Tsim wɔ Temple no do

President Russell M. Nelson ne Kasaa

Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne President

Mobɔ anohoba dɛ mber a hom bohwer wɔ temple mu rokɔ sor no obehyira hom abrabɔ akyɛn ma biribiara bio botum ayɛ.

Enuanom na nkyerɛbaa adɔfo, wiadze mfɛndzanan ehyiadzi ne nhyiamu nwanwa enum yinom mu no, yenya sũahu bio dɛ ɔsorsor ebue! Mobɔ mpaa dɛ hom kyerɛɛw dza okenyaan hom na hom bedzi do akɔ kan. Hɛn Ɔsor Egya na Ne Ba Jesus Christ, gyina ayɛ krado dɛ wɔbɔboa hom. Mutu hom fo dɛ hom ntow hom mbɔdzembɔ mu mpon mfa nhwehwɛ Hɔn mboa.

Ndaansa yi, emi na Akyerɛbaa Nelson nyaa kwan hwɛɛ Mormon Nwoma Video hyɛber 4 fofor ana wɔdze epue baguamu.¹ Okenyaan hɛn! Hom mma minyi hwɛbew mu esin kakra a ɔkyerɛ Agyenkwa a Opue Nephifo do no.

Ɔyɛ adze tsitsir dɛ Agyenkwa no san mu yii dɛ obopue nkorɔfo no do wɔ temple. Ɔyɛ Ne fie. No tum hyɛ hɔ mã. Mma hom mma hɛn werɛ mmfir dabiarada dza Ewuradze reyɛ ma hɛn sesei no. Ɔrema yeetum ara yie akɔ Ne temple horow no mu. Ɔrema temple ne nsii no rokɔ do ɔhar do. Ɔrema hɛn tum a yɛdze boaboa Israel ano no akɔ sor. Ɔrema wɔayɛ mberɛw so ama hɛn mu kor biara ma oenya sunsum mu ahotsew. Mobɔ anohoba dɛ mber a hom bohwer wɔ temple mu rokɔ sor no obehyira hom abrabɔ akyɛn ma biribiara bio botum ayɛ.

Sesei yɛwɔ temple horow 168 a wodzi mu dwuma na worisi 53 so afofor na 54 wɔreyɛ no ho nhyehyɛ ana woesi!² Ɔyɛ me enyigye dɛ mobɔ hɛn nhyehyɛɛ dɛ yebesi temple fofor kor wɔ mbea yinom a odzi do yi ho dawur: Busan, Korea; Naga, Philippines; Santiago, Philippines; Eket, Nigeria; Chiclayo, Peru; Buenos Aires City Center, Argentina; Londrina, Brazil; Ribeirão Prêto, Brazil; Huehuetenango, Guatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; na Tacoma, Washington.

Yɛreyɛ nhyehyɛɛ so dɛ yebesisi temple dodow wɔ kuropɔn akɛse mu bea a akwantu mber kɔ temple a ɔwɔ hɔ no yɛ ɔhaw kɛse. Dɛm ntsi, ɔyɛ me enyigye dɛ yɛbɔ no dawur fa mbea anan a ɔbɛn Mexico Kuropɔn no a wobesisi temple wɔ no Cuernavaca, Pachuca, Toluca, na Tula.

Mo nuanom na nkyerɛbaa adɔfo, hom ntsim wɔ temple do wɔ akwan a hom nnyɛ bi da. Mihyira hom dɛ hom nnyin mbɛn Nyankopɔn na Jesus Christ da biara. Modɔ hom. Nyame nka hom ho kɛpem dɛ yebehyia bio, mobɔ mpaa wɔ Jesus Christ ne dzin krɔnkrɔn no mu, amen.