Abɔtsir hyɛ Nso ananmu: Bɔnfakyɛ Ayarsa Kwan no
Mbrɛ ebɔbɔ wo bra wɔ kwan a itum ma abɔtsir dze hyɛ nso a ɔwɔ w’abrabɔ mu ananmu no yɛ gyedzi dwumadzi a odzi Agyenkwa no ne fasusu a ɔkrɔn no do.
1 Samuel nwoma mu no David, ndaamba Israel hen no, nna ɔbaa bi a wɔfrɛ no Abigail hɔnho asɛm wɔ mu a yennyim no papa.
Samuel no wu ekyir no, David na ne mbarimba fii Ɔhen Saul a, nna ɔrohwehwɛ David no nkwa no ne nkyɛn. Wɔkɔbɔɔ ɔdzefo bi a wɔfrɛ no Nabal, a ɔyɛ tsiɔdzennyi, no nguan na no nkowaa ho ban. David somaa ne mbarimba no mu 10 dɛ wɔnkekyia Nabal na wombisa no edziban a ohia papaapa no na ndzɛmba binom so.
Nabal dze adapaabɔ yii dza David n’ebisadze no ano na ɔpam ne mbarimba no kɔree nsapan.
Wɔafoom no, David yɛɛ ne mbarimba no ahoboa dɛ wɔbɔkɔ Nabal nye ne fifo do a ɔrekã dɛ, “Ɔdze bɔn ahyɛ me papa ananmu.”1 Akowaa bi kasaa kyerɛ Abigail, a ɔyɛ Nabal ne yer, fa no kun n’ayaayadze a odze edzi David ne mbarimba no ho. Ahoɔhar mu ara Abigail boaboaa edziban na ndzɛmba a ohia ano na ɔdze kedzii egyinamu.
Ber a Abigail hyiaa no no, “ɔhwee David n’enyim dze n’enyim butuuw famu, na ɔbɔɔ no mu adze kɔr famu,
“Na otwae hwee n’ananadze, na ɔsee dɛ, Mo do a, mo wura, mo do na emumuyɛ no nda. …
“Dɛm ntsi afei, … Ewuradze atwe wo ekyir wɔ bɔgya ho sõ ho, na ɔamma ammfa woara wo nsa enndzi wer amma woho no. …
“… Afei akyɛdze yi a w’afonabaa dze abrɛ mo wura yi, ma wɔmfa mma mberantsɛ no. …
“Meserɛ wo, fa w’afonabaa no mfom kyɛ no. …
“Na David see Abigail dɛ, nhyira nkã Ewuradze, Israel Nyankopɔn no a ɔsomaa wo ndɛ da yi dɛ nye me mbedzi ehyia no:
“Na nhyira nkã wo nyansaa, na nhyira nkã wo, ɔwo a ndɛ da yi atwe me ekyir wɔ bɔgya ho sõ ho, na amma mammfa mara me nsa ennkedzi wer amma moho. …
“Nna David gyee dza ɔdze brɛɛ no wɔ ne nsamu, na ɔsee no dɛ, Fow kɔ wo fie asomdwee mu; … metsie wo ndze, na mahwɛ w’enyim.”2
Hɔn beenu no kɔree asomdwee mu.
Dɛm asɛm yi mu no, yetum hu Abigail dɛ ɔyɛ ngyinahɔmadze ndamyɛ mu ma Jesus Christ.3 Ɔnam No werdam afɔrbɔ do, Obotum eyi hɛn efi bɔn na ɔtan adzesoa mu na Ɔama hɛn mboa a yehia.4
Dɛ mbrɛ nna Abigail ayɛ krado dɛ ɔbɛgye Nabal no mfom ato no do no, dɛm ara na Agyenkwa no yɛe—wɔ kwan a yɛnntsease do—faa hɛn bɔn na hɔn a wɔafom anaa woepira hɛn hɔn bɔn too no do. 5 Gethsemane na mbeamudua no do no, Ɔfaa dɛm bɔn yinom. Ɔbɔɔ kwan ma hɛn a yɛdze begyaa awerdzi akoma mu ato hɔ. Dɛm “kwan” no nye bɔnfakyɛ—a otum yɛ adze kor a ɔyɛ dzen papaapa dɛ yɛbɛyɛ na eso ɔyɛ adze krɔnkrɔn kɛse kor a yebotum enya. Bɔnfakyɛ no kwan do no, Jesus Christ no werdam tum no tsen ba hɛn abrabɔ mu na ɔhyɛ ase siesie akoma na ɔkra a apaapaa kɔ bun mu.
President Russell M. Nelson akyerɛkyerɛ dɛ Agyenkwa no ma hɛn tum dɛ yɛdze bɔn kyɛ:
“Ɔnam No Werdam a ɔmmbɔadze da do no, ibotum dze bɔn akyɛ hɔn a wɔafom wo na wɔnnkɛgye hɔn tsirmɔdzen a wɔdze yɛɛ wo ho asodzi no ato mu da.
“Ɔtaa yɛ mberɛw dɛ edze bɔn bɛkyɛ obi a nokwar mu na ahobrɛadze mu ara ɔhwehwɛ wo bɔnfakyɛ. Naaso Agyenkwa no bɛma wo ahom ma edze bɔn akyɛ obiara a ɔayɛ wo ayaayaadze wɔ kwan biara do. Nkyii hɔn ayaayaadze nyɛe no nnkotum asɛɛ wo kra bio.”6
Edziban na ndzɛmba mbordo a Abigail dze bae no botum akyerɛ hɛn dɛ Agyenkwa no ma hɔn a wɔafom hɔn na woepira hɔn no ɔmee na mboa a wohia dze enya ayarsa na wɔatse apɔw.7 Wonngyaa hɛn dɛ hɛn nko nsoa binom hɔn nyɛe no nsunsuando; hɛn so yebotum atse apɔw na yenya kwan agye hɛnho efi ebufuw akoma adzesoa ase na nyɛe biara a obedzi do.
Ewuradze akã dɛ, “Emi, Ewuradze, medze hɔn a mepɛ no hɔn bɔn kyɛ hɔn, na mbom homdze, ɔyɛ hom ahyɛdze dɛ hom dze nyimpa nyina hɔn bɔn kyɛ hɔn.”8 Ewuradze hyɛ hɛn dɛ yɛmfa bɔn nkyɛ ɔnam hɛn ara hɛn yieyɛ ntsi.9 Naaso Ommbisa hɛn dɛ yɛmfa nkyɛ a No mboa, No dɔ, Ne ntseasee nnkã ho. Ɔnam hɛn ahyɛmu a yɛnye Ewuradze edzi do, hɛn mu kor biara botum enya dzenhyɛ tum, akwankyerɛ, na mboa a yehia dze bɔn akyɛ na yenya bɔnfakyɛ.
Meserɛ hu dɛ edze bɔn rekyɛ obi nnkyerɛ dɛ edze woho bɛhyɛ tsebew bi mu a wɔbɔkɔ do epira wo. “Yebotum edzi dwuma dze obi no bɔn akyɛ no a yɛbɛda ho enya nkenyan efi Sunsum no hɔ dɛ yɛntwe hɛnho mfi hɔnho.”10
Dɛ mbrɛ Abigail boa David ma oennya “akoma mu fintsindua”11 na onyaa mboa a ohia no, dɛm ara na Agyenkwa no bɔboa wo. Ɔdɔ wo, na “Ɔdze ayarsa wɔ ne ntsaban mu” rihyia wo wɔ wo kwan do.12 Ɔpɛ w’asomdwee.
Mara ankasa mehu Christ n’anwanwadze a ɔresa m’ebufuw akoma yarba. Medze kwanserɛ fi m’egya hɔ, menye hom kyɛ dɛ minyin wɔ fi a nna menntse nkã dabaa dɛ mowɔ bambɔ mu ɔnam atsenkã na kasaa mu ayaayaadze ntsi. Me mbabun nye me nkataasia ber mu no, nna mikyir m’egya na nna mowɔ ebufuw wɔ m’akoma mu ɔnam dɛm ɔyaw no ntsi.
Mfe a abasen mu na wɔ mara mo mbɔdzembɔ mu dɛ menya asomdwee na ayarsa wɔ bɔnfakyɛ kwan no do no, mubohun no wɔ kwan nwanwa do dɛ Nyankopɔn ne Ba noara a Ɔbɔɔ werdam ma mo bɔn no, Ɔnoara nye Ɔpomfo no a Ɔbɛgye hɔn a woepira me kɔ bun mu no nkwa. Nna nokwar mu ara munnkotum agye nokwar a odzi kan no edzi a menngye nokwar a ɔtɔ do ebien no nndzi.
Dɛ mo dɔ ma Agyenkwa no enyin no, dɛm ara na me pɛ dɛ medze N’ayarsa edur no bɛhyɛ ɔyaw na ebufuw ananmu no tse. Ɔayɛ mfe pii nyɛbew a, ɔgye akokodur, mberɛwyɛ, enyimia, na irusũa dɛ edze wo werɛ bɛhyɛ Agyenkwa no no krɔnkrɔn tum a ɔdze gye nkwa na ɔsa yarba no mu. Meda ho wɔ edwuma yɛ, eso m’akoma nnyi ebufuw awerdzi kwan do bio. Ɔama me “akoma fofor”13—onyia ɔatse ankorankor Agyenkwa no dɔ a ɔkɔ bun mu na ɔwɔ hɔ daa no ne nkã, Agyenkwa no a ɔtsenaa me nkyɛn, na abotar mu ara Ogya me kɔr bea papa, Ɔno a ɔnye me sũi, a Onyim m’awerɛhow.
Ewuradze ama me nhyira nhyɛananmu dɛ ma Abigail dze dza David hia bae no. Ɔasoma akwankyerɛfo aba m’abrabɔ mu. Na dza ɔyɛ dɛw na nsesa kɛse papaapa a ɔkrɔn nye emi nye me Ɔsor Egya hɛn nkitsahodzi. Ɔnam No do, ndaase mu ara mehu Egya a odzi mu no dɔ a ɔyɛ bɔkɔɔ, bambɔ, na akwankyerɛ no.
Elder Richard G. Scott kãa dɛ: “Nnkotum apepa dza oesi dada, mbom ibotum dze bɔn akyɛ.14 Bɔnfakyɛ sã ekur a ɔyɛ hu, ɔyɛ yaw kɛse, osiandɛ ɔma Nyame no dɔ kwan ma oyi ɔtan no nsunsuando bɔn fi w’akoma nye w’adwen mu. Ɔpepa ɔpɛ dɛ ibedzi wer no fi w’adwen mu. Ɔma Ewuradze ne nsanho, ayarsa, nsanananmu dɔ no kwan.”15
M’egya a ɔwɔ asaase do so enya akoma nsesa nwanwa ndaansa mfe yi mu ara na ɔadan kɔ Ewuradze hɔ—adze a nna m’enyi nnda wɔ abrabɔ yi mu. Ɔyɛ dase kor so ma me a ɔfa Jesus Christ ne nsesa tum a ɔyɛ mu ho.
Minyim dɛ obotum asa dzebɔnyɛnyi na hɔn a wɔayɛ bɔn etsia hɔn no yar. Ɔno nye wiadze Agyenkwa na Pomfo no, a Ɔdze no nkwa too hɔ ama yɛaatsena ase bio. Ɔkãa dɛ: “Ewuradze no Sunsum wɔ mo do, osiandɛ ɔasera me dɛ membɛkã nsɛmpa nkyerɛ ehiafo; Ɔasoma me dɛ membɛsa akoma a ebubu yar membɛpaa ɔgye mma ndɔmmum, nye adzehu mma enyifurafo, na membɛgye hɔn a woepirapira hɔn.”16
Ma hɔn a hɔn akoma ebubu, wɔwɔ ndɔmmum, woepirapira, na bi a bɔn anaa ɔyaw efura hɔn enyi, Ɔma ayarsa, ahotɔ, na ɔgye. Megye dase dɛ ayarsa na ahotɔ a Ɔdze ma no yɛ nokwar. Mber a ayarsa no bɔkɔ do no yɛ ankorankor dze, na yennkotum ebu obi ne mber ho atsɛn. Ohia dɛ yɛma hɛnho mber a ohia dze enya ayarsa na ɔwɔ dɛ yɛyɛ ayamumyie ma hɛn ara hɛnho wɔ mber no mu. Agyenkwa no n’ehumbɔbɔr na asokyɛn wɔ hɔ daa, na Ogyina a Ɔayɛ krado dɛ Ɔbɛma hɛn mboa a yehia.17
Bɔnfakyɛ na ayarsa kwan do no, yɛwɔ nsanmuyi dɛ yɛnnkɛma su anaa nkitsahodzi binom a ɔmmfata akɔ do wɔ hɛn ebusua ebusua mu anaa beebi fofor. Ma hɔn a yɛwɔ nhyɛdo wɔ hɔn do no, yebotum ama ayamuyie ahyɛ tsirmɔdzen ananmu, ɔdɔ ahyɛ ɔtan ananmu, bɔkɔɔyɛ ahyɛ basabasayɛ ananmu, bambɔ ahyɛ atseetsee ananmu, na asomdwee ahyɛ wentwiwentwi ananmu.
Ibotum ama dza wɔdze akam wo no yɛ ɔsor ayarsa no tumdze fã bi a ɔba mu ɔnam gyedzi wɔ Jesus Christ mu. Mbrɛ ebɔbɔ wo bra a itum ma abɔtsir dze hyɛ nso a ɔwɔ w’abrabɔ mu ananmu, dɛ Isaiah akã no,18 yɛ gyedzi dwumadzi a odzi Agyenkwa no ne fasusu a ɔkrɔn do a ohun amandze nyina ama Ɔaaboa obiara.
Joseph Egyptnyi no bɔɔ bra a nso wɔ mu. No nuanom taan no, woyii no mae, wɔtɔɔn no kɔr nkowasom mu, wɔdze no too efiadze a onndzii fɔ, na nyia ɔhyɛɛ bɔ dɛ ɔbɔboa no no werɛ fiir no. Eso ɔdze ne werɛ hyɛɛ Ewuradze mu. “Ewuradze dzii Joseph n’ekyir”19 na ɔtseew no nsɔhwɛ ho ma ɔbɛyɛɛ nhyira na nyin ma ɔnoara—ma ɔgyee n’ebusua nye Egypt nyinara.
Ber a Joseph a ɔyɛ baanodzinyi kɛse wɔ Egpyt no hyiaa no nuanom no, no bɔnfakyɛ na nhumu a odzi mu no daa edzi wɔ adom nsɛm a ɔkãa no mu:
“Na afei mma ɔnnyɛ hom yaw, na mma hom bo mmfufuw homho so, dɛ hom tɔɔn me baa ha: osiandɛ Nyankopɔn na ɔsomaa me ma midzii hom enyim kan ama maabɛgye nkwa. …
“Dɛm ntsi afei, nnyɛ hom bi na wɔsomaa me wɔ ha, na Nyankopɔn a.”20
Ɔnam Agyenkwa no do, Joseph ne bra bɛyɛɛ “abɔtsir hyɛɛ nso ananmu.”21
Kevin J Worthen, BYU president akã dɛ Nyankopɔn “botum ama papa efi … nnyɛ hɛn nkonyimdzi mu nko aba mbom fi hɛn nkõgu na binom hɔn nkõgu a ɔma yedzi yaw mu so. Nyankopɔn ye na ɔyɛ tumfo.”22
Megye dase dɛ ɔdɔ na bɔnfakyɛ fasusu a ɔkrɔn nye hɛn Agyenkwa, Jesus Christ ne dze no, a wɔ ɔyaw wenwen mu ɔkãa dɛ:, “Egya, fa kyɛ hɔn, na wonnyim dza wɔreyɛ.”23
Minyim dɛ hɛn Ɔsor Egya pɛ papa na enyidado ma Ne mba nyina. Jeremiah mu yɛnkenkan dɛ, “Na minyim adwen a modwen wɔ hom ho, Ewuradze na ɔse, asomdwee adwen a.”24
Jesus Christ yɛ wankasa wo Messiah, wo Pomfo dɔfo na w’Agyenkwa, a Onyim w’akoma no ntotɔserɛdze. Ɔpɛ w’ayarsa nye w’enyigye. Ɔdɔ wo. Ɔnye wo sũ wɔ w’awerɛhow mu na odzi dɛw dɛ ɔbɛma edzi mu. Hom mma yɛnhyɛ dzen na yɛnsuo No ɔdɔ nsa a Ɔtsen no daa no mu,25 ber a yɛnantsew bɔnfakyɛ ayarsa kwan no do nye me mpaabɔ wɔ Jesus Christ dzin mu, amen.