Onnyiewiei Ɔdɔ Fapem no

Elder Hugo ne Kasaa

Ɔkã Eduosuon no ho

Hɛn Ɔsor Egya no dɔ ma Ne mba hɔn mu kor biara yɛ nokwar. Ɔsor Egya wɔ hɔ ma kor biara.

Onnyiewiei ɔdɔ fapem no da edzi ber a yɛdze mbrasɛm akɛse ebien no: Fa w’akoma, w’adwen na w’ahom nyina dɔ Nyankopɔn na dɔ wo nyɛnko dɛ woho robɔ bra.¹

Mekaa me awɔwber a odzi kan a nna metse Utah ha—beebiara ayɛ esukwankyɛba. Mefi Sonoran Sardo reba no, nda a wodzi kan no nna ɔyɛ me dɛw, mbom nda kakra ekyir no, muhun dɛ nna ɔwɔ dɛ mosoɛr ntsɛm na mudwuruw esukwankyɛba no fi me dan enyim hɔ.

Anapa bi, nna migyina esukwankyɛba ehum mu, a nna meretsew mfifir, murudwuruw esukwankyɛba, na muhun fipamfo dɛ orubue ne hɛnsibea wɔ stiitsi n’afã no ho. Ɔyɛ panyin sen me, ntsi modween ho dɛ sɛ muwie ntsɛm a mubotum aboa no. Ntsi me ma me ndze do bisaa no dɛ. “Nuabanyin, ana ihia mboa a?’’

Ɔyerɛɛw n’ano na ɔkãa dɛ, “Meda wo ase, Elder Montoya.’’ Nkyii oyii efir a wɔdze piapia esukwankyɛba, kenyan efir no, na mber kakra no, oyii esukwankyɛba no nyinara fii ne dan enyim. Afei ɔdze n’efir no twaa stiitsi no mu na obisaa me dɛ, “Elder, ana ihia mboa a?’’

Medze anoyerɛw kãa dɛ. “Nyew, meda wo ase.’’

Yɛwɔ pɛ dɛ yɛboa hɛn ho nkorkor osiandɛ yɛdɔ hɛn ho nkorkor, na mo nuabanyin n’ehiadze bɛyɛ m’ehiadze na medze yɛ ne dze. Ɔmmfa ho kasa a mo nuabanyin kã anaa ɔman a ofi mu no, yɛdɔ hɛn ho osiandɛ yɛyɛ nuambanyin, Egya kor noara ne mba.

Mber a wɔbɔɔ erosom ho dawur no, President Russell M. Nelson kãa dɛ: “Yɛdze yɛrohwɛ na yɛrosom nkaafo wɔ kwan fofor a ɔkrɔn mbordo mu bedzi dwuma.’’² Emi dze, ɔkrɔn kyerɛ ankorankor, bun mu yie, tse dɛ Agyenkwa n’akwan yie mu: “Hom nnya dɔ mma hom ho nkorkor,’’³ nkorkor.

Onnye dɛ ibokwetsir dɛ ebɛyɛ fintsidua ama binom, onnye dɛ ibohu ohianyi no wɔ kwan do na ibotwa mu akɔ. Hom mma yɛmfa kwan biara ho mfaso dɛ yɛbɔboa hɛn fipamfo, mpo sɛ ɔyɛ dza odzi kan na mber kor pɛ a yebehyia no wɔ abrabɔ yi mu o.

Dɛn ntsi na Nyankopɔn ho dɔ nye mbrasɛm kɛse a odzi kan?

Modwen ho dɛ osian Onyia a Ɔyɛ ma hɛn Yɛyɛ Ne mba, Ɔhwɛ hɛn yiedzi do, yɛdan No, na No dɔ bɔ hɛn ho ban. Nyimpa ne pɛ kã Ne nhyehyɛɛ ho; dɛm ntsi, ɔyɛ a yɛbɛyɛ mfomdo.

Ɔsan so ma kwan ma wɔsɔ hɛn hwɛ na wɔgyegye hɛn. Naaso sɛ yɛreyɛ mfomdo anaa yɛrokɔ nsɔhwɛ mu o, nhyehyɛɛ no ma Agyenkwa ama oeetum apon hɛn na yɛasan akɔ Nyankopɔn n’enyim.

Abɛbrɛsɛ wɔ hɛn abrabɔ mu no botum dze ekyingye aba anohoba horow a wɔdze abɔ hɛn no ho. Meserɛ nya awerɛhyɛmu wɔ hɛn Egya mu. Aber nyina Osie n’anohoba, na yebotum esuã dza Ɔpɛ dɛ ɔkyerɛkyerɛ hɛn no.

Mpo sɛ yɛyɛ dza oye a, gyinabew horow wɔ hɛn abrabɔ mu no botum asesa papa ma ayɛ bɔn, fi enyigye akɔ awerɛhow mu. Nyankopɔn yi hɛn mpaabɔ ano dɛ mbrɛ N’ehumbɔbɔr na ɔdɔ a ɔmmbɔadze da tse, na wɔ Ɔnoara Ne mber mu.

Ɔwora no a Elijah noom mu nsu no wewee.⁴
Nephi ne dadze egyen fɛfɛw no bui.⁵
Wɔyɛɛ nyiyimu tsĩaa banyimba na woyii no edzi fii skuul.
Abofra a ɔatweɔn no mbertsentsen no fii mu nda kakra ara wɔwoo no ekyir no.

Gyinabew ahorow sesã

Sɛ gyinabew ahorow sesã efi papa na oye kɔ bɔn a, ma w’enyi nkɔ do ngye osiandɛ enyigye nngyina gyinabew ahorow no do mbom ogyina hɛn su wɔ gyinabew horow no ho. President Nelson kãa dɛ, “Hɛn abrabɔ mu enyigye a yɛtse no mmfa gyinabew horow a yɛwɔ mu ho, mbom ɔfa adzebiara a hɛn abrabɔ tsim do ho.”⁶

Yebotum dɛ yɛnnkɛyɛ hwee ma gyinabew ahorow no hɔnara asesã, anaa yebotum asesã na yɛdze gyinabew ahorow afofor aba.

Elijah nantsewee kɔr Zarephath, a kunafo maa no edziban na nsu.⁷
Nephi yɛɛ dua egyen na ɔkɔr mbowa ahayɛ bedzii.⁸
Banyimba no tsenaa ase tsiei na ɔkyerɛɛw adze wɔ ntokura no ho, na ndɛ ɔyɛ mbofra skuul kyerɛkyerɛnyi.
Awarfo no enya gyedzi kɛse wɔ Agyenkwa Jesus Christ mu na wɔwɔ awerɛhyɛmu wɔ nkwagye ho nhyehyɛɛ no mu. Hɔn dɔ ma abofra a wɔtweɔn no mbertsentsen a owu awerɛfir mu no, yɛ kɛse kyɛn hɔn awerɛhow.

Sɛ metse nsɛmbisa, “Ɔsor Egya, ana Ewɔ hɔ ankasa a? Na Itse na Iyi abofra [biara] ne mpaabɔ ano a?,’’⁹ Mepɛ dɛ miyi ano dɛ, “Ɔawɔ hɔ, Ɔwɔ hɔ, na aber nyina Ɔbɔwɔ hɔ ama emi na ɔwo. Meyɛ Ne babanyin, Ɔyɛ m’Egya, na murusũa ayɛ egya papa dɛ mbrɛ Ɔyɛ no.

Aber nyina emi na me yer abɔ mbɔdzen dɛ yɛbɔwɔ hɔ ama hɛn mba aber biara, wɔ gyinabew biara, na wɔ kwan biara mu. Abofra biara yɛ soronko, Hɔn bo a wɔsom ma Nyankopɔn yɛ kɛse, na hɔn nsɔhwɛ biara no, bɔn na mberɛwyɛ a wɔwɔ no, Nyankopɔn dɔ hɔn, na hɛn so yɛdɔ hɔn.

Ber a minyaa ɔfrɛ yi dɛ Wiadze Mfɛndzanan Tumdzifo no, da a odzi ewiei ansaana hɛn akwantu akɔ Salt Lake no, me mba na hɔn ebusua ebusua bɔɔ mu wɔ hɛn fie bɛyɛɛ ebusua ewimbir fie nhyiamu, a yɛkyerɛɛ hɛn dɔ na ndaase. Adzesũa n’ewiei no, memaa me mba no hɔn mu kor biara asɔfodzi nhyira. Nyinsuwa guaree obiara. Nhyira n’ekyir no, me babanyin panyin no gyinaa obiara n’ananmu kãa ndaase nsɛm wɔ ɔdɔ kɛse a yɛdze maa hɔn ofi da a wɔdze woo hɔn besi dɛm da no.

Hyira wo mba sɛ woedzi mfe 5 anaa 50 o. Nye hɔn nwɔ hɔ, wɔ hɔ ma hɔn. Ɔwɔ mu dɛ yɛrohwɛ hɔn no yɛ asodzi nhyehyɛɛ krɔnkrɔn a wɔakyekyer dze, otwar dɛ hɛn werɛ nnkefir dɛ yɛnye hɛn mba bɔbɔ mu edzi enyigye mber.

Hɛn Ɔsor Egya no dɔ ma Ne mba hɔn mu kor biara yɛ nokwar. Ɔwɔ hɔ ma kor biara. Minnyim mbrɛ Osi yɛ no, naaso Ɔyɛ. Ɔno na N’Abakan yɛ kor wɔ Egya n’edwuma na n’enyimnyam ne nyɛe mu, “dɛ [wɔ]dze nyimpa ne bɛkyebo na onnyiewiei nkwa bɔbɔ adze.”¹⁰ Wɔdze Sunsum Krɔnkrɔn no abrɛ hɛn dɛ ɔnweɔn hɛn, ɔmbɔ hɛn kɔkɔ, na sɛ ohia a ɔnkyekye hɛn werɛ.

Ɔkyerɛkyerɛɛ No Dɔba dɛ ɔmbɔ asaase fɛfɛɛfɛw yi. Ɔkyerɛkyerɛɛ Adam na Eve na ɔdze hɔn pɛ maa hɔn. Mfe pii na Ɔasoma abɔfo ama yeetum eenya No dɔ na Ne mbrasɛm.

Nna ɔwɔ Kwaa Krɔnkrɔn no mu reyiyi Joseph kumabaa no nokwar asɛmbisa ano na ɔdze ne dzin frɛɛ no. Ɔkãa dɛ: “Iyi nye Modɔba. Tsie No!¹¹

Megye dzi dɛ Nyankopɔn no dɔ nwanwa kɛse a ɔkyerɛe maa hɛn no sii wɔ Gethsemane, bea a Nyame tseasefo Ne Ba no bɔɔ mpaa dɛ, “O m’Egya, sɛ ɔbɛyɛ a, ma kuruba yi mpa mo ho nkɔ: naaso nnyɛ dɛ mbrɛ mepɛ bi a, na mbrɛ ɔwo epɛ a.”¹²

Meehu dɛ m’afamudze ketseketse a mubotum atse ase wɔ Jesus Christ no Werdambɔ ho no ma mo dɔ ma Egya na Ne Ba no nyin, ɔtsew mepɛ do dɛ mebɛyɛ bɔn na mayɛ asõkyew, na mepɛ dɛ mebɛyɛ yie mbordo no nyin.

Jesus ammfa suro na ekyingye annantsew annkɔ Gethsemane, nna Ɔwɔ awerɛhyɛmu wɔ N’Egya mu, na onyim dɛ otwar dɛ No nko na otsiatsia wenyintwer no do. Ɔsɔɔw yaw nyina na enyimguase nyina. Wobuu No fɔ, wobuu No atsɛn, na wɔbɔɔ No mbeamudua mu. Ɔnoara Ne yaw na amandzehu ber wɔ mbeamudua do no, Jesus hwɛɛ Ne nã na N’esuafo a ɔdɔ hɔn no hɔn ehiadze. Ɔdze No nkwa mae.

Da a otsĩa ebiasa no Ɔsoɛree fii owu mu. Nda no atɔ pan; Ogyina N’Egya n’abanyimfa. Wɔwɔ enyidado dɛ yɛbɛsan mu eyi dɛ yebesie hɛn ahyɛmudzi horow na yɛasan akɔ Hɔn enyim. Asetsena yi a otsia ebien yi nnyɛ hɛn asetsena a odzi ewiei; asaase yi nnyɛ hɛn tsenabea afebɔɔ, mbom yɛyɛ onnyiewiei abɔdze a yɛwɔ honandua mu abrabɔ mu

Jesus nye Christ no, tsease Nyankopɔn ne Ba no. Ɔtse ase, na osiandɛ Ɔtse ntsi no, Nyankopɔn ne mba nyinara bɛtsena ase afebɔɔ. Ndaase nka No werdam afɔrbɔ, hɛn nyina yebotum abɔmu nye Hɔn atsena. Jesus Christ ne dzin mu, amen.