Afo Eyeworo Ke Ufin
Jesus Christ edi uwana oro emi nnyin idimenere ke enyong kpa ke ini ekim ke uwem nnyin ke isong.
Ndima ndito-eka mi iren ye iban, mmenem esit ke ifet nditiŋ-ikɔ nno mbufo emi ntingde nto idut Africa. Edi Edidiong ndinyene nti usung unam utom mfin emi ye ndikama enye ke ata eti usung ndisime mbufo ke ebiet ekededi emi mbufo edude.
Ke Ofiong Usukkiet ke isua 2019, Sister Mutombo ye ami, ke ini nnyin ikenamde utom nte mme adausung ke Maryland Baltimore Mission, ima inyene ifet ndikise ndusuk ebiet mbuk eset eke Ufok Abasi ke Palmyra, New York, ke ini nnyin ikedukde mboho mme adausung ke mission. Nnyin ima itre ediwaha nse nnyin ke Edisana Groove. Udong nnyin ke ndika nkese Edisana Grove ike idighe nnyin ndinyene asanga-asanga ediyarade mme nkukut, edi nnyin ima ikop ite ke Abasi odu ke edisana ebiet emi. Esit nnyin ama oyoho ye ekom ono Prophet Joseph Smith.
Ke ini nnyin ifiakde edem Sister Mutombo ama okut akwa imam ke iso mi nte ami nwatde moto, ndien enye obup ete, “Nso idi ntak emi esit enemde fi?”
Ami mboro nte, “Edima Nathalie mmi, akpaniko eye ka iso ndikan ndudue, ndien ekim idikaha iso ke ererimbot ke ntak mfiak-nda-ndi iko Abasi Jesus Christ.”
Abasi Ete ye Jesus Christ ema edise ekpri Joseph Smith man emen edi unwana mme mkpo oro ekedipde man nnyin ikeme ndibo “ifiok kpukpru nkpo nte mmo etiede, … nte mmo eketiede, ye nte mmo [editiede]” (Doctrine ye Covenants 93:24)
Ke nkpo nte isua ikie iba ebede, ediwak ke ekaka iso ndiyom akpaniko man mmo ekeme ndinyene uworo-ufin ekpong ndusuk ido-eset ye mme nsu emi owo-usua asuande ke ofuri ererimbot. Ediwak owo “edongo nnan eto ke nkari mbufiok mbon owo”” (Doctrine ye Covenants 123:12). Ke Nwed esie enye eke ewetde ono mbon Ephesus, Paul ekpeb ete: “Demere afo emi edede idap, enyung eset ke mkpa, ndien Christ eyeyama ono fi“ (Ephesians 5:14). Andinyanga ama onwongo ete ke Imo iyedi unwana ino kpukpru mmo emi ekopde iko Esie (se 2 Nephi 10:14).
Ke isua Edip ye efut emi ebede, ete ye eka mmi ema etiene edongo nnan enyung eka iso ndiyom akpaniko ke mbre-enyin enyung ekere ebanga ebiet emi mmo ekpekade man ekut enye. Ekeman ete ye eka mi ke ekpri obio inwang, emi ido-eset ekenyenede orung ke uwem mme owo ye ke mme ufokemana. Mmo mbiba ema ekpong ekpri obio inwang mmo ke ini uyen mmo enyung edi akwa obio, edi ndiyom eti uwem
Mmo ema edo ndo enyung etongo ubon mmo ke ata usuhore usung. Nnyin ikedi nkpo nte owo itiaita ke ekpri ufok kiet—ete ye eka mi, ndito eka mi iban iba, ye ami, ye eyen eyeneka mi emi ekesi idungde ye nnyin. Ami mma nsikere mme nnyin idi ata ubon kiet, koro owo ikesiyake nnyin idia udia mbubreyo ke okpokoro kiet ye ete ye eka nnyin. Ke ini ete nnyin oyongde utom edi, enye ama osuk ebe oduk ufok, eyedoho nnyin ete ikpong inyung iworo ika anwa esien. Okoneyo nnyin esidi ata ibio-ibio, nte nnyin ime-ikesikemeke ndide idap oto ke ntak unana edidiana kiet ye unana ima ke ufot ndo ete ye eka mi. Ufok nnyin ike idihe ekpri ke idaha ikpong, edi enye ekedi nkim-nkim ebiet. Mbemiso nnyin isobo ye mbon ukworo iko Abasi, nnyin ikesika nsio-nsio ufok Abasi ke kpukpru usen Ederi. Ama anwanga ete ke ete ye eka mi ekeyom nkpo emi ererimbot mme ikemeke ndino.
Emi ama aka iso tutu nnyin idisobo ye Elder ye Sister Hutchings, akpa akamba okworo iko Abasi emi ekekotde edinam utom ke Zaire (emi ediongode mfin nte DR Congo mme Congo-Kinshasa). Ke ini nnyin itongode ndisobo ye mme utibe okworo iko Abasi emi, emi ekebietde mme angels etode Abasi edi, ami mma nkut nte nkpo otongode ndikpuho ke ufokemana nnyin. Ke ima ikena baptism ima, nnyin ke akpaniko ima itongo ndikori ke obufa edu uwem ke ntak mfiak-nda-ndi iko Abasi. Iko Christ otongo ndinam ukpong nnyin okpon. Mmo etongo ndinam nkpo anwanga nnyin onyung enem nnyin, nte mme akpaniko emi nnyin ikibode ama atat nnyin enyin ndien nnyin ikeme ndikut unwana.
Ifiok emi ndidiongo ntak eke iko Abasi ama anwam nnyin ndikabare nnehede ntie nte Andiyanga. Idaha ufok nnyin ikekpuhoke; ndaha nnyin ke obio ike inyung ikpuhoke nko. Edi ami mma nkut ukpuhode ke esit ete ye eka mi nte nnyin ibongde akam kpukpru usen, ke usenubok ye ke mbubreyo. Nnyin ikpep ito Nwed Mormon; inim family home evening; ke akpaniko nnyin ikabade idi ufokemana. Kpukpru Ederi nnyin isidemede idap ke nkanika itiokiet usenubok, ibenge idem ndika ufok Abasi, ndien nnyin iyenam isang ke ediwak hour man ikeduk mbono ufok Abasi kpukpru udua eseme ike iduhe. Ekedi utibe nkpo ndikut. Nnyin, emi ikisisangade ke ekim ke usen edem, ibin ekim ifep ke otu nnyin (se Doctrine and Covenants 50:25)inyung ikut “akwa unwana” (2 Nephi 19:2).
Ami mmeti usen kiet emi ami mme nkenyeneke udong ndidemede ke usenubok man ntiene nduk akam ufokemana, ami nseme nno enyen eka mi anwan nte “Ke akpan iduhe baba nkpo efen emi nnyin ikemede ndinam ke ufok emi, nkukure nkpo edi ubong akam, ubong akam, ubong akam” Ete mi ama okpo se ami nketingde. Ami mmeti iboro esie nte enye ke ima edi ke nsongonda ekpebde mi ete “Adanga nte afo odude ke ufok emi, afo eyeka iso ndibong akam, ndibong akam, ndibong akam.”
Mme iko ete mi aka iso ndiyomo ke utong mi kpukpru usen. Nso ke mbufo ekere ete ke Sister Mutumbo ye ami isinam ye ndito nnyin mfin emi? Nnyin ibong akam, ibong akam inyung ibong akam. Emi edi inyene nnyin idikpade ikpong.
Owo emi ekedide nnan toto ke emana onyung obode edikok oto Jesus Christ, ke enye ama okobo afanikong oto mme mbohidung esie ye mme Pharisees, eting ete:
“Owo emi ekerede Jesus anam mbat, ada eyet mi ke enyin, onyung odoho mi ete, ka ke mmomg Siloam, keyet: ntre ke ami nka nkeyet, nkabare nkut usung. …
“… Mmofiok nkpo kiet, nte … nkedi nnan, edi [mmokut] usung ke emi.” (John 9:11, 25).
Nnyin nko ikedi nnan edi imokut usung ke emi. Mfiak-nda ndi iko Abasi anwam ufokemana nnyin tongo ke ini oro. Ndifiok ufon iko Abasi ama odiong ono emana ufokemana mi ita ndien eyesuk aka iso ndidiong mme emana efen emi edidide.
Jesus Christ edi unwana emi ayamade ke ekim. Mmo eke etienede Enye “idisangake ke ekim, edi eyenyene unwana uwem”(John 8:12).
Ke nkpo nte isua kiet, ke ufot 2016 ye 2017, mbon idut Kasai ema ekut akwa nkpo-mmongeyet. Ekedi ata nkim-nkim ini ono mme owo ke ntak enwan emi okodude ke ufot mbon isong obio ye mbon ekong mme ada ukara Afai ama atara toto ke mme obio ke Idut Kasai-Central ekesim akwa idut Kasai. Ediwak owo ema efehe ekpong ufok mmo man eboho enyung edibe ke ikot Mmo ikenyeneke udia mme mmong mme nkpo ndomokiet, ke akpan, ndien ke otu oro ekedi mbon Ufok Abasi Jesus Christ eke mme Latter-day Saint emi ekedude ke nkang Kananga. Mbon ekong isong obio ema ewot ndusuk mbon Ufok Abasi.
Eyen-ete Honoré Mulumba emi odude ke Nganza Ward ke obio Kananga ye mbon ufokemana esie ekesine kotu ekpri ibat owo emi edibede ke ufok mmo koro kpukpru efak okoyoho ye utop ikang. Usen kiet mbon ekong isong obio emi ekedude ke mboho oro ema ekut Eyen-ete Mulumba ye mbon ufokemana esie, nte mmo ekade mbubreyo kiet ndiyom ikong-udia ke inwang ufokemana mmo. Mbon ekong isong obio edi ufok mmo edi isiongo mmo enyung edoho mmo ette mmo etongo ndinam edu mmimo mme idihe ntre ke eyewot mmo.
Enyen-ete Mulumba ke akwa uko odoho mmo ete, “Ami ndi owo Ufok Abasi Jesus Christ eke mme Latter-day Saints. Ami ue ufokemana mi imenyime Jesus Christ inyung inyene mbuotidem ke Enye. Nnyin iyesuk inyene mbuotidem ke ediomi nnyin ndien nnyin imenyime ndikpa.”
Ndien, mmo edoho mmo ete, “Nte mbufo emekde Jesus Christ, ebua eyeta obuk-idem mbufo,” ndien mmo enwongo ndifiak ndi. Edi mmo ikefiake idi aba, ndien ufokemana oro edu do esim ofiong iba inyung ikwe mmo aba. Brother Mulumba ye mbon ufok emana esie ema enim ikang mbuotidem ayama. Mmo ema eti ediomi mmo ndien mmo ema eboho.
Jesus Christ edi uwana oro emi nnyin idimenere ke enyong kpa ke ini ekim ke uwem nnyin ke isong (se 3 Nephi 18:24). Ke ini emi nnyin imekde nditiene Christ, nnyin imek ndikpuho. Erenowo mme nwan emi okpuhode ono Christ, Christ eyedi etubom esie, ndien enye eyeka iso ndibup, nte Paul okobupde, “Obong, oyom mi nnam nso?” (Acts 26:16). Nnyin iye “tiene isanga ke nde ikpat esie” (1 Peter 2:21). Nnyin iye “sanga kpa nte enye akasangade” (1 John 2:6). Ezra Taft Benson, “Ndimana ke Abasi,” Tambuli, Oct. 1989, 2, 6)
Ami nno iko ntiense mbanga Enye emi akakpade, ebuk Enye, ndien Enye eset ke oyoho usen ita onyung odok ke heaven man afo ye ami ibo edidiong eke nsinsi uwem ye edimenere-ke-enyong. Enye edi unwana, … ye uwem, ye akpaniko” (Ether 4:12). Enye edi editibe ye usobo ono ndutime ererimbot. Enye edi eti uwutnkpo eke nsinsi uwem, kpa Jesus Christ. Ke enying Jesus Chrst, amen.