“Ke Ini Oro Ke Ndinam mme Mmem mmem Ŋkpɔ Edi Mkpɔsɔŋ”
Nte nnyin isukde idem inyuŋ inyenede mbuɔtidem ke Jesus Christ, mfɔn Christ ye anana utit uwa usio-isop Esie anam nnyin ikpuhɔ.
President Thomas S. Monson ama eneme abaŋa anam utom ufɔk ŋkpɔkɔbi Clinton Duffy. “Ke ufɔt mme isua 1940 ye 1950, ema enehede efiɔk [Warden Duffy] ke utom esie ndinam mbon ŋkpɔkɔbi efiak edi nti owo. Owo kiet ama ɔdɔhɔ ete, ‘akpana ɔfiɔk ete ke ekpe isikpuhɔke nkem mmɔ!’
Warden Duffy ɔbɔrɔ ete, ‘Akpana ɔfiɔk ete ke nnamke utom ye mme ekpe. Nnam utom ye mme owo, ndien mme owo esikpuhɔ kpukpru usen.’”1
Akamba nsu eke Satan kiet edi ke mme owo ikemeke ndikpuhɔ. Esu nsu emi ke nsio nsio usuŋ nte ererimbot edɔhɔde ete ke nnyin ikemeke ndikpuhɔ—mme ɔdiɔkde ntre, ke nnyin ikpikpuhɔke. Ekpep nnyin ete ke idaha nnyin owut se nnyin idide. Yak nnyin “inyime se nnyin idide,” ererimbot ɔdɔhɔ ntre, “ndien nnyin inam akpanikɔ inɔ idem nnyin.”
Nnyin Imikeme Ndikpuhɔ
Ke ini ɔfɔnde ndinam akpanikɔ, yak nnyin inam akpanikɔ inɔ ata, idem nnyin nte nditɔ Abasi ye edisana obot ye ini iso nditie nte Enye.2 Edieke udɔŋ nnyin edide ndinam akpanikɔ nnɔ edisana obot ye ini iso emi, ana nte kpukpru nnyin ikpuhɔ. Ndikphɔ ke spirit ɔwɔrɔ erikabare esit. “Ata ediwak owo,” President Nelson ekpep ete ke “eda edikabare-esit nte ufen—ŋkpo emi ekpesinde ke mibɔhɔke ke ata idiɔk idaha. … Kini Jesus oyomde afo ye ami ete ‘ikabare-esit,’ Enye okot nnyin ete yak ikpuhɔ.”3
Mme usuŋ Abasi
Mme anam utom computer eda mme ikɔ edɔhɔ mme computer se anade nte mmɔ enam. Usuk ini efiɔk mme ikɔ emi nte edieke-ndien. Ke nte, edieke x edide akpanikɔ, ndien nam y.
Jehovah nko anam-utom oto ke mme ndaha: ndaha mbuɔtidem, ndaha edinen-ido, ndaha nkabare-esit. Ediwak uwut-ŋkpɔ edu kabaŋa mme usuŋ otode Abasi utɔ ntem:
“Edieke mbufo enimde mme mbet mi enyuŋ eyɔde tutu esim utit [ndien] mbufo eyenyene nsi nsi uwem, emi edide enɔ Abasi emi okponde akan.”4
Mme “edieke mbufo ebeŋede ke esit akpanikɔ, ye ata udɔŋ, ye mbuɔtidem ke Christ, [ndien] enye oyowut mbufo akpanikɔ, ke odudu Edisana Spirit.”5
Kpa ima Abasi, okpoukedide anana utit ye anana ndo, enyene mme usuŋ ŋko.6 Nte uwutŋkpɔ:
“Edieke enimde mme mbet mi, [ndien] eyedu ke ima mi; kpa nte ami nnimde mme mbet Ete mi, ndien ndu ke ima esie.”7
Elder D. Todd Christofferson etiŋabaŋa akpanikɔgospel emi ke ini enye ekekpepde ete: Usuk mme owo eyedɔhɔ ete, ‘Andinyaŋa ama mi nte ami ntiede,’ ndien emi edi akpanikɔ. Edi enye ikemeke ndida nnyin nduk ke obio ubɔŋ Esie nte nnyin itiede, ’koro ndedehe ŋkpɔ ididuhe do, mme ididuhe ke iso Esie’ [Moses 6:57]. Ana nte ebem iso efen mme idiɔk ŋkpɔ nnyin.”8
Mme Mmem mmem Ŋkpɔ Ekeme Ndidi Mkpɔsɔŋ
Edidiɔŋ ndibɔ odudu Abasi ma awam nnyin ikpuhɔ enyene ntak. Andinyaŋa, ke eketiŋde ikɔ oto prophet Moroni ke Ŋwed Mormon, ama ekpep ete: “Edieke mme owo edide etiene mi, nyewut mmɔ mmem idem mmɔ. Ami nnɔ mme owo mmem idem man mmɔ esuhɔre idem; ndien mfɔn mi ekem kpukpru mbon emi esukde idem ke iso mi; koro edieke mmɔ esukde idem ke iso mi , enyuŋ enyenede mbuɔtidem ke ami, ke ini oro ke ndinam mmem mmem ŋkpɔ edi mkpɔsɔŋ ɔnɔ mmɔ.”9
Ke etimde ese se Abasi ekpepde nnyin mi, Enye oto ɔdɔhɔ ete ke Enye ɔnɔ iren ye iban mmem idem, kiet, emi edide kiet ke idaha nnyin nte mbon emi eduɔde mme mbon obukidem. Nnyin imikabare idi iren ye iban ke obukidem ke ntak Iduɔ Adam. Edi oto ke Erisio-isop Jesus Christ, nnyin imikeme ndikan mmem idem nnyin, mme iduɔ nnyin.
Enye ndien ɔdɔhɔ ete ke mfɔn Esie ekem ndien se edieke nnyin idisukde idem nnyin inyuŋ inyene mbuɔtidem ke Enye, ndien Enye “eyenam mme mmem mmem ŋkpɔ ediwak] edi mkpɔsɔŋ enɔ [nnyin].” Ke usuŋ efen, nte nnyin ibemde iso ikpuhɔ idaha iduɔ nnyin, mmem idem nnyin, ndien nnyin iyikan ikpuhɔ mme edu nnyin, mme mmem idem nnyin.
Se Eyomde Man Ekpuhɔ
Yak ifiak ise se eyomde man ekpuhɔ ke usuŋ Abasi
Akpa, ana nte nnyin isuhɔre idem nnyin. Usuŋ emi Abasi oyomde man ekpuhɔ edi nsukhɔre idem. “Edieke mmɔ esukde idem mmɔ ke iso mi,”10 Enye ama ɔdɔhɔ. Ŋtaŋidem edi asak iso nsukhɔre idem. Nkohore-idem odu ke ini ikerede ke imifiɔk okpon akan—kini se nnyin ikerede mme ifiɔkde akande se Abasi ekerede mme ɔfiɔkde.
Edidem Benjamin, ama ekpep ete “ ata owo edi usua ye Abasi, … ndien eyedi, ke nsinsi, ibɔhɔke enye … ɔfɔrɔde edu ata owo osio onyuŋ akabare edi edisana oto erisio-isop Christ Ɔbɔŋ, onyuŋ akabare etie nte eyen-ɔwɔŋ, suŋ-suŋ, [onyung] osukhɔre-idem.”11
Man ikpuhɔ, ana nte nnyin ifɔrɔde edu obot inyuŋ ikabare isukhɔre-idem inyuŋ isuk-ibuot. Ana nte isuk-ibuot ikem nditiene odu uwem prophet. Isuk-ibuot ikem ndinam nyuŋ nnim mme ediomi temple. Isuk-ibuot ikem ndikabare esit kpukpru usen. Ana nte nnyin isuk-ibuot ikem ndikpuhɔ, man “iyak esit nnyin inɔ Abasi.”12
Iba, ana nte nnyin inyene mbuɔtidem ke Jesus Christ. Ŋko, mme ikɔ Anadiyaŋa: “Edieke mmɔ esukde idem ke iso mi, enyuŋ ebuɔtde idem ke ami,”13 Enye eyenɔ nnyin odudu ndikan mme mmem idem nnyin. Nsukhɔre idem, asaŋade ye mbuɔtidem ke Jesus Christ, ayayak nnyin inyene odudu mfɔn Esie ye ɔyɔhɔ edidiɔŋ emi odude ke ntak Erisio-isop Esie.
President Nelson ekpep ete ke “ata edikabare esit ɔtɔŋɔ ye mbuɔtidem ete ke Jesus Christ enyene odudu ndiyet, nkɔk, nyung nsɔŋɔ nnyin idem. … Edi mbuɔtidem nnyin atat odudu Abasi ke uwem nnyin .”14
Ita, oto ke odudu Esie Enye ekeme ndinam mmem mmem ŋkpɔ akabare mkpɔsɔŋ. Edieke nnyin isukde idem inyuŋ inyenede mbuɔtidem ke Jesus Christ, ndien mfɔn Esie eyewam nnyin ikpuhɔ. Ke usuŋ efen, Enye eyewam nnyin ndikpuhɔ. Emi edi ntre koro, nte Enye ɔdɔhɔde, “mfɔn mi ekem kpukpru owo udeme.”15 Ukeme mfɔn Esie ɔnɔ nnyin odudu ndikan kpukpru mfina, kpukpru afanikɔŋ, ye kpukpru mmem idem.
Mmem idem nnyin ekeme ndidi odudu nnyin. Ekeme ndikpuhɔre nnyin “ikabare idi obufa obot.”16 Mme mmem mmem ŋkpɔ ekeme ndidi mkpɔsɔŋ nnɔ [nnyin].”17
Andinyaŋa ama anam anana utit ye nsi nsi Uwa usio-isop Esie man nnyin ikan ikpuhɔ, ikabare esit, inyuŋ ifɔn ikan akpa. Nnyin imikeme ndifiak mmana obufa. Nnyin imikeme nditre mme edu, mme ido ye “udɔŋ ndinam idiɔk.”18 Nte nditɔ edima Ete ke Heaven, nnyin iminyene odudu ke idem nnyin ndikpuhɔ.
Mme Uwut-ŋkpɔ Ukpuhɔ
Ŋwed Abasi ɔnɔ ɔyɔhɔ ye uwut-ŋkpɔ iren ye iban emi ekekpuhɔde.
Saul, eyen Pharisee ye ada iso ke ukɔbɔ Ufɔk Abasi,19 akabare edi Paul, Apostle Ɔbɔŋ Jesus Christ.
Alma ekedi oku ke esop idiɔk Edidem Noah. Enye ama okop mme ikɔ Abinadi, akabare esit, onyuŋ akabare edi mkpon-ŋkan ɔkwɔrɔ-ikɔ kiet ke Ŋwed Mormon.
Eyen esie Alma ama abiat eyo uyen esie oyom ndisobo Ufɔk Abasi. Enye ekedi kiet ke otu “ata mme anam idiɔk”20 tutu enye ɔkpuhɔre esit onyuŋ akabare edi akwa ɔkwɔrɔ ikɔ ke idaha esie.
Ema eda Moses esin ke ufɔk Pharaoh enyuŋ ebɔk enye ke eti usuŋ nte eyen edidem ke Egypt. Edi ke ini enye ekedide edifiɔk se enye ekedide onyuŋ ɔfiɔkde abaŋa edisana ini iso esie, enye ɔkpuhɔre onyuŋ edi akwa prophet ɔnɔ mbet ke Akani Testament.21
Mesima ete ete anwan mi James B. Keysor ke ntak utɔ akwa edikpuhɔre esit esie.22 Ke akamanade oto mme ada iso mbon-ntongo ubon Latter-day Saints ke Salt Lake Valley ke 1906, eka esie akakpa ɔkpɔŋ enye ke uyen ndien enye ama ɔbɔ ufen ke uyen. Enye ikikɔrike ke ufɔk Abasi, ndien ke ini emi enye ama ekpep ndiɔi ido. Nte ededi, enye ama osobo onyuŋ ɔdɔ eti anwan, ndien mmɔ ema enyene nditɔ ition.
ke 1943, ke etienede mme isua Great Depression ye World War II, Bud, nte mme ufan ye mbon ufɔk ekesikotde enye, ama ɔkpɔŋ Utah aka Los Angeles, California, ndiyom utom. Ke ini emi enye mikiduhe ke ufɔk mi, enye okoduŋ ye eyen eka esie anwan ye ebe esie, emi ekedide bishop ward mmɔ.
Ye ima emi otode eyen eka esie ye ukot esie, enye ama ɔtɔŋɔ ndidemere udɔŋ esie ke Ufɔk Abasi onyuŋ ɔtɔŋɔ ndikot Ŋwed Mormon kpukpru okoneyo mbemiso enye ede.
Okoneyo kiet, ke ini enye okotde ke Alma ibuot 34, ama otuk enye ke esit nte enye okotde mme ikɔ emi:
“Iŋ, ami moyom nte mbufo edi ekunyuŋ esɔŋ esit mbufo aba. …
“Koro esese, uwem emi edi ini emi anade nte mme owo ebeŋe idem ndisobo ye Abasi; iŋ, esese usen uwem emi edi usen emi anade nte mme owo enam mme utom mmɔ.”23
Ke ini enye okotde mme ufaŋ emi, akamba ntuk otuk enye ndien enye ɔfiɔk ete ke ana nte enye ɔkpuhɔ, akabaresit, ndien enye ama ɔfiɔk se anade nte enye anam. Enye ama adaha ada ke bed esie onyuŋ ɔtɔŋɔ edɔŋ onyuŋ ɔtɔŋɔ ndibɔŋ akam, ebeŋe Abasi efen ɔnɔ enye onyuŋ ɔnɔ enye ukeme emi enye oyomde man anam mme ukpuhɔre ke uwem esie. Ema ebɔrɔ akam esie, ndien ɔtɔŋɔde ke ini oro ka iso, enye ikisehe edem aba. Bud ama anam utom ke Ufɔk Abasi onyuŋ edi ɔbuɔtidem, esin-ifik Latter-day Saint tutu utit uwem esie. Enye ama ɔkpuhɔ ke kpukpru usuŋ. Ekikere esie, esit esie, mme edinam esie, ofuri uwem esie ema ekpuhɔ.
Ndito eka iren ye iban, edisana ini iso ye udɔŋ nnyin edi nditie nte Ete ke Heaven ye Andinyaŋa nnyin, Jesus Christ. Nnyin inam emi nte nnyin ikpuhɔre mme, ikabare esit. Nnyin ibɔ mbiet Andinyaŋa ke ɔkpɔ-iso [nnyin].”24 Nnyin idi obufa, isana, ikpuhɔ, ndien nnyin ika iso ndinam emi kpukpru usen. Usuk ini eyetie nte edi ikpat iba ika iso ndien ika kiet ke edem, edi ana nte nnyin ika iso inyene mbuɔtidem.
Ndien nte nnyin isukde idem inyuŋ inyenede mbuɔtidem ke Jesus Christ, mfɔn Christ ye anana utit erisio-isop Esie anam nnyin ikpuhɔ.
Ami mɔnɔ ikɔ ntiense nte ke Jesus Christ ke akpanikɔ edi Andinyaŋa ye Andifak nnyin. Mfon Esie ke akpanikɔ ekem udeme. Ami mfiori nte ke Enye edi “usuŋ, ye akpanikɔ, ye uwem.”25 Ke enying Jesus Christ, amen.