Udi Inyeneke Erikan
Ami mmetie ntiense nte otode ke edifak eke Erisio-isop ye oyoho-ubong Eriset eke Jesus Christ, mbungo-esit ekeme ndibɔ edikɔk, ubiak ekeme ndidi emem, mfina ekeme ndidi idorenyin.
Ke utibe Easter Sunday emi, mme ndito nnyin ekwo ke idara, “Ke edikwe ini ukwo, Jesus Christ ama edemere onyung okpon udi emi ekenimde enye; okpono mkpa ke enye okobung.”1
Nnyin imenem esit ke ndinyene ifiok kabanga eriset ke mkpa Jesus Christ. Ndien ke ndusuk ndaha ke uwem nnyin, nnyin imisikop mbungo-esit ke ini inanade owo emi nnyin inehede ima. Otode ke udongo ofuri ererimbot emi osuk akade iso, ediwak nnyin iminana mbon ima nnyin—mme nte mbon ufokemana ye mme ufan.2 Nnyin imenehede ibong-akam ino mbon oro edude ke oruk ntuanga oro.
President Russell M. Nelson ama ekepeb ete:
“Ke misehe isua emana, nnyin iuho ibanga mbon imade inyung inanade. Mfuho edi kiet kotu ndiwut edisana ima. …
“Ke ndidian do, nnyin ikemeke ndinehede nwut ima edidiana kiet ke ntuanga edidiangade miduhe idahaemi. Nkukure usung ndimen mfuho mfep ke mkpa edi ndimen ima nsio ke uwem.”3
Nnyin imikeme ndikere adanga nte mme ufan Jesus, emi eketienede Enye enyung enam nkpo eno Enye,4 ndikere mbanga mkpa Esie.5 Nnyin imediongo ete ke “mmo ema efuho enyung etua.”6 Ke usen emi ekekongde enye, ke mifioke se iditibede ke Sunday, ekeme ndi-di mmo ema enehede eyoho ye mfina, ekerede adanga nte edisangade ke Obong miduhe. Ke misehe, mmo ekaiso ndinam nkpo nno Enye tutu ke mkpa.
Joseph owo Arimathea ekebenge Pilate ayak ikpokidem Jesus ono imo. Enye emen idem osuhore, awang enye ke ediye linen, enim enye ke obufa udi esie, onyung ewere akwa itiat enim ke inua usung udi.7
Nicodemus emen myrrh ye aloes edi. Enye anwam Joseph ndimen ikpokidem onyung awang enye ke linen ye mme enem-utebe aran.8
Mary Magdalene ye mme iban efen etiene Joseph ye Nicodemus, ese ebiet emi mmo enimde ikpok idem Jesus, enyung ebenge mme enem-tube aran ndiduok enye.9 Nte mbet usen oro ekedide, mmo ebet ndibenge nyung ndiong idem koro Saturday ekedide Sabbath.10 Ndien, ke ata usen ubok Sunday, mmo eka ke udi. Ke mmo ema ekefiok ke ikpokidem Andinyanga iduhe do, mmo eka ndidoho mme mbet, emi ekedide mme Apostle Jesus. Mme Apostle etiene mmo eka ebiet udi nko ekut ke enye edi ukpok. Kpukpru suk Mary Magdalene ekedaha, ye ekikere me nsitibe ino ikpok idem Andinyanga.11
Mary Magdalene odu do ke udi ke idem esie. Mkpasip usen iba mbemiso, enye ekekut idiok mkpa eke ufan esie ye Andikpeb. Idahaemi udi esie ekedi ukpok, ndien enye ifioke ebiet emi Enye odude. Ama okpon akan se enye ekemede ndikama, ndien enye odu ke ntuanga. Ke ini oro, Andinyanga emi ekesetde osobo ye enye onyung obup enye ntak emi enye odude ke ntuanga nko emi enye okoyomde. Ndikere ke ekedi ese inwang eketing iko ye enye, enye obup mme, enye ama emen ikpok idem Obong esie, ndibup enye ebiet emi enye odude man enye ekeme ndikut enye.12
Ami nkut nte ke Obong ekpeke ekeme ndiyak Mary Magdalene ndifuho nyung nting esit esie ye ubiak.13 Ndien Enye okot enye ke enying, nko enye owongode ese Enye onyung ofiok Enye. Enye okut Christ emi ekesetde onyung edi ntiense ono utibe Eriset ke mkpa Esie.14
Nte afo, ke ndusuk usung ami mmekeme ndibuana ubiak emi Mary Magdalene ekekopde ye mme ufan esie nte mmo ekefuhode ebanga mkpa Obong mmo. Kini nkedide eyen isua usukkiet, mma nnana nkpon nkan eyen-eka eren mi ke akwa unyek isong. Koro nkpo oro eketibe ke unana ifiok, ama adat mi ini ndifiok ata-nkpo se iketibe. Esit ama obungo mi ye mfuho, ndien mma mbup idem mi, “nso iketibe ino eyeneka eren mi? Enye odu ke mmong? Ebiet ewe ke enye aka? Mme ami nyefiak nkut enye inikiet efen?”
Kini oro, ami nkefioke uduak erinyanga-ukpong ekeAbasi, ndien ami mma nnyene udong ndifiok ebiet emi nnyin iketode idi, ye se ufon uwem edide, ye se iditibe ino nnyin ikpade. Nte nnyin isinyeneke ukem ekikere oro kini inanade mbon ima nnyin mme kini ikutde ndutuho ke uwem emi.
Esesit isua ekebe, ami ntongo ndikere mbanga eyeneka mi ke asanga-sanga usung. Nkeme ndikere nte enye okongde enyin-usung nnyin. Ami nyeberede usung, enye ke ada do, ndien enye eyedoho mi ete, “Ami mkpaha. Ami ke ndu ke uwem. Ami nkemeke ndidi mbine fi, edi idahaemi ami nyedu ye afo nko ndikpongke aba.” Ekikere oro, etiede nte ndap, anwam mi ndiyo ye ubiak emi nkekopde ke ndinana enye. Ekikere ke enye eyedu ye ami edi ke ibuot mi kini kini. Ndusuk iniami nyese ke ienyin-usung, ye ekikere ke enye eyekong ndien ami nyekut enye inikiet efen.
Ke isua Aba ebede, kini Easter, ami nkekere mbanga Eriset eke Jesus Christ ndien ntongo ndikere mbanga eyeneka eren mi. Ke ini oro, nkpo oduk ke ekikere mi. Ami nti nte nkutde enye nte edisede mi.
Ke usen oro ami mfiok ke Spirit ama ono mi ndongesit ke okposong ini. Ami mma mbo ntiense ke eyeneka mi eren ikpaha; enye odu ke uwem. Enye ke aka iso ke nsinsi uwem esie. Mmefiok idahaemi ke eyeneka “[mi] eren eyeset inikiet efen”16 ke eti ini oro, kie ntak Eriset ke Jesus Christ, kpukpru nnyin iyeset ke mkpa. Ke ndidian do, Enye anam emem ono kpukpru nnyin ndidiana kiet nte ufok emana nyung nyene nsi nsi inem esit ke iso Abasi edieke nnyin imekde inyung inim ndisana ediomi ye Enye.
President Nelson ekepeb ete:
“Mkpa edi akpan nkpo ke nsi nsi uwem nnyin. Iduhe owo emi ofiokde ini enye edidide, edi oro akpan ke akwa uduak inem esit eke Abasi. Ekom enyene Erisio-isop Obong, ke emi eriset ke mkpa edi akpaniko nko nsinsi uwem edi mmem-mmem ono ofuri ubonowo. …
“… Eke mbon ima emi ekpongde ke edem … mbuotidem ke Christ osusuk ifɔt mkpa ɔbɔ, eti uyama eke idorenyin, ima Abasi ye eke kpukpru owo, ye ntotungo udong ndinam nkpo nno mmo. Mbuotidem oro, idorenyin oro, ima oro eyenam nnyin idot ndika ke iso Abasi ndien, ye nsinsi owo nsanga ye mme ufokemana nnyin, idung ye Enye ke nsinsi.”16
“Edieke Christ mikisetke ke mkpa, inyung ibungke okpono mkpa ke udi ikpinyeneke erikan, ndien mkpa ikpinyeneke nditop, eriset ke mkpa ikpiduhe.
“Edi eriset ke mkpa odu, mmodo udi inyeneke erikan, Christ ama emen ifɔt mkpa efep.
“Enye edi unwana ye uwem ererimbot; sese, unwana emi minyeneke utit, midikemeke ndidu ke ekim;, ses, nko uwem emi minyeneke utit, ke mkpa ididuhe aba.”17
Jesus Christ ke Idem-,esie okodoho ete, “Ami ndi eriset ye uwem: owo eke obuotde idem ye ami, okposuk edi nte enye ama akpa, enye eyedu uwem” .”18
Ami mmetie ntiense nte otode ke edifak eke Erisio-isop ye oyoho-ubong Eriset eke Jesus Christ, mbungo-esit ekeme edibɔ edikɔk, ubiak ekeme ndikabare emem, unana-idorenyin ekeme ndikabare idorenyin. Enye ekeme ndifat nnyin ke ubɔk-mbɔm Esie, odongde esit, onode uko, ye ndikɔk nnyin. Ke enying Jesus Chrst, amen.