11:29

Mme Ukpep-ŋkpɔ ke mben Obube-mmɔŋ

Etop otode Susan H. Porter

Akpa Onoitem ke Primary General Presidency

Nnyin imikeme nditiene Andinyanga nyom osongo ye ukɔk emi edinwamde nnyin ndinam ofuri se ekedongde nnyin ete idi-nam mi ikure.

Edi ŋkpɔ idara ke ndiboho ye mbufo owo kiet-kiet ke ikpehe akwa mbono eke iban!

Ami nkekpon ke usoputin nkang New York nyung nsika ekpri branch Ufok Abasi emi edide itiat Edip (32 km) tongo ke ufokidung nnyin. Nte ami ntiede ke class Sunday School ke idak-isong eke akani, ekpekpe chapel nnyin ye Patti Jo ufan mi kpɔt, ami nkekereke ndisine kotu ediwak million mboho iban ke ekondo.

Isua ition emi ekebede Bruce, ebe-ndo mi, ama enehede odongo kini nnyin ikanamde utom ye mme esinifik ikot Abasi ke Europe East Area. Nnyin ima inyong ufok, ndien enye ama ebe efep ke esisit ufang udua ifang. Uwem mi ama okpuho ke okoneyo kiet. Ami mma mfuhɔ nyung nkpo mmemidem ye ekaha. Ami ndibenge Jehovah man ekpeme usung-isang mi nte: “Nso ke Afo oyom mi nam?”

Esisit udua ifang ekedi, nte ami nkotde leta mi ekpri ndise kiet ke nwed-ndise ama oduk enyin mi. Nte ami nehede nse, ami ndifiok ke oro ekedi nduri anam-usɔ eke nnwan Samaria odude ye Jesus ke obube-mmong. Ke ndo-ndo oro Spirit edineme ono mi ete: “Oro edi se anade nte afo anam.” Edima Ete ke Enyong amaokot mi ete nditiene Andinyanga nyung mbɔ ukpep.

Ami nyema ndibuana ukpenkpo ita eke ami mbode ukpep ye mbufo ke nte ami nkade-iso ndiwong nto obube-mmong eke ”odu-uwem-mmong Esie”¹

Akpa: Itie Nnyin Idahaemi ye Andikibe Ibiereke Ini-iso Nnyin

Ndito-eka iban, ami mmediongo ke ediwak mbufo emekere ukem nte ami, ifiokke nte ediyɔde afanikong ye unana—unana koro uwem mbufo iduhe nte mbufo ekeyomde, ebongde-akam eno, ye nte ekekerede.

Isehe ndaha mbufo, uwem nnyin edi edisana onyung enyene se oworode ye uduak. Nnyin kiet-kiet idi edima eyen-anwan eke Abasi, ikemana ye ifiok-nkpo Abasi ke ukpong nnyin.

Andinyanga nnyin, Jesus Christ, otode uwa usio-isop Esie, anam emem ono nnyin ndisana nyung mbɔ-ukɔk, anwam nnyin ndinam uduak nnyin ke isong nkure ke misehe ubiere eke mbon ufokemana, ndaha ndɔ, osongo eke idem ye mfre, mme ndaha efen ekededi.

Kere-banga nnwan oro ke mben obube mmong. Uwem esie eketie didie? Jesus ama ofiok ke enye ama enyenyene ebe ition ndien ikiduhe ke ndɔ ye erenowo emi odungde ye enye. Edi, kesioho mme mkposong eke uweem esie, kiet kotu akpa editing mme iko Andinyanga ke anwa-anwa ete ke Imo idi Messiah eketing ono enye. Enye ete, “Ami emi nneneme nneme mi ye afo ndi Enye.”²

Enye akabare edi oyoho ntiense, editing ono mbon obio esie ete ke Jesus edi Christ. “Edi ediwak mbio Samaria emo etode ke obio oro ebuotidem ye Enye oto ke iko ntiense eke nnwan oro.”³

Itie esie idahaemi ye andikibe ikebiereke ini-iso esie. Ukem nte enye, nnyin imikeme ndimek ndiwongore ntiene Andinyanga mfin emi nyom osongo ye ukɔk emi edinamde nnyin inam ofuri se ekedongde nnyin ete idi-nam mi ikure.

Udiana: Odudu Oro Odu ke Idem Nnyin

Ke ufang emi inehede ifiok ke Doctrine ye Covenants, Jehovah eteme iban ye irenowo ete “ke ana esongo ke edi-nam nti nkpo, ndien inam ediwak nkpo ke odudu idem nnyin, inyung ida ediwak edinen-ido idi; koro mmo enyene odudu ke idem mmo.”⁴

Ndito-eka iban, odudu oro odu nnyin ke idem ke ndida ediwak edinen-ido ndi!

President Russell M. Nelson eting iko ntiense ete ke, “Ofuri nwan ye ofuri irenowo emi enamde ediomi ye Abasi eyung enim mme deiomi oro, emi ebuanade ke edisana ke ndutim eke itie oku, eyene nenen unen ke odudu Abasi.”⁵

Ami mmedidiongo nte ke danga nnyin inwanade ndikpono ndisana ediomi emi ikinamde ke baptism ye ke ndisana temple, Jehovah eyediong nnyin “ye odudu ukeme edikɔk Esie ” diana ye “ifiok spirit ye edidemede eke [nnyin] minyeneke akpa.”⁶

Oyoho Ita: “Otode ke Mkpri Nkpo Oworo Nkpo Emi Okponde””⁷

Ke Ukworo-iko ke Akamba-obot, Jesus ekpep mbet Esie ete, “Mbufo edi inung isong”⁸ nko “Mbufo edi unwana ererimbot.”⁹ Ekem Enye ada nkori obio-ubong heaven odomo ye leaven, “eke nnwan emende esin ke udomo ndom-uyo ita, tutu leaven asuana oyoho ofuri ndom-uyo.”¹⁰

Inuŋ
Leaven
Unwana

Kpa ke ata ekpri ndaha, mmo kiet-kiet enam-ufon eno ofuri-nkpo emi ekperede enye. Andinyanga okot nnyin ete ida odudu Esie man idi inung, leaven, ye unwana.

Inung

Edi nkpo mkpaidem ke adanga ukpuhore eke ekpri-nsuana inung anamde ke esit inem nkpo emi nnyin idiade. Ndien inuŋ edi kiet kotu mmem-urua ye ndimem nkpo-udia.

Ke nwed Udiana Ndidem, nnyin ikoot kabanga “ekpri eyen-anwan,”¹¹ emi mbon Syria ekemumde ndien akabare edi eyen-ufok nnwan Naaman, etubom mbon-ekong Syria. Enye ekedi nte inuŋ; enye ekedi ekpri-eyen, inyeneke ufon ino ererimbot, ndien uwem esie nte ifin ke esen idut idihe se enye okoyomde.

Nte ededi, enye eketing udim-ikoiba ye Abasi, eting iko ntiense ono nnwan Naaman ete: Ete mi akpakam odu ke iso prophet emi odude ke Samaria! enye akpanam ndien akpa-mfia okure enye.”¹²

Ema eting iko mbuotidem esie eno Naaman, emi akanamde nte eyen oro eketemede, ayak idem esie man obo edikok ke ikpokidem ye ke spirit.

Nnyin imisiwak ndise eyen-ufok emi okodohode Naaman ete ekeyere ke inyang Jordan,ke nte prophet Elisha eketemede, edi Naaman ikpikemeke ndika ke enyin-usung Elisha kesioho “ekpri eyen-ufok oro efep.”

Afo emekpri mme ndikere ke unyeneke ufon, edi afo emekeme ndidi nte inung ke ufokemana, ke ufoknwed ye ke obio fo.

Leaven

Akananam nte afo ama-ta uyo emi leaven miduhe ke esit? Didie ke afo edi-men oro iwut? Okpup? Odobi? Ɔsɔɔŋ? Ye ekpri ndaha leaven, uyo okori, atara akabare ayaha onyung emem.

Ini emi nnyin idade odudu Abasi isin ke uwem nnyin, nnyin iyekeme ndikpuho “ibuot mkpa-esit”¹³ ino nti ekikere emi edidemede mbon efen onyung ono esit mmo ufang man ebo ukok.

Mmi-mmi emi ufan mi kiet akana ke bed esie ke usenubɔk usen Ukabade-isua, ɔyɔhɔ ye mfuhɔ. Ndito esie edoho ete enye adaha ada, nte ededi, enye okofuho oto ubiak uworo-ndo esie. Nte anade ke bed atua, enye ama obong-akam ono Ete Heaven, eseme unana idorenyin esie ono Enye.

Nte enye etrede akam esie, Spirit ɔdɔhɔ enye sung-sung ete ke Abai ɔfiɔk ubiak esie. Enye ama ɔyɔhɔ ye esit-mbɔm Esie ɔnɔ enye. Edisana ifiɔk-ukpep emi ama osuhore idiok ekikere esie onyung ono enye idorenyin ke enye ikɔfuhɔke ikpong. Enye ama adaha-ada, ɔwɔrɔ anwa, onyung okobop owo-snow ye ndito esie, okpuho mkpa-esit eke usenubɔk oro esin ke imam ye idara.

Unwana

Adanga ibat unwana ifang ke ediyom man akara ekim ke ubet-ufok kiet. Ekpri mbukpong unwana kiet. Ndien mbukpong unwana oro ke ebiet ekimde ekeme ndiworonto odudu Abasi emi odude ke esit idem fo.

Okpusuk edi afo emekeme ndidu ikpong kini oyobio uwem ofimede, afo emekeme ndino unwana ke ekim unana-ifiok, ndutime, ye unana edinim ke akapaniko. Unwana mbuotidem fo ke Christ ekeme ndituak-nda onyung osongo, ada mbon ekperede fi ekesim uboho ye emem.

Ndito-eka iban, esit ekeme ndikpuho ndien uwem obo edidiong ke nte nnyin inode ekpri inung, oyoho-ikpang leaven kiet, ye mbukpong unwana.

Ami nting iko ntiense nte ke Andinyanga edi inung ke uwem nnyin, ke okot nnyin ete iditabi idara ye ima Esie ikop.¹⁴ Edi Enye edi leaven kini uwem osongde ye nnyin, ono nnyin idorenyin¹⁵ onyung emenede mbiomo nnyin¹⁶ oto ke anana-adanga odudu ye ima-ufak Esie.¹⁷ Enye edi unwana nnyin,¹⁸ ndiwangai usung nnyin man ifiak inyong ufok.

Ami mbenge yak nnyin ikeme nditiene Andinyanga, ukem nte nnwan oro ke mben obube-mmong, inyung inwong odu-uwem mmong Esie. Diana ye mbon Samaria, nnyin ndien iyeting ite, “Ke emi nnyin imonim ke akpaniko, … edi koro nnyin ima ikokop ke idem nnyin, inyung ifiok ite, Owo emi edi Christ, Andinyanga ererimbot ke akpaniko.”¹⁹ Ke enying Jesus Christ, amen.