Abasi Amama Ndito Esie
Ami nyema ndibuana asanga-sanga usung ita emi Ete Heaven esiwutde ima Esie ono nnyin, ndito Esie.
Ndito-eka irenowo ye iban, ami mmedara ye mbufo ke iko Abasi Jesus Christ. Ami mmeda ima otode nti mbon Ufok Abasi ke Philippines nyung ndoho, ke ibuot mmo nte, Mabuhay!
Ke usenubok Easter emi, ami mmetie ntiense mbanga odu-uwem Christ, ke Enye ama eset ke mkpa ndien ke ima Esie ye nnyin ye eke Ete ke Heaven edi edisana ye nsinsi. Mfin emi, ami mmenyene udong nditing mbanga ima eke Ete Heaven ye Jesus Christ enyenede eno kpukpru owo,emi owutde-idem ke Erisio-isop eke Jesus Christ. “Koro Abasi akamama ererimbot ntem, tutu Enye osio ikpong-ikpong Eyen emi Enye obonde ono” (John 3:16).
Kini angel okobupde prophet Nephi se enye odiongo abanga Abasi, Nephi enehede oboro ete,“Ami mmediongo ke Enye ama ndito Esie” (se 1 Nephi 11:16–17).
Ufang kiet ke Nwed Mormon: Testament Jesus Christ Efen osongo emen edisana ima eke Andinyanga owut ete: “Ndien ererimbot, ke ntak ukwaŋ-ŋkpɔ mmɔ, eyebiere ikpe enɔ enye nte ŋkpɔ emi esinde; … mmɔ emia enye ke ikpa, … mmɔ emia enye,… mmɔ efiari enye etap, ndien enye ɔyɔ oro, ke ntak ima mbɔm esie ye anyan ime esie ke abaŋa nditɔ owo” (1 Nephi 19:9). Anana-adanga ima eke Andinyanga edi akpan-ntak ke kpukpru se Enye anamde. Nnyin imediongo ke ukem ima oro ke Ete ke Heaven enyene ono nnyin, koro Andinyanga otim ekpeb ke Enye ye Ete “edi kiet” (se John 10:30; 17:20–23).
Didie, ndien, ke nnyin ikpeyak inyung iwut ekom nnyin ino akwa ima Mmo. Andinyanga ekpeb nnyin ye ndimem, ofuri-ndaha ikoot emi ete:“Edieke amade Mi, nim mbet Mi” (John 14:15).
President Dallin H. Oaks ekpeb ete, “Ewut akwa ye edisana ima eke Abasi ke ofuri edidiong eke uduak iko Abasi Esie, esinede akpaniko ete ke enim ndimek edidiong Esie eno mbon emi enamde ewuho Esie.”1
Ami nyema ndibuana asanga-sanga usung ita emi Ete Heaven esiwutde ima Esie ono nnyin, ndito Esie.
Akpa, Ebuana ye Abasi ye Ufokemana Owut Ima Esie
Akpan ebuana nnyin edi ye Abasi ye Eyen Esie ye ufokemana nnyin koro ediyiri nnyin ye mmo edi nsinsi. Akwa uduak inemesit edi ata ediwut ima emi Abasi enyenede ono nnyin. Ye enyin ndiwuho ke uduak Abasi, nnyin inyime ndimek nkap isong ye itiat ke idem nnyin ekesongoke udong uma-idem inyung iyak adaha emi obopde nsinsi ebuana ada itie mmo. Ke ekikere kiet, ekeme ndikot emi “editibi ke nkpo Abasi.” Ke ndinam nkpo Abasi nnyin etibi, ana nnyin ibemiso iyom Abasi inyung ikoot Enye (se Jeremiah 29:12–13).
Ndiyom Enye nyung nkot Enye eyetongo usung onyung ono ufang ndibop nyung nsongo nsinsi ebuana nnyin. Oro eyetara enyin spirit nnyin onyung anwam nnyin ndise ukpuhode emi nnyin ikpenamde akan ndise ndik emi nnyin mikemeke ndikpan. Ndikpeb uwem ye utom Andinyanga nnyin, Jesus Christ, eyenam nnyin ise mme nkpo efen emi ye enyin nsinsi.
Mfep-enyin ke ubakini ekeme ndikpan nnyin ndifiok ima Abasi ke ebuana ye edinam eke ufokemana. Eka kiet, emi ekereke ke mme gadget ke ada itie mme ebuana ufokemana esie, ama ono iboro kiet. Ke okpokoro udia mbubreyo ye ke mbono ufokemana efen, enye ofiori ete, “eyak mme Phone enim; yak nnyin ida ini ise kiet eken ke iso.” Enye ete ke emi edi obufa mbet ke ufokemana esie ndien ke nkpo oro osongo ebuana mmimo nte ufokemana kini mmo esede kiet eke ke iso. Idahaemi mmo enehede eneme ebanga Di, Tiene Mi otokiet nte ufokemana.
Udiana, Enye Owut Ima Esie on Ndito Esie ke Ndikot mme Prophet
Idahaemi ererimbot oyoho ye “idiok iko ye afanikong ke ekikere” (Joseph Smith—History 1:10). Paul eti nnyin ete ke“ odu … ediwak oruk usem eti-eti ke ererimbot” (1 Corinthians 14:10). Ewe kotu ofuri uyio enehede anwanga onyung oworo-nkpo akan utok? Edi uyio mme prophet, asiak-uduak, ye andiyarare eke Abasi.
Ami menehede nti, ke nnamde usiak-idem nkure ke 2018 ye ke mfiakde nka utom, ami nkodu ke ebiet ubono moto ke headquaters Ufok Abasi. Ibighike, ami nkop uyio President Russell M. Nelson okotde, “Taniela, Taniela.” Ami mfehe nkesim enye, ndien enye obup nte idem mi etiede.
Ami ndoho nte, “President Nelson, ami mmekop nsongidem eti-eti.”
Enye ono mi item onyung afat mi. Ami mma nehede nkop utom-unwam eke prophet nno “owo kiet.”
President Nelson anam isang aka ediwak idut ke ererimbot. Ke ekikere mi, enye isinke unwam ino mme ediwak tosin, edi enye anwam tosin “mme owo.” Ke ndinam ntre,enye abuana ima emi Abasi enyenede ono ofuri ndoto Abasi.
Mmi-mmi emi, iko President Nelson edi ntak osongo ye ifiok ono mbon Philippines. Ukem ye ofuri idut ke ererimbot, ke 2020 Philippines ama enehede oduo oto udongo COVID-19 , diana ye obot-ikang-ndibomo, unyek-isong, okposong oyobio-mmong, ye nsobo edim-ukwo.
Edi, nte adaha unwana ayamade ke ekim ntukube eke ndik, ikpong, ye unana-idorenyin iko prophet edino emem. Mmɔ esine edinim utre-udia ye akam ke ererimbot ye item ke ndika-iso ke ufot udongo emi. Enye ɔdɔhɔ ete yak inam ufok nnyin edi ebiet mbuotidem. Enye okot mbon Latter-day Saint ke ofuri ebiet ete ekpono ofuri ndito Absi enyung eyak Abasi akara ke uwem mmo.2
Ukem oro ekedi ye mmi-mmi ndise-video eke iko ntiense President Nelson kabanga odudu esit-ekom, ye akam usuana Esie ediyoho ke Philippines.3 Ke obio Leyte, ema ewut ndise-video oro ke mbono mme okpono Abasi efen, ndien ema eting oro nte ubak-nkpo ke ukworo-iko eke oku kiet. Mbon Philippines, diana ye ofuri ererimbot, ebo edidong ke ndikop ima Abasi oto ke iko edimek prophet Esie.
Oyoho Ita, Ntuno Ekeme Ndidi Idiongo Ima Abasi nno Ndito Esie
Ke ubakini Abasi owut ima Esie ke nditunɔ nnyin. Edi usung nditi nnyin ke Enye ama nnyin ndien ke Enye ofiok owo emi nnyin idide. Mme enwongo emem edidiong Esie eberede ono ofuri mbon emi enehede esanga ke usung ediomi enyung enyime ndibo ntuno.
Ini emi nnyin ifiokde ntuno inyung idi mbon emi enyimede ebo ntuno, oro akabare edi usiak-idem eke spirit. Nte ededi, anie ama usiak-idem? Edi eke mbon emi eyomde usiak-idem ndien enyung enyime ndibo, oro ekeme ndinyanga uwem. Jehovah otuno owo emi Enye amade. Nwed Abasi eting ntre ono nnyin (se Hebrews 12:5–11; Helaman 12:3; Doctrine ye Covenants 1:27; 95:1). Ntuno oro, mme usiak-idem eke spirit, eyeda ukpuhode emi uwem nnyim nnyin oyomde edi. Ndito-eka irenowo ye iban, nnyin iyefiok, ete ke usiak-idem eyenam nkpo esit-idem nnyin ofon onyung asana.
Joseph Smith, prophet Mfiak-nda-ndi, ama obo ntuno. Ke Joseph ɔduɔkde ikpanwed Ikie-ye-efurekiet eke Nwed Mormon emi ekewetde, Jehovah ama ɔtunɔ onyung owut ima ke ndidoho ete: “Afo ukpubakke owo ukan Abasi. … Akpana afo ekenyene mbuotidem. … Sese, afo edi Joseph, ndien ema emek fi. … Ti, ke Abasi oyoho ye mbom, mmodo, kabare esit”(Doctrine ye Covenants 3:7–10).
Ke 2016, kini ndude ke mission ke Little Rock, Arkansas, ami ndoho Brother Cava nte ada eku osok akamba eyeneka mi nnwan, emi odungde ke isuo kiet ke Fiji. Iboro esie ikedige nkpo se ami nkeyomde ndikop. Enye ye eseme oboro ete, “President Wakolo, eyeneka fo nnwan ama ebe efep ndien ema ebuk enye ke ufang usen Duop emi ebdee.” Ami mma nnyene-mbom nyung nkop esisit iyatesit ke ufokemana mi ikeyomde ndinam mi ndiongo.
Edem usen oro, kini nnwan mi ekpebde missionaries nkpo, ekikere emi ediduk ukpong mi ete: “Taniela, ofuri ifiok-ukpeb emi edi ke ufon ye nkori fo. Afo ke ekpeb onyung abuana iko ntiense fo kabanga Erisio-isop Jesus Christ; idahaemi du uwem ntre.” Ema eti mi ete ke “ofofon ono owo eke Jehovah otunɔ[de]; ndien [inaha nnyin] isin … item Ata Okposong” (Job 5:17). Oro ekedi usiak-idem spirit ono mi, ndien iboro ekedi usop--usop.
Ukem nte ami nkekerede ifiok-ukpeb oro, ema ekot mi ete nno akpatre etop mi kabanga ibuot-nneme oro. Kotu nkpo efen, ami mbuana ukpebnkpo emi ekekpebde mi: kiet, Edisana Spirit ama ebemiso otuno mi, ndien ami mmema oro sia ami nkedi nkokure owo emi okokopde ntunɔ oro; iba, otode ke uwa ye ufak Andinyanga, ami ndisehe mfina mi nte idomo ye mfiomo, edi nte nkpo ifiok-ukpeb; ndien ita, otode ke nsana-mma ye uwem anana-ndo Esie, ami ndidaha ndudue ye unana ukeme mi nte mmemidem edi nte ke ami mmenyene ufang ndikori. Ifiok-ukpeb emi ama anwam mi ndidiongo ke Abasi esituno nnyin koro Enye amama nnyin.
Ami ntre. Nsinsi Ete nnyin ye Eyen Esie, Jesus Christ, ewut ima Mmo ke ndinam emem ono nnyin ndinyene nsinsi ebuana ye Mmo ye mbon ufokemana nnyin, ke ndikot mme prophet usen emi man ekpeb enyung enwam nnyin, ye ke ndituno nnyin man anwam nnyin, ye ke ndibo-ukpeb nyung nkori. “Ekom enyene Abasi ke anana-ukem eno edisana Eyen Esie,”4 Obong nnyin emi ekesetde, kpa odu-uwem Christ. Ke enying Jesus Chrst, amen.