Dɛ Wobohu Ɔwo
Me pɛ dzendzen nye dɛ edze Jesus n’edzin ahorow pii no bɛba ebohu No na abɛyɛ dɛ Ɔno yie.
Mfe kakra a abasen no, minyaa abrabɔ-nsesa sũahu bi wɔ sacrament nhyiamu ase wɔ hɛn fie ward wɔ Arizona. Ber a sacrament mpaabɔ no kyerɛɛ hɛn pɛ dɛ “[yɛ]bɛfa [Jesus Christ] ne dzin ato [hɛn] do” no,1 Sunsum Krɔnkrɔn no kaa me dɛ Jesus wɔ edzin pii. Dɛm asɛmbisa yi ba m’akoma mu: “Jesus n’edzin no mu hen dze na memfa nto moho do dapɛn yi?”
Edzin no mu ebiasa baa m’adwen mu, na mekyerɛwee too hɔ. Nna edzin ebiasa no no mu kor biara kitsa Christ saso su binom a mepɛ dɛ mutu ho mpon yie. Dapɛn a odzi do no mu, mitsim dɛm edzin ebiasa no do na mobɔɔ mbɔdzen dɛ mɛfa su a ɔkeka ho no. Fi dɛm mber no, makɔ do ebisa dɛm asɛm no akã marankasa mo som ho: “Jesus n’edzin mu hendze na memfa nto moho do dapɛn yi?” Miriyi dɛm asɛmbisa no ano na mereper dɛ menya Christ saso su a ɔkã ho no ehyira m’abrabɔ.
N’Odzimafo Mpaabɔ kɛse mu no, Jesus kãa dɛm nokwar ehiasɛm yi: “Na iyi nye onnyiewiei nkwa, dɛ wobohu ɔwo nokwar Nyame kor no, nye nyia esomaa no, mekyerɛ Jesus Christ.”2 Ndɛ mepɛ dɛ menye hom kyɛ nhyira horow na tum a ɔba ber a edze Jesus Christ N’edzin ahorow pii no ruhu No.
Kwan kor a ɔda famu a itum dze hu obi nye irusũa ne dzin. Wɔakã dɛ “nyimpa ne dzin nye ndze a ɔyɛ ɔnoara dɛw papaapa na ohia no kɛse wɔ kasa biara mu.”3 Ana enya sũahu bi dɛ edze dzin a ɔnnyɛ obi dze refrɛ nyimpa no anaa wo werɛ efir hɔn dzin? Emi na me yer, Alexis, mber bi mu no, afrɛ hɛn mba no mu kor “Lola.” Ɔyɛ yaw dɛ, bia itumii susui dɛ, Lola yɛ hɛn bɔdɔm! Omuo koraa no, wo werɛ rifir obi ne dzin kã kyerɛ nyimpa no dɛ gyama innyim no yie.
Nna Jesus nyim nkorɔfo na ɔdze hɔn edzin frɛɛ hɔn. Ewuradze kãa kyerɛɛ tsetse Israel dɛ, “Mma nnsuro: na mapon wo, mabɔ wo dzin afrɛ wo; eyɛ medze.”4 Easter anapa no, Mary ne dasee wɔ Christ a oewu asoɛr ho no mu hyɛɛ dzen ber a Jesus dze ne dzin frɛɛ no.5 Dɛmara, Nyankopɔn dze Joseph Smith ne dzin frɛɛ no ber a oyii ne gyedzi mpaabɔ ano.6
Mber bi mu no, Jesus maa N’esuafo edzin afofor a ɔkyerɛ hɔn su, hɔn tum, na dza wobotum abɛyɛ. Jehovah maa Jacob dzin fofor Israel, a n’ase kyerɛ “nyia a ɔnye Nyankopɔn dzi nyim” anaa “ma Nyankopɔn ndzi nyim.”7 Jesus dze dzin Boanerges maa James na John, a asekyerɛ nye “senaman mba.”8 Ohun ne ndaamba baanodzi no, Jesus too Simon dzin Cephas anaa Peter, a ɔkyerɛ ɔbo.9
Tse dɛ ma Jesus dze hɛn dzin nyim hɛn mu kor biara no, kwan kor a yebotum ebohu Jesus yie nye yerusũa N’edzin pii no. Tse dɛ edzin Israel na Peter, Jesus n’edzin no mu pii yɛ abɔdzin horow a ɔboa hɛn ma yɛtse N’edwuma, botae, suban, na su ase. Sɛ yebohu Jesus n’edzin ahorow pii no a, yɛbɛba abɛtse N’edwuma krɔnkrɔn na N’etuhoakyɛ suban ase. Yeruhu N’edzin ahorow pii no so kenyan hɛn dɛ yɛbɛyɛ dɛ Ɔno yie—dɛ yebenya Christ saso su a ɔdze dɛwdzi na botae brɛ hɛn abrabɔ.
Mfe kakra abasen no, President Russell M. Nelson sũaa kyerɛwsɛm a ɔfa Jesus Christ ho nyinara a ɔwɔ Topical Guide mu.10 Nkyii ɔtoo nsa frɛɛ mberantsɛ na nkataasia dɛ wonsũa dɛm kyerɛwsɛm noara. Ɔfa Jesus n’edzin ahorow pii ho no, President Nelson kãa dɛ, “Sũa biribiara a Jesus Christ yɛ ber a mpaabɔ na ahoɔdzen mu ara erohwehwɛ dɛ ebɛtse dza N’abɔdzin no mu kor biara ase kyerɛ ma wankasa woho.”11
Midzii President Nelson ne nsato no do no, mehyɛɛ ase yɛɛ mara me Jesus edzin ahorow ne nkyerɛwee. Me nkyerɛwee no kitsa edzin bɔbor 300 sesei, na megye dzi dɛ pii so wɔ hɔ a minnya nnhunii.
Ɔwɔ mu dɛ Jesus n’edzin no mu bi wɔ hɔ a wɔdze ato hɔ ama Ɔno nko,12 mebɛpɛ dɛ menye hom bɛkyɛ edzin na abɔdzin enum a ɔyɛ nhwɛdo ma hɛn mu kor biara. Moto nsa frɛ wo dɛ yɛ wankasa wo nkyerɛwee ber a edze Jesus N’edzin ahorow pii bohu No. Ereyɛ no dɛm no, ibohu dɛ edzin binom wɔ hɔ a—hɔn Christ saso su kã ho a—ebɛpɛ dɛ edze bɔto woho do dɛ Jesus n’ahyɛmu osuanyi.13
Odzi kan, Jesus yɛ Oguanhwɛfo Pa.14 Ntsi, Jesus nyim No nguan,15 “ɔbɔ nankasa no nguan dzin frɛ hɔn,”16 na, dɛ Nyame Eguambaa, ɔdze no nkwa too hɔ ma No nguan.17 Dɛmara, Jesus pɛ dɛ yɛyɛ nguanhwɛfo apapa, nkankaara wɔ hɛn ebusua ebusua mu na dɛ nuambanyin na nkyerɛbaa asomfo. Kwan kor a yɛfa do kyerɛ hɛn dɔ ma Jesus nye yɛrenyɛn No nguan.18 Ma nguan a worikyinkyin no, nguanhwɛfo pa kɔ sar no do kɔhwehwɛ nguan a wɔayew no na ɔkã hɔn ho kɛpem dɛ wɔbɛsan aba bambɔ mu.19 Dɛ nguanhwɛfo apapa na dɛ ma mbea a yɛtse ne tsebew ma ho kwan no, ɔsɛ dɛ yɛhwehwɛ dzi mber pii som nkorɔfo wɔ hɔn efiefi. Hɛn som mu no, nkyerɛwee kɛma na abaefor edwindze wɔ dɛ ɔboa, nnyɛ dɛ ɔhyɛ ankorankor nkitahodzi anan mu.20
Otsĩa ebien, Jesus nye Ndzepa a Ɔrebɛba no ho Sɔfopanyin.21 Onyim dɛ ɔaka ndɔnhwer kumaa bi ma Ne Mbeamuduabɔ aso no, Jesus see dɛ: “Yinom maka akyerɛ hom ma hom eenya asomdwee wɔ mo mu. Wiadze mu dze, hom wɔ ahohia: naaso hom nhyɛ dzen; medzi wiadze do konyim.”22 Ndɛ hɛn wiadze yi a adwenkuw pii a wɔbɔ ebira na nkyekyɛmu taa wɔ mu no, ohia kɛse dɛ yɛkyerɛkyerɛ na yɛdze adwen pa, ɔbɛyɛ yie su, na enyidado bɔ bra. Ɔmmfa ho ɔhaw biara a etwa mu kɔ wɔ hɛn abrabɔ mu, gyedzi kyerɛ kɔ ndaamba dabaa,23 a enyidado ahyɛ no mã a, ɔma hɛn kwan ma yɛhyɛ Jesus ne nsato dɛ yɛnhyɛ dzen no mã.24 Yɛdze asɛmpa no robɔ bra enyigye mu no boa hɛn ma yɛbɛyɛ ndzepa a ɔreba no ho esũafo.
Jesus n’abɔdzin kor so nye dɛ Ɔtse Dɛmara Ndeda, Ndɛ, nye Daapem nyina.25 Ɔnnsesa yɛ Christ saso su. Jesus yɛɛ N’Egya ne pɛ dabaa,26 na Ne nsa tsen dabaa dɛ ɔbɛgye, ɔaboa, na ɔasa hɛn yar.27 Ber a yɛwɔw do yie dze asɛmpa no bɔ bra no, yɛbɛba abɛyɛ tse dɛ Jesus yie.28 Wiadze bɛdandan akɛse a ogyina dza wɔabado do ber a nkyerɛkyerɛ mframa biara yɛ nkorɔfo begyabegya dze hɔn dzi akɔnaaba dze,29 naaso yɛrowɔw do dze asɛmpa no abɔ bra boa hɛn ma yegyina pintsinn a yennhihim wɔ ɔbra n’ehum mu.30 Yebotum so akyerɛ nwɔwdoyɛ sɛ yɛgye President Nelson ne nsato dɛ “nya mber ma Ewuradze” no to mu a.31 Sunsum mu ahoɔdzen kɛse fi ndzɛmba nketsenketse mu ba32 tse dɛ irinya “suban krɔnkrɔn na tsenenee nhyehyɛɛ”33 dɛ daa daa mpaabɔ, nnuhu, kyerɛwsɛm adzesũa, na erosom binom.
Otsĩa anan, Jesus nye Israel Krɔnkrɔnnyi no.34 Nna Jesus n’abrabɔ yɛ krɔnkrɔnyɛ nhwɛdo. Sɛ yedzi Jesus n’ekyir a, yebotum abɛyɛ krɔnkrɔnnyi wɔ Israel.35 Hɛn krɔnkrɔnyɛ nyin ber a yɛtaa kɔ temple, bea a wɔakyerɛw “Krɔnkrɔnyɛ ma Ewuradze” wɔ abobow no sor hɔ. Aber biara a yɛsom wɔ temple no, yefi hɔ a wɔdze tum kɛse hyira hɛn ma yɛdze yɛ hɛn efiefi krɔnkrɔn mbea.36 Moto nsa frɛ obiara a onnyi recommend sesei a ɔdze bɛhɛn temple krɔnkrɔn mu dɛ, hyia wo bishop na siesie woho a edze bɔkɔ dɛm bea krɔnkrɔn no anaa san kɔ. Mber a yedzi wɔ temple bɛma hɛn abrabɔ mu krɔnkrɔnyɛ akɔ sor.
Jesus dzin kor a odzi ewiei nye dɛ Ɔyɛ Ɔsɛnkordzifo nye Nokwafo.37 Dɛ nna Jesus yɛ ɔsɛnkordzifo daa nyina na ɔyɛ nokwafo dabaa no, Ne pɛ dzendzen ma hɛn nye dɛ yɛbɛda dɛm su yinom edzi wɔ hɛn abrabɔ mu. Sɛ hɛn gyedzi hihim a, yebotum esu afrɛ Jesus, “Ewuradze, gye me,” dɛ ma Peter yɛe ber a ɔhyɛɛ ase dɛ ɔrodɔ wɔ Galilee po begyabegya mu no.38 Dɛm da no, Jesus tsenee kɔr famu gyee osuanyi a ɔrodɔ. Ɔayɛ dɛmara ama me, na Ɔbɛyɛ dɛmara so ama ɔwo. Mma mmpa abaw wɔ Jesus mu da—Ɔremmpa abaw wɔ woho dabiara da!
Ber a yɛyɛ asɛnkordzifo na anokwafo no, yedzi Jesus ne frɛ do dɛ “hom ntsena mo mu,” a ɔsan kyerɛ dɛ “hom nye me ntsena.”39 Sɛ yehyia nsɛmbisa horow, sɛ wosi hɛn atwetwe osian hɛn gyedzi ntsi, sɛ hɔn a wɔwɔ wiadze dan kɛse pontonn no mu tsen enyimtsiabu nsatseaba wɔ hɛn do a, yɛkɔ do yɛ asɛnkordzifo na anokwafo. Dɛm mber yi mu no, yɛkaa Jesus no ntotɔ serɛ: “Hom nhwɛ me wɔ hom adwendwen biara mu; mma hom nngye kyim, mma hom nnsuro.’’40 Ber a yɛyɛ dɛm no, Ɔma hɛn gyedzi, enyidado, na ahoɔdzen a ohia ma yɛdze atsena Ne nkyɛn daapem.41
Mo nuambanyin na nkyerɛbaa adɔfo, Jesus pɛ dɛ yehu No osiandɛ Ne dzin nko nye dza ɔwɔ wiase mu a wɔnam do bɛgye hɛn nkwa.42 Jesus nye Ɔkwan no, nye Nokwar no, nye Nkwa no—obi mmba Egya no hɔ, gyedɛ ɔnam No do.43 Jesus nko nye kwan no! Dɛm ntsi, Jesus frɛ, “Hom mbra mo hɔ,”44 “Ka mo do,”45 “Nye me nnantsew,”46 na “Hom nsũa me.”47
Medze m’akoma nyina gye Jesus Christ ho dase—dɛ Ɔtse ase, dɛ Ɔdɔ wo, dɛ Ɔdze wo dzin nyim wo. Ɔyɛ Nyankopɔn ne Ba,48 nyia Egya no Woo no Kortonoo.49 Ɔyɛ hɛn Botan, hɛn Akoban, hɛn Akokyɛm, hɛn Guansumabew, na hɛn Gyefo.50 Ɔno nye Kan No a Ɔhyerɛn wɔ Sum mu.51 Ɔyɛ hɛn Agyenkwa52 na hɛn Pomfo.53 Ɔno nye Wunyan no nye Nkwa no.54 Me pɛ dzendzen nye dɛ edze Jesus n’edzin ahorow pii no bɛba ebohu no na abɛyɛ dɛ Ɔno yie ber a eda No su krɔnkrɔn horow no edzi wɔ w’abrabɔ mu. Jesus Christ ne dzin mu, amen.