Jesus Christ nye Mbabun hɔn Ahoɔdzen

Elder Dieter F. Uchtdorf ne Kasaa

Ɔkã Asomafo Duebien no hɔn Quorum no ho

Hom mfa hom werɛ ntwer Jesus Christ. Obegya hom akɔ ɔkwan pa no do. Ɔno nye hom ahoɔdzen.

Mereyɛ ahoboaboa wɔ asɛm yi ho ndɛ no, menyaa nkenyan ho atsenkã dzendzen dɛ menkasa nkyerɛ nkataasia na mberantsɛ.

Merekasa so kyerɛ hɔn a nna nkyɛ wɔyɛ nkataasia na mberantsɛ, mpo hɔn a wɔnnkaa no bio no.

Na mekasa so kyerɛ hɔn nyina a wɔdɔ hɛn mbasirmba na wɔpɛ hɔn dɛ wonya abrabɔ mu konyimdzi.

Dze ma ebusuasantsen a wɔreba no, mowɔ asɛm ankasa a ofi hɛn Agyenkwa, Jesus Christ hɔ brɛ hom.

Agyenkwa no N’Asɛm a Ɔdze ma Wo

M’anyɛnkofo mbasirmba adɔfo, sɛ Agyenkwa no wɔ ha sesei a, nkyɛ ebɛnadze na Ɔbɛkã akyerɛ wo?

Megye dzi dɛ Ɔbɛkã No dɔ a ɔdɔ bun mu a Ɔwɔ ma wo dze ahyɛ ase. Bia a Ɔdze nsɛmfua bɛkã, mbom ɔbɛpɛm dzendzenndzen—efi N’enyim—a ɔbɛhɛn w’akoma no bun mu a ekyingye biara nnyi ho, ma ɔahyɛ wo kra nyina mã.

Naaso, osiandɛ hɛn nyina yɛyɛ mberɛw na yenndzi mu ntsi, nsɛm a ɔhaw botum aweawea aba w’adwen mu. Bia ibɛkaa mfomdo horow a ayɛ, mber a igyaa wo ho maa nsɔhwɛ, ndzɛmba ahorow a nkyɛ nnkɛpɛ dɛ ibɛyɛ—anaa nkyɛ ipɛ dɛ eyɛ no yie.

Agyenkwa no bɛtse ho nkã, na megye dzi dɛ Ɔdze nsɛm a Ɔakã no wɔ kyerɛwsɛm mu no bɛhyɛ wo dzen:

“Mma nnsuro.”¹

“Mma nngye ho kyim.”²

“Hom mma hom enyi ngye.”³

“Mma hom akoma nntutu.”⁴

Minngye nndzi dɛ Obobu enyiwa egu wo mfomdo ahorow do. Ɔrennkã dɛ ɔnnyɛ hwee. Oho, Ɔbɛse wo dɛ nu woho—dɛ gyaa wo bɔn nyina ekyir, dɛ sesã, ama Oeetum dze aakyɛ wo. Ɔbɛkaa wo dɛ mfe 2000 abɛsen no, Ɔfaa dɛm bɔn horow no too No ho do ama eetum eenu woho. Ɔno kã enyigye ho nhyehyɛɛ a hɛn Ɔsor Egya dɔfo dze kyɛɛ hɛn no ho.

Bia Jesus bekyerɛ wo dɛ ahyɛmu a enye No edzi no—eyɛɛ ber a wonumaa wo na ikenyan no fofor ber biara a idzi sacrament no—ma enye No nya nkitahodzi soronko. Nkitahodzi kor a kyerɛwsɛm no kã ho asɛm dɛ yɛnye no twe kɔndua kor ama, yɛdze No mboa no, yeetum aasoa adzesoadze biara.⁵

Megye dzi dɛ Agyenkwa Jesus Christ bɛpɛ dɛ ebɔhwɛ, ibenya ho atsenkã, na ehu dɛ Ɔno nye w’ahoɔdzen. Dɛ edze No mboa no, biribiara nnyi hɔ a obesiw dza ibotum ayɛ. Wo hyɛbea mmbɔ adze. Ɔbɛpɛ dɛ ibohu woho dɛ mbrɛ Ohu wo no. Na ɔson ɔno koraa na ma mbrɛ wiadze hu wo no.

Agyenkwa no bɛpaa mu akã, a Ɔrennkantse, dɛ eyɛ Otumfo Nyankopɔn ne babaa anaa babanyin. Wo Ɔsor Egya nye Onyia a enyimnyam ahyɛ No mã mapã wɔ wiadze nyina mu, ɔdɔ, enyigye, ahotsew, krɔnkrɔnyɛ, kan, adom, na nokwar ahyɛ no mã. Na Ɔpɛ dɛ dabi enya dza Ɔwɔ nyina dzi.⁶

Ɔno nye siantsir a ewɔ asaase no do—dɛ ibosũa adze, ibenyin, na etu mpon na abɛyɛ biribiara a wo Egya a ɔwɔ Sor abɔ ama wo.

Ama iyi eetum aaba mu no, Ɔsomaa Jesus Christ dɛ Ɔmbɛyɛ w’Agyenkwa. Ɔno nye N’enyigye ho nhyehyɛɛ kɛse no, N’Asɔr, N’asɔfodzi, na kyerɛwsɛm no—ne nyina no botae.

Dɛm nye wo nkrabea. Dɛm nye wo daakye. Dɛm nye wo nsanmuyi!

Nokwar na Nsanmuyi horow

Nyankopɔn ne nhyehyɛɛ ma wo enyigye ne tsirmpɔw nye wo tum a edze san mu yi.⁷ Nyew, wo Ɔsor Egya pɛ dɛ isan mu yi onnyiewiei enyigye wɔ Ne nkyɛn, na Ɔbɔboa wo ma etum enya, naaso Ɔrennfa nnhyɛ wo do dabiarada.

Ntsi Ɔma wo kwan ma isan mu yi: Kan anaa sum? Papa anaa bɔn? Enyigye anaa awerɛhow? Onnyiewiei nkwa anaa sunsum mu owu?⁸

Ɔyɛ dɛ nsanmuyi a ɔnnyɛ dzen, ɔnntse dɛm a? Mbom kwan bi do no, wɔ asaase do no, ɔyɛ dzen koraa kyɛn ma ɔsɛ dɛ ɔyɛ.

Asɛnhia no nye dɛ yenntum nnhu ndzɛmba pefee dɛ mbrɛ nkyɛ yɛbɛpɛ. Paul dze totoo “yɛnam ahwehwɛ mu hu adze wɔ bɛ mu.”⁹ Adwensɛɛ pii wɔ wiadze mu a ɔfa dza ɔtsen na dza omuo ho. Wokyimkyim nokwar ma bɔn yɛ dɛ papa na papa yɛ dɛ bɔn.¹⁰

Mbom ber a erohwehwɛ nokwar—onnyiewiei, nokwar a ɔnnsesã enyiberdo do no—wo nsanmuyi bɛyɛ pefee ara yie. Nyew, ibɛda ho enya nsɔhwɛ na nkodzen pii. Mbusudze bɔkɔ do esisi. Ndzɛmba a ɔkyer adwen mu. Ndzɛmba a ɔyɛ awerɛhow kɛse. Naaso ibotum egyina ano ber a inyim wo nyimpa ban, saintsir a ewɔ ha, na ber a etwer Nyame.

Ntsi henfa na ibohu nokwar?

Ɔwɔ Jesus Christ asɛmpa no mu. Na dɛm asɛmpa no ne mãhyɛ no wɔkyerɛkyerɛ no wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu.

“Jesus Christ see no dɛ, “Emi nye ɔkwan no, nye nokwar no, nye nkwa no; obi mmba Egya no hɔ, gyedɛ ɔnam mo do.”¹¹

Sɛ ewɔ nsanmuyi horow a ohia yɛ a, Jesus Christ na N’asɛmpa a wɔdze asan ananmu aba no nye nsanmuyi tsitsir no. Sɛ ewɔ nsɛmbisa horow a, Jesus Christ na N’asɛmpa a wɔdze asan ananmu aba no nye mbuae tsitsir no. Sɛ inya mberɛwyɛ ho atsenkã a, Jesus Christ nye w’ahoɔdzen.

Ɔma hɔn a wɔaberɛ no tum, na hɔn a wonya atsenkã dɛ wonnyi ahom biara no, Ɔtow hɔn ahoɔdzen mu.

Hɔn a wɔtweɔn Ewuradze dze wobonu hɔn ahoɔdzen mu fofor.¹²

Ma Mbabun Enya Ahoɔdzen

Ama ɔaaboa wo ma ehu Ɔkwan no na wɔaboa wo ma ayɛ Christ asɛmpa no w’abrabɔ mu kwankyerɛ ho nhyɛdo no, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no esiesie dza ɔboa adzesũa no, For the Strength of Youth nwoma a wɔasakyer no.

Bɔbor mfe 50 no, For the Strength of Youth ayɛ kwankyerɛ ama Latter-day Saintfo mbabun ebusuasantsen ebusuasantsen. Daa nna medze bi hyɛ mo kotoku mu, na menye nkorɔfo a wɔreper ehu hɛn gyinapɛn no kyɛ. Wɔasakyer no etu no huam ama oeetum egyina ɔhaw na nsɔhwɛ ahorow a ɔwɔ hɛn nda yi mu no ano. For the Strength of Youth fofor dze no nsa bɛkã no online wɔ kasa ahorow 50 mu na ma woetsimtsim so nsa bɛkã. Ɔbɛyɛ mboa ara yie ama hom abrabɔ mu nsanmuyi horow. Meserɛ, fua no dɛ wankasa wo dza na enye w’anyɛnkofo nkyɛ.

For the Strength of Youth nwoma fofor yi ase nkyerɛwee nye A Guide for Making Choices (Nsanmuyi ho Kwankyerɛ).

Ama wɔaada edzi pefee no, kwankyerɛfo a ɔkrɔn mapã a ibotum enya ayɛ nsanmuyi horow nye Jesus Christ. Jesus Christ nye mbabun hɔn ahoɔdzen.

Ntsi For the Strength of Youth no botae nye dɛ ɔbɛkyerɛ wo Ɔno. Ɔkyerɛkyerɛ wo Ne nsanananmu asɛmpa no onnyiewiei nokwar horow—nokwar a ɔfa wo nyimpa ban ho, onyia Ɔyɛ, na dza ibotum dze N’ahoɔdzen ayɛ. Ɔkyerɛkyerɛ wo mbrɛ ibotum ayɛ nsanmuyi tsenenee mu a ogyina dɛm onnyiewiei nokwar no do.¹³

Ohia so ma wo dɛ ibohu dza For the Strength of Youth nnyɛ. Ɔmmbɔ adwenpɔw horow no mma wo. Ɔmma wo nsanmuyi biara a ibehia ho nyiano “nyew” anaa “oho.” For the Strength of Youth tsim wɔ wo nsanmuyi horow no ne fapem do. Otsim wɔ su pa, fapem, na nkyerɛkyerɛ do nnyɛ wɔ ndzeyɛɛ pɔkyee biara do.

Ewuradze, edua No nkɔnhyɛfo do, ama hɛn kwankyerɛ wɔ dɛm kwan no do. Ɔrototɔ serɛ hɛn dɛ yɛma “sunsum mu ahom a [yɛdze] tum dze nya nyikyerɛ no nyin.’’¹⁴ Ɔroto nsa afrɛ hɛn dɛ “yentsie No.”¹⁵ Ɔrefrɛ hɛn dɛ yɛnkã No do wɔ akwan a ɔkrɔn na krɔnkrɔn ara yie mu.¹⁹ Na yerusũa akwan a ɔtse dɛm dapɛn biara wɔ Come, Follow Me.

Mususu dɛ nkyɛ kwankyerɛ no bɛma wo ntar a wɔakyerɛw no nkorkor tsentsen a onnyi dɛ ehyɛ, nsɛm a onnyi dɛ ekã, na sene a onnyi dɛ ehwɛ. Naaso ana dɛm botum ayɛ mboa ampaara ama asɔr a ɔwɔ wiadze nyina mu a? Ana nyɛbew a ɔtse dɛm botum ayɛ wo ahoboa ma abrabɔ nyina dɛ Christ-su dze a?

Joseph Smith kãa dɛ, “Mekyerɛkyerɛ hɔn nokwar fapem, na hɔn ara hwɛ hɔnho do yie.”¹⁷

Na Ɔhen Benjamin kãa kyerɛɛ no nkorɔfo wɔ Mormon Nwoma mu dɛ, “murunntum nnkã ndzɛmba nyina a hom nam do bɛyɛ bɔn; osiandɛ ɔnam akwan horow pii do a murunntum nnkenkan ne nyina.”¹⁸

Ɔhen Benjamin kɔr do kãa dɛ, “Mbom iyi dze mubotum akã akyerɛ hom dɛ, … hom nweɔn homho nye hom adwendwen, … nye hom ndzeyɛɛ yie, na hom … ndzi Nyankopɔn ne mbrasɛm do, na hom … nkɔ do … ntsena wɔ gyedzi wɔ … hɛn Ewuradze mu … nkesi hom nkwa n’ewiei mpo.”¹⁹

Ana omuo dɛ yebenya mbra a? Ɔnnyɛ nokwar. Hɛn nyina yehia no dabiara. Mbom omuo dɛ yetsim wɔ mbra nko do kyɛn dɛ yebetsim wɔ Agyenkwa No do. Ohia dɛ wohu siantsir horow na mbrɛ wobesi ayɛ adze na nkyii woesusu hom nsanmuyi horow no nsunsuando ho. Ohia dɛ hom dze hom werɛ twer Jesus Christ. Obegya hom akɔ ɔkwan pa no do. Ɔno nye hom ahoɔdzen.²⁰

Nokwar Nkyerɛkyerɛ no Tum

For the Strength of Youth (Ama Mbabun Enya Ahoɔdzen) paa mu kã Jesus Christ ne nkyerɛkyerɛ no ndamyɛ mu. Ɔto nsa frɛ wo ndamyɛ mu dɛ yɛ nsanmuyi a ogyina Christ ne nkyerɛkyerɛ do. Na ɔdze ndamyɛ kyerɛ nhyira horow a Jesus Christ bɔ ho anohoba ma hɔn a wɔka No Kwan do.²¹

President Russell M. Nelson kyerɛkyerɛɛ dɛ: “Sɛ w’ahwehwɛdze tsitsir nye ibɛma Nyankopɔn edzi nyim [wɔ w’abrabɔ mu] a, adwenpɔwbɔ pii yɛ mberɛw. … Nsɛmasɛma pii bɛyɛ kwa! Inyim mbrɛ ibesi esiesie wo ho. Inyim dza ibɔhwɛ na ibɛkenkan, na bea ibɔhwer wo mber, na nyimpa enye no bedzi nkitaho. Inyim dza erohwehwɛ ayɛ. Inyim nyimpa ban a …ipɛ ankasa dɛ ibɛyɛ.”²²

Gyinapɛn a Ɔkrɔn

Jesus Christ wɔ gyinapɛn a ɔkrɔn ara yie ma N’akãdofo. Na nsato no dɛ yɛnhwehwɛ Ne pɛ na yɛmfa No nokwar mbɔ bra no nye gyinapɛn a ɔkrɔn kɛse a ɔwɔ hɔ.

Honandua mu na sunsum mu nsanmuyi horow no nnyi dɛ ogyina ankorankor ankorankor apɛdze do, anaa dza ɔma ahotɔ anaa ɔayɛ atsenkã do.²³ Ewuradze erennkã dɛ, “Yɛ dza ɔwoara pɛ biara.”

Ɔrekã dɛ, “Ma Nyankopɔn ndzi nyim.”

Ɔrekã dɛ, “Bra, bɛka Mo do.”²⁴

Ɔrekã dɛ, “Bɔ bra krɔnkrɔn, a ɔkrɔn ara yie, wɔ kwan a ɔkyerɛ dɛ enyin do.”

Ɔrekã dɛ, ‘Sie me mbrasɛm.”

Jesus Christ nye hɛn fasusu mapã, na yɛbɔ mbɔdzen dɛ yɛdze hɛn kra mu ahom nyina bɛkã No do.

M’anyɛnkofo adɔfo, hom mma minsi do nkã, Sɛ Agyenkwa no gyina ha ndɛ a, nkyɛ Ɔbɛkã No dɔ a ɔmmbɔadze ma hom, N’awerɛhyɛmu mapã ma hom ho asɛm. Ɔbɛkã akyerɛ hom dɛ hom botum ayɛ iyi. Hom botum abɔ enyigye abrabɔ a ɔyɛ ahomkã osiandɛ Jesus Christ nye hom ahoɔdzen. Hom botum enya awerɛhyɛmu, asomdwee, bambɔ, enyigye, na dɛ hom kã ho sesei na daapem, osiandɛ hom bohu ne nyinara wɔ Jesus Christ mu, N’asɛmpa no mu, na N’Asɔr no mu.

Iyi ho na megye dase awɔse mu dɛ Ewuradze Jesus Christ N’Asomafo mu ɔbaako na megya hom akoma nhyira wɔ enyisɔ no bun mu na ɔdɔ ma hom, wɔ Jesus Christ Ne dzin mu, amen.

Nsɛnsin

1. Luke 5:10; 8:50; 12:7; Nkyerɛkyerɛ na Ahyɛmudzi 38:15; 50:41; 98:1.

2. Nkyerɛkyerɛ na Ahyɛmudzi 6:36.

3. Matthew 14:27; John 16:33; Nkyerɛkyerɛ na Ahyɛmudzi 61:36; 68:6; 78:18.

4. John 14:1, 27.

5. Hwɛ Matthew 11:28–30.

6. Hwɛ Nkyerɛkyerɛ na Ahyɛmudzi 84:38.

7. Bia ibɛkã dɛ wɔyɛɛ Egya ne nhyehyɛɛ no ama wɔama wo kwan ma edua wo nsanmuyi ahorow do dze akyerɛ wo pɛ ama eetum eenya w’apɛdze ho nsunsuando emudzi mu. Dɛ mbrɛ Elder Dale G. Renlund kyerɛkyerɛɛ no, “Hɛn Ɔsor Egya no botae wɔ N’abaatanyɛ nnyɛ dɛ Ɔbɛma Ne mba ayɛ dza oye, mbom ɔyɛ dɛ Ɔbɛma Ne mba asan mu eyi dɛ wɔbɛyɛ dza oye na ewiei koraa no wɔabɛyɛ tse dɛ Ɔno” (“Choose You This Day,” Liahona, Ɔberɛfɛw 2018, 104).

8. Hwɛ 2 Nephi 2:26–27.

9. 1 Corinthfo 13:12.

10. Hwɛ Isaiah 5:20.

11. John 14:6.

12. Hwɛ Isaiah 40:29–31.

13. Dɛ yɛyɛ Latter-day Saintfo no, wɔtaa nyim hɛn suban—dza yɛyɛ nye dza yɛnnyɛ. Iyi botom ayɛ adze pa, mbom oye mpo koraa dɛ wobenyim wɔ dza yenyim ho (nokwar horow no a okenyan hɛn suban no) na wɔ nyia yenyim no (Agyenkwa no—na mbrɛ hɛn dɔ ma No no kenyan hɛn suban).

14. Russell M. Nelson, “Revelation for the Church, Revelation for Our Lives,” Liahona, Esusow Aketseaba 2018, 96.

15. Hwɛ Russell M. Nelson, “Hear Him,” Liahona, Esusow Aketseaba 2020, 88–92.

16. For the Strength of Youth kwankyerɛ fofor no gyina fapem do na ɔnye ndaansa yi mu dza woekenyan no fofor wɔ Agyenkwa no N’Asɔr mu no saa, a Preach My Gospel, erosom, Come, Follow me adzesuadze a fie nye ne fapem, Mbofra na Mbabun nhyehyɛɛ, Teaching in the Savior’s Way na General Handbook no kã ho. Ɔda edzi pefee dɛ, Ewuradze rotow hɛn sunsum mu tum mu. Ɔrekyerɛ N’awerɛhyɛmu kɛse wɔ N’ahyɛmu nkorɔfo mu wɔ nda a odzi ewiei no.

17. Teachings of Presidents of the Church: Joseph Smith (2007), 284.

18. Mosiah 4:29. Kwan bi mu no, iyi nye dza Phariseefo a wɔwɔ Jesus ne nda mu no bɔɔ mbɔdzen dɛ wɔbɛyɛ. Hɔn enyimpi mu dɛ wɔbɛma nkorɔfo no egyaa bɔn yɛ no, wɔkyerɛɛw mbra ɔha ɔha a ogyinaa hɔn ntseasee wɔ nkyerɛwee krɔnkrɔn no ho. Mfom a Phariseefo no yɛɛ nye dɛ wɔdween dɛ hɔn mbra dodow no bɛgye hɔn nkwa. Nkyii, ber a Agyenkwa no pueii no, woennhu No.

19. Mosiah 4:30; oetsi mu akã ho.

20. Siantsir kor so a wohia nyɛbew a otsim fapem do ndɛ nye Ewuradze N’Asɔr mu amambra asorɔtow a ɔrodɔɔ sõ. Fapem horow yɛ onnyiewiei a ofua obiara. Mbra anaa ho ndzeyɛɛ pɔɔkyee wɔ dɛm fapem horow no ho yɛ edwuma yie wɔ mbea ahorow binom mbom ɔnnyɛ edwuma yie wɔ binom so. Dza ɔkã hɛn bɔ mu nye Jesus Christ na onnyiewiei nokwar horow a Ɔkyerɛkyerɛɛ, sɛ ho ndzeyɛɛ sesã mber rugu mu na amambra ahorow mpo a. Ntsi nsɛnhia no nnyɛ wɔbɛkyerɛw dza wobotum anaa wonkutum ayɛ no nkorkor a ne yɛ bɛyɛ dzen a wonnkotum akɔ do ayɛ. Nsɛnhia no nye dɛ ɔdan hɛn enyi a yedze tsim Jesus Christ, hɛn ahoɔdzen no nokwar Fibea, na hɛn Agyenkwa do.

21. Mfe pii a abasen kɔ no, President Boyd K. Packer kãa nsɛmfua yinom a ɔyɛ ndam yi: “Nokwar nkyerɛkyerɛ, ho ntseasee, sesã su na suban. Asɛmpa nkyerɛkyerɛ ho adzesũa no botu suban mpon ntsɛm akyɛn suban no adzesũa botum etu suban no mpon” (“Do Not Fear,” Liahona, Esusow Aketseaba 2004, 79).

    President Ezra Taft Benson kyerɛkyerɛɛ nokwar ho nsɛm a ɔtse dɛm: “Ewuradze dzi dwuma wɔ nyimpa no mu dze pue. Wiadzemba dzi dwuma bagumu dze hɛn nyimpa mu. … Wiadze nya nhyɛdo wɔ nyimpa no suban do, mbom Christ botum asesã nyimpa no su.” (“Born of God,” Ensign, Ɔberɛfɛw 1985, 6).

    Ber a Mormon Nwoma mu nkɔnhyɛnyi Alma hun bɔn wɔ wiadze a woetwa noho ehyia mu no, ɔdanee kɔr Nyame n’asɛm ho osiandɛ nna onyim dɛ asɛm no wɔ “onya tum kɛse wɔ dɔm no hɔn adwen do sen nkrantsee, anaa adze biara a oesi hɔn do pɛn—dɛm ntsi Alma hun dɛ obeye dɛ wɔdze Nyame n’asɛm no nokwar no bedzi dwuma ahwɛ” (Alma 31:5

22. Russell M. Nelson, “Let God Prevail,” Liahona, Ɔberɛfɛw 2020, 94. President Nelson yɛɛ nyɛbew yi ho fasusu ber a ɔkyerɛkyerɛɛ hɛn erisie Ahomgyeda no krɔnkrɔn mu: “Ber a nna minnyinii pii no, musũaa dza binom akyerɛw no nkorkor a ɔfa ndzɛmba horow a ibotum bɛyɛ na ma nnkɛyɛ no Ahomgyeda no. Ekyir no koraa na musũaa fii kyerɛwsɛm no mu dɛ me ndzeyɛɛ na mo su wɔ Ahomgyeda no yɛ sɛnkyerɛdze a ɔda emi na mo Ɔsor Egya no ntamu. Minyaa dɛm ntseasee no, nna minnhia dza wɔakyerɛw no nkorkor a wɔyɛ anaa wɔnnyɛ. Sɛ ɔwɔ dɛ mobɔ adwenpɔw anaa biribi ne nyɛe dɛ ɔfata Ahomgyeda no a, mibisa moho sin ara dɛ, ‘Ebɛn sɛnkyerɛdze na mepɛ dɛ medze ma Nyankopɔn?’ Asɛmbisa no maa me nsanmuyi horow a ɔfa Ahomgyeda no ho bɛyɛɛ pefee” (“The Sabbath Is a Delight,” Liahona, Esusow Aketseaba 2015, 130)

23. Elder David A. Bednar kyerɛkyerɛɛ dɛ “tseneneeyɛ ho fapem … boa hɛn ma yehu tra hɛn ankorankor ahwehwɛdze na hɛn pɛsɛankonya apɛdze ma yenya onnyiewiei nokwar ho nhumu a ɔsombo ber a yetwa ɔnnkyebo abrabɔ yi mu gyinabew, nkõdzen, nsanmuyi, nye sũahu ahorow no.” (“The Principles of My Gospel,” Liahona, Esusow Aketseaba 2021, 123–24).

24. Luke 18:22.