இதுவே நேரம்
இப்பொழுதே நாம் கற்றுக்கொள்ள முடிகிற நேரம். இப்பொழுதே நாம் மனந்திரும்ப முடிகிற நேரம். இப்பொழுதே நாம் மற்றவர்களை ஆசீர்வதிக்க முடிகிற நேரம்.
என் அன்பு சகோதர சகோதரிகளே, இந்த மாபெரும் மாநாடு பல வழிகளில் வரலாற்று சிறப்பு மிக்கதாக உள்ளது. வழங்கப்பட்ட ஜெபங்கள், செய்திகள் மற்றும் இசையால் நாம் ஆசீர்வதிக்கப்பட்டுள்ளோம். கர்த்தருடைய ஊழியக்காரர்களால் நாம் உணர்த்தப்பட்டுள்ளோம்.
வருங்காலத்திற்கான முக்கியமான வழிகாட்டுதலை நாம் பெற்றுள்ளோம். கர்த்தர் நீங்கள் செய்ய விரும்பும் காரியங்களைப்பற்றி ஆவியானவர் உங்களிடம் நேரடியாகப் பேசியிருக்க வேண்டும் என்பதே என் ஜெபம்.
எதிர்காலம் எப்போதும் நிச்சயமற்றது. வானிலை மாறுகிறது. பொருளாதார சுழற்சிகள் கணிக்க முடியாதவை. இயற்கை பேரழிவுகள், விபத்துக்கள் மற்றும் நோய்கள் வாழ்க்கையை விரைவாக மாற்றலாம். இந்த செயல்கள் பெரும்பாலும் நமது தனிப்பட்ட கட்டுப்பாட்டிற்கு அப்பாற்பட்டவை. ஆனால் ஒவ்வொரு நாளும் நம் நேரத்தை எப்படி செலவிடுகிறோம் என்பது உட்பட, நம்மால் கட்டுப்படுத்தக்கூடிய காரியங்கள் உள்ளன.
நியூயார்க்கில் உள்ள வெல்ஸ் கல்லூரியில் ஒரு சூரியக் கடிகாரத்தில் பதிவிடப்பட்ட ஹென்றி வான் டைக்கின் இந்தக் கவிதை எனக்குப் பிடித்திருக்கிறது. அதில் எழுதப்பட்டிருக்கிறது:
என் விரல் படர்ந்த நிழல்
கடந்த காலத்திலிருந்து எதிர்காலத்தைப் பிரிக்கிறது:
அதற்கு முன், பிறக்காத மணிநேரம் தூங்குகிறது,
இருளில், மற்றும் உமது சக்திக்கு அப்பாற்பட்டது.
அதன் திரும்பி வராத கோட்டின் பின்னால்,
மறைந்த மணி, இனி உம்முடையது அல்ல:
ஒரு மணி நேரம் மட்டும் உமது கையில் இருக்கிறது,
இப்போது அதன்மீது நிழல் நிற்கிறது.1
ஆம், கடந்த காலத்திலிருந்து நாம் கற்றுக்கொள்ளவேண்டும், ஆம், எதிர்காலத்திற்காக நாம் ஆயத்தப்பட வேண்டும். ஆனால் இப்போதுதான் நம்மால் முடியும். இப்பொழுதே நாம் கற்றுக்கொள்ள முடிகிற நேரம். இப்பொழுதே நாம் மனந்திரும்ப முடிகிற நேரம். இப்பொழுதே நாம் மற்றவர்களை ஆசீர்வதிக்கவும் “தொங்கும் கைகளை திரும்ப நிமிர்த்தவும்”2 முடிகிற நேரம். மார்மன் தனது மகன் மரோனிக்கு அறிவுரை கூறியது போல், “நாம் கருத்தாய் பிரயாசப்படுவோமாக; … ஏனெனில் நாம் எல்லா நீதிக்கும் சத்துருவானவனை மேற்கொள்ளவும், நம்முடைய ஆத்துமாக்கள் தேவ ராஜ்யத்தில் இளைப்பாறத்தக்கதாகவும், நாம் இந்தக் களிமண்ணாலான வாசஸ்தலத்திலிருக்கும்போது நாம் செய்யவேண்டிய வேலை ஒன்று உண்டு.”3
சத்துரு ஒருபோதும் உறங்குகிறதில்லை. உண்மைக்கு எப்போதும் எதிர்ப்பு இருக்கும். உங்கள் நேர்மறை ஆவிக்குரிய வேகத்தை அதிகரிக்கும் அந்த காரியங்களை செய்யவும், எம்மாதிரி சவால்களும் வாய்ப்புகளும் வந்தாலும் உங்களை முன்னோக்கி நகர்த்துவதற்கும், இன்று காலையிலிருந்து என் வற்புறுத்தலை மீண்டும் சொல்கிறேன்.
ஆலயத்தில் நாம் வழிபடும்போதும், அங்கு நாம் பெறும் ஆசீர்வாதங்களின் மகத்தான அகலம் மற்றும் ஆழத்தைப்பற்றிய புரிதல் வளரும்போதும் நேர்மறையான ஆவிக்குரிய வேகம் அதிகரிக்கிறது. ஆலயத்தின் நித்திய ஆசீர்வாதங்களில் கவனம் செலுத்துவதன் மூலம் உலக வழிகளை எதிர்கொள்ள நான் உங்களிடம் கெஞ்சுகிறேன். அங்கு உங்கள் நேரம் நித்தியத்திற்கான ஆசீர்வாதங்களைக் கொண்டுவருகிறது.
சபை வளர்ந்து வரும் நிலையில், மேலும் பல ஆலயங்களைக் கட்டுவதில், வேகத்தைத் தக்கவைக்க நாம் முயற்சி செய்கிறோம். நாற்பத்து நான்கு புதிய ஆலயங்கள் தற்போது கட்டப்பட்டு வருகின்றன. அதிக ஆலயங்கள் புதுப்பிக்கப்பட்டு வருகின்றன. உலகெங்கிலும் உள்ள அந்தத் திட்டங்களில் உழைக்கும் திறமைமிக்க மக்களுக்காக நான் ஜெபிக்கிறேன்.
ஜெபத்தின், நன்றியுணர்வில் பின்வரும் ஒவ்வொரு இடத்திலும் ஒரு புதிய ஆலயத்தைக் கட்டுவதற்கான நமது திட்டங்களை அறிவிப்பதில் மகிழ்ச்சி அடைகிறேன்: வெலிங்டன், நியூசிலாந்து; பிராசவிலே, காங்கோ குடியரசு; பார்சிலோனா, ஸ்பெயின்; பர்மிங்காம், யுனைட்டட் கிங்டம்; குஸ்கோ, பெரு; மேசியோ, பிரேசில்; சாண்டோஸ், பிரேசில்; சான் லூயிஸ் போடோசி, மெக்சிகோ; மெக்ஸிகோ சிட்டி பெனெமெரிட்டோ, மெக்சிகோ; தம்பா, புளோரிடா; நாக்ஸ்வில்லே, டென்னசி; கிளீவ்லேண்ட், ஓஹியோ; விசிட்டா, கன்சாஸ்; ஆஸ்டின், டெக்சாஸ்; மிசோலா, மொன்டானா; மாண்ட்பெலியர், ஐடஹோ; மற்றும் மொடெஸ்டோ, கலிபோர்னியா.
திரையின் இருபுறத்திலுமுள்ள அநேக ஜனங்களின் வாழ்க்கையை இந்த பதினேழு புதிய ஆலயங்கள் ஆசீர்வதிக்கும். அன்புள்ள சகோதர சகோதரிகளே நான் உங்களை நேசிக்கிறேன். மிக முக்கியமாக கர்த்தர் உங்களை நேசிக்கிறார். அவரே உங்கள் இரட்சகர் மற்றும் உங்கள் மீட்பர். அவர் தனது சபையை வழிநடத்தி, வழிகாட்டுகிறார். “நீங்கள் என் ஜனமாயிருப்பீர்கள், நான் உங்கள் தேவனாயிருப்பேன்”4 என்று சொன்ன கர்த்தருக்குப் பாத்திரமான ஜனமாக இருப்போம்.
இதற்காக நான் இயேசு கிறிஸ்துவின் பரிசுத்த நாமத்தில் ஜெபிக்கிறேன், ஆமென்.