Ini Nnyin Edi Emi!
Abasi okono nnyin idi mi, idahaemi, ke akpan ini emi ke mbuk ererimbot.
Ke isua 1978, ami nkeda ke akwa anwa-mbre ball ye mme ese-mbre Tosin Ata-ye-ition ke esit. Ekedade ke iso mi ekedi ediwak okop-idem mbon edituahade ye nnyin, eketiede nte edisibe mi ibot. Emi ekedi akpa ini nkebrede nte anditongo quarterback ke Natoinal Football League, ndien ikiyom ndibre mme ayara-anyanya ke Super Bowl. Nditing akpaniko, ami mma nkere mme mmofon nkem ndidu ke anwa-mbre oro. Mma ntim nda nditop akpa ball mi, ndien mma nkayak ball, ema etɔ mi ke ata okposong ndahaemi akananam owo itɔhɔ mi akpa. Do ndien, nte nnade ke idak mme okop-odudu mbon mbre oro, mma nkere mme nso ke ami nkanam do. Mma nnyene uduak ndinam. Ndi ami nyeyak eyighe mi akan mi, mme nte ami nyeda uko ye osongo ndidaha-nda ndien man ika iso?
Associated Press
Ami nkodiongoke ke ini oro, nte nkpontibe oro eketim mi idem ono ukeme ke ini iso. Akana ami mkpeb nte esongde ubok enyung enyenede uko ke ini ndude ke mfina.
Mbre ball inehekede ikpon nte mme mfina afo edikutde. Ke ediwak ini, akwa anwa-mbre oyohode ye mme owo edade ese ididuhe. Edi osongo ubiere mbufo eyenyene nsinsi ufon.
Ekeme ndidi nnyin idikemeke ndiyo mfina oro ke kpukpru ini. Edi Ete nnyin ke Heaven okut nnyin nte mbon-uko emi ebopde obio ubong Esie. Oro edi ntak Enye okonode mbufo edi mi ke uto ini emi ke mbuk ererimbot. Ini nnyin edi emi!
Kpang utong kop se President Russell M. Nelson eketingde ekpri ini enye ama ekedi President ke ufok-Abasi: “Andinyanga ye Andifak nnyin, Jesus Christ, edinam ndusuk mkpon-nkan utom Esie ke ufot ini emi ye ini Enye edifiakde idi. Nnyin iyekut mme utibe-nkpo ediwutde ke Abasi Ete ye Eyen Esie, Jesus Christ, eda ibuot ke Ufok Abasi emi ke ubong ye odudu” (“Revelation for the Church, Revelation for Our Lives,” Liahona, May 2018, 96).
Ndi edi ata akamba utom? Ndi edi utibe nkpo? Mme oro etie didie? Nso ke nnyin idinam, idinyung inam didie idiongo se ikpanamde? Ami ndiongoke kpukpru iboro, edi modiongo ke Abasi oyom nnyin ibenge idem! Enehede oyom ikama odudu itie-oku ke usung odotde.
Ndi imenim prophet Abasi ke akpaniko? Ndi nnyin imokut inyung inam akpatre akanga nnyin? Ihn, nnyin imekeme, ndien ihn, ana inam, koro ini nnyin edi emi!
Ke ini ikopde mbuk abangade ikpo ndito Abasi emi ekebemde nnyin iso edu—nte Moses, Mary, Moroni, Alma, Esther, Joseph, ye ekese eken—etie nte mmo ekponi ekan uwem. Edi mmo ikinehekede ikpuhode ye nnyin. Mmo ekedi mme owo emi ekekutde ukut. Mmo ekebere-edem ke Abasi. Mmo ema emek eti udeme ke ini ekeyomde. Ndien, ye mbuotidem ke Jesus Christ, mmo ema enam utom ekeyomde ke ini mmo.
Goodsalt
Emeti owo-uko oro, Joshua, ke Akani Ediomi. Enye ekedi eti mbet Moses, kiet ke otu mme akakan ada-usung ke mbuk. Ke ini Moses ama okokpong, ekedi ini Joshua. Enye akana nte ada ndito Israel oduk obio enwongo. Didie ke enye akanam oro? Joshua akamana onyung okori ke ufin ke obio Egypt. Enye ikenyeneke nwed-ukpeb-nkpo ye nwed ndise ndinwam enye. Enye ikenyeneke nkpo nte smartphone! Edi enye ama enyene enwongo emi oto Abasi:
“Kpa nte nkodude ye Moses, ntre ke ndidu ye afo: ndiyakke fi nduok, ndinyung mkpongke fi.
“Song ubok nyung song esit” (Joshua 1:5–6).
Ini nkedide obufa owo ke Seventy, mma mbo mbuat ikoot nto Ufok-utom First Presidency, ekebipde mme ami nyeda ke ibot prophet eda ekese akparawa kiet okodude ke ufok-ibok—ke usop. Akparawa emi ekekere Zach. Enye ekebenge idem ndidi missionary edi ama edinyene unommo ye akamba unan ke ibot.
Nte nkawatde nka ufokbok, ekikere mi ama oyo. Ndidi isung-utom nno prophet—ndi enam mbre? Nso nkpo ke ndikinam? Didie ke ndinwam akparawa emi? Ndi mmenyene mbuotidem emi ekemde? OKposong akam ye ifiok nte ke mmenyene unen eke edisana itie-oku ama edi ododu mi.
Ini nkesimde, Zach akana ke mkpo-nna ufok-ibok. Andikpeme kiet ama ada ke mbengidem ndiwat enye nka ubet usiak-idem man mme mbia-ibok ekpenam ubiak osuhode ke mfiri esie. Mma nse eka esie nte atuade ye ekpri ufan esie, ndik ofukde, edade ekpere, nnyung ndiongo ini kiet ke Zach oyom edidiong otode odudu itie-oku. Mma nkot ufan esie emi mibihike okobo unen Itie-Oku Melchizedek, edinwam mi. Mma nkop odudu itie-oku adangante ikonode Zach edidiong ke nsuhore idem. Ema esop eda enye edaha man ekesiak idem, ndien emem nkokopde ama osongo nte ke Andinyanga eyenam nkpo etiene ifiok Esie.
Mbia-ibok ema enam akpatre usio-idem mbemiso etongo ndisiak. Ke mkpaidem, mmo ema ekut ke mmo idiyomke usiak idem aba.
Ema ekeno ediwak usobo, Zach ama ekpep ndisanga nyung nting iko. Enye ama aka mission onyong, ndien idahaemi enye kobop ediye ekpuk.
Nte ededi, se ikopde oro isitibe kpukpru ini. Mmono mme edidiong itie-oku efen ye ukem mbuotidem oro, ndien uduak Abasi ikinoho oyoho ukɔk ke uwem emi. Ana nnyin inyene mbuotidem ke uduak Esie inyung iyak iboro ino Enye. Nnyin ikemeke ndimek iboro utom nnyin kpukpru ini, edi ndimek ndibenge idem man inam nkpo.
Ekeme ndidi First Presidency idikotke fi edida ono mmo ke ndaha eke enyene ndik nkpo-ntiibe. Edi ekot nnyin ete idinam okpuhode-uwem nkpo nte mme isungutom Abasi. Enye idifreke nnyin. Ini nnyin edi emi!
Peter, obong kotu mme Apostle Andinyanga okodu ke esit ubom ke akpa-inyang kini enye okutde nte Jesus asangade ke enyong ikpa-mmong. Enye onyung oyom nditiene Enye, ndien Andinyanga odoho, “Di.” Ke uko ye mkpaidem, Peter ama okpong ifre esit ubom onyung otongo ndisanga mbine Andinyanga. Edi ke ini Peter esede ofum, mbuotidem esie ama oduo. “Enye ama okop ndik, ndien ke ini otongode ndideng, enye ama ofiori, ette, Obong, nyanga mi. Ndien idahaoro Jesus anyanade ubok, omum enye.” (Se Matthew 14:22-33.)
Ke ini ofum ofumede ke uwem nnyin, nnyin ikpese mmong? Ti, ke akpan usung kiet odu ndino odudu ye uko kpukpru ini. Ubok Jesus atara esimme nnyin, kpasuk nte akatarade esime Peter. Nte nnyin iyomde Enye, enye eyenyanga nnyin ke ima. Nyin idi Esiemmong. Enye ette, “Kufehe: Koro Ami mfakde fi, nkosio fi enying; afo edi okim” (Isaiah 43:1). Enye eyekara ke uwem fo edieke ayakde Enye. Mbumek edi okwo. (See Russell M. Nelson, “Let God Prevail; Liahona, Nov. 2020, 92–95.)
Ke utit uwem esie, Joshua ebenge ikot esieete, “Emek ke idem mbufo ndien enyeke mbufo edinamde nkpo esie; … edi amadi ami ye ufok mi, nnyin iyenam nkpo Jehovah” (Joshua 24:15). Ke ntak udeme enye ekemekde ndinam nkpo Jehovah, Joshua ekedi akwa ada-usung ke ini esie. Ndima ufan mi, ini nnyin edi emi! Ndien mbumek emi nnyin inamde eyewut akpatre akanga nnyin (se Thomas S. Monson, “Decisions Determine Destiny” [Brigham Young University fireside, Nov. 6, 2005], speeches.byu.edu).
Ke ini nkedide bishop, ima inyene iko-nda-usung ke ward nnyin: Nti udeme ono inemesit—ke nsinsi. Mkpri owo ema esanga ebe mi ke esit ufok, eyedoho, “Bishop, ami ke mmek nti mbumek!” Oro edi se bishop okoyomde!
Nso ke “nti mbumek” oworo? Owo ama ebip Jesus, ette, “Ewe edi akamba item ke mbet?” “Ndien enye oboro ete:
“Ma Jehovah Abasi fo ke ofuri esit fo, ye ke ofuri ukpong fo, ye ke ofuri ekikere fo.
“Emi edi ebe-iso ye akamba item.
“Udiana onyung ebiet enye, ete, Ma mbohoidung fo nte idem fo” (Matthew 22:36–39).
Ndiongoke mbanga fi, edi nte nkotde mme akamba item iba emi, mokut anam ita, nte ibet nko: ndima idem fo.
Nte mbufo akananam emekere ebanga ndima idem mbufo nte ibet? Ndi nnyin imekeme ndima Abasi ke akpaniko inyung ima ndito Esie edieke nnyin mimaha idem nnyin?
Eti ada-usung kiet ekekpep erenowo kiet akanwanade ndikan anyan isua ndioi udeme. Erenowo oro ama okop buut, ifiokke mme owo ekeme ndima enye.
Adausung esie odoho enye ete, “Jehovah odiongo fi, ama fi, onyung enemesit [ye] afo ye nti nkpo afo anamde.” Onyung adian do ette, “Ana [Afo] okop item ndima idem fo man afo okpokop ima [Abasi] onyung ama mbon efen.”
Ini emi eyeneka-eren emi okopde item emi, enye edikut uwem ke obufa ndaha. Ekekem enye ama odoho, “Mmabiat ofuri uwem mi ke ndiyom emem ye ukpono. Nkoyom mme nkpo oro ke ediwak ukwang ebiet. Edi ke ima Ete Heaven ye Andinyanga kpot ke ami ndikut mfon. Modiongo ke Mmo eyom mi mma idem mi, enye edi nkukure usung ndikopde ima Mmo nnoidem mi.”
Ete nnyin ke Heaven oyom nnyin ima idem nnyin— idihe ndikabare ntangidem mme ndima-idem, edi man ikpokut idem nnyin nte Enye okutde nnyin: nnyin idi ndima ndito Esie. Adangante akpaniko emi osuhode oduk esit nnyin, ima emi inyenede ino Abasi eyekori. Kini nnyin ikutde idem nnyin ke ata ukpono, esit nnyin oyom ndinam nkpo ye mbon efen ntre nko. Adangante nnyin ifiokde ata idaha nnyin, nnyin iyetim ifiok ata akpaniko emi: ke Abasi okono nnyin idi mi, idahaemi, ke utibe ini emi ke mbuk, man nnyin ida ikike ye eno nnyin inyeneke inam ata akamba ufon emi odotde. Ini nnyin edi emi! Russell M. Nelson,“Becoming True Millennials” [worldwide devotional for young adults, Jan. 10, 2016], broadcast.lds.org.
Joseph Smith ama ekpeb ete ke kpukpru prophet ke ofuri emana “ema adara ebet usen emi nnyin idungde mi; … mmo ema ekwo enyung ewet enyung edaba ebanga eyo nnyin emi; … nnyin idi ndima owo emi Abasi [ama ekmek] ndino mfon ukperedem-usen emi” (Teachings of Presidents of the Church: Joseph Smith [2007], 186).
Adangante eyode ukut uwem, eti enwongo emi Elder Jeffrey R. Holland okonode: “Emebiom ediwak mbiomo, edi eyebo ediye ye eti utip. … Ema ebemiso eno edikan ke akpatre enwan emi. Edikan mmodo edu ke nwed editi … , nwed Abasi!” (“Ekukop Ndik, Edi Ebuotidem” [address to Church Educational System religious educators, Feb. 6, 2015], broadcasts.ChurchofJesusChrist.org).
Ke ediye utit-udua Easter emi, yak ami nno ikoot kiet nte yak ofuri nnyin ibong-akam man ifiok inyung inam ubiong nnyin kiet-kiet ke nte nnyin ibengeke-idem ino ediye usen kini Andinyanga edifiakde idi. Jehovah ama nnyin akan se nnyin ikemede ndifiok, ndien Enye eyeboro akam nnyin! Mme nnyin idu ke anwa mbre-ball, ke ubet ufok-ibok, mme ke ebiet ekededi, nnyin imekeme ndidi akpan ubak utom ke ediye utibe-nkpo emi—koro ini nnyin edi emi. Ke enying Jesus Chrst, amen.