Ma, Buana, Kot
Nte nnyin imade, ibuana, inyung ikoot, nnyin idibuana ke akwa ye enyene-ubong utom emi ebenge-ke isong ono edifiak-ndi eke Messiah esie.
Kere ye ami, ke esisit ini, adade ke obot kiet ke Galilee, ndidi ntiense nno utibede ye ubong eke Andinyanga andikiset-ke-mkpa ekesede mbet Esie. Mkpaidem nkpo okpon didie ndikere nte okopde iko emi, emi Enye akabuanade ye mmo, ekpri ubiong Esie ete, “mbufo eka ekanam kpukpru mme idut edi mbet Mi, enim mmo baptism esin ke enying Ete ye Eyen ye Edisana Spirit.”1 Ke akpaniko, iko emi eyeno odudu, ifiok, onyung osongo nnyin owo kiet-kiet, nte mmɔ ekenamde mme Apostle Esie. Ke akpaniko, mmo ekeyak ofuri eyo uwem mmo esin ke edi-nam kpa oro.
Nte ededi, ikedihe mme Apostle kpot ekenam iko Jesus emi ikpong. Mme akpa-mbon Ufok Abasi, tongo ke ata mbufa owo kesim akpa ibon, ema ebe eduk ke akwa ikoot eke Andinyanga, ndibuana eti mbuk iko Abasi ye mbon emi mmo ekekutde enyung efiokde. Ubiere man ibuana ikontiense Jesus Christ ama anwam obufa Ufok Abasi Esie emi ekesiakde ke ndinehede nkori.2
Ekot nnyin nko, nte mbet eke Christ, ete inam ubiong emi mfin, ukem nte nnyin ikodu do ke obot oro ke Galilee nte Enye eketingde oro ke akpa ini. Utom emi ama afiak otongo ke 1830 kini ekemekde Joseph Smith ye Samuel eyeneka eren esie nte akpa okworo-iko eke Ufok Abasi Jesus Christ.3 Totongo kini oro, akande mme ɔkwɔrɔ-ikɔ 1.5 million esanga ke ofuri ererimbot ekpep kpukpru mme idut enyung enim batism eno mbon emi enyimede mbuk akwa idara eke mfiak-nda-ndi ikɔ Abasi emi.
Emi edi ukpep-nkpɔ nnyin. Edima udɔŋ nnyin.
Tonogode ke mkpri ndito nnyin kesim ikpɔ-owo kotu nnyin, nnyin iyomini eke nnyin idikeme edi-nam ikoot Andinyanga nyung mbuana iko Abasi ye mme idut efen ke ererimbot. Ami mmenim ke mbufo mkarawa ye nkaiferi ema ebɔ ukem ikoot oro eto prophet nnyin mkpong ke nte enye okokotde mbufoete ebenge-idem ndika mission ukem nte Andinyanga akanamde ye mme Apostle Esie.
Ukem nte mbon-itɔk ke itie utongo-itɔk, nnyin ibet ye udɔŋ inɔ ikoot eke otongo-itɔk, iyɔhɔ ye idiongo eke prophet, ɔnɔde uyo ete etɔŋɔ itɔk oro! Udong emi edi eti ye eke ifiok, nte ededi, yak nnyin ikere-ibanga mbume emi: Nsinam ke nnyin kpukpru itongo idahaemi?
Afo emekeme ndibup ete, “Didie ke ami nkeme ndidi okwor-iko ke miyirike idiongo enying?” Mme idɔhɔ idem nnyin ite, “Ekemek full time missionaries enim ete enam utom emi. Ami mkpama ndinwam edi ndusuk edi-di kini uwem ama ofon esisit.”
Ndito-eka irenowo ye iban, enehede emem akan oro! Ke inemesit, imikeme ndinam akwa ubiong eke Andinyanga ke ndimem, usung emi ekekpepde eno nnyin owo kiet-kiet tongo kini uyen: ma, buana, ndien kot.
Ma
Akpa nkpo emi nnyin ikemeke edi-nam edi ndima nte Christ aka-made.
Esit nnyin ofuhɔ oto ukut ye mfiomo uwem emi nnyin ikutde ke ererimbot ke mme ndutime ini emi. Nte ededi, nnyin nko imikeme ndisongo oto ke ediwak esit-mbom ye nti-edu emi mme owo enyenede ke ofuri ebiet ke ukeme mmo ndinwam mbon unana—mbon ekpongde ufokidung mmo, mbon ebahade ekpong ufɔkemana mmo, mme mbon ekutde mma ndaha ukut ye unana-idorenyin efen.
Mmi-mmi emi, etop emi ibɔde eting nte eboho mme eka-ndito ke Poland, ke ndikere mbanga mme ufokemana enyekde-idem, efehe, eyak nyɔhɔ uwere-nkpɔ nsek-nditɔ enim ke udim ke enyong mbehe train, eno mme eka ye ndito-nwong eke eyomde oro ke adanga-idung oro ke nte mmo ewɔrɔde ke train. Ke akpaniko, Ete nnyin ke Enyong enem esit abanga utom nwaidem ata-ima oruk nte enye emi,koro nte nnyin ibiomde mbiomo kiet eken, nnyin “imenim ibet Christ.”4
Ini ekededi emi nnyin iwutde mbiet ima inɔ mbɔhiduŋ nnyin, nnyin imikwɔrɔ iko Abasi—ekpedi ke nnyin itingke ikɔ ndomokiet.
Ndinyene ima nnɔ mbon efen edi uyo ediwut udiana akamba ibet ke ndima mbɔhidung nnyin;5 oro owut eti usung eke Edisana Spirit anamde utom ke ukpong nnyin. Ke ndiwut ima Christ nnɔ mbon efen, nnyin iyenam mbon eke ekutde nti utom nnyin “etoro Ete [nnyin] emi odude ke enyong.”5
Nnyin inam emi ke mikereke ibaŋa udori.
Idorenyin nnyin, nte ededi, edi ke mmɔ eyenyime ima ye etop nnyin, okposuk ke nte mmɔ enamde nkpɔ isineke ke odudu nnyin.
Se nnyin inam ye oruk owo eke nnyin idide esine ke odudu nnyin.
Otode ke ndinyene mbiet-ima Christ nno mbon efen, nnyin ikworo ye oyoho ubɔŋ, inyene edikpuho-uwem eke iko Abasi Christ, ndien nnyin ibuana akpan-akpan ke ndinam akwa ubiong Esie.
Buana
Udiana nkpɔ emi nnyin ikemeke ndinam edi ndibuana iko Abasi.
Kini akpa ofiong eke udongo COVID-19, Brother Wisan emi otode Thailand okoyom ndibuana ekikere ye udong esie ke se enye ekpepde oto enye edikot Nwed Mormon ke nkpɔ social media esie. Ke nkpo kiet emi enye ekewetde esie, enye ama abuana mbuk iba eke ɔkwɔrɔ-ikɔ iba eke Nwed Mormon, Alma ye Amulek.
Eyeneka eren esie, Winai, okposuk nte enimde ke edu-ukpono esie, ama oyuhɔ ke se enye ekewet ndien ɔbɔrɔ, ke ndibup ete, “Nte ami mekeme ndinyene nwed oro usem Thai?”
Wisan ama ebenge oyom Nwed Mormon emi mme sister missionaries iba edidade ikenɔ, emi eketɔŋɔde ndikpep eyeneka eren esie ikɔ Abasi.
Wiasan ama abuana ke ukpep oro ke nkpɔ-ofim, emi enye akabuanade ekikere esie kabanga Nwed Mormon. Wihai ekpep ndibong-akam nyung nkot ke spirit akpaniko, man enyime onyung ɔbɔ akpanikɔ. Ke esisit ofiong ifang, ema enim Wihai baptism!
Ekem Wisan ete, “Nnyin iminyene ubiɔŋ-utom ndidi nkpɔ-utom ke ubɔk Abasi, ndien ana nnyin ke kpukpru ini ibenge-idem ino Enye otode ke nnyin anam utom Esie ke usung Esie.” Utibe-nkpo eke ufokemana esie ama ada itie koro Wisan ama abuana iko Abasi ke eti ye ediye usung.
Kpukpru nnyin imisi-buana nkpo ye mbon efen. Nnyin imisnam oro ke ediwak ini. Nnyin imisi-buana sutɔ eses-ndise ye udia eke nnyin imade, mbre-nkpo eke nnyin ikutde, mme ebiet eke nnyin ikade, utom-usɔ eke nnyin imade, ikɔ-ibuot emi ekenemde nnyin.
Didie ke nnyin ikpidian ke ibat mme nkpɔ emi nnyin ikibemde-iso ibuana inɔ se nnyin imade kabanga ikɔ Abasi Jesus Christ?
Elder Dieter F. Uchtdorf ete, “Owo okpobup fi abanga weekend fo, kutre nditing mbanga ifiɔk-ukpep emi afo ekenyenede ke ufɔk Abasi. Ting banga mkpri nditv emi ekedade kiso otuowo ekwo ye udong ke nte mmo edomoke ndibiet Jesus. Ting banga eboho mme iwaad emi eyakde ini mmo ekenwam ikpɔ-owo ke ufɔk nduɔk-odudu man etum mbuk eke idem mmɔ.”7
Edibuana idihe ibanga “ndinya-nyam” iko Abasi. Inaha nte ewewet ukworo-iko mme ndinehede ukwang ekiekere eke owo efen.
Kini ebehede utom ukworo-iko, Abasi iyomde afo edi andino-mbet Esie, Enye eyeno, nte ededi, bup ete yak afo edi andibuana ikɔ Abasi Esie.
Nte ibuanade nti ifiok-ukpep nnyin eke iko Abasi ye mbon efen, nnyin imebuana ke akwa utom eke Andinyanga.
Ekoot
Oyoho nkpo ita emi nnyin ikemeke ndinam edi ndikot.
Sister Mayra edi obufa owo ufok Abasi otode Ecuador. Idara esie ke iko Abasi ɔsɔsɔp okpon etiene bpaism esie ke nte enye adade nkpɔ social media okot mme ufan ye ama esie ete edi.ufok Abasi. Ediwak mbon ufɔkemana ye ufan emi ekekutde se enye ewet ema ebɔrɔ ye mbume. Mayra ama eyiri ye mmo, awak ndikot mmɔ nka ufɔkidung esie man eksobo ye mme ɔkwɔrɔ-ikɔ Abasi otokiet.
Eka ye ete Mayra, nditɔ-eka esie, aunt esie, cousins mbiba, ye ediwak mme ufan esie ema ena baptism koro enye ama ɔsɔŋɔ okot mmɔ ete “edi edise,” “edi edinwam,” ye “edi edinyene.” Otode ke ata ye nsio-nim ikoot esie, ebede owo Edip ema enyime ikoot esie ena baptism edi mbon Ufok Abasi Jesus Christ. Emi eketibe koro Sister Mayra ama enehede okoot mbon efen ete edifiok idaresit emi enye okopde nte owo Ufok Abasi.
Odu ata ediwak ikoot emi nnyin ikemeke ndino mbon efen. Nnyin imikeme ndikot mbon efen ete “edi edise” esop udia-Obong, edinam eke ward, ndise-video eke nkpo-ofim emi anamde iko Abasi Jesus Christ anwanga. “Edi edise” ekeme ndi-di ikoot man okot Nwed Mormon mme ndikse obufa temple kini eberede enye mbemiso edi-diong enye. Ubakini ikoot oro edi nkpo emi nnyin inode ke esit-idem—emi ikotde idem nnyin, ndino nnyin ntat-enyin ye nkukut kabanga mme ifet anade ono nnyin ndinam utom.
Ke obufa eyo nnyin emi, mbon ufok Abasi esiwak ndibuana mme etop oto ke social media. Odu mme ndaha ikie, midige mme tɔsin, eke nti nkpɔ emi afo ekpekeme-ke ndinehede mbuana. Se isinede-ke-esit emi ɔnɔnɔ ikoot man “edi edise,” “edi edinwam,” ye “edi edinyene.”
Nte nnyin ikotde mbon efen ete edikpep awak ebanga iko Abasi Jesus Christ, nnyin imibuana ke ikoot Andinyanga ndinam utom ubiong Esie.
Akpatre
Ndima nditɔ-eka irenowo ye iban, nnyin imiting mfin kabanga ndimem nkpɔ ita—mmem-mmem nkpɔ—emi owo ekededi ekemede ndinam! Mme nkpɔ eke afo ekemede ndinam! Ndusuk afo ke ananam mmɔ—kpa mutimke ufiɔk ete ke afo ama ananam!
Ami nkot fi nte ekere-ebanga mme usung eke afo ekemeke ndima, mbuana, nyung nkot. Nte afo anamde ntre, afo eyekop udomo idara ndidiongo ke afo amanam mme iko eke edima Andinyanga nnyin.
Nkpɔ se ami nyom afo anam idihe obufa edi-nam. Afo ama ebebem-iso okop mme ukpep emi akpa. Emi idihe “udiana akwa nkpɔ efen” emi Ufɔk Abasi eyomde ete afo anam. Mme nkpɔ ita emi edi mkpri ediwut utɔ owo eke nnyin ikedide nte mme mbet Jesus Christ.
Owo iyomke idiɔŋɔ-enying mme efɔk-nwed.
Owo iyomke ata edinehede nnɔ-ikoot.
Nte nkpɔ ita emi akabare edi ata ubak eke owo emi nnyin idide ye nte nnyin idude uwem, mmɔ eyekabare usɔp-usɔp, ndimem ediwut ata ima.
Ukem nte mme mbet Jesus Christ emi ekebohode ɔtɔkiet man ekpep eto Enye ke Galilee ke isua Tɔsin iba emi ekebede, nnyin nko imikeme ndibɔ ubiong-utom Andinyanga nyung nka ke ofuri ererimbot nkekwɔrɔ ikɔ Abasi.
Nte nnyin imade, ibuana, inyung ikoot, nnyin idibuana ke akwa ye enyene-ubong utom emi ebenge-ke isong ono edifiak-ndi eke Messiah esie.
Man nnyin ikop ikoot eke Andinyanga inyung iwana ndinam akwa ubiong Esie edi ebenge mi ke enying Jesus Christ, amen.