தேவனுடன் நமது உறவு
நம்முடைய அநித்திய அனுபவம் எதுவாக இருந்தாலும், நாம் தேவனை நம்பலாம், அவரில் மகிழ்ச்சியைக் காணலாம்.
பழைய ஏற்பாட்டில் உள்ள யோபு போல், துன்பத்தின் போது தேவன் தங்களைக் கைவிட்டதாக சிலர் நினைக்கலாம். எந்தவொரு துன்பத்தையும் தடுக்கும் அல்லது அகற்றும் வல்லமை தேவனுக்கு உண்டு என்பதை நாம் அறிந்திருப்பதால், அவர் அதைச் செய்யவில்லை என்றால், ஒருவேளை, “தேவன் நான் ஜெபிக்கும் உதவியை வழங்கவில்லை என்றால், நான் எப்படி அவர் மீது விசுவாசம் வைப்பது?” என்ற கேள்வி எழலாம். அவனுடைய கடுமையான சோதனைகளின் ஒரு கட்டத்தில், நீதியுள்ள யோபு கூறினான்:
“தேவன் என்னைக் கவிழ்த்து, தம்முடைய வலையை என்மேல் வீசினார்.
“இதோ, ‘கொடுமை என்று கூப்பிடுகிறேன்!’ கேட்பார் ஒருவரும் இல்லை, கூக்குரலிடுகிறேன், நியாயவிசாரணை இல்லை.”1
யோபுவுக்கு அவர் அளித்த பதிலில், “நீயே என் நியாயத்தை அவமாக்குவாயோ, நீ உன்னை நீதிமானாக்கிக் கொள்ளும்படிக்கு என்மேல் குற்றஞ் சுமத்துவாயோ?”2 என்று தேவன் கோருகிறார். அல்லது வேறு வார்த்தைகளில் எனில், “நீ என்னை அவமாக்குவாயோ? நீ உன்னை நீதிமானாக்கிக் கொள்ளும்படிக்கு என்மேல் குற்றஞ் சுமத்துவாயோ?”3 யேகோவா தனது சர்வ வல்லமை மற்றும் சர்வ அறிவாற்றலை யோபுவுக்கு வலுக்கட்டாயமாக நினைவூட்டுகிறார், மேலும் தேவனின் அறிவு, ஆற்றல் மற்றும் நீதிக்கு அருகில் எதுவும் தன்னிடம் இல்லை என்றும், சர்வவல்லமையுள்ளவரின் தீர்ப்பில் நிற்க முடியாது என்றும் ஆழ்ந்த மனத்தாழ்மையுடன் யோபு ஒப்புக்கொள்கிறான்:
அவன் சொன்னான், “தேவரீர் சகலத்தையும் செய்ய வல்லவர், நீர் செய்ய நினைத்தது தடைபடாது என்பதை அறிந்திருக்கிறேன்.
“… நான் எனக்குத் தெரியாததையும், என் புத்திக்கு எட்டாததையும். நான் அறியாததையும் அலப்பினேன் என்கிறேன். …
“ஆகையால் நான் என்னை அருவருத்து, தூளிலும் சாம்பலிலும் இருந்து மனஸ்தாபப்படுகிறேன்”4 என அவன் சொன்னான்.
இறுதியில், யோபு கர்த்தரைக் காணும் பாக்கியத்தைப் பெற்றான், “கர்த்தர் யோபின் முன்னிலைமையைப் பார்க்கிலும் அவன் பின்நிலைமையை ஆசீர்வதித்தார்.”5
நமது அநித்திய கிட்டப்பார்வையைக் கொண்ட நாம் தேவனை நியாயந்தீர்ப்பதாகக் கருதுவது, உதாரணமாக, “நான் மகிழ்ச்சியாக இல்லை, அதனால் தேவன் ஏதாவது தவறு செய்துகொண்டிருக்க வேண்டும்” என்பதாகும். கடந்த காலம், நிகழ்காலம் மற்றும் எதிர்காலத்தைப்பற்றி மிகக் குறைவாகவே அறிந்திருக்கும், வீழ்ச்சியுற்ற உலகில் உள்ள அவரது அநித்தியப் பிள்ளைகளான நமக்கு, அவர் அறிவிக்கிறார், “சகல காரியங்களையும் நான் அறிந்திருப்பதால் அவைகள் என்னுடனே இருக்கின்றன.”6 யாக்கோபு புத்திசாலித்தனமாக எச்சரித்தான்: “கர்த்தருக்கு ஆலோசனைகூற நாடாமல், அவரின் கரத்திலிருந்து ஆலோசனையைப் பெற்றுக்கொள்ளத் தேடுங்கள். ஏனெனில் இதோ, தம் எல்லா கிரியைகளைப்பற்றியும், அவர் ஞானத்திலும், நீதியிலும் மகா இரக்கத்தோடு ஆலோசனை கொடுக்கிறார், என்பதை நீங்களே அறிந்திருக்கிறீர்கள்.”7
தேவனுக்குக் கீழ்ப்படிவது ஒரு குறிப்பிட்ட கால அட்டவணையில் குறிப்பிட்ட பலனைத் தரும் என்று சிலர் தேவனின் வாக்குறுதிகளை தவறாகப் புரிந்துகொள்கிறார்கள். “நான் முழுநேர ஊழியத்தை விடாமுயற்சியுடன் செய்தால், தேவன் எனக்கு மகிழ்ச்சியான திருமணத்தோடும் பிள்ளைகளோடும் ஆசீர்வதிப்பார்” அல்லது “ஓய்வுநாளில் பள்ளிப் படிப்பைத் தவிர்த்துவிட்டால், தேவன் என்னை நல்ல மதிப்பெண்களால் ஆசீர்வதிப்பார்” அல்லது “நான் தசமபாகம் கொடுத்தால், நான் விரும்பிய அந்த வேலையோடு தேவன் என்னை ஆசீர்வதிப்பார்” என்று அவர்கள் நினைக்கலாம். . வாழ்க்கை துல்லியமாக இந்த வழியில் அல்லது எதிர்பார்க்கப்படும் கால அட்டவணையின்படி நடக்கவில்லை என்றால், அவர்கள் தேவனால் காட்டிக் கொடுக்கப்பட்டதாக உணரலாம். ஆனால் தெய்வீகப் பொருளாதாரத்தில் காரியங்கள் அவ்வளவு இயந்திரத்தனமாக இல்லை. நாம் (1) விரும்பிய ஆசீர்வாதத்தைத் தேர்ந்தெடுத்து, (2) தேவையான நற்செயல்களின் தொகையைச் செருகி, (3) விண்ணப்பம் உடனடியாக அனுப்பப்படும் என, தேவனின் திட்டத்தை ஒரு பிரபஞ்ச விற்பனை இயந்திரம் என்று நாம் நினைக்கக் கூடாது.8
தேவன் நம் ஒவ்வொருவருக்கும் தம் உடன்படிக்கைகளையும் வாக்குறுதிகளையும் உண்மையாகவே மதிப்பார். நாம் அதைப்பற்றிக் கவலைப்படத் தேவையில்லை.9 வானத்திலும் பூமியிலும்11 சகல அதிகாரமும் கொடுக்கப்பட்டிருந்த அவர் உன்னதத்திற்கு ஏறி,10 சகலவற்றிற்கும் கீழேயும் இறங்கிய இயேசு கிறிஸ்துவின் பாவநிவாரண வல்லமை, தேவன் தம்முடைய வாக்குத்தத்தங்களை நிறைவேற்றுவார் என உறுதியளிக்கிறது. அவருடைய நியாயப்பிரமாணங்களை நாம் மதிப்பதும் கடைப்பிடிப்பதும் இன்றியமையாதது, ஆனால் நியாயப்பிரமாணத்திற்குக்12 கீழ்ப்படிவதன் மூலம் முன்னறிவிக்கப்பட்ட ஒவ்வொரு ஆசீர்வாதமும் நமது எதிர்பார்ப்புகளுக்கு ஏற்ப உருவமைக்கப்பட்டு, வடிவமைக்கப்பட்டு, நேரம் ஒதுக்கப்படுவதில்லை. நாம் சிறந்ததைச் செய்கிறோம், ஆனால் உலகப்பிரகாரமான, ஆவிக்குரிய ஆசீர்வாதங்களின் நிர்வாகத்தை அவருக்கு விட்டுவிட வேண்டும்.
அவரது விசுவாசம் சில விளைவுகள் அல்லது ஆசீர்வாதங்களின் மீது கட்டமைக்கப்படவில்லை, மாறாக இயேசு கிறிஸ்துவுடனான அவரது சாட்சி மற்றும் உறவின் மீது கட்டப்பட்டது என்று தலைவர் பிரிகாம் யங் விளக்கினார். அவர் கூறினார்: “கர்த்தர் சமுத்திரத்தின் தீவுகளில் வேலை செய்வதிலும், மக்களை அவர் இங்கு வரவழைப்பதிலும், … அல்லது இந்த மக்களுக்கு அல்லது அந்த மக்களுக்கு அவர் செய்யும் தயவின் மீதும், நாம் ஆசீர்வதிக்கப்பட்டவர்களா இல்லையா என்பதன் மீதும் என் விசுவாசம் வைக்கப்படவில்லை. ஆனால் என் விசுவாசம் கர்த்தராகிய இயேசு கிறிஸ்துவின் மேல் வைக்கப்பட்டுள்ளது, மேலும் என்னுடைய அறிவை அவரிடமிருந்து பெற்றேன்.”13
நம்முடைய மனந்திரும்புதலும், கீழ்ப்படிதலும், நம்முடைய சேவையும், நம்முடைய தியாகங்களும் முக்கியமானவை. “நற்கிரியைகளில் எப்போதும் பெருகுகிறவர்களாய் இருக்க”14 ஏத்தேரால் விவரிக்கப்பட்டவர்கள் மத்தியில் நாமும் இருக்க விரும்புகிறோம் ஆனால் செலஸ்டியல் கணக்கு புத்தகங்களில் வைக்கப்பட்டுள்ள சில எண்ணிக்கை நிமித்தம் அது அவ்வளவு இல்லை. இந்த காரியங்கள் முக்கியமானவை, ஏனென்றால் அவை தேவனின் வேலையில் நம்மை ஈடுபடுத்துகின்றன மற்றும் சுபாவ மனிதனிலிருந்து பரிசுத்தராக நம்முடைய சொந்த மாற்றத்தில் நாம் அவருடன் ஒத்துழைக்கும் வழிமுறையாகும்.15 அவருடைய குமாரனும், நம்முடைய மீட்பருமாகிய இயேசு கிறிஸ்துவின் கிருபை மற்றும் மத்தியஸ்தம் மூலம் அவருடன் நெருக்கமான மற்றும் நீடித்த உறவுமாகிய அவரையே நம்முடைய பரலோக பிதா நமக்கு வழங்குகிறார்.
நாம் தேவனின் பிள்ளைகள், அநித்திய மற்றும் நித்திய வாழ்வுக்காக வைக்கப்பட்டுள்ளோம். “கிறிஸ்துக்குள் உடன் சுதந்தரரான” அவருடைய சுதந்தரர்களாக இருக்க வேண்டும் என்பதே நமது இலக்கு.16 நம்முடைய தனிப்பட்ட தேவைக்காக வடிவமைக்கப்பட்ட படிகள் மற்றும் அவருடனான நமது இறுதி மகிழ்ச்சிக்கான அவரது திட்டத்திற்கு ஏற்றவாறு அவருடைய உடன்படிக்கையின் பாதையில் நம் ஒவ்வொருவரையும் வழிநடத்த நம் பிதா ஆயத்தமாக இருக்கிறார். பிதா மற்றும் குமாரன் மீது வளர்ந்து வரும் நம்பிக்கை மற்றும் விசுவாசம், அவர்களின் அன்பின் அதிகரிப்பு மற்றும் பரிசுத்த ஆவியின் நிலையான ஆறுதல் மற்றும் வழிகாட்டுதல் ஆகியவற்றை நாம் எதிர்பார்க்கலாம்.
அப்படி இருந்தும் இந்த பாதை நம்மில் யாருக்கும் சுலபமாக இருக்க முடியாது. அது எளிதாக இருக்க, அதிக சுத்திகரிப்பு தேவைப்படுகிறது. இயேசு சொன்னார்:
“நான் மெய்யான திராட்சச்செடி, என் பிதா திராட்சத் தோட்டக்காரர்.
“என்னில் கனிகொடாதிருக்கிற கொடி எதுவோ அதை அவர் அறுத்துப்போடுகிறார், கனி கொடுக்கிற கொடி எதுவோ அது அதிக கனிகளைக் கொடு்க்கும்படி அதைச் களையெடுக்கிறார்.”17
தேவன் வழிநடத்தும் அவசியமான களையெடுத்தல் மற்றும் சுத்திகரிப்பின் செயல்முறை, சில சமயங்களில் மிகவும் நொறுக்குகிறதாகவும் வேதனையாகவும் இருக்கும். பவுலின் வார்த்தைகளை நினைவுபடுத்தும்போது, நாம் “கிறிஸ்துக்கு உடன் சுதந்தரருமாமே, கிறிஸ்துவுடனேகூட நாம் மகிமைப்படும்படிக்கு, அவருடனேகூட பாடுபட்டால், அப்படியாகும்.”18
ஆகவே, இந்த புடமிடுபவரின் நெருப்பின் மத்தியிலும், தேவனிடம் கோபப்படுவதை விட, தேவனிடம் நெருங்குங்கள். குமாரனின் நாமத்தில் பிதாவை அழையுங்கள். நாளுக்கு நாள் அவர்களுடன் ஆவியில் நடக்கவும். காலப்போக்கில் அவர்கள் உங்களிடம் தங்கள் இணக்கத்தை வெளிப்படுத்த அனுமதிக்கவும். அவர்களை உண்மையாக அறிந்துகொள்ளுங்கள், உங்களையும் உண்மையாகவே அறிந்துகொள்ளுங்கள்.19 தேவன் ஜெயம் கொள்வாராக.20 இரட்சகர் நமக்கு உறுதியளிக்கிறார்:
“அவருக்கு முன்பாக உங்களுக்காக வேண்டிக்கொண்டிருக்கிற பிதாவிடம் பரிந்து பேசுகிற அவர் சொல்வதைக் கவனியுங்கள்,
“அவர் சொல்லுகிறார்: பிதாவே, நீர் பிரியமாயிருந்த, பாவம் செய்யாத அவரின் பாடுகளையும் மரணத்தையும் பாரும்; சிந்தப்பட்ட உமது குமாரனின் இரத்தத்தை, நீர் மகிமையடையும்படியாக நீர் கொடுத்த அவரது இரத்தத்தைப் பாரும்,
“ஆகவே, பிதாவே, அவர்கள் என்னிடத்திற்கு வந்து நித்திய ஜீவனை அடையும்படியாக எனது நாமத்தில் நம்பிக்கையுள்ள எனது இந்த சகோதரர்களை [எனது சகோதரிகளையும்] தப்பவிடும்.”21
தேவனை நம்பிய விசுவாசமிக்க ஆண்கள் மற்றும் பெண்களின் சில உதாரணங்களைக் கவனியுங்கள், அவருடைய வாக்குறுதியளிக்கப்பட்ட ஆசீர்வாதங்கள் வாழ்விலும் சாவிலும் அவர்கள்மீது இருக்கும். அவர்களுடைய விசுவாசம் தேவன் ஒரு குறிப்பிட்ட சூழ்நிலையிலோ அல்லது தருணத்திலோ என்ன செய்தார் அல்லது செய்யவில்லை என்பதன் அடிப்படையில் அல்ல, மாறாக அவரைத் தங்கள் கருணையுள்ள பிதாவாகவும், இயேசு கிறிஸ்துவை தங்கள் உண்மையுள்ள மீட்பராகவும் அறிந்துகொள்வதன் அடிப்படையில் அமைந்தது.
எல்கெனாவின் எகிப்திய ஆசாரியனால் ஆபிரகாம் பலியிடப்பட இருந்தபோது, அவனைக் காப்பாற்றும்படி அவன் கூக்குரலிட்டான், தேவன் செய்தார்.22 ஆபிரகாம் விசுவாசிகளின் தந்தையாகுவதற்கு வாழ்ந்தார், அவனுடைய சந்ததியின் மூலம் பூமியிலுள்ள அனைத்து குடும்பங்களும் ஆசீர்வதிக்கப்படும்.23 முன்னதாக, “தங்களின் நற்குணத்தினிமித்தம், மரத்தால் அல்லது கல்லால் உண்டாக்கப்பட்ட தேவர்களுக்கு அவர்கள் தலைவணங்காதிருந்ததால்,”24 இந்த கன்னிகைகள் இதே பலிபீடத்தில் இதே எல்கெனாவின் ஆசாரியனால் பலிசெலுத்தப்பட்டார்கள். இரத்த சாட்சிகளாக அவர்கள் அங்கே மரித்தார்கள்.
தனது சொந்த சகோதரர்களால் இளைஞனாக, பழைய யோசேப்பு, அடிமையாக விற்கப்பட்டான், தனது வேதனையில் தேவனிடம் அவன் திரும்பினான். படிப்படியாக, அவன் எகிப்தில் உள்ள தனது எஜமானனின் வீட்டில் பிரபலமடைந்தான், ஆனால் போத்திபாரின் மனைவியின் பொய்யான குற்றச்சாட்டுகளால் இந்த எல்லா முன்னேற்றமும் பறிக்கப்பட்டது. “கற்புடமை நியாயப்பிரமாணத்தைக் கடைப்பிடிப்பதால் எனக்குக் கிடைப்பது சிறைதான்” என்று யோசேப்பு நினைத்திருக்கலாம். மாறாக அவன் மீண்டும் தேவனிடம் திரும்பி, சிறையிலும் செழிப்பானான். அவன் நட்பாகப் பழகிய கைதி, யோசேப்புக்கு உதவுவதாக வாக்குறுதி அளித்த போதிலும், பார்வோனின் நீதிமன்றத்தில் அவனுக்குரிய நிலைக்குத் திரும்பிய பிறகு, அவனைப்பற்றிய அனைத்தையும் மறந்துவிட்டதால், யோசேப்பு நசுக்கப்பட்ட ஏமாற்றத்தை அனுபவித்தான். காலப்போக்கில், உங்களுக்குத் தெரிந்தபடி, பார்வோனுக்கு அடுத்தபடியாக நம்பிக்கை மற்றும் அதிகாரத்தின் மிக உயர்ந்த பதவியில் யோசேப்பை வைக்க கர்த்தர் தலையிட்டார், இஸ்ரவேல் வீட்டாரைக் காப்பாற்ற யோசேப்புக்கு உதவினார். “தேவனிடத்தில் அன்புகூருகிறவர்களுக்குச் சகலமும் நன்மைக்கு ஏதுவாக நடக்கிறதென்று”25 நிச்சயமாக யோசேப்பு சான்றளிக்க முடியும்.
அபிநாதி தனது தெய்வீக ஆணையை நிறைவேற்றும் நோக்கத்தில் இருந்தான். “என் செய்தியை முடித்துக்கொள்கிறேன். அதன் பின்பும் [எனக்கு என்ன நடக்கும்], பிழைத்திருப்பேன் எனில் நான் செல்லும் இடம் முக்கியமானதாயிராது”26 என அவன் சொன்னான். அவன் ஒரு இரத்த சாட்சியின் மரணத்திலிருந்து காப்பாற்றப்படவில்லை, ஆனால் அவன் நிச்சயமாக தேவனின் ராஜ்யத்தில் இரட்சிக்கப்பட்டான், மேலும் அவனுடைய ஒரு மதிப்புமிக்க மனமாறிய ஆல்மா, கிறிஸ்துவின் வருகைக்கு வழிவகுத்த நேபியரின் வரலாற்றின் போக்கை மாற்றினான்.
ஆல்மாவும் அமுலேக்கும் அம்மோனிக்காவில் இருந்து அவர்களின் வேண்டுகோளுக்கு பதிலளிக்கும் வகையில் விடுவிக்கப்பட்டனர், அவர்களை துன்புறுத்தியவர்கள் கொல்லப்பட்டனர்.27 இருப்பினும், முன்னதாக, இதே துன்புறுத்துபவர்கள் விசுவாசிகளான பெண்களையும் பிள்ளைகளையும் கர்ஜிக்கும் நெருப்பில் தள்ளினார்கள். ஆல்மா, வேதனையில் கொடூரமான காட்சியைக் கண்டு, அவர்கள் தேவனிடம் மகிமையுடன் ஏற்றுக்கொள்ளப்படுவதற்காக, “அவர்களை நெருப்பிலிருந்து காப்பாற்ற”28 தேவனின் வல்லமையைப் பயன்படுத்த வேண்டாம் என்று பரிசுத்த ஆவியால் கட்டுப்படுத்தப்பட்டான்.29
குளிர்காலத்தின் கடும் குளிரில் பரிசுத்தர்கள் கொள்ளையடிக்கப்பட்டு வீடுகளை விட்டு விரட்டப்பட்டதால் அவர்களுக்கு உதவ சக்தியில்லாமல் ஜோசப் ஸ்மித் தீர்க்கதரிசி, மிசோரியின் லிபர்ட்டி சிறையில், தவித்தார். “தேவனே, நீர் எங்கே இருக்கிறீர்?” ஜோசப் கூக்குரலிட்டார். “எம்மட்டும் உமது கரம் தடுக்கப்படும்?”30 பதிலுக்கு தேவன் வாக்களித்தார்: “உன்னுடைய இக்கட்டுகளும் உன்னுடைய உபத்திரவங்களும் ஒரு சிறிய சமயத்திற்கு மட்டுமே, பின்னர், நீ அதில் நன்றாய் நிலைத்திருந்தால் தேவன் உன்னை உன்னதத்திற்கு உயர்த்துவார். … நீ இன்னும் யோபுவைப் போலில்லை.”31
இறுதியில், ஜோசப் “[தேவன்] என்னைக் கொன்றுபோட்டாலும், நான் அவர்மேல் நம்பிக்கையாயிருப்பேன்”32 என யோபுவுடன் அறிவிக்க முடிந்தது.
சாதாரண கண்பார்வையுடன் பிறந்து, ஆனால் 11 வயதிற்குள் பார்வையற்றவரான சகோதரி பாட்ரிசியா பார்கின்சன் கதையை மூப்பர் ப்ரூக் பி. ஹேல்ஸ் சொன்னார்.
மூப்பர் ஹேல்ஸ் நினைவூட்டினார்: “அநேக ஆண்டுகளாக பாட்டை எனக்குத் தெரியும், அவள் எப்போதும் நேர்மறையாகவும் மகிழ்ச்சியாகவும் இருக்கிறாள் என்ற உண்மை என்னைக் கவர்கிறது என அண்மையில் அவளிடம் கூறினேன். அவள் பதிலளித்தான், ‘சரி, என்னோடு நீங்கள் வீட்டில் இருந்ததில்லையா? எனக்கான நேரங்கள் உண்டு. எனக்கு கடுமையான மனச்சோர்வு இருந்தது, நான் அதிகம் அழுதிருக்கிறேன்.” எனினும் அவள் சொன்னாள், ‘நான் பார்வையை இழக்கத் தொடங்கிய காலத்திலிருந்து, அது விசித்திரமாக இருந்தது, ஆனால் பரலோக பிதாவும் இரட்சகரும் என் குடும்பத்துடனும் என்னுடனும் இருப்பதை நான் அறிந்தேன். … நான் குருடியாக இருப்பதால், நான் கோபமாக இருக்கிறேனா என கேட்பவர்களுக்கு பதிலளிக்கிறேன், ‘நான் யாரிடம் கோபப்பட வேண்டும்? இந்த காரியத்தில் பரலோக பிதா என்னுடன் இருக்கிறார்; நான் தனியாக இல்லை. அவர் எல்லா நேரத்திலும் என்னோடு இருக்கிறார்.’”33
இறுதியில், பிதாவோடும் குமாரனோடும் நெருங்கிய, நிலையான உறவின் ஆசீர்வாதத்தை நாம் தேடுகிறோம். இது எல்லா வித்தியாசங்களையும் ஏற்படுத்துகிறது, எப்போதும் விலைக்கு தகுதியாயுள்ளது. “இக்காலத்து பாடுகள் இனி நம்ல் வெளிப்படும் மகிமைக்கு ஒப்பிடத் தக்கவைகள் அல்ல”34 என பவுலோடு நாமும் சாட்சியளிப்போம். நம்முடைய அநித்திய அனுபவம் எதுவாக இருந்தாலும், நாம் தேவனை நம்பலாம், அவரில் மகிழ்ச்சியைக் காணலாம் என்று நான் சாட்சி கூறுகிறேன்
“உன் சுயபுத்தியின்மேல் சாயாமல், உன் முழுஇருதயத்தோடும், கர்த்தரில் நம்பிக்கையாயிருந்து,
“உன் வழிகளெல்லாம் அவரை நினைத்துக்கொள், அப்பொழுது அவர் உன் பாதைகளைச் செவ்வைப்படுத்துவார்”.35
இயேசு கிறிஸ்துவின், நாமத்தினாலே, ஆமென்.