Asɛm no Nokwar no

Elder Mark D. Eddy ne Kasaa

Ɔkã Eduosuon no ho

Nokwar wɔ tsetse na ndɛ nkɔnhyɛfo hɔn nsɛm mu tsitsir ara dɛ hɔn nsɛm no yɛ Ewuradze ne nsɛm.

Mormon Nwoma mu no, yɛkenkan fa gyinasi a ohia papaapa a Alma nkɔnhyɛnhyi no yɛe wɔ kyerɛwsɛm ne nkyekyɛmu bi a yɛpɛ mu. Ansaana mobɔkɔ dɛm nsɛm no a yenyim no do no, meserɛ hom nye me nsusu ahokyer tsebea a nna wɔwɔ mu a ɔdze sii dɛm gyinae no.

Nna nkorɔfo no hɔn mu ɔfã bi a, wɔfrɛɛ hɔnho Zoramfo, atsew hɔnho efi Nephifo no ho¹ na wɔaboa hɔn ano wɔ asaase a ɔbɛn Lamanfo asaase ne hẽ do.² Nna ɔnnkyɛree a Nephifo no edzi Lamanfo do konyim wɔ ɔkõ a, bi nnsii da mu a wokum mpem du mpem du,³ na nna “wosuro dɛ bɛyɛ na Zoramfo no nye Lamanfo no akɛyɛ kor ma Nephifo no nam do ayew hɔn dɔm no mu pii.”⁴ Ɔkõ ho adwendwen nda nkyɛn no, Alma hun dɛ Zoramfo a, “wɔakã Nyame n’asɛm no akyerɛ hɔn da no,”⁵ redan kɔ abosonsom mu na “[wɔ]rokontom Ewuradze n’akwan.”⁶ Iyinom nyina hyɛɛ Alma no do dodow na ɔmaa “[o]dzii awerɛhow kɛsenara.”⁷

Ohun noho wɔ tsebew a ɔdzen na ɔyɛ haw yinom mu no, Alma dwendween dza ɔsɛ dɛ wɔyɛ ho. Ne gyinasi mu no yɛkenkan nsɛm a wɔkora do dɛ wobekenyan na wɔakyerɛkyerɛ hɛn ber a yɛfa tsebew a ɔyɛ dzen na ɔyɛ haw mu wɔ hɛn nda yi mu.⁸

“Na afei, sɛ wɔkã asɛm no a onya tum kɛse bi wɔ nkorɔfo no do ma ogya hɔn ma wɔyɛ dza ɔtsen—nyew, onya tum kɛse wɔ dɔm no hɔn adwen do sen nkrantsee, anaa adze biara a oesi hɔn do pɛn—dɛm ntsi Alma hun dɛ obeye dɛ wɔdze Nyame n’asɛm no nokwar no bedzi dwuma ahwɛ.”⁹

Nsɔwano no mu pii a ɔwɔ hɔ no, Alma ne gyedzi gyaa hɔn ma wɔtweer asɛm no no tum. Ɔnnyɛ adze ara kwa dɛ asɛnkã binom a tum wɔ mu papaapa no a ibenya no wɔ kyerɛwsɛm ne beebiara no wɔkyerɛɛ no wɔ dɛm gyinasi no n’ekyir pɛɛ. Alma etsir 32 na 33 mu no, yɛkenkan ne gyedzi wɔ Ewuradze Jesus Christ mu ho nkyerɛkyerɛ nwanwason no, na wɔ tsir 34 mu, yehu Amulek ne nkyerɛkyerɛ a ohia papaapa a ɔfa Jesus Christ No Werdambɔ afɔr no ho.

Asɛm no no Nokwar ho Mfatoho

Ampaara, wɔ kyerɛwsɛm mu nyina yɛkenkan fa anwanwadze nhyira a wohue gu hɔn a wɔsan mu yi dɛ wɔdze Nyame n’asɛm no nokwar no bedzi dwuma ahwɛ wɔ hɔn abrabɔ mu no do.¹⁰ Moto nsa frɛ hom dɛ hom nye me ndwen mfatoho ebiasa ho ber a yɛdan dze hɛn enyi tsim Mormon Nwoma no do—nwoma a Nkɔnhyɛnyi Russell M. Nelson kyerɛe dɛ ɔyɛ “hɛn nda a odzi ekyir asetsena ho kwankyerɛdze.”¹¹

Odzi kan, ɔrekaakaa no nkorɔfo no mbrɛ Ewuradze sii gyee hɔn egyanom no, Alma kyerɛkyerɛe dɛ: “Hwɛ, ɔsakyeer hɔn akoma; nyew, onyaan hɔn fii nda heii mu, na wonyanee maa Nyankopɔn. Hwɛ, nna wɔwɔ sum mu; naaso, daapem asɛm no ne kan hyerɛɛn hɔn akra mu.”¹² Bi a etse nkã dɛ gyɛma ewɔ sum mu. Ana wo kra hwehwɛ kan? Sɛ ɔtse dɛm a, meserɛ fa Nyame n’asɛm no nokwar no dzi dwuma hwɛ.

Otsĩa ebien, ber a ɔrodwendwen Ewuradze ne Lamanfo nsakyeree ho no, a ohunii ber a ɔyɛ asɛmpasomafo no, Ammon kãa dɛ, “Hwɛ, hɛn nuanom mpem ahen na oeyi hɔn efi hɛl ne yaw mu; na wɔaba robɔtow ɔdɔ ɔpon ho ndwom, na iyi osian n’asɛm no tum a ɔwɔ hɛn mu ntsi.”¹³ Enuanom na nkyerɛbaa, pii wɔ hɛn mu a hɛn enyi da kwan dɛ obi a yɛdɔ no bɛba abɔtow ɔdɔ ɔpon ho ndwom. Hɛn mbɔdzembɔ nyina mu no, yɛnkaa dɛ yɛdze Nyame n’asɛm no nokwar no a ɔwɔ hɛn mu no bedzi dwuma ahwɛ.

Otsĩa ebiasa, yɛkenkan wɔ Helaman nwoma no mu dɛ, “Nyew, yehu dɛ obiara a ɔpɛ na obosuo Nyankopɔn n’asɛm a ɔyɛ ndam na tum wɔ mu, dza obotum etwitwa abɔnsam ne ndabraba nye ne mfir a oesua na ne ndaadaa nyina mu, na ɔafa nyimpa a ɔwɔ Christ no edua kwan heaheaba na nkekãnkekã no mu etwa awerɛhow no bun no … na ɔagye hɔn akra … esi Nyankopɔn n’abanyimfa wɔ sor ahenman no mu.”¹⁴ Ana erohwehwɛ dɛ ibotwitwa abɔnsam ne ndabraba nye ne mfir a oesua na ne ndaadaa nyina a wɔadɔɔ sõ wɔ ndɛ adwenkyerɛ pii mu no? Ana ewɔ pɛ dɛ ebɔhwetse adwensɛɛ mununkum a wɔaba a ɔnam nsɛm mbordo pii a yenya ama eetum dze w’enyi etsim ahyɛmu kwan no do tɔɔtseen? Meserɛ fa Nyame n’asɛm no nokwar no dzi dwuma hwɛ.

Dɛ meyɛ obi a asɛm no no tum asakyer me no, mankasa megye dase wɔ dɛm nokwar a hɛn nkɔnhyɛnyi dɔfo, President Russell M. Nelson kyerɛkyerɛɛ no ahomka mu ara yi ho: “Ma emi no, Mormon Nwoma no tum no da edzi kɛse wɔ nsakyeree kɛse a ɔba hɔn a wɔdze ‘nokwar akoma, [wɔ]pra hɔn akoma mu, [dze] gyedzi wɔ Christ mu’ kenkan no hɔn abrabɔ mu. Pii a wɔasakyer no gyaa ndzɛmba pii a nkyɛ ɔsom hɔn bo mu gu hɔ ama woeetum eedzi dɛm nwoma no ne nkyerɛkyerɛ do. … Ɔbɛyɛ w’edwindze a ɔkrɔn kɛse a edze bɔtwe akra abrɛ Jesus Christ no.”¹⁵

Nokwar ne Farba

Iyinom na mfatoho binom mu, yehu Nyame n’asɛm no nokwar wɔ Ne mba hɔn abrabɔ mu. Bia yebebisa dɛ, dɛm nokwar na tum no fi hen?

Ber a yɛdwen dɛm asɛmbisa yi ho no, ohia dɛ yɛkaa dɛ kasasin “asɛm no,” wɔ nkyerɛasee bɛyɛ ebien wɔ kyerɛwsɛm mu. Elder David A. Bednar akyerɛkyerɛ ndaansa yi ara dɛ “Jesus Christ n’edzin no mu kor nye ‘Asɛm No,’” na dɛ “Agyenkwa ne nkyerɛkyerɛ no, dɛ ma wɔakyerɛw no wɔ kyerɛwsɛm krɔnkrɔn mu no, so yɛ ‘asɛm no.’”¹⁶

Nkɔnhyɛnyi Nephi kyerɛɛ nkitahodzi a ɔda dɛm nkyerɛasee ebien yi ntamu ber a ɔkyerɛw dɛ: “Hom ntsie nsɛm yi na hom ngye Christ ndzi; na sɛ hom renngye nsɛm yi nndzi a hom ngye Christ ndzi. Na sɛ hom gye Christ dzi a hom bɛgye nsɛm yi edzi, osiandɛ ɔyɛ Christ ne nsɛm na ɔdze ama me.”¹⁷ Ntsi yesũa dɛ nokwar wɔ tsetse na ndɛ nkɔnhyɛfo hɔn nsɛm mu tsitsir ara dɛ hɔn nsɛm no yɛ Ewuradze ne nsɛm.¹⁸ M’anyɛnkofo adɔfo, yɛregye dɛm onnyiewiei nokwar yi ato mu hia mapã ma hɛn sunsum mu asetsena wɔ nda a odzi ewiei yi mu,¹⁹ ber a, dɛ ma wɔahyɛ ho nkɔm no, “ɔkɔm aba asaase no do, nnyɛ edzibankɔm, anaa nsukɔm, na Ewuradze n’asɛntsie ho kɔm a.”²⁰

Ne nyina mu no, Nyame n’asɛm no tum no nye Ewuradze Jesus Christ.²¹ Sɛ yɛtse iyi ase yie a, yebotum ehu onnyiewiei nkitahodzi a ohia a ɔda No nkɔnhyɛfo hɔn edwuma na Ɔpomfo Noara ntamu. Hɛn dɔ ma No, hɛn pɛ dɛ yɛbɔtwe abɛn No yie na yɛatsena No dɔ mu,²² kenyan hɛn ma yɛdze asɛm no nokwar no edzi dwuma ahwɛ wɔ hɛn abrabɔ mu—nokwar a ɔpem fi No hɔ dɛ hɛnankasa hɛn Agyenkwa na Ɔpomfo²³ na nokwar a ofi No hɔ ba a ɔpem dua “hɔn a wɔasan mu eyi hɔn ama Ewuradze” hɔn nsɛm mu.²⁴ Yɛbɛba ebenya nhumu dɛ, susuampaara dɛ ndzɛmba binom botum aboa wɔ hɛn adzesũa fa Agyenkwa no na No nkɔnhyɛfo hɔn nsɛm ho no, ɔnnsɛ dɛ wɔbɛhyɛ hɔn ananmu dabiara da. Ɔwɔ dɛ yɛnom kɔ bun mu na ntaataado,²⁵ fi farba no nankasa mu.²⁶

Mekyerɛ modɔ ma hom, m’enuanom na me nkyerɛbaa. Dɛm dɔ no mu, meserɛ hom dɛ hom benya Nyame n’asɛm no nokwar ho sũahu, nkanka dze edua Mormon Nwoma no mu, dabiara wɔ hom abrabɔ mu. Ber a hom yɛ dɛm no, hom benya nkɔnhyɛ anohoba ho sũahu a ofi President Russell M. Nelson hɔ no: “Mobɔ anohoba dɛ sɛ hom sũa Mormon Nwoma no dabiara a, hom bɔbɔ adwenpɔw a oye—dabiara. Mobɔ anohoba dɛ ber a hom dwendwen dza hom sũa ho no, ɔsor ntokura no bobuei, na hom benya homara hom nsɛmbisa ne nyiano na akwankyerɛ ama homara hom abrabɔ. Mobɔ anohoba dɛ sɛ daa daa hom dze homho hyɛ Mormon Nwoma no mu a, hom botum edzi nyim etsia ndɛ no bɔn no do.’’²⁷

Megye dase dɛ hɛn Ɔsor Egya ama hɛn asɛm no osiandɛ Ɔdɔ hɛn emudzi mu ara na Ɔpɛ dɛ hɛn mu kor biara san ba fie nye No bɛtsena afebɔɔ. Megye dase wɔ “Asɛm [a] … [ɔ]bɛyɛɛ honam,”²⁸ Jesus Christ mpo no, na No tum a ɔgye nkwa na ɔpon hɛn ho. Minyim dɛ No nokwar no pem fi No nkɔnhyɛfo nsɛm mu ba, hɔn a woetwa mu kɔ na ndɛ dze, hɔn beenu nyina.

Ɔyɛ m’akoma ne mpaabɔ dɛ yebenya nyansa na botooyɛ dze esuo Nyame n’asɛm mu dzendzenndzen²⁹ na yɛaka ahyɛmu kwan a ogya kɔ nkwagye ntowdo nye onnyiewiei nkwa mu no do.³⁰ Hom mma yɛnkɔ do nya nsakyeree kɛse a ɔwɔ hɔ ma hɛn mu kor biara a ɔnam Asɛm no nokwar do.³¹ Jesus Christ ne dzin mu, amen.