Daapem Osuanyiyɛ
Yebotum enya sunsum mu awerɛhyɛmu na asomdwee ber a yɛnyɛn suban krɔnkrɔn na tsenenee nyɛe a wobotum ama hɛn gyedzi enya ahom na wɔahyɛ hɛn dasee dzen.
Ɔhyew ber a abasen kɔ no, hɛn mbasirmba bɔbor 150,000 no nyinii wɔ gyedzi mu wɔ For the Strength of Youth, anaa FSY, ehyiadzi ɔha ɔha ahorow mu kor ase. Ɔnnkyɛree a wofii wiadze nsan yarba a wɔbraa nhyiamu ntsi, hɔn mu pii noara dze nna ɔyɛ gyedzi wɔ Ewuradze mu nyɛe mpo dɛ wɔbɔkɔ. Mbasirmba dodow a wɔdze hɔn ho hyɛɛ mu no kyerɛɛ nsakyeree a no mu dɔ. Hɔn dapɛn n’ewie no, mepɛɛ dɛ mibisa dɛ, “Na ɔkɔɔr dɛn?’’
Nna ɔtɔfabi a wɔkã biribi tse dɛ: “Oye, Dwowda no mobofuuw me maame ara ma osiandɛ ɔyɛɛ ma mebae na mebɛyɛɛ iyi. Na nna minnyim obiara. Na manndwen dɛ obeye ama me. Na merennya anyɛnkofo biara. … Afei sesei ɔyɛ Fida, na dza mepɛ ara nye metsena ha. Mepɛ dɛ metse Sunsum ne nkã ara wɔ m’abrabɔ mu. Mepɛ dɛ mobɔ bra dɛ iyi.”
Hɔn mu kor biara wɔ nankasa n’asɛm a ɔbɛkã wɔ ahotsew ho mber na sunsum mu akyɛdze horow ho a ɔmaa hɔn nsakyeree no mu dɔe na wonyinii wɔ sunsum mu. Ɔhyew ber yi FSY sesaa mo so ber a muhun Nyankopɔn no Sunsum a oenngyaa dɛ obeyi mbasirmba dɔm yinom hɔn ankorankor akoma mu tsenenee apɛdze horow ano a ankorankor biara nyaa akokodur dze tweer No a wodzii dapɛn wɔ Ne bambɔ ase.
Tse dɛ wusiwhɛn ne dadze hyɛnhyɛn a osi po do no, yɛtse sunsum mu bɔn na adzesɛɛ mber mu a otwar dɛ hɛn enyi wɔ enyimpisi a ɔhyerɛn dodoodow no do na yɛhwɛ no yie annyɛ dɛm a hɔn ho botum etsitsi, nkyii wɔawe, na afei wɔasɛɛ koraa.
Ebɛn Ndzɛmba na Yebotum Ayɛ Ma Yɛdze Ahyɛ Hɛn Enyimpisi no Tum no Dzen?
Sũahu horow tse dɛ FSY ehyiadzi horow, asesebɔ, sacrament nhyiamu, na asɛmpakã botum aboa ma wɔahyɛ hɛn dasee dzen, a wɔdze hɛn bodua nsakyeree na sunsum mu nyinii nhwehwɛmu mu dze hɛn akɔ mbeambea a hɔ yɛ asomdwee. Naaso ebɛn adze na otwar dɛ yɛyɛ dze etsim hɔ na yɛakɔdo “[a]per [a]kɔ kan [e]gyina pintsinn wɔ Christ mu’’ (2 Nephi 31:20) akyɛn dɛ yɛbɛtsew asan ekyir? Otwar dɛ yɛkɔdo yɛ ndzɛmba a wodzii kan nye hɛn kɔɔr hɔ no, tse dɛ yɛtaa bɔ mpaa, a yɛdze hɛnho nyina hyɛ kyerɛwsɛm no mu, na yɛsom nokwar mu ara.
Hɛn mu binom dze, obehia dɛ yenya awerɛhyɛmu wɔ Ewuradze mu mpo dɛ yɛbɔkɔ sacrament nhyiamu. Mbom yeena akɔ hɔ no, Ewuradze ne sacrament ayarsa tum no, asɛmpa fapem no ndur no, na Asɔr kuw ntsetsee no botum ama yɛdze sunsum mu nkenyan na ahoɔdzen akɔ fie.
Henfa na Hɛnankasa Yɛrobɔ Mu Aboa Ano no Tum No Fi Ba?
FSY hɔ no, hɛn mbabun mpem ɔha na no mboree bohun Agyenkwa no yie ber a wɔdze nyehyɛɛ a ɔnnyɛ dzen dɛ wɔbɔ mu wɔ beebi a nna beenu anaa hɔn mu mboree ehyia wɔ Ne dzin mu (hwɛ Matthew 18:20 reyɛ asɛmpa na kyerɛwsɛm adzesũa, wɔrobɔ mu tow ndwom, wɔrobɔ mu bɔ mpaa, na wɔrohwehwɛ asomdwee wɔ Christ mu. Iyi yɛ tum kwan a ɔboa nyimpa ma ɔtse sunsum ne nkã dzendzen.
Afei nuambanyin na nkyerɛbaa kuw a wɔwɔ wiadze nyina mu no asan akɔ fie rokɔhwɛ “fa wo werɛ hyɛ Ewuradze mu’’ (Mbɛbusɛm 3:5; 2022 mbabun asɛngyinado) dza n’asekyerɛ da ho yɛ ber a wiadze no mu nhyɛdo ahorow bebereebe a wɔmmpem adze no twa hɔn ho hyia no. Ɔyɛ adze kor dɛ “tsie No’’ (Joseph Smith—Abakɔsɛm 1:17) wɔ bea kɔnn a yebotum adwendwen kyerɛwsɛm a yeebue no tɛtɛɛtɛr no ho. Mbom ɔyɛ adze fofor so dɛ yɛbɛkyerɛ hɛn osuanyiyɛ ber a wiadze ndanenyi etwa hɛn ho ehyia a otwar dɛ yɛper “tsie No’’ mpo wɔ pɛsankomanya su na awerɛhyɛmu a no do ruhuan mu no. Mma hom nngye kyim wɔ dza wɔakã no ho: ɔno nye ekunyin hɔn suban nsɔhwɛ a hɛn mbabun da no edzi sɛ wosi hɔn akoma na adwen pi dzendzen dɛ wobegyina pintsii etsia hɛn ber wiadze no mu suban a ɔkɔ do sesa no.
Ebɛnadze na Ebusua Ebusua Botum Ayɛ Dze Atoa Ahoɔhar Pa a Ɔba wɔ Asɔr Dwumadzi Horow mu no Do?
Mber bi nna meyɛ stake Young Women president no kun. Anafua bi wɔmaa me edwuma dɛ menhyehyɛ brɔtoo wɔ abradaa mu hɔ ber a nna me yer reyɛ fireside dwumadzi wɔ asɔr dan mu hɔ ama awofo na hɔn mbasiamba a wɔreyɛ ahoboaboa dze akɔ Young Women asesebɔ dapɛn a odzi do no. Ɔkyerɛkyerɛ bea a ɔwɔ dɛ wohyia na dza ɔwɔ dɛ wɔdze ba mu wiei no, ɔkãa dɛ, “Afei, Benada anapa sɛ wobesiansian hɔn mbabaawa afɛɛfɛw yinom wɔ bɔɔs gyinabea hɔ a, hom ntu mfua hɔn dzendzenndzen. Na hom mfew hɔn afon ho nye hɔn ndzi nkra—osiandɛ wɔrennsan hɔn ekyir mmba bio.’’
Metsee dɛ obi egu ahomtsen, nkyii na muhun dɛ saãna mara a. “Wɔnnkɛsan aba?’’
Mbom afei ɔkɔɔr do dɛ, “Sɛ hom siansian mbabaawa no Benada-anapa a, wobegya ndanenyi ndzɛmba a ho nnhia no ekyir na wɔabɔ mu edzi dapɛn kor esũa na woenyin na woenya awerɛhyɛmu wɔ Ewuradze mu. Yɛbɔbɔ mu abɔ mpaa na yɛatow ndwom na yɛayɛ edziban na yɛabɔ mu asom na yɛabɔ mu agye dase na yɛayɛ ndzɛmba a wɔma hɛn kwan ma yɛtse Ɔsor Egya no Sunsum nkã, dapɛnda no nyina, kɛpem dɛ ɔbɛhɛnhɛn hɛn mbiew mu nyina. Memenda bɔsõ no, mbabaawa a wobohu hɔn dɛ worisiansian efi dɛm bɔɔs mu no nnkɛyɛ mbabaawa kor noara a wosiansian hɔn Benada no. Wɔbɛyɛ abɔdze afofor. Na sɛ hom boa hɔn ma wɔkɔ do wɔ dɛm sunsum mu nkenyan na ahoɔdzen hɔ a, wɔbɛyɛ ahobowdze. Wɔbɔkɔ do asesa na woenyin. Na hom ebusua so bɛsesa.’’
Dɛm Memenda no, ɔyɛɛ dɛmara dɛ mbrɛ wɔhyɛɛ ho nkɔm no. Mber a medze ntamadan no resan egu hɛn no mu no, metsee me yer ne ndze wɔ kwaa agorhwɛbea kakraba hɔ bea a mbabaawa no boaa ano ansaana wɔrokɔ fie. Metsee dɛ ɔkãa dɛ, “O, hom nyi. Yɛahwɛ hom ahwɛ hom dapɛnda no nyina. Hɛn Memenda mbabaawa.’’
Zion mbabun akatakyifo no rutu kwan wɔ mber nwanwa mu. Worinya enyigye wɔ wiadze yi mu a wɔahyɛ basabasayɛ ho nkɔm a wɔnnkɛka dɛm wiadze no ho a, ɔwɔ adwenbɔn wɔ krɔnkrɔnyɛ ho, nye hɔn asodzi tsitsir. Bɛyɛ mfe ɔha a abasen kɔ no, G. K Chesterton kasae ara ma ɔyɛ dɛ ohunii ahwehwɛdze yi dɛ gyamaa ɔno nye fie nhyiamu na Asɔr mboa mber a ɔkãa dɛ, “Ɔwɔ dɛ yehu wiadze no prɛko pɛr dɛ ɔyɛ nyimpa bɔn bi n’abankɛse, a yɛbɔ no do ntoa, na naaso ɔyɛ dɛ hɛnara hɛn ekurase no, a odu ewimbir a yebotum asan akɔ hɔ’’ (Orthodoxy [1909], 130).
Ndaase mu ara, nnyɛ hɔn nko na ɔwɔ dɛ wɔkɔ akõno. Wɔwɔ hɔnho nkorkor. Na wɔwɔ hom so. Na wɔka nkɔnhyɛnyi tseasefo, President Russell M. Nelson, a ɔdze adzehunyi n’enyidado dzi bano do wɔ dawurbɔ mu dɛ mber yinom mu mbɔdzembɔ kɛse nye—Israel mboaboano—a ɔbɛyɛ kra bɔ hwɛ na fɛɛfɛw (hwɛ “Hope of Israel” [wiadze nyina mu mbabun mpaabɔsom Obiradzi 3, 2018], HopeofIsrael.ChurchofJesusChrist.org).
Ɔhyew ber yi, nna emi na me yer, Kalleen rofow wimuhɛn fofor wɔ Amsterdam, bea, mfe pii abasen kɔ no, nna meyɛ asɛmpasomafo wɔ hɔ. Abosoom pii ekyir a midzii aper dɛ mubosũa Dutch kasa no, nna hɛn KLM wimuhɛn no ribesi famu, na sahen no yɛɛ dawurbɔ bi a nna yɛnntse ase wɔ akasamu no do. Mber kumaa kommyɛ ekyir no, me nyɛnko no kasaa bɔkɔɔ dɛ, “nna ɔyɛ Dutch kasa.’’ Yɛhwɛɛ sor, a hɛn adwen yɛɛ kor dɛ: Enyidado asa.
Mbom ne nyina nnyɛɛ nkõgu. Ber a ndzeyɛɛ a ɔkyerɛɛ gyedzi kɛse a yɛfaa do dze nantsewee wimuhɛn gyinabea hɔ yi a yɛnam rokɔ awanwadze a obohue egu hɛn do dɛ asɛmpasomafo no, amonmu ara na asɛmpasomafo bi a nna ɔrokɔfow wimuhɛn akɔ fie maa m’enyi sanee baa moho do. Ɔdaa noho edzi na obisaa dɛ, “President Lund, ebɛnadze na menyɛ no sesei? Ebɛnadze na mebɛyɛ dze egyina dzen?’’
Oye, iyi nye asɛmbisa kor noara a ɔda hɛn mbabun hɔn adwen do sɛ wofi FSY ehyiadzi horow, mbabun asesebɔ ase, temple nkɔree na aber biara a wɔtse ɔsor tum nkã no: “Erodɔ Nyankopɔn no besi dɛn botum adan ayɛ osuanyiyɛ a otsim?’’
Metsee ɔdɔ nkã dɛ orinyin ma asɛmpasomafo yi a n’adwen mu da hɔ a n’asɛmpakã mber a odzi ewiei no a ɔrosom, na wɔ Sunsum no kommyɛ mber mu no metsee dɛ me ndze mu esiw ber a mekãa no bɔkɔɔ dɛ, “Nnhia dɛ ibenya ahyɛnsewdze ansaana edze Ne dzin ato wo do.’’
Nna mepɛ dɛ medze me nsa gu n’abatsir do na mekã dɛ, “Iyi nye dza ewɔ yɛ. Kɔ fie, na yɛ iyiara. Wo papayɛ ma ehyerɛn wɔ sum mu. W’asɛmpakã ntsetsee na afɔrbɔ ama ayɛ Nyankopɔn ne ba nwanwanyi. Kɔ do yɛ no wɔ fie dza tum mu ara wɔayɛ yie ama wo wɔ asɛmpakã mbiew no. Esũa dɛ ebɔ mpaa na nyia ebɔ mpaa ma no na mpaabɔ kasa. Esũa Ne nsɛm na abɔdɔ Agyenkwa no ber a erobɔ mbɔdzen ayɛ tse dɛ Ɔno. Adɔ Ɔsor Egya tse dɛ Ɔdɔɔ N’Egya, soom binom tse dɛ mbrɛ Ɔsoom binom, na edze mbrasɛm no bɔɔ bra tse dɛ mbrɛ Ɔdze bɔɔ bra no—na ber a annyɛ no, enu woho. W’osuanyiyɛ no nnyɛ asɛnkã biara a ɔwɔ wo T hyɛɛt mu—ɔabɛkã w’abrabɔ a agye enyim ara abɔ ama binom ho. Ntsi no, kɔ fie na kɛyɛ dɛm. Yɛ dɛmara. Fa sunsum mu ahoɔhar pa yi ka w’abrabɔ nkae no ho.’’
Minyim dɛ ɔnam yɛrotwer Ewuradze Jesus Christ na N’ahyɛmu anamɔn kwan do no, yebotum enya sunsum mu awerɛhyɛmu na asomdwee ber a yɛnyɛn suban krɔnkrɔn na tsenenee nyɛe a wobotum ama hɛn gyedzi ahom na wɔahyɛ hɛn dasee dzen. Dza ɔbɛba biara no hom ma hɛn mu kor biara nkɔ do ntwe mbɛn dza ɔhyɛ hɛn dasee no dzen yie, na ma ɔbɛba biara no yɛnka hɔ. Jesus Christ ne dzin mu, amen.