Nso Ke Andinyanga Nnyin Akanam Ono Nnyin?
Jesus Christ ama anam kpukpru nkpo edide akpan ke isang nnyin kini uwem emi ndika akanga emi esinede ke uduak Ete nnyin eke Heaven.
Ke ikpehe mbubreyo ke stake conference ediwak isua emi ekebede, ami nkesobo ye nwan kiet okodohode ke mme ufan esie ekedoho enye ete afiak edi ke ufok Abasi ke ediwak isua emi enye mikiduke, edi enye ikikemeke ndikere ntak ndinam. Ke ndino enye osongo, Ami ndoho nte, “Kini afo esede kpukpru nkpo emi Andinyanga akanamde ono fi, eyenyene ediwak ntak ndifiak ndi ndikpono nyung nam nkpo nno Enye.” Nkedu ke mkpa-idem ke iboro emi enye okonode, “Nso ke Enye anam ono mi?”
Nso ke Jesus Christ akanam ono nnyin owo kiet-kiet? Enye amanam kpukpru nkpo edide akpan ke isang nnyin kini uwem emi ndika akanga emi esinede ke uduak Ete nnyin eke Heaven. Ami nyeting mbanga inang kotu mme nkpo uduak oro. Kiet kiet kotu emi, Ikpong-ikpong Eyen Esie, Jesus Christ, edi esine ufout. Ndimenere kpukpru emi edi “ima Abasi, emi odude ke esit ndito owo; ke ntre, edi nkpo emi ofonde akan kpukpru nkpo”(1 Nephi 11:22).
I.
Esisit mbemiso ini Easter Sunday, ekem ini nditing akpa mbanga Eriset Jesus Christ. Eriset ke mkpa edi osongo ndaha mbuotidem nnyin. Oro adian mbufiok ke ndutim nnyin, edimenere ke edu-uwem nnyin, ye idorenyin nnyin kini iso.
Koro iminim se ewetde ke Bible ye Nwed Mormon kabanga Eriset ke mkpa Jesus Christ, nko imenyime mme ediwak ukpep iko Abasi kabanga eriset ke mkpa emi edidide ono kpukpru me odu uwem emi ekedungde kisong.1 Nte Jesus ekekpepde, Koro Ami ndude uwem, mbufo nko eyedu uwem” (John 14:19 Ndien mme Apostle Esie ekpep ete “mme akpanga mkpa eyeset ye anana ndo” nko “ikpokidem emi eyesine ikpokidem emi midikpaha” (1 Corinthians 15:52, 54).
Edi Eriset ke mkpa ono nnyin akan osongo nsinsi ikpokidem emi. Okpuhore adanga nte ikutde uwem emi.
Eriset ke mkpa ono nnyin mbufiok ye odudu ndiyo ke mme idomo ikutde kuwem nnyin kiet kiet ye eke mbon ima nnyin. Ono nnyin obufa ndaha ndikut ikpokidem, nkike, mme unana ekikere inyenede ke emana me emi inyenede kini uwem emi. Enye ono nnyin ukeme ndiyo mfuho, edikpu, ye mme nditaba. Ke ntak nnyin kiet kiet inyenede osongo eriset ke mkpa, imofiok ite ke unana uwem ye nyanubok edi ke esesit ini.
Eriset nko ono nnyin akamba nkpo kabanga ndinim ewuhoho Abasi kini uwem isong emi. Kini idisetde ke mkpa ndien ika ke ikpe emi eketingde ebanga Akpatre Ubiere ikpe, nnyin iyom ndidot no edidiong emi ekenwongode eno mme andikiset ke mkpa.2
Ke ndidian do, enwongo emi Eriset ekeme ndidongo unen ndidu ye mbon ufokemana—ebe, nwan, ndito, mme ete ye eka, ye ubon—edi ata osongo ke ndinam ubiong eke ufokemana kuwem emi. Enye nko anwam nnyin ndidu ato kiet ke ima ke uwem, emi onyung odong nnyin esit kabanga mbon ima nnyin emi ekpangade. Nnyin imofiok ke edi-diangade ke uwem ererimbot emi edi ke esesit ini, ndien nnyin iyom idara edidiana kiet ye ebuana ini iso. Eriset ono nnyin idorenyin ye odudu ke ndinyene ime nte ibetde. Enye nko otim nnyin idem ye osongo ye uko ndikut mkpa eke nnyin—kpa nte mkpa ekemede ndikot mkpa nsek.
Kpukpru mme nkpo Eriset emi edi kiet ke akpa mbume “Nso ke Jesus Christ akanam ono mi?”
II.
Ke ediwak nnyin, unen ndibo erifen-nno ke ndudue nnyin edi ata akpan mbufiok eke Erisio-isop eke Jesus Christ. Ke ntuak-ibuot, nnyin ikwo iti:
Edisana iyip Esie ke enye okoduok ke mfon;
Uwem Esie ke enye okono ke mfon,
Uwa anana-ndo onode ke ndudue,
Man anyanga ererimbot emi akpade.3
Andinyanga ye Andifak nnyin oyo akwa ndutuhore ke ndidi uwa nno idiok nkpo man mbon oro edude uwem ekeme ndikabare esit. Uwa usio isop emi ono ata eti, eyen erong minyeneke ndo, ke ata udomo idiok, idiok nkpo ofuri ererimbot. Enye eberede usung ono kpukpru nnyin ndiyere nsana ke mme idiok nkpo eke idem nnyin man nnyin ekeme ndifiak nda nnyin nsin ke iso Abasi, Nsinsi Ete nnyin. Usung emi eberede ono kpukpru ndito Abasi. Ke ntuak-ibuot, nnyin ikwo:
Akpa mi idem ke enye ekeme ndisuhore nto ke edisana ebekpo esie
Ndinyanga ukpong emi osongde-ibuot onyung okohore idem nte okim,
Ke enye ekeme ndiyak akwa ima esie nno oruk owo nte ami.4
Akwa ye ediwak mbufiok nkpo kabangade Uwa-usio-isop Jesus Christ ada ke ima eke Abasi enyenede ono nnyin kiet kiet. Emi osongo edimen nwut esie nte ke “ekom urua ukpong”—eke kpukpru owo—“okpon ke iso Abasi” (Doctrine and Covenants 18:10 Ke Bible Jesus Christ anam anwanga emi ke ndaha eke ima eke Ete eke Heaven nnyin: “Koro Abasi akamama ererimbot ntem, tutu Enye osio ikpog-ikpong Eyen emi Enye Obonde ono, man owo ekededi eke obuotde idem ye Enye okutak, edi enyene nsinsi uwem” (John 3:16). Ke obufa eriyarare, Andifak nnyin, Jesus Christ, odoho ete Enye “enehede ama ererimbot ntem tutu enye ayak uwem esie ono, man nte ediwak oro edibotde idem ekeme ndidi ndito Abasi” (Doctrine and Covenants 34:3
Odu nkpo mkpa idem, nko, ke Nwed Mormon, Ediomi Christ Efen,” etre ye mme ukpep ndidi “edisana” nyung “nsana ke Christ” nnyin ana nte “ima Abasi ke ofuri ukeme [nnyin], ekikere ye ukeme”? (Moroni 10:32–33). Uduak Esie emenere ye ima ana nte ebo ye ima.
III.
Nso efen ke Andinyanga, Jesus Christ, anam ono Nnyin? Otode ke mme ukpe eke mme prophet Esie nko otode ke utom Esie ke isong, Jesus ama ekpep nnyin uduak eriyanga ukpong. Uduak emi esine Obot, ntak uwem, ntak ndinyene ubine, ye eno edimek ke idem. Enye nko ama ekpep nnyin mme mbet ye ediomi anade nte nnyin ikpono nye ndutim anade nte inyene edimende nnyin ifiak isok ete ye eka nnyin eke heaven.
Ke Bible nnyin imokot mme ukpep nkpo Esie, “Ami ndi unwana ererimbot: owo eke etienede Mi idisangake ke ekim, edi eyenyene unwana uwem” (John 8:12). Nko ke obufa eriyarare, nnyin imokot, “Sese, Ami ndi Jesus Christ, … unwana emi ekim mikemeke ndifuk” (Doctrine and Covenants 14:9 Edieke nnyin iditienede mme ukpep Esie, Enye eyenam usung nnyin ayama ke uwem emi onyung osongo ebiet emi idikade efen.
Koro Enye amade nnyin, Enye odoho nnyin ete iwuk-enyin ise Enye utu ke mme nkpo uwem emi. Akwa ukpepnkpo Esie eke uyio uwem, Jesus ekpep ete ke nnyin isine kotu mbon oro eyomde nkpo isong emi—nkpo emi anamde uwem aka iso ke isong edi ibɔkke ke nkpo emi adade aka nsinsi uwem.5 Nte Jesus okotde nnyin inikiet efen ete, “Etiene Mi.”6
IV.
Ke akpatre, Nwed Mormon ekpep ete nte ubak Erisio isop, Jesus Christ “ama [okop] ubiak ye ndutuho ye idomo kuto-kuto; emi man iko okposu emi odohode ke enye eyemen ono idem esie mme ubiak ye mme udongo kpukpru owo” (Alma 7:11
Ntak emi Andinyanga nnyin okobode ndutuho uwem “ke kpukpru ndaha-a”? Alma anam anwanga ete, “Ndien enye eyemen ono idem esie ndutugho mmo, man esit esie oyoho ye mbom, nte edide ke obukidem, man enye okpofiok nte edide ke obukidem adanga nte okpo node udia [emi oworode ndino edifere ye unwam] ye mbon esie nte ukutmmo edide” (Alma 7:12).
Andinyanga nnyin okop onyung ofiok mme idomo nnyin, enwana nnyin, ubiak-esit nnyin, ye mme ndutuho nnyin, koro Enye ama enyime ɔyɔ mmɔ kpukpru nte kiet ke otu Erisio-isop Esie. Mme nwedabasi efen esongo emi. Obufa Ediomi anam anwanga ete, “Koro enye ke idem esie ama obo ndutuho ke idak idomo, enye ekeme ndino mbon oro edomode unwam” (Hebrews 2:18). Isaiah ekpep ete, “Ekukop ndik; koro Ami ndodu ye afo: … Ami nyesongo fi idem; nko, Ami nyewam fi” (Isaiah 41:10 Kpukpru emi ekopde ndutugho uwem emi ana eti ete ke Andinyanga nnyin ama okop oruk ubiak oro nko, nko otode ke Uwa erisio isop Esie, Enye ono nnyin kiet kiet ukeme ndiyo enye.
Prophet Joseph Smith ewet ofuri emi ke iko mbuotidem nnyin oyoho ita: “Nnyin inim ite oto ke Erisio-isop Christ, kpukpru ubonowo ekeme ndibo erinyanga, ke ndinsuhore idem nno mme ibet ye ndutim iko Abasi.”
Eyeneka-nqan oro okobup ete, “Nso ke Jesus Christ akanam ono mi?” Ke esit uduak Ete nnyin eke Heaven, Enye “okobot enyong ye isong” (Doctrine and Covenants 14:9) man nnyin kiet-kiet ikeme ndinyene mbufiok edide akpan ke ndiyom edisana ebiet idung nnyin. Nte kiet kotu uduak Ete, Eriset Jesus Christ akan mkpa ke ndino nnyin kiet-kiet ikpokidem eke midikpaha. Uwa usio-isop Jesus Christ ono nnyin kiet-kiet unen ndikabare esit ke idioknkpo nyung mfiak nyong edisana ebiet idung nnyin ke heaven. Mbet ye ediomi Esie owut nnyin usung, ndien itie oku Esie ono nnyin unen ndinam mme ndutim emi edide akpan ndisim ebiet idung nnyin. Ndien Andinyanga nnyin kunyime ama okop kpukpru ubiak ye mfina emi Enye ekeduakde ndifiok adanga nte edisongode nnyin idem ke ndutugho.
Jesus Christ akanam kpukpru emi koro Enye ama kpukpru ndito Abasi. Ima edi edimenere ono kpukpru, ndien ekedi ntre tongode ke editongo. Abasi ama odoho nnyin ke eriyarare ete “enye okobot … eren ye nwan, ke mbiet idem esie … ; onyung ono mmo mme ewuho ete mmo ema enyung enam nkpo eno enye” (Doctrine ye Covenants 20:18–19).
Ami ntie ntie nse kpukpru emi nyung mbong akam nte kpukpru nnyin ikeme nditi se Andinyanga nnyin akanamde ono nnyin kiet-kiet nko ke kpukpru nnyin ana ima inyung inam nkpo ino Enye, ke enying Jesus Christ, amen.