Yeruhu Jesus Christ Yie wɔ Hɛn Abrabɔ Mu.
Agyenkwa no to nsa frɛ hɛn dɛ yɛnhwɛ hɛn abrabɔ dɛ mbrɛ Ɔno hu, ama yeehu No yie wɔ hɛn abrabɔ mu.
Nuambanyin na nkyerɛmbaa, ahobrɛdze mu na medze gyina hom enyim ha anapa yi. Medze m’akoma kã hom dze ho wɔ ndaase mu dɛ yeehyia mu, beebiara a hom wɔ wɔ wiadze biara, rebetsie nsɛm efi nkɔnhyɛfo, asomafo, adzehufo, nyikyerɛfo, na baanodzifo hɔ wɔ Nyankopɔn n’ahenman mu. Yɛayɛ tse dɛ nkorɔfo a wɔwɔ Ɔhen Benjamin ne nda mu, wɔbobɔ hɔn asese na wobuebue hɔn mbobow na wɔdze kyerɛɛ Nyankopɔn ne nkɔnhyɛnyi wɔ asaase yi do,1 President Russell M. Nelson.
Mber tsentsen na munntum kae dɛ nna munnhu adze papa na nna oekehia dɛ aber nyina mehyɛ ahwehwɛ-enyiwa dze tsen m’adzehwɛ. Sɛ mubue m’enyiwa anapa biara, nna ɔyɛ dɛ ma wiadze ayɛ basaa ankasa. Adzebiara fi n’ananmu, yɛ nsisisisii, na wɔkyeakyea. Mo kun dɔfo mpo sesa yɛ mfonyin bi a ɔnye no nnsɛ dɛ no bɔbea no a ɔyɛ ahomka na m’enyi gye ho ankasa no! Dza meyɛ a monndwen ho, ansaana mebɛyɛ biribiara wɔ me da n’ahyɛse no, nye dɛ metsen me nsa hwehwɛ m’ahwehwɛ-enyiwa ma ɔaboa me ma meehu dza woetwa moho ehyia na meenya hyewbɔ sũahu ber a ɔboa me ma motwa da no nyina.
Mfe etwa mu no, meebohu dɛ suban yi kyerɛ dɛ me daa daa no gyina ndzɛmba ebien do: odzi kan, edwindze a ɔboa me ma muhu wiadze dɛ mbrɛ nokwar ara ɔtse pefee; na otsĩa ebien, ohia ma akwankyerɛ ankasa ma ɔakɔ do akyerɛ me akɔ kwan a ɔtsen mu. Daa daa nyɛe a ɔnnyɛ dzen no, ma muhu hɛn nkitahodzi a yɛnye hɛn Agyenkwa, Jesus Christ yɛ ne saso.
Hɛn abrabɔ mu a daa na nsɛmbisa, ɔhaw ahomtsew, na akwanhorow ahyɛ mu mã no, hɛn Agyenkwa no dɔ ma hɛn ankorankor na dɛ yɛyɛ N’ahyɛmu mba na Ne nkyerɛkyerɛ na mbra a ɔkã ho no, yɛ daa daa mboa horow a wɔwɔ hɔ a yebotum yɛatwer ma yɛayɛ “kan a ɔhyerɛn, … obue [hɛn] enyiwa [na] okenyan [hɛn] ntseasee.’’2 Sɛ yɛhwehwɛ Sunsum ne nhyira horow wɔ hɛn abrabɔ mu a, yebotum, dɛ mbrɛ Jacob kyerɛkyerɛɛ no, ehu “ndzɛmba dɛ mbrɛ wɔtse pɛpɛɛpɛr, na … dɛ mbrɛ wɔbɛyɛ pɛpɛɛpɛr.’’3
Dɛ Nyankopɔn n’ahyɛmu mba no, wɔdze edwindze krɔnkrɔn beberee ama hɛn dze ehyira hɛn soronko ma yeetu hɛn sunsum mu adzehu mpon. Jesus Christ ne nkyerɛkyerɛ na ne nsɛm dɛ mbrɛ wɔakyerɛw no wɔ kyerɛwsɛm mu na nsɛm fi No nkɔnhyɛfo a wɔasan mu eyi hɔn, na No Sunsum a yedua daa daa mpaabɔ do nya, temple nkɔree a yɛtɔ kɔ do, na dapɛn dapɛn sacrament ayɛdze no botum aboa dze asomdwee aba na wɔama nhumu akyɛdze a ohia a ɔdze Christ ne kan na Ne ntseasee aba hɛn abrabɔ no duodoo mu na wiadze a wɔayɛ wusiwusiw mu. Agyenkwa no so botum ayɛ hɛn kɔmpas na hɛn hɛnkanyi ber a yetwuw dua abrabɔ no nsu a ɔyɛ a wɔataa dzinn anaa ɔyɛ begyabegya no mu. Obotum ama anamɔn kwan a ɔtsen ayɛ petee a ogya hɛn kɔn hɛn onnyiewiei fie. Ntsi no, ebɛnadze na Ɔpɛ dɛ yehwɛ, na henfa na Ɔpɛ dɛ yɛkɔ?
Hɛn nkɔnhyɛnyi dɔfo akyerɛkyerɛɛ hɛn dɛ “otwar dɛ hɛn enyi tsim Agyenkwa na N’asɛmpa no do’’ na otwar dɛ “yɛper hwɛ No wɔ adwendwen biara mu.’’4 President Nelson asan so abɔ anohoba dɛ “biribiara mmfrɛ Sunsum no nkyɛn dɛ edze w’adwen betsim Jesus Christ do. … Obegya wo na Ɔama wo kwankyerɛ wɔ wankasa w’abrabɔ mu sɛ ibenya mber ama No wɔ w’abrabɔ mu—da no na dababiara a.’’5 Anyɛnkofo, Jesus Christ nye hɛn abrabɔ no botae ntsi na yetsim wɔ no do no. Ama wɔa boa hɛn ma yeetsim yie na yɛafa kwan tsen do no, Agyenkwa no to nsa frɛ hɛn dɛ yɛnhwɛ hɛn abrabɔ dɛ mbrɛ Ɔno hu ama yeehu No yie wɔ hɛn abrabɔ mu. Meedua me Ahyɛmu Dadaw nsũae do ebosũa ɔfrɛ tsitsir yi ho nsɛm yie.
Wɔdze Moses mbra no maa tsetse Israelfo no dɛ asɛmpa ne nsiesie, a wɔhyehyɛɛ dze yɛɛ nkorɔfo krado ma ahyɛmudzi nkitahodzi a ɔkrɔn a wɔnye Nyankopɔn dzi a ɔnam Jesus Christ do.6 Mbra no, a asɛnkyerɛdze beberee wɔ mu no a ɔkyerɛ agyedzifo kwan dɛ “wɔnhwɛ mbae no kwan’’ na Jesus Christ no Werdambɔ no,7 nna ɔwɔ hɔ dɛ ɔboa Israel dɔm ma wotsim wɔ Agyenkwa no do ber a worisie gyedzi wɔ No mu, N’afɔrbɔ, na Ne mbra na mbrasɛm wɔ hɔn abrabɔ mu8—a nna hɔn adwen nye dɛ ɔbɛma hɔn hɔn Pomfo ho ntseasee kɛsenara.
Dɛmara dɛ yɛtse ndɛ no, wɔtoo nsa frɛɛ Nyankopɔn ne tsetse dɔm no dɛ wɔnhwɛ hɔn abrabɔ dɛ mbrɛ Ɔno hu ama woehu No yie wɔ hɔn abrabɔ mu. Mbom ber a Agyenkwa no somdwuma sõe no, nna Israelfo hɔn werɛ efir Jesus Christ wɔ hɔn nyɛe mu, a wɔdze No sii nkyɛn na wɔdze nyɛe ahorow a tumdzi nnka ho na nna onnyi nkyerɛkyerɛ ngyinahɔmadze a ɔkyerɛ hɔn hɔn nokwar nkwagye na ɔpon ne fibea nko no—Jesus Christ.9
Nna Israelfo hɔn daa daa wiadze no ayɛ basaa na wohu no yie. Israelmba, wɔ gyinabew yi mu no, wɔgyee dzii dɛ mbra ne nyɛe na atɔrmuadze horow no nye anamɔn kwan a ɔdze kɔ ankorankor nkwagye ho na ne fã bi wɔtseew Moses mbra no do bɛyɛɛ ahyehyɛdze a wɔdze bu ɔman.10 Iyi kehia dɛ Agyenkwa no dze N’asɛmpa a ɔtsen na ne pefeeyɛ san ananmu ba.
Ewiei no Israelfo fã kɛse poow N’asɛm, mpo dɛ wɔbɔɔ Agyenkwa no sombo—Ɔno a ɔmaa mbra no na ɔpaa mu kãa dɛ Ɔno nye “mbra no, na kan no’’—dɛ oebu mbra no do. Mbom Jesus Ne Bepɔw do Nkyerɛkyerɛ mu no, ɔrekã Moses mbra ho asɛm no, paa mu kãa dɛ, “Mma hom nndwen dɛ mebaa bɛsɛɛ mbra no, anaa nkɔnhyɛfo no: mammbɛsɛɛ no, na mebɛhyɛɛ no mã.’’12 Nkyii Agyenkwa no, nam No onnyiewiei Werdambɔ no do , dze mbra, nhyehyɛɛ, na baguamu nyɛe horow a dɛm mber Israel dɔm yɛ no baa ewiei. N’afɔrbɔ a odzi ewiei no maa wofii ɔhyew afɔr ho kɔr hɛn “akoma a abobɔ na sunsum a abotow,’’13 a yɛdze ma, fi afɔrbɔ ayɛdze kɔ sacrament ayɛdze.
President M. Russell Ballard, rekyerɛkyerɛ wɔ asɛm no ho, kãa dɛ, “sɛ yɛrekã a, afɔrbɔ no sesae fii afɔrbɔdze bɛyɛɛ nyia a ɔbɔ afɔr no.’’14 Sɛ yɛdze hɛn afɔrbɔdze brɛ Agyenkwa no a, nna woroto nsa afrɛ hɛn dɛ yenhu Jesus Christ yie wɔ hɛn abrabɔ mu, ber a ahobrɛadze mu ara yegyaa hɛn pɛ mu dze ma No dɛ yeehu na yɛtse ne pɛ a Ogyae mu emudzi mu dze maa Egya no ase. Sɛ yɛdze hɛn enyiwa tsim Jesus Christ do a, yehu na yɛtse ase dɛ Ɔno nko nye fibea na kwan a yebenya bɔnfakyɛ na ɔpon, mpo dze akɔ onnyiewiei nkwa na nkwagye ntowdo mu.
Dɛ asɛmpa kadofo abɔasenyi no, mihyiaa dodow a wɔhwɛe na wohun nesa wɔ mo suban, nyɛe, na nsanmuyi ber a modɔɔm Asɔr no ekyir no. Nna wɔpɛ asɛm dze ehu “siantsir’’ wɔ dza nna woruhu no—siantsir a mesan mu ma wonumaa me na modɔm agyedzifo mboanofo yi mpo Jesus Christ N’Asɔr a ɔwɔ hɔ ma Nda a Odzi Ekyir Ahotseweefo, siantsir a maatwe moho efi nyɛe bi ho wɔ Ahomgyeda no, siantsir a m’ayɛ Enyansasɛm ho nokwafo, siantsir a mekenkan Mormon Nwoma no, siantsir a megye ndɛ da yi nkɔnhyɛfo na asomafo hɔn nkyerɛkyerɛ dzi na medze bɔ bra, siantsir a mokɔ Asɔr nhyiamu dapɛn dapɛn, siantsir a moto nsa frɛ binom dɛ “bra na bɔhwɛ, bra na bɔboa, … bra na bɛtsena,”15 na “bra na bɛka ho.”16
Dɛm mber no, nna nsɛmbisa no hyɛ modo na, ɔtɔfabi a nna ɔda edzi dɛ wɔyɛ nsɛm nto do. Ber a medze nkorɔfo hɔn nsɛmbisa dzii aper no, mubohun dɛ nokwar, nna hɔn nhwehwɛmu no yɛ me ɔfrɛ a odzi kan dɛ memfa sunsum mu ahwehwɛ-enyiwa na menhyɛ mfa nhu pefee, ntsim, na maama adze a okenyaan me ma medze asɛmpa nyɛe na gyinapɛn ahorow no afam moho no etsim pampee. Nna me dasee ne fibea nye ebɛn? Ana nna mereyɛ “enyisom kyerɛ’’ a meremma kwan ma nyɛe no a ɔka Nyankopɔn ne mbra ho no “nhyɛ [me] gyedzi wɔ Christ mu dzen,’’17 anaa ɔnnkyerɛ ntseasee dɛ Jesus Christ nko nye tum ne fibea wɔ me ndzeyɛe mu a?
Ɔnam mbɔdzembɔ dzendzen do dɛ monhwɛ kwan na monhwehwɛ Jesus Christ wɔ m’adwendwen na adzeyɛ biara mu no, m’enyiwa buei, na okenyaan me ntseasee ma muhun dɛ nna Jesus Christ refrɛ me dɛ “me mbra No hɔ.’’18 Fi me mbabun mu osuanyiyɛ ahyɛse mber mu no, mutum kaa nsato a asɛmpasomafo no dze maa me dɛ me mbɛka hɔnho ber a nna wɔkyerɛkyerɛ m’etsipɛnfo mbasiamba asɛmpa no. Ewimbir bi, ber a nna yɛtsena young womenfo yinom kor hɔn fie no, hɔn nokwar asɛmbisa fa siantsir a megye dzi ho wowɔɔ m’akoma mu na ɔmaa mo kwan ma medze ntseasee a no mu dɔ wɔ Ewuradze n’adwen wɔ mo sunsum mu nkenyan ho osuanyiyɛ gyee dase kyerɛɛ hɔn, na ɔrokɔ kan no oesiesie me dasee
Nkyii musũae dɛ, dɛ mbrɛ minyim sesei no dɛ, hɛn Agyenkwa, Jesus Christ, kyerɛ hɛn kwan dze kɔ nhyiamudan dapɛn biara ma yekedzi Ne sacrament, dze kɔ Ewuradze ne fie nye No kedzi ahyɛmudzi horow, kɔ kyerɛwsɛm na nkɔnhyɛfo hɔn nkyerɛkyerɛ no mu ma yesũa Ne nsɛm. Obue hɛn ano ma yɛgye No ho dase, ma hɛn nsa do ma yɛsom dɛ mbrɛ Ɔbɛma do na ɔasom, hɛn enyiwa ma yeehu wiadze na hɛnho nkorkor dɛ mbrɛ Ohu—“dɛ mbrɛ wɔtse, na … mbrɛ nkyɛ wɔbɛyɛ.’’19 Na sɛ yɛma No kwan dɛ ɔnkyerɛ hɛn kwan wɔ ndzɛmba nyinara mu a, yenya dase dɛ “ndzɛmba nyina kyerɛ dɛ Nyame wɔ hɔ,’’20 osiandɛ beebi a yɛbɔhwehwɛ No wɔ no yebohu No hɔ21—da no na dabiara. Iyi na megye ho dase wɔ Jesus Christ ne dzin krɔnkrɔn no mu, amen.