Akoma nyina
Ɔwɔ dɛ yɛyɛ Jesus n’akadofo a yedzi dɛw na yedzi nokwar wɔ hɛnara hɛn ankorankor osuanyiyɛ akwantu mu.
Ɔtɔfabia, ɔboa dɛ ibohu dza w’enyi da do kwan
Ɔrokɔ No somdwuma n’ewiei no, Jesus kãa kyerɛ N’Asomafo no dɛ mber a ɔyɛ dzen bɛba. Mbom Ɔsanee so kãa dɛ “Hom nhwɛ, mma hom akoma nntu.’’1 Nyew, Ɔbɔkɔ, mbom Onnkegya hɔn ankonam.2 Ɔbɔsoma No Sunsum ma ɔaboa hɔn ma wɔakaa, woegyina pintsinn, na woenya asomdwee. Iyi kyerɛ dɛ Agyenkwa no hyɛɛ N’anohoba no mã dɛ ɔnye N’esuafo no bɔwɔ hɔ, na otwar dɛ yɛkɔdo hwɛ No dɛ ɔmboa hɛn ma yenhu na hɛn enyi ngye dɛ Ɔwɔ hɛn nkyɛn.
Christ n’esuafo ehyia nkõdzen mber aber nyina.
Me nyɛnko dɔfo bi dze nkyerɛwee bi a ɔakyɛr fi Nebraska Advertiser mu brɛɛ me, Midwestern United States amandzɛɛbɔ krataa, a nna da no yɛ Ayɛwoho 9, 1857. Ɔkenkan dɛ: “Anapa tutu yi Mormonfo kuw bi twaa mu wɔ hɔn akwantu mu dze rokɔ Salt Lake. Mbaa a (hɔnho yɛ dzen) rutwuw ntaabow ahɛn tse dɛ mbowa, [ɔbaa] kor hwee famu wɔ atɛkyɛ tuntum yi mu, a ɔmaa santsen no gyinaa kakra, mbofra nkakraba hyɛ hɔn ahɔho ntar [nwanwa] kã ho nantsewee ɔbrɛ mu na wɔdze enyimpisi dɛ hɔn enãnom.’’3
M’adwendwen ɔbaa yi a atɛkyɛ guaree no noho dodow. Ebɛnadze ntsi na nna no nko rotwe? Nna ɔyɛ enã sigyanyi a? Ebɛnadze na ɔdze ahoɔdzen bɛhyɛɛ no mu, ɔmaa no akokodur, mbɔdzembɔ dɛ ontu akwantu yaayaw a ɔtse dɛm wɔ atɛkyɛ mu, a ɔrotwe n’ahonyadze nyina wɔ ntaabow hɛn mu dze akɔ sar do fie a onnyim hɔ—na ɔyɛ a bɔhwɛadzefo sii no atwetwe?4
President Joseph F. Smith kãa ahoɔdzen a nna ɔhyɛ mbaa edzikamfo yinom mu no ho asɛm, a ɔkã dɛ: “Ana ibotum adan mbaa yinom mu kor efi hɔn gyedzi wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu ho a? Ana ibotum ebir hɔn adwen afa Nkɔnhyɛnyi Joseph Smith no dwuma ho a? Ana ibotum efura hɔn enyiwa a ɔfa Jesus Christ, Nyankopɔn ne Ba no no dwuma krɔnkrɔn ho? Oho, nnkotum ayɛ dɛm wɔ wiadze dabiarada. Ebɛnadze ntsi a? Osiandɛ nna wonyim. Nyankopɔn yii kyerɛɛ hɔn, na wɔtsee ase, na tum biara nnyi asaase do a obotum adan dza wonyim dɛ ɔyɛ dɛm nokwar no.’’5
Nuambanyin na nkyerɛbaa, yɛbɛyɛ mbanyin na mbaa a wɔtsetse dɛm no nye hɛn nda a yɛtse mu no ɔfrɛ—esuafo a yɛdɔ bun mu dze hwehwɛ ahoɔdzen ma yɛakɔdo epia sɛ wɔfrɛ hɛn dɛ yɛnnantsew sar do a, esuafo a yɛwɔ gyedzi a Nyankopɔn eyi akyerɛ hɛn, Jesus n’akadofo a hɛn enyi gye na yɛdze akoma nyina wɔ hɛnara hɛn ankorankor osuanyiyɛ akwantu mu. Dɛ Jesus Christ n’esuafo no, yɛgye dzi na yebotum enyin wɔ nokwar ebiasa a ohia mu.
Odzi kan, Yebotum Yesie Hɛn Ahyɛmudzi, Mpo Sɛ Ɔnnyɛ Mberɛw a.
Sɛ hom gyedzi, hom ebusua, anaa hom ndaamba wɔgye ho kyim a—sɛ hom nnhu siantsir a abrabɔ yɛ dzen dodow ber a hom reyɛ dza oye koraa dze asɛm no abɔ bra a—hom nkaa dɛ Ewuradze kãe kyerɛɛ hɛn dɛ hɛn enyi nda ɔhaw kwan. Ɔhaw kã nhyehyɛɛ no ho na ɔnnkyerɛ dɛ wɔapow hom; ɔkã dza ɔkyerɛ dɛ hom yɛ Ne dze ho.6 Ma ohia dodow no, nna Ɔyɛ, awerɛhow nyimpa, a yaw abra no.’’7
Murusũa dɛ Ɔsor Egya n’enyigye yie wɔ mo mpontu mu dɛ Jesus Christ n’osuanyi sen dza Ɔwɔ wɔ m’ahotɔ ho. Aber nyina nkyɛ memmpɛ dɛ ɔbɛyɛ dɛm—naaso dɛm na ɔtse!
Yɛtse ahodwe mu mmfa tum mmba. Tum a yehia dze egyina hɛn nda ɔhyew mu no ano nye Ewuradze no tum, na No tum no nam hɛn ahyɛmu a yɛnye No edzi no mu.8 Yɛdze hɛn gyedzi rotwer ber a mframa a ɔyɛ dzen rokõ tsia hɛn no—na nokwar mu ara yɛper da biara yɛ dza yɛnye Agyenkwa edzi ahyɛmu dɛ yɛbɛyɛ no mpo tsitsirara sɛ yɛabrɛ, yɛhaw, yɛdze nsɛmbisa na nsɛmansɛm a ɔhaw ridzi aper—nye dɛ nkakrankakra yebenya Ne kan, N’ahoɔdzen, No dɔ, No Sunsum, N’asomdwee.
Siantsir a yɛnantsew ahyɛmu anamɔn kwan no nye yɛbɛbɛn Agyenkwa no. Ɔno nye siantsir no, nyɛ hɛn mpontu a mfom nye ho. Ɔnnyɛ mbirikatu, na onnyi dɛ yɛdze hɛn akwantu toto binom dze ho.’ Mpo sɛ yefintsiw a, Ɔwɔ hɔ.
Otsĩa ebien, Yɛdze Gyedzi Botum Ayɛ Adze.
Dɛ Jesus Christ n’esuafo no, yɛtse ase dɛ gyedzi wɔ No mu hia nyɛe—tsitsir ara wɔ mber a ɔyɛ dzen mu.9
Mfe pii a abɛsen kɔ no, m’awofo yɛɛ hɔn adwen dɛ wɔdze kapɛt fofor bɛsaw fie hɔ nyina. Anago no ansaana kapɛt fofor bɛba no, me maame see mo nuambanyin no dɛ wonyiyi dan mu ndzɛmba na wɔntsetsew mpia mu kapɛt no ama wɔdze kapɛt fofor asɛw hɔ. Nna m’akyerɛbaa a oedzi mfe esuon, Emily ada dadaw. Ntsi, ber a nna ɔda no, wɔyɛɛ bɔkɔɔ yiyii dan mu ndzɛmba no fii ne dan mu, ɔkaa mpadua no nko, na nkyii wɔtsetseew kapɛt no fii hɔ. Oye, tse dɛ dza nuambanyin mpanyimfo yɛ no, wɔyɛɛ adwen dɛ wɔbɛdaadaa no. Woyiyii ne ndzɛmba nkaa no nyina fii dan mu hɔ na ban ho, a woenngya hwee wɔ dan no mu. Nkyii wɔkyerɛɛw asɛnsin bi na wɔdze hyɛɛ ban ho dɛ: “Emily dɔfo, yeetu kɔ. Yɛbɛkyerɛw nda kakra ntamu na yɛakã beebi a yɛwɔ. Ɔdɔ mu, w’ebusua.’’
Adzekyee no ber a Emily ammba emmbedzizi no, mo nuambanyin no kɔhwehwɛɛ no—nna ɔwɔ hɔ, a oridzi awerɛhow na ɔayɛ ankonam wɔ abow a wɔatoow mu n’ekyir. Ekyir no Emily dwendween sũahu yi ho dɛ: “Meyɛɛ basaa dodow. Mbom sɛ mubue abow no hɔara nkyɛ ebɛnadze na obesi? Nkyɛ ebɛnadze na mebɛtse? Nkyɛ ebɛnadze na mubohua? Nkyɛ mubohu dɛ ɔnnka mo nko. Nkyɛ mubohu dɛ wɔdɔ me ankasa. Adwendwen no mpo enntwa m’adwen mu da dɛ menyɛ biribi wɔ me gyinabew no ho no. Mepaa abaw na mehyɛɛ me dan mu na musũi. Naaso sɛ nkyɛ mubue abow no ara.’’10
M’akyerɛbaa yɛɛ n’adwen wɔ dza ohunii no do, naaso nna ɔnnyɛ dza ndzɛmba tse ara nye no. Ana ɔnnyɛ serew dɛ hɛn, tse dɛ Emily, bɛma awerɛhow anaa ayawdzi, anaa abawgura, anaa ɔhaw, anaa ankonamyɛ, anaa ebufuw, anaa basaayɛ wɔahyɛ hɛn do ara ma yɛnndwen ho mpo dɛ yɛnyɛ biribi a ɔnnyɛ dzen, dɛ yembue abow, dɛ yɛmfa gyedzi wɔ Jesus Christ mu nyɛ adze?
Mbanyin na mbaa, Christ n’esuafo, a wohyiaa dza onnkotum ayɛ yie no yɛɛ dza wɔbɛyɛ—na wɔdze gyedzi soɛree na wɔnantsewee no hɔn fasusu ahyɛ kyerɛwsɛm no mã.11
Akwatafo a wɔhwehwɛɛ ayarsa no, Christ kãa dɛ, “Hom nkɔ mfa homho nkɛkyerɛ asɔfo no. Na ɔbaa dɛ wɔrokɔ no hɔn ho sanee.’’12
Wɔdze hɔn ho kɛyerɛɛ asɔfo no dɛ mbrɛ woenya hɔn ayarsa dadaw, na wɔ nyɛe kwan mu no, wonyae.
Mesan so pɛ dɛ mekã dɛ sɛ wo yaw mu na edwen ho dɛ adze a ebɛyɛ no nnkɛyɛ yie a, meserɛ ma w’adzeyɛ nyɛ dɛ ebɛserɛ mboa—kɔ nyɛnko bi, ebusuanyi, Asɔr baanodzinyi bi, obi a ɔawea hɔ. Iyi botum ayɛ enyidado anamɔntu a odzi kan.
Otsĩa ebiasa, Yebotum Enya Ahomka na Yeedzi Dɛw wɔ hɛn Nokwardzi mu.13
Sɛ nkõdzen mber ba a, mobɔ mbɔdzen kaa dɛ mesan mu yii dɛ mebɛkã Christ do ansaana mereba asaase do na me gyedzi, apɔwmudzen, na penkyɛr no nsɔhwɛ nyinara kã siantsir a mowɔ ha no ho. Na nokwar onnyi dɛ modwen ho dabiarada dɛ ndɛ no nsɔhwɛ no bɛma meebisa Nyankopɔn no dɔ ma me ho asɛm anaa ɔbɛma me gyedzi wɔ No mu adan ekyingye. Nsɔhwɛ nnkyerɛ dɛ nhyehyɛɛ no rennyɛ yie; wɔkã nhyehyɛɛ no a wɔbɔboa me ma maahwehwɛ Nyankopɔn ho no. Meyɛ tse dɛ Ɔno yie sɛ mosɔw abotar mu ara na, enyidado mu ara, tse dɛ Ɔno no, sɛ mowɔ yaw mu a, mobɔ mpaa enyiberdo.14
Jesus Christ nye fasusu a odzi mu dɛ Ɔdze N’akoma nyina rodɔ hɛn Egya—dɛ Ɔyɛɛ Ne pɛ, a Ɔnnhwɛ no ho haw.15 Mepɛ dɛ meyɛ dɛmara ber a midzi Ne fasusu do.
Kunafo nokwafo, a ɔdze ne kra nyina yɛɛ osuanyi na ɔtoow ne kɔɔbermba ebien guu temple sikakorabea no mu no kenyan me. Ɔdze dza ɔwɔ nyina mae.16
Jesus Christ hun dza a ɔwɔ nyina no dodow a binom hun dza onnyi nko. Ɔyɛ nokwar dɛmara ma hɛn mu kor biara. Onnhu dza yennyi dɛ nkõgu mbom dɛ ɔyɛ kwan bi a yɛdze besie gyedzi na yeenyin.
Ewiei
Me mfɛfo Jesus Christ n’esuafo, medze m’akoma nyina no, mesan mu yi dɛ menye Ewuradze begyina. Mesan mu yi dɛ menye No nkowaa a wɔasan mu eyi hɔn no begyina—President Russell M. Nelson na ne mfɛfo Asomafo—osiandɛ wɔkasa ma No na hɔn nye ayɛdze na ahyɛmudzi horow a ɔkyekyer me fam Agyenkwa noho n’asomfo.
Sɛ mifintsiw a. Mobɔkɔ do asoɛr, a mebɛdan Jesus Christ n’adom na tum do. Menye No bɛtsena m’ahyɛmudzi mu na meedua Nyankopɔn n’asɛm no nsũae, gyedzi, na Sunsum Krɔnkrɔn no mboa, n’akwankyerɛ a mowɔ mu awerɛhyɛmu do ayɛ me nsɛmbisa ho edwuma. Mebɛyɛ ndzɛmba nketsenketse na ɔnnyɛ dzen do ahwehwɛ No Sunsum da biara.
Iyi nye me osuanyiyɛ anamɔn kwan no.
Na kɛpem dɛ ɔnnkyebo ne dabiara epirakor bɛsa no, mobɔtweɔn Ewuradze na meenya awerɛhyɛmu wɔ No mu—Ne mber, Ne nyansa, Ne nhyehyɛɛ.17
Menye wo to abasa no, mepɛ dɛ menye No gyina afebɔɔ. Akoma nyina. Yenyim dɛ sɛ yɛdze hɛn akoma nyina dɔ Jesus Christ a, Ɔdze ne nyina san ma hɛn.18 Jesus Christ ne dzin mu, amen.