Andinyanga eke Idem Nnyin
Otode ke uwa ufak Esie, Andinyanga enyene odudu ndiyet, nkok, nyung nsongo nnyin owo ke owo idem.
Ami mmenem esit ndidu ye mbufo ke ediye usenubok ini Easter emi. Ini eke ami nkereke mbanga ini Easter, ami mma-ma ndifiak-nkrre ke esit mi mme iko emi mme angel eketingde eno mbonowo emi ekedude ke Udi Inwang ete: “Nsinam mbufo eyomde Enye emi odude uwem ke otu mme akpa-mkpa? Enye iduhe mi, Enye emeset.”1 Ami mmetie-ntiense ke Jesus eyen Nazareth ama eset ndien Enye odu uwem.
Mbufo Ekere Nso ebanga Christ?
Isua Edip-ye-duopenang emi ekebede, ami ye nsanga ukworo-iko mi ima iso-bo inyung ikpeb ata enyene-ikikke erenowo kiet emi ekedide ewet-nkpo ke nwed mbuk nkpo-ntibe eke isong-obio ke Davao City, Philippines. Nnyin ima idara ndikpeb enye koro enye ama enyene ediwak mbume onyung okpono se nnyin inimde-ke-akpaniko. Ata akpan mbume emi enye okobupde emi nnyin inehede iti ekedi “Mbufo ekere nso ebanga Christ?”2 Nnyin nte ededi ikop inem ndibuana ekikere nnyin inyung iting iko-ntiense ibanga Jesus Christ. Ekem enye edisio nwed kiet ewetde ebanga ukem ibuot-iko oro odongode mme inem iko ye udim-iko abangade Andinyanga. Ami mmeti nte nkopde-inemesit edi ntimke nkohore-idem. Nwed oro ama enyene eti etop edi ekedi ukpok onyung anana odudu spirit.
Ndikori Ndi man Ndiongo Enye
“Mbufo Ekere Nso ebanga Christ?” Ami mmedifiok nte ke adanga ami nehede ndiongo Andinyanga eyenehede osongo nte ami nkopde uyo Esie ukem nko nte ami nnode iboro. Esisit mme isua emi ekebede, Elder David A. Bednar okobup mme mbume emi nte ubak etop esie ete: Nte nnyin idiongo ibanga Andinyanga kpot, mme nnyin ikori idi man idiongo Enye? Didie ke nnyin idi man ididiongo Jehovah?”3
Nte ami nkotde nyung nkerede, ami ndinehede mfiok nte ke se ami ndiongo mbanga Andinynaga enehede okpon akan danga ami nehede ndiongo Enye. Ami mbiere ndien ndisin-ifik okposong man ndiongo Enye. Ami menehede nnem-esit nno nwed Abasi ye iko ntiense eke nti irenowo ye iban emi edide mbet Jesus Christ. Isang mi ke mme esisit isua ekebede ama ada mi aka ediwak usung edikot nyung mfiok. Ami mbong-akam yak Edisana Spirit mfin emi edi-da etop emi okponde akan mme mkpri iko eke ami nwetde osok mbufo.
Akpa, ana nnyin ifiok ke ndidiongo Andinyanga edi ata akpan nkpo se ikpoyom ke uwem nnyin. Oro akpana edi akpa-nkpo akan nkpo efen ekededi.
“Ndien nsinsi uwem oro edi ndifiok Fi, ata Abasi kierakiet, ye Eyen emi Afo okodongde, kpa Jesus Christ.”4
Jesus oboro enye ete, Ami ndi usung ye akpaniko ye uwem: owo baba kiet itieneke Ete, Ibohoke ebe ke ami.”5
“Ami ndi unwana ererimbot; owo eke etienede Mi idisangake ke ekim, edi eyenyene unwana uwem.”6
Udiana, nte nnyin ikoride idi man idiongo Andinyanga, mme ufang nwed Abasi ye iko eke mme prophet akabare oworo akpan-nkpo ono nnyin ekesim mmo ndikabare ndi iko idem nnyin. Idihe ibanga mbukpebe iko, ekikere, ye ifiok-ukpeb eke mbon efen nte ke ndidi-diongo nno idem nnyin, ke asanga-sanga usung nnyin, oto ke ndidomo iko nse7 nyung mbo ntiense eketode Edisana Spirit. Nte prophet Alma eketingde ete:
“Ndi mbufo ikere ite ke ami mefiɔk mme ŋkpɔ emi ke idem mi? Sese, ami ntie ntiense nnɔ mbufo nte ke ami mefiɔk ke mme ŋkpɔ emi emi ami ntiŋde edi akpanikɔ. Ndien didie ke mbufo ekere ke ami mefiɔk mbaŋa akpanikɔ mmɔ?
“Sese, ami ndɔhɔ mbufo ke edi Edisana Spirit Abasi anam mi mfiɔk mmɔ. Sese, ami metre udia nyuŋ mbɔŋ akam ke ediwak usen man ami mfiɔk mme ŋkpɔ emi ke idem mi. Ndien idahaemi ami mefiɔk ke idem mi nte ke mmɔ edi akpanikɔ; koro Jehovah Abasi ama ayarare mmɔ ɔnɔ mi ke Edisana Spirit; ndien emi edi spirit eriyarare emi odude ke ami.”8
Oyoho Ita, nkori edifiok ete ke Erisio-isop Jesus Christ abanga idem nnyin ye owo kiet-kiet eyenwam nnyin ndidiongo mbanga Enye. Ediwak-ini emem ono nnyin ndikere ye nditing mbanga Eriso-isop Christ ke ofuri ndaha akan ndifiok ufon esie ke uwem nnyin. Erisio-isop Jesus Christ edi nsinsi inyeneke adanga ndien ofuk ofuri ukpa ye utungo edi oyoho idem nnyin ye owo kiet-kiet ke utom esie. Otode ke uwa ufak Esie, Andinyanga enyene odudu ndiyet, nkok, nyung nsongo nnyin owo ke owo idem.
Nkokure udong Andinyanga, nkokure udak Esie tongo ke akpa ntongo, ekedi ndinam uduak Ete. Uduak Ete okodu ono Enye man anwam ke [ndida] uwem unana-mkpa ye nsinsi uwem nsok owo”9 ke ndikabare ndi “ekpe-emem ke ufot nnyin ye Ete.”10 Ke ntre, “okposuk edi nte Enye edide Eyen, Enye ekpeb nsuk-ibuot ofiok oto ndutuho eke Enye okutde; ndien ke ema ekenam Enye ofon ama, Enye akabare edi ntak nsinsi erinyanga ono kpukpru owo emi ekopde uyo Esie.”11
Ndien enye eyeka, eyeyɔ mme ubiak ye mme ukut ye mme idomo ke utɔ ke utɔ. …
“Ndien enye eyeda mkpa ɔnɔ idem esie, man enye atat mme uruk mkpa … ndien enye eyeda ɔnɔ idem esie mme mmemidem mmɔ, man esit esie ɔyɔhɔ ye mbɔm, … man enye ɔfiɔk ke obukidem nte aŋwamde ikɔt esie nte asaŋade ye mme mmemidem mmɔ.
“… Eyen Abasi ɔbɔ ndutuhɔ ke obukidem man enye ada mme idiɔk ŋkpɔ ikɔt esie ɔnɔ idem esie, man enye ɔsɔhi mme ndudue mmɔ osio nte asaŋade ye odudu ubɔhɔ esie.”12
Ami mkpema ndibuana mmem-mmem ifiok-ukpeb kiet emi owutde utom emi nnyin ke usukini inade nte inam ke ata uduot-obot eke Erisio-isop Obong.
Ediwak isua emi ekebede, ke ndinam ikoot adausung mi, ami mekot Nwed Mormon ofuri-ofuri nyung ndebi mme ufang emi etingde abanga Erisio-isop Obong. Adauusung mi nko ama okot mi ete nwet ibio-ibio ke ikpa-nwed kiet kabanga se ami mkpebde. Ami ndoho idem mi nte, “Ikpa-nwed kiet? Ke akpaniko, oro emem.” Ke mkpaidem mi, nte ededi, ami ndikut ke ubiong oro enehede osong, ndien ami mma nduo.
Ami ndifiok tongo do ke ami nkeduo koro ami mma nkesehe nde ndien nkenyene ukwang ekikere. Akpa, ami nkoyom ibio-ibio iboro eke edisinde odudu ino ofuri owo. Ibio-ibio iboro akana ono mi inyung idige ino owo efen ekededi. Akana ono ndimum ekikere ye ntuuk mi kabanga Andinyanga ye se Enye akanamde ono mi mbak ofuri ini eke ami nkotde enye, iboro oro eyeda nti, akpan, ye spirit ifiok-ukpeb eke idem mi owut anwa-anwa.
Udiana, ami nkoyom ibio-ibio iboro edi akamba onyung awak ndien esine mme ikpo iko ye udim-iko. Akananam oro ikedige ibanga ikpo iko. Oro akabanga ndi-di inwang-inwang ye ndimem ubiere eke edifiok akpaniko. “Koro ukpɔŋ enemde esit ke ndinam edi iŋwaŋ-iŋwaŋ; koro ke ntem ke Jehovah Abasi anam utom ke ufɔt nditɔ owo. Koro Jehovah Abasi ɔnɔ ifiɔk uŋwana.”13
Oyoho Ita, ami nkoyom iboro oro asana-mma, akpatre ono utit ofuri iboro—akpatre iboro emi owo mikemeke inyung idianke nkpo do—utu ke utom ndikori eke ami nkemeke ndidian iko kiet mi mme udim-iko kiet do ke nte ifiok mi kabanga Erisio-isop Jesus Christ okoride.
Iko-ntiense ye Ikoot
Nte akparawa eren, ami mma mkpeb ediwak nkpo nto ke nnememi ye bishop mi. Ke mme mkpri isua oro, ami mma mkpeb ndima mme iko otode inem ikwo kiet:
Ami ndu ke oyoho mkpaidem ke ima emi Jesus onode mi,
Oyong mi ke oyoho mfon emi enye onode mi,
Ami nnyek ke ndidiongo ke ekekong enye ke cross ke ntak mi,
Ke ntak mi, anam-idiok kiet, ke enye okobo ufen, oduok-iyip onyung akpa.
Oh, edi inem-nkpo ke enye ekere-nkpo abanga mi
Ekesim ndikpa nno mi!
Oh, edi inem-nkpo, inem-nkpo ono mi!14
Prophet Moroni okokot nnyin ete: “Ndien idahaemi, ami nyedoho mbufo nte eyom Jesus emi mme prophet ye apostle ekewetde ebanga.”15
President Russell M. Nelson onwongo ete “edieke nnyin itongoke ndikpeb ofuri se [nnyin] ikeme ibanga Jesus Christ, … ukeme [nnyin] ndikpong idioknkpo eyekori. Udong [nnyin] ndinam mme mbet eyekpon.”16
Ke usen Ederi ini Easter emi, ukem nte Andinyanga ekesetke oworo ke udi itiat Esie,yak nnyin idemede ke mmemidem nnyin ndien isiaha ikan ekim eyihe, umum ndik, inaam eke nkohore-idem, ye ndobo eke uyuho-itie. Jesus Christ ye Ete Heaven edu uwem. Ami nno iko ntiense kabanga edisana ima emi Mmo enyenede eno nnyin. Ke enying Jesus Chrst, amen.