Ana Tangira te Atua Ibukira

Iroun Unimwaane D. Todd Christofferson

Man te Kooram n Abotoro n te Tengaun ma Uoman

Tamara ao te Tia Kabooi Maiura a tia ni kakabwaiaira n taian tua, ao n ara ongeaba nakon Aia tua, ti na namakina Aia tangira ae kororaoi ae bwanin man raka tamaroana.

Tamara are i Karawa e tangiriira n ae moan te bati ao ae kororaoi.¹ N Ana tangira, E karaoa te baire, te babaire ni kabomwi ao ni kakukurei ni kauki tibwanga ni kabane ao kimwareirei ake ti tangiria ni karekei, ni kabane ma ake E a tia ni karekei.² Ni karekean aei, E bon tauraoi naba n anga Natina ae Tangiraki, Iesu Kristo, bwa te Tia Kabooira. “Ba E tangiriia aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”³ Ngaia bon ana tangira ae itiaki te Tama—n te aonaaba ni bane ma n onoti nakon temanna ma temanna.

Iesu Kristo ma te Tama a tibwaua te tangira ae kororaoi aei. Ngke e moan kabwarabwara Ana baire ae kakukurei ao ni korakora, E wetea temanna bwa e na riki bwa te Tia Kamaiuira—te mwakoro ae moan te kakaawaki n te babaire anne. E taku Iesu, “Aio ngai, kanakoai.”⁴ Te Tia Kamaiu “akea te bwai ae kakaraoia ma ti bwaai aika a na kawaaka te aonaaba; bwa e tangira te aonaaba, n te aro are e anga oin maiuna bwa e aonga ni kairiia aomata ni kabane nakoina. Mangaia ae, bon akea temanna are e tuangnga bwa e na aki karekea ana kamaiu.”⁵

Te tangira mai karawa aei e na anganiira te karaunano ae bati ao te onimaki ngkai ti tataro nakon te Tama n aran Kristo. Akea temanna ibuakora ae e iruwa Irouia. Ti riai n aki rawa ni wetea te Atua, riki ngkana ti namakina te aki tau. Ti kona ni katan iaon ana akoi ao ana mwakuri aika raraoi Iesu Kristo bwa a na ongoraeaki ara tataro.⁶ Ao ngkana ti maeka inanon ana tangira te Atua, ti aikoa katan iaoia tabeman ibukin kairakira.

Ana Tangira te Atua E aki Kariaia te Bure; Ma E Anga Kabooan Maiura

Ibukin ana tangira te Atua e mwaneira, tabeman a atongnga bwa e “aki tianaki,” ao n aia iango, a kona n iangoia bwa ana kakabwaia te Atua a “aki tianaki,” ao bwa te kamaiuaki e “aki tianaki.” A bon aki. Tabeman a taneiai n taekinna, “te Tia Kamaiu e tangirai n arou aei,” ao anne e bon koaua. Ma E aki kona n ana temannna nakon Abanueana n arora ae ngkai, “bwa akea te bwai ae bareka ae kona ni maeka ikekei, ke ni maeka i matana.”⁷ Ara bure e riai moa ni kaitiakaki.

Burobetia Hugh Nibley e taekinna n te taina bwa abanuean te Atua e aki kona n teimatoa ngkana e kariaia te bure naba teutana. “Teutana kabuakakan te urubwai ae nanonaki bwa aonaaba tabeuatao a na aki uruakaki ke akea tokina Te kairua naba teutana n te kateitei, te bootaki, koute, ke anua e na bon karika te kangaanga n te tai ae akea tokina.”⁸ Ana tua te Atua a “matoa”⁹ ibukina bwa Abanueana ao kaaina a kona n teimatoa n totokoa te buakaka ao a rinea te raoiroi, n akea riki te anga teuana.¹⁰

Unimwaane Jeffrey R. Holland e nooria, “E ataia raoi Iesu bwa tera ae a mwaninga aomata aika mwaiti ni boong aikai: bwa iai te kaokoro ae kakaawaki imarenan te tua ni kabwarai buure (are iai Ana kona ae akea tokina ni karaoia) ao te kauring ibukin kabuakakana (are E bon aki karaoia naba teutana).”¹¹

N aki tarai arora n aki kororaoi, ti kona n teimatoa n onimaki bwa ti mwakuri ni karekea “te ara ao te mwioko,”¹² n te tabo, n Ana Ekaretia ao n te aonaaba are te tiretio. Imwiin kamatatakina bwa E aki kona ni kariaia te bure naba teutana, te Uea e kakoaua nakoira:

E ngae n anne, ane e raira nanona ao ni karaoi ana tua te Uea e na bon kabwaraaki ana bure. ”¹³

“Ao N na kabwarai aia bure au botanaomata n aron katoa tain aia rairannano ibukin aia bure nakoiu.”¹⁴

Te Rairannano ao te nanoanga mai karawa e katoka te kangaanga:

“Ao uring naba ana taeka Amureki ake e taekin nakon Teeterom, n te kaawa are Amonia; bwa e taku nakoina bwa e bon koaua bwa te Uea e na roko ni kabooia ana botanaomata, ma e na aki roko ni kabooia i nanon aia bure, ma e na kabooia man aia bure.

“Ao iai mwaakana are e anganaki mai iroun te Tama bwa e na kabooia man aia bure ibukin aia rairannano; ngaia are e a tia ni kanakoia anera bwa a na tataekina rongorongon aron te rairannano, are e kairiri nakon mwaakan te Tia Kabomwi, nakon kamaiuan tamneia.”¹⁵

Ma aron te rairannano, te Uea e kona n reita ana nanoanga n aki kabua te motikitaeka, ao “te Atua aki toki bwa te Atua.”¹⁶

Ana kawai te aonaaba, n aron ae kam ataia, bon kaitaraan Kristo, ke “bwaai ni kabane ma tiaki Kristo.” Ara bong a kaoti bwaai ake a riki n rongorongon Ana Boki Moomon are aomata a tautaekaniia aomata n ae aki raoiroi, a karaoi waaki ni wenenibure, ao ni karikirakea karakaan kaubwaia bwa te botoniango ibukin maiura. A kataua karaoan te bure teutana,¹⁷ ke bon te bure ae korakora, ma akea ae e kona n anga kabooan maiura. Anne e roko ti man raraan te tiibu te Tei. Are a taekinna aomata ae “bwaai ni kabane ma tiaki Kristo” ke “bwaai ni kabane ma tiaki te rairannano” bon te koaua ae akea aana ae te bure e aki ririki, ke ngkana e rki, akea mwiina ae kona n reke. I aki kona n nooria bwa te kauntaeka anne a na iai korakorana n te Kabanea ni Motikitaeka.¹⁸

Ti na aki kataia ni karaoa ae aki kona ni karaoaki ni katani ara bure ni kakeai. N iterana teuana, ti riai n aki kata ae aki kona ni karaoaki ni kamauna mwiin te bure man arora ni karaoa ae tamaroa n tii ngaia. Ara aro bon tiaki te aro ae ko na kataniko iai ke te aro ni kororaoi, ma te aro ni kabooi maiura—kamaiuaki rinanon Iesu Kristo. Ngkana ti bon mena ibuakoia taan nanomaraki, ma Ana Mwakuri ni Kamaiu ara bure ana bon neeraki nakon Ana kaibangaki, ao, “man imwiin babangakina ti a kamaiuaki.”¹⁹

Te Nano n Tangira irouia Burabeti Ai Aron Ana Tangira te Atua Ibukira

E a tia n rang n anaaki nanou, ao n namakina naba, nanoia n tangira ana burabeti te Atua n aia kauring ibukin te bure. A aki kaungaaki n te nano ni kamaraia. Nanoia ni koaua e kaota ana tangira te Atua, ni koaua, bon ana tangira te Atua. A tangiriia naake a kanakoaki nakoia, n taabo ake a maeka iai ao n aroia nako ake a mena inanona. N ai aron te Uea, Ana toro aki tangira temanna bwa e na korakai ni marakin te bure ao te rinerine ae buakaka.²⁰

Aramwa e kanakoaki bwa e na katanoata te rongorongo n rairannano ao te kabooaki nakoia aomata aika riribai ake a tangiria ni bwainikiriniia, kamarakiia, ao ni bon tiringiia Kiritian, n ikotaki ma ngaia Aramwa. E ngae n anne e bon tangiriia ao e bubuti ibukin kamaiuakiia. Imwiin katanoataakin ana Mwakuri ni Kamaiu Kristo nakoia aomatan Amonia, Aramwa e bubuti: “Ao ngkai, tariu, I tangiria mai kabin nanou, eng, ma te ingainga ae aiaron te maraki, bwa kam na ongo nakon au taeka, ma n tewei nako ami bure, ao ma n aki kawaeremwea bongin ami rairannano; … bwa kam na tabekakirake n te kabanea ni bong ao n rin ni motirawa iroun [te Atua].”²⁰

N ana taeka Beretitenti Russell M. Nelson, “E rang bwarabwara raoi ibukina bwa ti tabeaianga ibukiia ni kabane natin te Atua n te aro are ti taetaekina Ana koaua.”²²

E Tangirii Ngkami Te Atua; Ngkami Kam Tangiria?

Aia tangira te Tama ao te Nati a bon anga ni kainaaomata ma n ikotii kantaninga ao namakin. Aio riki ana taeka Beretitenti Nelson “Ana tua te Atua a bane n riki ni kabane man Ana tangira ae akea tokina ibukira ao Ana kantaninga ibukira bwa ti na riki nakon are ti na riki nako iai.”²³

Ibukina bwa A tangiriko, A aki tangiria ni kitaniko “n arom are ko mena inanona.” Ibukina bwa A tangiriko, A tangiria bwa kona karekea te kimwarerei ao te tokanikai. Ibukina bwa A tangiriko, A tangiria bwa kona raira nanom ibukina bwa anne te kawai nakon te kimwareirei. Ma anne bon am rinerine—A karinea inaomatam. Ko riai n rineia bwa kona Tangiriia, ni beku Ibukiia, ni kawakin Aia tua. Ngkanne A kona ni kakabwaiako n ae mwaiti ao n tangirako naba.

Oin Aia kantaningai ibukira bwa tina tatangira naba. “Ane akea te tangira irouna ao e aki ata te Atua; bwa te Atua bon te tangira.”²⁴ N aron are e koreia Ioane, “Tatangiraki, ngkana e rang n tangiriira te Atua, ti na itangitangiri.”²⁵

Te Beretitenti ni Kabuta n te Moanrinan ngkoa Joy D. Jones e kauringnga ngke e taanga ni kairake ao a weteaki bwa a na kawara ao ni buoka te utu ae tuai roko n taromauri inanon ririki aika a bati. E waekoa ni mataata ni moan rokoia bwa a namakinna bwa aki butimwaeaki. Imwiin te bwarannano n te aki nakoraoi ake imwiina, ao imwin aia tataro ao ni iango, te Tari ao Titita Jones a karekea te kaeka bwa tera ae riki n aia ibuobuoki n te kibu man Reirei ao Berita aika Tabu: “Ko na tangira te Uea ae Atuam ma nanom ni kabanea, ma marurungim, am iango, ao korakoram ni kabane; ao ko na beku ibukina n aran Iesu Kristo kona beku ibukina.²⁶ E taku Titita Jones:

“Ti a ataia bwa ti kabanei nanora ni kataia ni buokiia te utu aei ao ni beku ibukin te bitiobi, ma ti riai n titirakiniira ngkana ti bon beku man ara tangira ibukin te Uea. …

Ti a ingainga nakon rokora are imwiina ni kawara te utu aei ibukin ara tangira ibukin te Uea [taraa 1 Nibwaai 11:22]. Ti bon karaoia Ibukina. E karaoa te rawawata bwa e na beebete. Imwiin namwakaina aika bati n tei imatan aia mataroa, te utu aei a moanna ni kariniira n aia auti. N tokina, ti a ikoikotaki ni kakaraoa te tataro ao te marooro iaon te euangkerio. Te iraorao ae reitinako e a rikirake. Ti neboia ao ti tangiria man tangirakiia Natina.”²⁷

N ataakina bwa te Atua e tangiriira n ae kororaoi, ti kona n titirakiniira ibon iroura, “Mwaitira tangiran te Atua irou? E kona ni katan iaan au tangira ngkai I katan iaan Ana tangira?” Tiaki ae e na tamaroa tangiran ae ti na maiu bwa e aonga te Atua n tangiriira tiaki ti ibukin ae ti kabwaka ma ibukin naba arora are tia riki nako iai? O, bwa E a kona n taekinna nakoim ao nakoiu n aron are E taekinna nakon Hyrum Smith, te katoto, “ngai te Uea, I tangiria ibukin raoiroin nanona.”²⁸ Tina uringa ana reirei Ioane n akoi: “Bwa bon tangiran te Atua te baei, ae tauan ana tua I roura: ao a aki rawawata ana tua.”²⁹

Ni koauana, Ana tua aki kananokawaki—bon kaitaraana. A mwakena te kawai nakon te kamaiuaki, kukurei, rau, ao te kimwareirei. Tamara ao te Tia Kabooi Maiura a tia ni kakabwaiaira n taian tua, ao n ara ongeaba nakon Aia tua, ti na namakina Aia tangira ae kororaoi n ae bwanin ao n ae tamaroa riki.³⁰

Aio bon te tai ni katoka ara kakauntaeka ae reitinako—ana tangira te Atua. Inanon taai ni kukurei n te rongorongo n Ana Boki Moomon imwiin rokon te Tia Kamaiu, e taekinaki bwa “bon akea te itabaraaraa n te aba, ibukin tangiran te Atua are e bon maeka inanoia aomata.”³¹ Ngkai ti kataia ni kaineta Tion, ti uringa te berita n te Kaotioti: “Ao a kabaia akana teboki niniraia, ba a aonga n riai n roko n te kai ni kamaiu arei, ao a aonga n rin i nanon te kawa [ae tabu] ni mataroana.”³²

I kaota au kakoaua ni koauan Tamara are i Karawa ao te Tia Kabooira, Iesu Kristo, ao Aia tangira ae teimatoa, n aki bwaka. N aran Iesu Kristo, amen.

Bwaai aika a na taraaki

1. Ni katauraoan te rongorongo aei, I a tia n anai reirei ake a taekinaki iroun Beretitenti Russell M. Nelson “The Love and Laws of God” (Brigham Young University devotional, Sept. 17, 2019), speeches.byu.edu, and by Beretitenti Dallin H. Oaks in “Love and Law,” Liahona, Nov. 2009, 26–29, and “UouaTuua aika KorakoraRiaonaNobembwa 2019, 73–76.

2. Taraa Mote 1:39.

3. Ioane 3:16.

4. Aberaam 3:27.

5. 2 Nibwaai 26:24. E taku Iesu, “Akea te tangira iroun te aomata, ae korakora riki nakon ae te anga maiuna i bukiia raona. Raou ngkami, ngkana kam karaoi baika I tuangngkami.” (Ioane 15:13–14).

6. Taraa 2 Nibwaai 31:13; Moronaai 10:4.

7. Mote 6:57.

8. Temple and Cosmos: Beyond This Ignorant Present, vol. 12 of The Collected Works of Hugh Nibley (1992), 61; taraa naba Approaching Zion, vol. 9 of The Collected Works of Hugh Nibley (1989), 274: “Bon [Tion ae akea tokina] e aki kona ni waaki nako n akea tokina ngkana e kaonaki rabwatana n te aki kororaoi ao teina ae aki rokoraoi nakon riki te buriiti ke te taua are e tei ni mamaara man kairua aika uarereke inanon kateana.”

9. Aramwa 37:13.

10. Ma, e taekinna te Tia Kamaiu; “Bwa e wariki te mataroa, ao e irariki te kawai are nako n te maiu” (Mataio 7:14) ao “Bwa Ngai te Uea I aki kona n taraa te bure ma ni kariaia karaoana naba teutana” (Reirei ao Berita aika Tabu 1:31; taraa naba Aramwa 45:16).

11. Jeffrey R. Holland, “The Cost—and Blessings—of Discipleship,” Liahona, May 2014, 8; see also Jeffrey R. Holland, “The Second Half of the Second Century of Brigham Young University” (university conference address, Aug. 23, 2021), 4, speeches.byu.edu: “N aron ae I kona n taekinna, Kristo e aki konaa taua Ana tangira mairouia aomata, ma E aki naba taekinna n te taina n taku nakoia aomata, ‘Bukina I tangiringkami, ko kainaomatako man kawakinan au tua’”

12. Reirei ao Berita aika Tabu 109:22.

13. Reirei ao Berita aika Tabu 1:32.

14. Motiaea 26:30.

15. Ereman 5:10–11; e kairaki ma katuruturuana.

16. Aramwaa 42:23; taraa naba kiibu aika 13–15, 22, 24–25.

17. 2 Nibwaai 28:8.

18. Taraa 2 Nibwaai 9:46.

19. Itaia 53:5; taraa naba Takaria 14:5

20. Taraa Motiaea 28:3.

21. Aramwa 13:27, 29; e kairaki ma katuruturuana.

22. Russell M. Nelson, “The Love and Laws of God,” 3.

23. Russell M. Nelson, “The Love and Laws of God,”3.

24. 1 Ioane 4:8.

25. 1 Ioane 4:11.

26. Reirei ao Berita aika Tabu 59:5; e kairaki katuruturuana.

27. Joy D. Jones, “For Him,” Riaona, Nov. 2018, 50.

28. Reirei ao Berita aika Tabu 124:15.

29. 1 Ioane 5:3; taraa naba Ioane 14:15; 2 Ioane 1:6.

30. Taraa Ioane 15:10.

31. 4 Nibwaai 1:15; e kairaki ma katuruturuana.

32. Te Kaotioti 22:14.