, sucu lal, ac tahmtahel se ma el karihngihn ah kuh in fohlohk nuh ke alu uh. Tuhsruhk katinmas yac 87 sac, enenuh elacn muhta na lohm sel, ke srihpen wacngihn suhnuhn ma in karihngihn sensen lal. Tamuhlwel in karihngihn sac—esamwack lah kunohkohn lal ma nuh sin mwet tuhlan lal ac finne tiac ma nuh sin mwet mahtuh se inge muhkwena—srwackna nuh ke lwen se mihsenge tuhkuh mihs nuh lohm sel ke kais sie Sacnri, ma suhmuhslah ac kihtin bread se lun pacol, in ahkfahsryelah sackramacn ke Kuhfwen Ahluhkwelah luhn Leum.
Kuhlwacnsap lal ke pristut, oacna nga ke lwen sac ke nien karihngihnyuck, tuhtahflah ke luhngse. Pwacyeiyac, tamuhlwel in karihngihn sac tuhfahna siyuck sin pisap lal lah oasr mwet sahyac ke ward sac el kuh in soklah. Kena lal in ahkyohkye orekma luhn pristut yohkwelihk oacna ke el kuhlwacnsuhpuh inen Leum ac ke ohiyac etweyuck apkuhran in upaclaclac nuh Sel. Nga tiacna etuh lah tamuhlwel in karihngihn sac pruhe, ke nga oruh oacna, nuh selos suc el kuhlwacnsuhpuh in etuh ke luhngse luhn Leum, tuhsruhk ke srihpen orekma lal ma ke inen Leum, ma sikyak kac an oacpacna.
Oacpacna sie ma sikyak kac an tuhkuh ke nga pruhe kac met liki nga sang mwe ahkinsewowo luhn pristut nuh sin sie mwet suc mas kuh oasr in elyah. Sikyak sie pacl ke lohm ono se ke taktuh semuhtweng ekahsr elos pahtokyuc—upac liki na pahtok yuc—elos sap ke kuh nuh sihk—in silahklahk ac kihlucklac liki acn uh elos in kuh in oruh orekma lalos uh, liki na in use pacl wowo luhk in sang mwe insewowo luhn pristut. Nga muhta na, ac nga sang mwe insewowo sac. Ac tuhlihk muhtwacn srihsrihk se ma nga ahkinsewowoye ke lwen sac ah, suc ma taktuh ah nuhnkuh muh e misac ah, moul na. Nga kuloh ke pacl se inge ke lwen sac, lah nga tena fuhlwelah puhla luhk sifacna in tulokihnyuc tuh puhla lah Leum el ke tuhlihk muhtwacn sac in eis sie alu in ahkinsewowo ah. Ac nga etuh lah meac se mwe insewowo sac: Nga ahkinsewowoyacl elan kwelac. Ac el kwelac.
Sikyak pacl puhkantwen ke nga tuh sang sie mwe ahkinsewowo nuh sin sie mwet ma apkuhran in misac, wi mwet ke sucu sac raunwelah mwe oan kiacl, finsraki na ke sie mwet insewowo in ahkkweyelah ah. Finne kihtin pacl se na utuckuh luhk, nga pruhe in etuh lah meac mwe ahkinsewowo oasr sin Leum ma nga kuh in sang ke Inel. Ac nga siyuck in etuh lah meac El ac luhngse in ahkinsewowoyelah mwet mas sac kac ac tiac muh ma nga kuh mwet tu siskac ah ke uh. Ma sikyak nuh sihk ah pa finne ke mwe insewowo se tiac ma mwet sahyac kena kac nuh selos sifacna kuh mwet sacohk se lalos, Nguhn puhsrallah insiaclos in muh sun lwelah ac ahkkweyeyuck liki na toasrlah.
Mwe nuhnak se pacna inge tuhkuh ke patriarch uh lalo ac pruhekihn kolyuck in sang mwe insewowo ma Leum El ahkolah nuh sin sie mwet. Sifil pac, nga lohng mwe insewowo ituckyang ma ahklutye yuc ac oacyacpac ahklutye mwet se ma eis mwe insewowo sac. Kahlwem na, mwe insewowo sac ma sin Leum—kwewana mwe sensen ma oasr kac oacyacpac olwelah ma akacsruhi ke Inel. Pruhe ac lalo luhn patriarch sac opiyucki sin Leum.
Ekihn sie pisap, nga lotwelah ke nga kol lohlngohk suwohswohs in pruhe nuh sin Leum in lwelah nuh sihk in puhla ma El luhngse nuh sin mwet se, liyacacng oacna sie mwe nuhnak El fah use liki na nuhnuhnkuh luhk sifacna. Upac ma se ingacn fin Leum, ke luhngse, sahp El ac luhngse in ahkinsewowoye sie mwet ah in ahkpwacyelah. Ac sang kuhiyac in oraclah sulaclah ma Leum El luhngse sin ma kom ac mwet se sahyac luhngse uh.
Nga luhlahlfongi muh kuht kuh in ahkyohkye orekma luhn pristut lasr ke lusen moul lasr kuh sahp som ahluhkwelah. Ac ukwe na oaru lasr in srihke etuh luhngse luhn Leum ac kampare lasr in porongo puhsra Lal kuht in muh kuh in etuh na pwacye ma El luhngse in orek nuh sin mwet ma kuht kuhlwacnsapi nuh Sel. Ahkyohkye se ingacn fah tuhkuh ke step srihsrihk. Sahp ac fah tuhkuh suhmuhi, tuhsruhktuh ac fah tuhkuh. Leum El olwelah ma se inge nuh sesr:
“Tuh el suc luhlahlfongi ke eisyacn pristut luo inge suc Nga sramsramkihn, ac ahkyohkye kunohkohn la, ac ahkmuhtahlyeyuck ke Nguhn nuh ke ahksasucyeyacn mahnolos.
“Elos eklac wen nahtuhl Moses ac Aaron ac fihtacl Abraham, ac alu ac tohkohsrahi, ac sulohsohl luhn God.
“Ac oacyacpac elos nuhkwewa suc eis pristut fah eis yuc, Leum El fahk.”3
Nga wi lohkihn lah ki luhn pristut sifil fohlohkyak nuh sel Mwet Pahluh Joseph Smith. Mwet kuhlwacnsap luhn Leum sikyang tuhkuh inkuhsrao mwe in sifil fohlohkohnwack pristut nuh ke ma sikyak yohk ma ikackwelihk ac fihliyuckiye muhtahsr. Israel fah fahsrweni. Mwet luhn Leum fah ahkolah nuh ke Tuhkuh Wolacna Ahkluo Lal. Sifil Moulyak uh fah tuhtahflah. Leum El ac fah ahkkahlwemye kuhtuh pac ma luhngse Lal nuh sin mwet pahluh Lal ac nuh sin mwet kuhlwacnsap Lal.
Sahp kom ac puhla kihtihn kuhpahsr nuh ke wacngihnlac luhn ma Leum El fah oruh. Fin kom oruh, nga suli kom in pruhe siyuck lah Leum El liye kom fuhkah. El etwekom sifacna, El tahfweoht pristut nuh feim, ac kapwack lom ac ahkyohkye elyah luhn pristut lom nuh Sel mweyen El luhngse kom ac El luhlahlfongi kom in ahkinsewowoye mwet ke Inel.
Nga ahkinsewowoye kom ingena kom in kuh in puhla luhngse Lal ac luhlahlfongi Lal ke inen Jisus Kraist, amen.