Ediomi ye Abasi Osongo, Ekpeme, onyung Ebenge Nnyin ono Nsinsi Ubong
Nte nyim imekde ndinam nyung nnim ediomi, eyediong nyin ye ediwak inemesit nkoro ediye nsinsi uwem emi edidide.
Ndito-eka iban, edi nkpo idara ndidu otokiet nte ndito-eka iban eke ofuri ererimbot. Nte iban emi enamde enyung enimde ediomi ye Abasi, nnyin imebuana ubiong eke spirit emi anwamde nnyin ndiyo mme mfana ke usen nnyin onyung ebenge nnyin idem abanga Edifiak-ndi Jesus Christ Oyoho Ikaba. Ndien ndinim ediomi oro anwam nnyin ndidi iban emi enyenede odudu emi ekemede ndiduri mbon efen mbine Andinyanga.
Mbon emi ekenade baptism ema enam ediomi ke usen eke owo-mikemeke-ndifre ndida enying Jesus Christ ndori ke idem mmo ke ndi-di owo mfiak-mmen-ndi Ufok Abasi Esie, nditi Enye ke kpukpru ini , nnim mbet Esie, nnyung nam nkpo nno Enye tutu osim utit. Kini nnyin inamde mme nkpo emi, Ete ke Heaven onwongo ndifen mme idioknkpo nnyin nnyung nno nnyin nsanga Edisana Spirit otode ke edinam ndori-ubok. Mme edidiong emi otongo nnyin ke usung ete, edieke nnyin isuk isinde ifik ika iso inyung iyo tutu osim utit, enye eyeyak nnyin idung ye Enye ye Eyen Esie, Jesus Christ, ke obio bong celestial. Kpukpru mbon emi ekenade baptism enyene enwongo edidiong ye unen emi edieke mmo enimde ediomi emi mmo enamde ke akpan usen oro.
Mbon emi ekade-iso ndinam ediomi efen ke temple ebo akwa enwongo emi okongode ke ndinyene mbuotidem eke idem mmo. Nnyin ke utenge inam enwongo ndinim mbet Abasi, inam iko Abasi Jesus Christ, idu edisana uwem, inyung iyak ini ye eno nnyin isin ke utom Obong. Ke edifiak-nno, Abasi onwongo mme utibe edidiong ke uwem emi ye eti-ifet ke ndifiak ndung ye Enye ke nsinsi.1 Ke usung oro, eno nnyin, odudu ndifiok akpaniko ye nsu, ndifiok eti ye idiok, ke ufot ediwak ukwang ye ndutime uyo emi amiade nnyin ke ofuri ndaha. Nso akwa eno idi oro!
Ke ndibenge-idem nno akpa isang uka temple mmi, eka mi ye mme ofioknkpo ndito eka iban ke Nka Iban ema enwam mi ndisat mme nkpo eke ami ndiyomde, esinede ye ediye ofong edinam. Edi ata akpan mbenge-idem ama odu mbemiso ami ndifiok se ami ndisinede. Ke enye odungore mi okure man ese mme ami mmodot, bishop mi ama anam anwanga mi mme ediomi emi ediyomde ami nnam. Eti edinam anwanga esie ama ono mi ufang ndikere mbanga nyung mbenge-idem ndi-nam ediomi oro.
Ke ini usen edikemde, ami mma mbuana ke mme enyene-utenge edinam oro ke esit ekom ye emem. Okposukedi ami mikifioke se ediomi eke ami nkenamde usen oro adade ono oyoho-oyoho, ami mma mfiok nte ke ebop mi edian ye Abasi oto ke mme ediomi oro ndien enyung enwongo mme edidiong eke ami mikemeke ndifiok edieke ami nnimde ediomi oro. Tongo ke akpa ifiok oro, ami mma nka iso ndibo osongo nte ke ndinam ediomi emi nnyin inamde ye Abasi anwam nnyin ndiduri nto odudu Andinyanga, emi edinode nnyin odudu ke ini ukut, ono ukpeme osio ke odudu andidiok, onyung ebenge nnyin idem ono nsinsi ubong eke ini iso.
Ifiok-ukpep eke uwem ekeme ndito ke nyo-nkpo ekesim nkpo mbungo-esit, oto ke nkpo-ndik ekesim emi enyenede ubong. Ifiok-ukpep kiet-kiet anwam nnyin itim ifiok mbanga akwa ima eke Ete ye ukeme nnyin ndikpuhore oto ke eno mfon eke Andinyanga. Ndinim ediomi nnyin ayak odudu Andinyanga eyet nnyin nte nnyin ikpebde ito mme ifiok-ukpep eke uwem isong—ekpededi enye edi ekpri ukwang ikpe mme akamba ndudue. Andifak nnyin odu ndikpobi nnyin ke ini nnyin iduode edieke nnyin idiwongode ibine Enye.
Ndi akananam afo emeda ke enyong ebedeng ye ikpat fo ke mben esie ndien edem fo ese udem esie ke idak? Ke mbre usuhore ke uruk, okposuk-edi afo ofiokde ete ke ebop fi mfon-mfon edian ke eti oruk onyung akama nkpo-utom emi ekemede ndida fi sung-sung nkesim idak ebedeng, afo ndida ke mben ebedeng oro osuk edi nkpo iduo-esit. Ndisik nka edem mkpong ebedeng nyung ntop idem fo nsin ke ofum oyom fi enyene mbuotidem ke ibang-ubom, emi emi ema ekebop mfon-mfon edian ke nkpo emi mikemeke ndisik. Enye oyom mbuotidem ke idem owo emi omumde uruk akama nte afo osuhore aka isong. Okposuk-edi nkpo-utom oro onode fi ukeme ndikara edisuhore fo , ana nte afo osuk enyene mbuotidem ete ke nsanga fo idiyakke fi oduo.
Ami mmeti mfon-mfon ini nkesangade ke otu nka iferi iban nka mbre usuhore ke uruk. Ami nkedi akpa owo ndika ke otu oro. Nte ami nsikde nka edem mkpong ebedeng, ami ntongo ndiduo nyung nkemeke ndinwam idem mi. Ke esit-ekom, uruk atigha ndien ata usop-usop edisuhore mi etre. Nte ami nyirede ufum nsuk iso nse mme itiat ke isong ebedeng, ami mma mbong akam eti-eti nno owo ekededi mme nkpo ekededi emi ekekpande mi ndiduo nduk mme itiat.
Ekedikem, ami mma ndifiok nte ke owo ikisongoke ibang-ubom mfon-mfon, ndien nte Ami nduode mkpong mben ebedeng, uruk owo emi omumde mi ama atigha ke edem esie ndien oduri aka mben ebedeng. Nte ededi, enye ama ada ukot esie ofiok ke itiat. Ke enye osongode ada ke ndaha oro, enye ke ata nsin-ifik ama ekeme ndida uruk nsuhore mi ke ubok akanade ubok. Okposuk-edi Ami mmekikemeke ndikut enye, ami mma mfiok ke enye akanam utom ye kpukpru odudu esie ndiyanga mi. Ufan efen ama odu ke idak ebedeng, ebenge idem ndikpobi mi edieke uruk etrede ndimum. Nte ami nsangade mkpere, enye omum mme uruk-udok-enyong mi osuhore me tutu nsim isong.
Ye Jesus Christ nte nsongonda ye eti nsanga nnyin, nnyin imiyene osongo ibanga edima odudu Esie ke ini idomo ye uboho emi idikutde ke utit oto ke Enye. Nte President M. Russel Ballard ekekpepde: “Mbuotidem ke Abasi ye ke Enyen esie, Obong Jesus Christ, edi … nsongonda emi anade nte nnyin inyene ke uwem nnyin man omum nnyin akama ke ini ndutime ye idiok-ido … Mbuotidem nnyin … ana okongo ke Jesus Christ, uwem Esie ye erisio-isop esie, ye ke mfiak-nda ndi iko Abasi esie .”2
Nkpo utom eke spirit emi akpande nnyin ndibungo ke itiat ukut edi mme iko ntiense nnyin abangade Jesus Christ ye mme ediomi emi nnyin inamde. Nnyin ikeme ndibere ke mme unwam emi ndida nnyin usung nka ebiet uboho. Nte enyene-udong nsanga nnyin, Andinyanga idiyake nnyin iduo ikpong ndaha unwam Esie. Ekpededi ke ini ukut ye mfuho, Enye odu ndimenere nyung ndong nnyin esit. Odudu Esie anwam nnyin ndifiak nkop nsongidem nto mbumek mbon efen emi esiwakde ndifina nnyin ata eti-eti. Nte ededi, ana nnyin owo kiet-kiet isine mme uruk-udok-enyong nnyin inyung ikut ite ke imibup enye enehede osong. Ana nte nnyin imek ndisongo nda ke Andinyanga, idiana kiet ye Enye oto ke mme ediomi nnyin.3
Didie ke nnyin ikeme ndinam nsongonda nnyin enehede osong? Nnyin ibong-akam ye nsuhore esit, ikoot inyung ikere ibanga nwed Abasi ke esit nnyin, nnyin idia udia-Obong ke spirit nkabare-esit ye utenge, inwana ndinim mbet Abasi, inyung inam item eke prophet. Nte nnyin inamde utom nnyin kpukpru usen ke “nkong-nkan ye nsana-nkan”4 usung, nnyin iyekabare inehede iyire ye Andinyanga ndien, ke ukem ini oro, inwam mbon efen nditeine Enye.
“Nkong-nkan ye nsana-nkan” usung etie didie? Nnyin inwana ndidu uwem ntiene iko Abasi ke kpukpru ebuana nnyin. Nnyin inwam mbon emi edude ke unana ke ndinam utom unwam ke akpan, iwut ima nnyin ito mkpri utom emi nnyin inamde. Nnyin ibuana eti etop iko Abasi ye mbon emi eyomde emem ye odudu edi inyung “ifiokke ebiet emi mmo ekpekutde oro.”5 Nnyin inam utom ndidian mme ufokemana otokiet ke nsinsi ke nkang ikpehe mbiba. Ndien eke mmo emi enamde ediomi ke ufok Jehovah, nte President Russel M. Nelson akanamde anwanga, “Mme ikpo owo kiet-kiet emi ekade temple eyesine ndisana ewura eke itie-oku [emi] … etide nnyin … ndisanga kpukpru usen ke nkong-nkan ye nsana-nkan usung.”6 Mme utom emi idihe nkpo emi enamde ndien-ndien edi mmo edi ata akpan nkpo ono inemesit nnyin kpukpru usen—ye eke nsinsi idara.
Iduhe nkpo emi okponde akan ke nkori nsinsi nnyin nte ndinim ediomi nnyin ye Abasi. Kini ediomi eke temple nnyin enyenede odudu, nnyin iyebuot-idem ke oyoho-idara edifiak-ndu ye mbon emi nnyin imade ke ikpehe nkang oko. Eyen mme ete ye eka mme nnwan ye ebe emi ema ekekpong uwem isong enyene idorenyin ke ofuri esit mmo ete ke afo eyenam akpaniko ono ediomi emi obopde fi adian otokiet. Edieke nnyin imiomde mme isinde ediomi nnyin ye Abasi ke ndek, nnyin isin nsinsi edibop oro ke afanikong. Idahaemi edi ini ndikabare esit, ndidiong, nyung mfiak nam.
inemesit edi ukpok-ukpok edieke nnyin ikpuhode mme edidiong eke idara nsinsi ye se idide mmem-mmem idahaemi. Isehe isua emana emi nnyin idide, oro edi ata akpaniko: ukpohode emi onode nsinsi inemesit edi ndinam iko Abasi Jesus Christ nyung nnam ediomi nyin. Prophet nnyin, President Nelson ama osongo ete ke “akpatre ukpeme ye nkokure nsinsi inemesit nnyin okongo ke ndimum esang-ukwak mfiak-nda-ndi iko Abasi Jesus Christ nkama, oyoho-oyoho ye ediomi ye mme edinam-iko Abasi esie. Kini nnyin inamde ntre, nnyin imekeme ndiwat ke ifure ke idiok mmong koro nnyin iminyene usung ndibo odudu Abasi.”7
Ediwak nnyin ke imokut mkposong mmong. Nte mbufot mmong ukut otopde nnyin ndien ndusuk ini nnyin ikwe usung oto ke ediwak mmong-eyet emi edide ke ini afanikong oro, nnyin imikeme ndifre usung emi nnyin ikpiwatde ubom nnyin ika. Nyin imiyung ikeme nditre ndikere ite ke nyin imiyene ukeme ndiwat nsim obot mbeninyang. Ke nditi owo emi afo edide—edima eyen Abasi—ntak emi afo odude ke ererimbot, ye uduak fo ndidung ye Abasi ye mbon emi afo amade ekeme ndinam usung emi afo okutde nkpo anwanga ke nnen-nnen usung. ke ufot oyobio, uyama ikang odu ndiwut nnyin usung. “Ami ndi unwana emi ayamade ke ekim,”8Jesus okodoho. Eno nnyin osongo ebanga ifure kini nnyin isede unwana Esie inyung imum ediomi nnyin ikama ke ofuri akpaniko.
Ekedi unen mi ndisobo ye iban eke ofuri isua emana ke emi edungde ke ediwak nsio-nsio ndaha enyung enimde ediomi mmo. Kpukpru usen, mmo ese Obong ye prophet esie eyom ndausung, idihe mme nkpo usuanetop emi oyohode kpukpru ebiet. okposukedi mmo enyenede nsio-nsio mfina ye ndioi ukpeb eke ererimbot emi anwanade ndikpan mmo ndinam ediomi mmo, mmo ebiere ndidu ke usung ediomi. Mmo ebuotidem ke enwongo odohode ete “kpukpru [se] Ete enyenede.”9 Ndien se ededi isua emana fo, mbufo iban kiet-kiet emi enamde ediomi ye Abasi emenyene ukeme ndimenere unwana Obong ke enyong enyung eda mbon efen esok Enye o.10 Otode ke afo ndinam ediomi , Enye eyediong fi ye odudu itie-oku Esie onyung ono fi ukeme ndinyene akwa odudu ye kpukpru mbon emi afo osobode. Mbufo edi iban emi edinamde mme nkukut emi eketingde enim eworo esu!11
Ndima ndito-eka iban, ke ebede kpukpru nkpo efen, edu ke usung ediomi ekesim Jesus Christ! Nnyin imibo edidiong ndidi ererimbot ke ini temple oyohode ofuri ekondo. Ndinam nyung nim ediomi odu ono kpukpru mbon Ufok Abasi emi edotde. Mme young adult, ekubet tutu ini ndɔ mme kini akade mission ndinam edisana ediomi oro. Afo emekeme ndibenge-idem nte nkaiferi man afo ekeme ndibo ukpeme ye odudu emi ediomi temple onode ke ini afo ebede isua Efureta nte afo ebengede idem onyung okopde udong ndikpono mme ediomi temple oro.12 Mbufo emi ema ekebɔbɔ mme edidiong eke temple, kuyak mbon-ubiongo mme ndutime oduri fi osio okpong nsinsi akpaniko . Kpeb yung bup ke mme itie emi ofonde man otim ofiok abanga ndisana idiongo eke ediomi emi akanamde. Ka temple ndien-ndien nte afo ekemede yung kpang utong nno Spirit. Afo eyekop inem-inem osongo ete ke afo odu ke usung Obong. Afo eyebo uko ndika-iso ukem ntre ke ndida mbon efen ndi.
Ami nno iko ntiense nte ke nte nnyin imekde ndinam ediomi ye Ete ke Heaven inyung ibo odudu Andinyanga ndinim mmo, eyediong nnyin ye ekese inemesit ke uwem emi akan nte nnyin ikpikerede idahaemi ye enyene-ubong nsinsi uwem emi edidide.13 Ke enying Jesus Chrst, amen.