Ida ho Wɔ Ɔpɛ?
Hɛn pɛ dɛ yɛbɛka Jesus Christ do nye mber a yetu si hɔ a yɛdze bɔwɔ krɔnkrɔn mbea no nam pɛpɛɛpɛ.
Kwesida bi, adapɛn pii ekyir a makɔ stake ehyiadzi edwumayɛ no, ber a nna mereyɛ ahosiesie edzi sacrament no, adwendwen nwanwa bi a tum wɔ mu faa m’adwen mu.
Ber a sɔfo no hyɛɛ ase dɛ ɔrema paanoo no ne nhyira do no, nsɛmfua a matse no mpɛn pii no hyɛɛ m’adwen na m’akoma mu dzendzenndzen. “Na wɔagye dase dze ama wo, O Nyankopɔn, Onnyiewiei Egya, dɛ woenya pɛ dɛ wɔbɛfa wo Ba ne dzin ato hɔn do, na wɔakaa no aber nyina na woedzi ne mbrasɛm a ɔdze ama a hɔn no do; ama aber nyina woenya no Sunsum ma ɔnye hɔn atsena.”1 Mpɛn ahen na yɛagye dase ama Nyankopɔn dɛ yeenya pɛ?
Ber a modwendwen dɛm nsɛmfua krɔnkrɔn no ho hia a ohia ho no, nsɛmfua woenya pɛ kenyaan me a ɔnnyɛɛ dɛm da. Sũahu dɛɛdɛw krɔnkrɔn pemee hyɛɛ m’adwen na m’akoma mu mã a ɔdze Agyenkwa no werdam afɔrbɔ ho dɔ na enyisɔ na Ne dzibew a ɔkrɔn wɔ Egya no ɔpon nhyehyɛɛ ho ma emi na m’ebusua. Nkyii, meyɛɛ aso na menyaa atsenkã dɛ nsu ne nhyira do no nsɛmfua no rehwirom mo mu: “Ama wɔagye dase dze ama wo … na wɔakaa no aber nyina.”2 Metsee ase pefee aber noara mu dɛ merisie m’ahyɛmudzi no, otwar dɛ ɔbor adwen pa ara.
Eridzi sacrament no nnyɛ nyamesom ho ndzeyɛɛ a yɛnnyɛ ho hwee na yɛpen do ara. Ɔyɛ nkaa ndamyɛ mu wɔ Agyenkwa No Werdambɔ a ɔmmbɔadze da no nokwar ho na hia a ohia dɛ yɛbɛkaa No aber nyina na yesie Ne mbrasɛm no. Yenya pɛ dɛ yebetsim wɔ Agyenkwa no do yɛ adze tsitsir ara ma ɔyɛ kyerɛwsɛm ebien a wɔtaa serɛ kã wɔ Asɔr no mu no: sacrament mpaabɔ no, ne nsɛm ne fapem. Yerenya dza Ɔsor Egya dze edua No Dɔba a Wɔwoo no Kortoo no do ama hɛn mu kor biara ɔpɛ mu ara no ho nokwar ntseasee no, ɔwɔ dɛ okenyan hɛn mbɔdzembɔ ara yie dɛ aber biara hɛn so yebenya pɛ.
Ana hɛnankasa hɛn sunsum mu fapem no, wɔatow ma woetsim Jesus Christ do?
Sɛ hɛn sunsum mu fapem nndɔ anaa ɔyɛ biara biara a, yɛdze hɛn pɛ bɔto ma nkorɔfo bɛkã anaa hɛn ahwehwɛdze ho. Na sɛ yɛgye to mu dɛ tsetse ndzeyɛɛ anaa dza nyimpa dɔm bi mmpɛ, nnhyɛ a ɔmmfa kwan mu, mber a yennyi ma Asɔr no gyina do a, nna ewiei no hɛn pɛ bɔtɔ sin. Onnyi dɛ yenya enyidakwan dɛ ɔpɛ yi begye dzin pa wɔ hɔn a wɔayɛ atsenkã wɔ social media do anaa hɔn a wɔpɛ TikTok. Nyimpa nkyerɛkyerɛ nntaa nnye ɔsor nokwar nnsaa.
Asɔr no yɛ bia a ankorankor a wonndzi mu a wɔdɔ Nyankopɔn na woenya pɛ dɛ wɔbɛka Ewuradze Jesus Christ do no na wɔboa ano. Dɛm ɔpɛ no ɔgye ndwow wɔ nokwar no dɛ Jesus nye Christ no, Nyame tseasefo ne Ba no. Ɔsor nokwar yi gyedɛ wɔnam Sunsum Krɔnkrɔn no tum nko do na wobenya. Dɛm ntsi, hɛn pɛ nye mber a yetu si hɔ a yɛdze bɔwɔ krɔnkrɔn mbea a Sunsum Krɔnkrɔn ne nhyɛdo wɔ no nam pɛpɛɛpɛ.
Ɔbɛyɛ yie dɛ yɛbɔhwer hɛn mber kɛse wɔ nkɔmbɔdzi a ɔyɛ ntowdo a yɛnye hɛn Ɔsor Egya a ɔdɔ hɛn rekã hɛn akadadwen ho nsɛm, na yɛatsew mber no do a yɛdze hwehwɛ binom a wɔnndɔ hɛn hɔn adwenkyerɛ. Yebotum asan mu asesã daa daa kwan do nsɛm a yetsie dze etsie Christ ne nsɛm a ɔwɔ kyerɛwsɛm krɔnkrɔn no mu na nkɔnhyɛ nsɛm efi No nkɔnhyɛfo atseasefo hɔ.
Ahomgyeda ne nsiei, nokwar ebupɛn du no ntuae, ikitsa temple recommend a ɔmmpaa ho, erokɔ temple, na yeridzi hɛn temple ahyɛmudzi krɔnkrɔn no nyi ho bo a ɔsom hɛn yɛ nsɛnkyerɛdze kɛse wɔ hɛn pɛ na hɛn pisi ho adanse. Yenya pɛ dɛ yɛbɛyɛ abor enyiwado mbɔdzembɔ dze ahyɛ hɛn gyedzi dzen wɔ Christ mu?
Ɔsor Egya dɔ hɛn emudzi mu, mbom dɛm dɔ no dze enyidakwan kɛse ba. N’enyi da kwan dɛ yɛdze Agyenkwa no bɛyɛ hɛn abrabɔ ne fapem ankasa. Agyenkwa no nye hɛn fasusu a ɔkrɔn dɛ ɔpɛ mu ara Ogyaa No ho ma Egya no, wɔ adze nyina mu. Ɔno nye “ɔkwan no, nokwar no, nye nkwa no.”3 Ɔpɛ mu ara Ɔbɔɔ werdam maa hɛn bɔn. Ɔbrɛ hɛn adzesoadze adze, dwedwe hɛn suro, ma hɛn ahoɔdzen, na Ɔdze asomdwee na ntsease ba hɛn akoma mu wɔ atseetsee na awerɛhow ber mu.
Naaso gyedzi wɔ Jesus Christ mu yɛ nsanmuyi. “Sɛ [ye]benya pɛ bi dze agye [Ne nsɛm] edzi a”,4 yenya ahyɛse bea a yɛbɛhyɛ ase anaa yɛbɛhyehyɛ hɛn gyedzi akwantu no fofor. Ne nsɛm no, sɛ woedua no wɔ hɛn akoma mu tse dɛ aba na yɛdze ahwɛyie ma no fa a, ɔbɛgye ndwow, na hɛn gyedzi benyin abɛyɛ awerɛhyɛmu na wɔabɛyɛ ndzeyɛɛ na tum fapem. Mormon Nwoma no nye mboa adze a tum wɔ mu kɛse ma gyedzi enyin na okenyan no. Ɔpɛ na ɔma gyedzi nyin ntsɛm.
Ɔnnkyebo abrabɔ, wɔ sor nhyehyɛɛ do no, nnyɛ mberɛw na ɔtɔfabi a otum bor hɛn do. Na “[yɛ]tse ase, ama yeenya enyigye”!5 Yeritsim wɔ Agyenkwa na hɛn ahyɛmu no do dze daapem enyigye ba. Ɔnnkyebo abrabɔ yi no botae nye dɛ wɔbɔsɔ hɛn pɛ ahwɛ. “Abrabɔ edwuma kɛse [na osuanyiyɛ no bo a ɔsom] nye yebosũa Ewuradze ne pɛ na nkyii yɛayɛ.”6 Osuanyiyɛ nokwar mu no ogya kɔ enyigye ne mãhyɛ. Yerinya pɛ dɛ yebotua osuanyiyɛ no bo?
Ahyɛmu anamɔn kwan no nnyɛ adze a wɔakyerɛw no nkorkor na yɛyɛ; ɔyɛ sunsum mu nyɛbew kwan na pisi a yɛhyɛ no dzen ma Ewuradze Jesus Christ. Mbrasɛm, nkyerɛkyerɛ, ahyɛmu, na ayɛdze biara no botae nye dɛ ɔbɛkyekyer gyedzi na awerɛhyɛmu wɔ Christ mu. Hɛn enyimpi si dɛ yɛbotow hɛn abrabɔ wɔ Christ do no, dɛm ntsi, otwar dɛ yɛwɔw do yɛ—nnyɛ ngyinado bi, gyinabew, anaa enyiwa do ara ntsi. Yennkotum afa akwanma nda anaa hɛn ankasa hɛn mber a yɛnnkenya pɛ dɛ “[yebe]gyina dɛ Nyankopɔn N’adasefo aber nyina wɔ adze nyina mu, wɔ gyinabew biara a [yɛ]wɔ mu no mu.”7 Osuanyiyɛ wɔmmfa no kwa, osiandɛ Sunsum Krɔnkrɔn anyɛnkoyɛ no wonntwa ho bo.
Ampaara nna Ewuradze rodwen hɛn nda yi ho ber a Ɔkyerɛkyerɛɛ mbaabun du abɛbu no. Beenum no wɔyɛɛ enyansafo no, Ɔkãa dɛ “na wɔfaa Sunsum Krɔnkrɔn no dze yɛɛ hɔn kwankyerɛfo, na wɔamma wɔanndaadaa hɔn,”8 ber a nkwasea hɔn kandzea “rudundum” osiandɛ ngo nnyi mu.9 Nephi ne nsɛm yi bia ɔbɛkyerɛ Asɔrmba a nkyɛ ber bi wɔyɛ anokwafo no: “Na binom so … na wɔadaadaa hɔn ma wɔdze hɔn werɛ atwer wiadze, ama wɔakã dɛ: Zion ayɛ yie.”10
Hɔn a wɔdze hɔn werɛ atwer wiadze nye wɔrohwehwɛ na wɔrotwer wiadze ndzɛmba kyɛn Christ—sɛ yɛrekã a, erohwɛ wiadze nyansa ahwehwɛ mu kyɛn sunsum mu ahwehwɛ mu. Sunsum Krɔnkrɔn no ma hɛn tum ma yetum hu “ɔkã ndzɛmba ho nsɛm dɛ mbrɛ wɔtse pɛpɛɛpɛr, na … mbrɛ wɔbɛyɛ pɛpɛɛpɛr.”11 “Ɔnam Sunsum Krɔnkrɔn no tum do, [ye]botum ehu nokwar a ɔwɔ ndzɛmba nyinara mu”12 na wɔanndaadaa hɛn. Yɛdze Christ bɛyɛ hɛn abrabɔ ne fapem na yɛbɔ anohoba dɛ yebedzi Ne mbrasɛm do ɔpɛ mu ara nnyɛ osiandɛ yɛyɛ enyifurafo mbom osiandɛ yetum hu adze.13
Na ɔfa mbaabun nkwasea no so ɛ? Dɛn ntsi na woennya pɛ dɛ wobekitsa sunsum mu ngo kuraba bi? Ana wotui hyɛɛ da ara? Bia wɔyɛɛ no biara biara osiandɛ ɔyɛ ahokyer anaa ɔyɛ dɛ ho nnhia. Siantsir biara no, wɔdaadaa hɔn faa Christ ne dzibew a ɔkrɔn no ho. Iyi nye Satan ne ndaadaa ano na siantsir a hɔn dasegye kandzea no ewiei no odumee ɔnam sunsum mu ngo a onnyi. Abɛbu yi yɛ mfatohosɛm ma hɛn mber yi. Beberee gyaa Agyenkwa no na hɔn ahyɛmudzi mu ma mber pii gu mu ana woegyaa N’Asɔr.
Yɛtse mber a ɔmmbaa da mu a tsetse nkɔnhyɛfo akã ho asɛm, da no a Satan ɔbɔsoɛr “wɔ adasamba hɔn akoma mu, na oenunu hɔn ebufuw etsia dza oye.”14 Hɛn mu dodowara, tse online wiadze a ɔwɔ ehoo mu a enyikadze na nkɔmbɔdzi a otsia hɛn su krɔnkrɔn na gyedzi wɔ Christ mu.
Sunsum mu nhyɛdo a ɔyɛ ndam mapã wɔ abofra n’abrabɔ mu no nye n’awofo dɔfo na nananom a wosie hɔn anakasa hɔn ahyɛmudzi krɔnkrɔn no nokwar mu no hɔn tsenenee fasusu. Awofo dze enyidahɔ kyerɛkyerɛ hɔn mbofra gyedzi wɔ Ewuradze Jesus Christ mu, ama hɔn so “eehu fibea kor a ɔsɛ dɛ wɔkɔ kɔhwehwɛ hɔn bɔnfakyɛ.”15 Ahyɛmudzi nsiei biara biara na dakor dakor no ogya kɔ sunsum biara biara mu. Sunsum mu mbusu no yɛ kɛse koraa wɔ hɛn mba na mbanana no do. Awofo na nananom, yɛda ho wɔ ɔpɛ?
President Russell M. Nelson kɔɔr do bɔɔ kɔkɔ dɛ, “nda a ɔreba mu no, yennkotum atsena ase sunsum mu a Sunsum Krɔnkrɔn ne bambɔ n’akwankyerɛ. ne kyerɛpɛn, n’awerɛkyekyer, na ne daa daa nhyɛdo nnkã ho.’’16 Ɔyɛ kɔkɔbɔ pefee na pɔkyee dɛ yensiesie hɛn kandzea na yɛntow hɛn sunsum mu ngo no mu. Yɛda ho wɔ ɔpɛ dɛ yɛbɛkã nkɔnhyɛfo atseasefo do a? Wo sunsum mu ngo dodow ahen na ɔwɔ wo kandzea mu? Ebɛn nsesã horow wɔ wankasa w’abrabɔ mu na ɔbɛma etum enya Sunsum Krɔnkrɔn ne nhyɛdo daa daa?
Ndɛ, tse dɛ Jesus ne mber mu no, binom bɔwɔ hɔ a wɔbɛdan hɔn ekyir, a wɔmmpɛ dɛ wɔbɛpen osuanyiyɛ ho kaw no. Ber a ntsɛn na kasatsia ebufuw mu rodɔɔ sõ dze tsia Agyenkwa N’Asɔr no na hɔn a wɔkã No do no, hɛn osuanyiyɛ behia ɔpɛ kɛse dze atsentsen na yɛahyɛ hɛn sunsum mu ekyir mbiew dzen na yɛnnkasa hɔnho.17
Sɛ sunsum mu fapem wɔatow ma woetsim Jesus Christ do a, yerinndzi nkogu na onnhia dɛ yebosuro.
“Hwɛ, Ewuradze rohwehwɛ akoma nye adwen pa; na nyia ɔwɔ su pa na ɔyɛ setsie no, obedzi Zion asaase no do ndzepa wɔ nda a odzi ekyir yinom mu.”18
Nkyɛ yenya pɛ aber nyina. Ewuradze Jesus Christ No dzin krɔnkrɔn no mu, amen.