Wiadze Mfɛndzanan Ehyiadzi
Hom Mma Dza Oye ne Yɛ Nyɛ Hɛn Ntɔyɛɛ
Ɔbɛsɛ 2022 Wiadze Mfɛndzanan Ehyiadzi
9:28

Hom Mma Dza Oye ne Yɛ Nyɛ Hɛn Ntɔyɛɛ

Elder Rafael E. Pino ne Kasaa

Ɔkã Eduosuon no ho

Sɛ yegyina pintsinn na yennhihim wɔ dza oye mu a, hɛn amambra bɔboa hɛn ma yɛaka ahyɛmu kwan no do.

Menyi bɔsɔ dabaa wɔ m’edwuma horow ho wɔ Asɔr yi mu a ɔama makɛtsena amanaman ahorow mu. Aman yi kor biara mu no yehun nsesã kɛse na nyimpa soronko a wokitsa amambra na kusum ahorow.

Hɛn nyina yɛwɔ hɛn ankorankor amambra na kusum, a ofi hɛn ebusua mu, anaa hɛn sɔn a yɛtse mu no, na yɛwɔ enyidado dɛ yɛbɔkora dza wɔnye asɛmpa nkyerɛkyerɛ no saa nyinara do. Amambra na kusum a ɔma ntowdo no hia ma hɛn mbɔdzembɔ dɛ yɛbɛka ahyɛmu kwan no do, na no mu dza wɔyɛ akwansiwdze no, ɔsɛ dɛ yɛpow.

Amambra yɛ ndzyɛɛ anaa daa daa ntɔyɛɛ kwan a nyimpa fa do dwen, amandze, anaa kusum. Ɔtaa si dɛ, ndzɛmba a yɛdwen ho na yɛyɛ no daa daa kwan do no yehu dɛ ɔyɛ ntɔyɛɛ.

Ma mema mfatoho: Mo dɔ yer, Patricia, pɛ kube nsu nom na owie a odzi kube n’edziban no. Yɛkɔr nsera a odzi kan wɔ Puebla, Mexico no, yɛkɔr beebi a yɛtɔɔ kube. Ɔnom no mu nsu no wiei no, me yer bisa dɛ wɔmpaa kube no mu nyi no mu edziban no mma no ma ondzi. Wɔdze brɛɛ no no, nna ɔyɛ kɔkɔɔ. Wɔdze muoko yeraw apetse do! Kube dɛw a muoko kã ho! Nna ɔyɛ hɛn nwanwa. Naaso ekyir yi yehun dɛ emi na me yer mbom na hɛn ho yɛɛ nwanwa, a yɛmmfa muoko nndzi kube. Mexico dze, ɔnnyɛ nã; ɔyɛ ntɔyɛɛ ankasa.

Da fofor bi so nna yɛnye Brazil anyɛnkofo bi ridzidzi, na wɔmaa hɛn paya. Yɛyɛ dɛ yɛdze nkyen robogu do ara, hɛn anyɛnkofo no see hɛn dɛ, “Ebɛnadze na hom reyɛ no? Yɛdze esikyire egu paya no do dada!” Paya a esikyire kã ho! Nna ɔnntɔ asowa mu ma hɛn. Naaso nkyii yehun dɛ emi na me yer na yɛatɔ mu, a yɛmmfa esikyire nndzi paya. Brazil hɔ no, ɔyɛ ntɔyɛɛ dɛ wɔdze esikyire bɛpetse paya do.

Dza ɔyɛ ntɔyɛɛ ma binom no botum ayɛ biribi biribi ama binom, a ogyina hɔn amambra na kusum do.

Ebɛn amambra na kusum horow na ɔyɛ ntɔyɛɛ wɔ hɛn abrabɔ mu?

President Russell M. Nelson akã dɛ: “Ndɛ yɛtse dɛ wɔkã fa “ntɔyɛɛ fofor no” ho. Sɛ hom pɛ dɛ hom fua “ntɔyɛɛ fofor no” a, moto nsa frɛ hom dɛ hom ndan hom akoma, adwen, na ɔkra no nkɔ hɛn Ɔsor Egya na Ne Ba, Jesus Christ do ara yie. Hom mma ɔno nyɛ hom ntɔyɛɛ fofor no” (“A New Normal,” Liahona, Ɔberɛfɛw 2020, 118).

Dɛm nsato yi kɔ ma obiara. Ɔmmfa ho sɛ yɛyɛ ehiafo anaa ahonyafo, yɛwɔ nwomasũa anaa yennyi, panyin anaa abofra, yɛyar anaa yɛtse apɔw. Ɔto nsa frɛ hɛn dɛ yɛma dza ɔyɛ ntɔyɛɛ wɔ hɛn abrabɔ mu no nyɛ dza ɔboa hɛn ma yɛka ahyɛmu kwan no do.

Ɔman biara nnyi hɔ a okitsa dza oye nyinara anaa ɔyɛ ahomka nyinara. Dɛm ntsi, ma Paul na Nkɔnhyɛnyi Joseph Smith kyerɛkyerɛɛ no:

“Sɛ ɔbra pa, dza ɔyɛ fɛw anaa ɔwɔ dzin pa anaa ɔsɛ nkamfo a, ndzɛmba yinom na yɛhwehwɛ ekyir kwan” (Gyedzi ho Nsɛmpɔw 1:13).

“Ayɛyi bi so wɔ hɔ a, hom ndwen dɛm ndzɛmba yi ho” (Philippifo 4:8).

Hyɛ no nsew dɛ iyi yɛ afotu, nnyɛ nsɛm kãe ara bi.

Mepɛ dɛ hɛn nyina fa mber kakra dze dwendwen hɛn amambra horow ho na mbrɛ worisi nya nhyɛdo wɔ hɛn ebusua ebusua do.

Su pa no mu binom a ɔwɔ dɛ ɔyɛ Asɔrmba hɔn ntɔɔyɛ no mu anan nye yi:

  1. Ankorankor na ebusua kyerɛwsɛm adzesũa. Ama yɛaasakyer ama Ewuradze Jesus Christ no, ankorankor biara wɔ asodzi dɛ osũa asɛmpa no. Awofo wɔ asodzi dɛ wɔkyerɛkyerɛ hɔn mba asɛmpa no (hwɛ Nkyerɛkyerɛ na Ahyɛmudzi 68:25; 93:40).

  2. Ankorankor na ebusua mpaabɔ. Agyenkwa no hyɛ hɛn dɛ yɛmbɔ mpaa aber nyina (Hwɛ Nkyerɛkyerɛ na Ahyɛmudzi 19:38). Mpaabɔ ma hɛn kwan ma hɛnankasa yɛnye hɛn Ɔsor Egya dzi nkitaho wɔ Ne Ba, Jesus Christ dzin mu.

  3. Dapɛn dapɛn sacrament nhyiamu nkɔree (hwɛ 3 Nephi 18:1–12; Moroni 6:5–6). Yɛyɛ dɛm dze kaa Jesus Christ ber a yedzi sacrament no. Dɛm ayɛdze yi mu no Asɔrmba yɛ hɔn ahyɛmu no fofor dɛ wɔbɛfa Agyenkwa no Ne dzin ato hɔn do, dɛ wɔbɛkaa no aber nyina, na dɛ wobedzi Ne mbrasɛm do (hwɛ Nkyerɛkyerɛ na Ahyɛmudzi 20:77, 79)

  4. Yɛtaa dze hɛnho hyɛ temple na ebusua abakɔsɛm edwuma mu. Dɛm dwuma yi nye kwan a wɔfa do dze kã ebusua bɔ mu na wɔsɔw ebusua ebusua ano ma mbersantsen (hwɛ Nkyerɛkyerɛ na Ahyɛmudzi 128:15).

Ebɛn atsenkã na yenya sɛ yɛtse dɛm ndzɛmba anan yi a? Ana wɔkã hɛn ntɔyɛɛ abrabɔ ho?

Amambra binom pii wɔ hɔ a wobotum akã ntɔyɛɛ a yɛafa no ho, a ɔma Nyankopɔn dzi nyim wɔ hɛn abrabɔ mu.

Yebsesi dɛn esi dza ɔbɛyɛ ntɔyɛɛ wɔ hɛn abrabɔ mu na hɛn ebusua mu pi? Kyerɛwsɛm mu yehu fasusu kɛse bi; wɔ Mosiah 5:15 ɔkã dɛ: “Mebɛpɛ dɛ hom gyina pintsinn na hom nnhihim, na daa hom yɛ ndwuma pa.”

Modɔ dɛm nsɛm yi osiandɛ yenyim dɛ ndzɛmba a ɔbɛyɛ ntɔyɛɛ wɔ hɛn abrabɔ mu nye dza yesi do yɛ no bio na bio. Sɛ yegyina pintsinn na yennhihim wɔ dza oye mu a, hɛn amambra nye asɛmpa nkyerɛkyerɛ no bɛsaa na wɔbɔboa hɛn ma yɛaka ahyɛmu kwan no do.

President Nelson so etu fo dɛ: “Hom nnu homho daa daa mfa mfua hom ntɔyɛɛ fofor no. Hom nhwehwɛ ma hom adwendwen, nsɛmfua, na ndzeyɛɛ nkɔ do ara ho ntsew. Hom nsom binom. Hom nsie onnyiewiei nhumu. Hom ntu hom frɛ mpon. Na ɔhaw biara mu no, mo nuambanyin na nkyerɛbaa adɔfo, hom ntsena ase da biara ama hom ayɛ ahosiesie yie dɛ hom dze behyia hom Yɛfo kwan” (“A New Normal,” 118).

Sesei, ɔnnyɛ nwanwa mma me yer, Patricia, anaa emi dɛ yebedzi kube na muoko na paya a esikyire wɔ do—nokwar, yɛpɛ. Naaso, nkwagye ntowdo sen eretse adze ne dɛw a otwa mu kɔ ara; ɔyɛ asɛntsir a ɔfa mbersantsen ho.

Mobɔ mpaa dɛ hɛn ntɔyɛɛ bɛma hɛn kwan ma yenya “enyigye a onnyiewiei da” tsebea mu sũahu (Mosiah 2:41) a wɔdze abɔ hɔn a wodzi Nyankopɔn ne mbrasɛm do anohoba no na ber a yɛreyɛ dɛm no, yeetum akã dɛ, “Na ɔbaa dɛ yɛtsenaa ase wɔ enyigye mu” (2 Nephi 5:27).

Mo nuambanyin na nkyerɛbaa, megye dase wɔ mbanyin 15 a yɛma hɔn tsipia dɛ nkɔnhyɛfo, adzehufo, nye nyikyerɛfo, a hɛn nkɔnhyɛnyi dɔfo, President Russell M. Nelson, kã ho. Megye dase dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no yɛ nokwar. Megye dase ankasa fa Jesus Christ, hɛn Agyenkwa na Pomfo ho, wɔ Jesus Christ Ne dzin mu, amen.