No Kɔndua Yɛ Mberɛw na N’Adzesoa Yɛ Har
Hom mma yɛnkaa dɛ nyimpa kor biara a ɔwɔ asaase yi do yɛ Nyame ne ba na Ɔdɔ kor biara.
Wɔkã banyin bi a wɔfrɛ no Jack a ɔwɔ anoma-ha bɔdɔm a wɔfrɛ no Cassie ho asɛm. Nna Jack enyigye Cassie ho dodow na ɔtaa tu noho dɛ bɔdɔm no awea ara yie. Ama ɔakyerɛ iyi no, Jack too nsa frɛɛ anyɛnkofo binom dɛ wɔmbɔhwɛ dza Cassie tum yɛ. Wokodur ahayɛ kuw ase no, Jack gyaa Cassie dɛ ɔnenam hɔ ber a ɔrokɔ dan mu akɛkyerɛw ne dzin.
Oduur mber a wɔbɛhyɛ ase no, nna Jack noho har no dɛ obotu noho wɔ Cassie ne nyimdzee nwanwa no ho. Naaso, nna Cassie ne ndzeyɛɛ asesã koraa. Ɔannyɛ Jack n’ahyɛdze a ɔtaa yɛ no ɔpɛ mu ara mu kor mpo. Nna dza ɔpɛ ayɛ ara nye obegyina ne nkyɛn.
Jack yɛ basaa na n’enyi tõe na no bo fuuw Cassie; annkyɛr na ɔkãa dɛ womfi hɔ nkɔ. Cassie ennhuru annkɔ hɛn no ekyir mpo, dɛm ntsi ebufuw mu ara Jack maa no do na ɔtoow no hyɛɛ ne dan mu. No bo fuwii ber a hɔn a wɔkã no ho sii no bɔdɔm ne ndzeyɛɛ atwetwe ara dze koduur fie. Nna Jack nntum nntse ase saintsir a Cassie rekyerɛ suban bɔn dɛm no. Ɔatsetse no yie, na dze kesi dɛm aber no nna bɔdɔm no n’apɛdze ara nye ɔbɛyɛ dza ɔpɛ na ɔasom no.
Wokoduur fie ekyir no, Jack hyɛɛ ase dɛ ɔrohwehwɛ Cassie noho ahwɛ pira, nsõe, anaa mbowaba, a ɔtaa yɛ. Ber a ɔdze ne nsa too n’akoko do no, ɔtsee biribi fɔwee na ohun dɛ bɔgya ayɛ ne nsaho. N’enyitõ na ahobow mu no, ohun dɛ biribi etwa no akɔ n’akoko mbiew no mu. Ohun kor so wɔ n’anan enyimfa ho, no so akã biew no.
Jack maa Cassie do na ɔhyɛɛ ase sũi. N’enyito wɔ mbrɛ oebua no atsɛnkyew na ma ɔdze yɛɛ no bɔdɔm no boor no do. Dza nna Cassie reyɛ anapa no nnyɛ no ntɔyɛɛ osiandɛ nna oepira. Ne yaw, n’amandzehu, na ne pira kur no na ɔmaa no su yɛɛ dɛm no. Nna ɔnnyɛ dɛ ɔmmpɛ dɛ ɔbɛyɛ aso ama Jack anaa dɛ onnyi ɔdɔ ma no.1
Metsee asɛm yi mfe pii a abasen kɔ na mowerɛ mmfir da. Ankorankor ahen na woepirapira wɔ hɛn mu? Mpɛn ahen na yebua binom atsɛn a ɔnam hɔn hwɛbea na ndzeyɛɛ, anaa dza wɔnnyɛ do, ber a, sɛ nkyɛ yɛtse ase yie a, yɛdze mbɔbɔrhu na ɔpɛ dɛ yɛboa kyɛn ɔnam hɛn atsɛmbu ntsi, yɛdze bi bɛkã hɔn adzesoa ho?
Meedzi fɔ wɔ iyi ho mpɛn pii wɔ m’abrabɔ mu, naaso Ewuradze akyerɛkyerɛ me abotar mu ara edua mankasa mo sũahu do na ber a metsie nkaafo pii hɔn abrabɔ mu sũahu horow. Maba ebenya enyisɔ ara yie wɔ hɛn Agyenkwa dɔfo Ne fasusu a Ɔhweer Ne mber mu pii dze rosom binom ɔdɔ mu ara.
Me babaa kumaa ehyia abrabɔ mu sũahu ahorow a nkã tse mu ɔhaw kã ho fitsi ber a nna osuar koraa no. Mber pii wɔ n’abrabɔ mu no nna onya atsenkã dɛ onnkotum akɔ do. Yebenya enyisɔ daapem ama asaase do abɔfo ahorow a dɛm mber no nna wɔwɔ hɔ, wɔnye no tsena, tsie no, wɔnye no sũ, na wɔbɔ mu kyɛ akyɛdze soronko binom, sunsum mu ntseasee, na ɔdɔ ma hɔnho nkorkor. Ɔdɔ gyinabew a ɔtse dɛm mu no, wɔtaa mema adzesoadze do wɔ afã ebien nyina.
Elder Joseph B. Wirthlin, ɔreserɛɛ kãa 1 Corinthfo no, ɔkãa dɛ, “Sɛ medze nyimpa nye abɔfo tɛkyerɛma mekasa, na minnyi ɔdɔ a, mayɛ dɛ ayewa a ɔgyegye nye akasaa a ɔwosow.”2
Ɔsɔɔw do:
“Paul n’amandzɛɛ a ɔdze bɔɔ Ahotseweefo kuw fofor yi yɛ tsiabaa na tɔɔtsen: Biribiara a eyɛ biara rennkesi hwee sɛ nnyi ɔdɔ a. Ibotum dze kasahorow akasa, enya nkɔnhyɛ akyɛdze, atse esumasɛm nyina ase, na enya nyimdzee nyina; mpo sɛ ewɔ gyedzi a wɔdze tutu mbepɔw, na nnyi ɔdɔ a ɔrennyɛ mfaso biara mma wo koraa.
“‘Ayamuyie yɛ Jesus Christ no dɔ mapã no’ [Moroni 7:47]. Agyenkwa no yɛɛ dɛm dɔ ho fasusu.”3
“Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ wɔ homho nkorkor a.”4
Asɔr baanodzifo akã ayamuyie, koryɛ, ɔdɔ, ayamuhyehye, bɔnfakyɛ, na ehumbɔbɔr ho asɛm pii. Megye dzi dɛ Agyenkwa no roto nsa afrɛ hɛn ma yɛabɔ bra a ɔkrɔn, wɔ krɔnkrɔnyɛ kwan do5—No ɔdɔ kwan a obiara botum enya atsenkã dɛ wɔkã ho na wohia hɔn.
Wɔahyɛ hɛn dɛ yɛndɔ nkaafo,6 na mma yembua hɔn atsɛn.7 Hom mma yɛmfa adzesoa duudur no nto famu, ɔnnyɛ hɛn na yɛbɔsoa.8 N’anan mu no, yebotum ama Agyenkwa no ɔdɔ na ayamuhyehye kɔndua no do.
“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.
“Hom mfa mo kɔndua no nto hom do, na hom nsũa me; …
“Na mo kɔndua yɛ mberɛw, na m’adzesoa yɛ har.”9
Agyenkwa no mmpen bɔn mbom Ɔdze No dɔ ma hɛn na Ɔtsen bɔnfakyɛ mu ma hɛn sɛ yenu hɛnho a. Ɔbaa no a wɔkyee no awartõ mu no, Ɔkãa dɛ, “Na mummbu wo fɔ; kɔ wo kwan na mma nnyɛ bɔn bio.”10 Hɔn a Ɔdze Ne nsa kãa hɔn no tsee No dɔ, na dɛm dɔ no saa hɔn yarba na Ɔsesãa hɔn. No dɔ kenyaan hɔn ma wɔpɛɛ dɛ wɔsesã hɔn abrabɔ. Ebɔ bra wɔ No kwan do no dze enyigye na asomdwee ba, na ɔdwe, ayamuyie na ɔdɔ mu ara Ɔtoo nsa frɛɛ binom so dɛ wɔmbɔ bra wɔ dɛm kwan no do.
Elder Gary E. Stevenson kãa dɛ “Sɛ ɔbra no nsɔhwɛ na nkõdzen, nyarbanyarba, epirapira nye hɛn dzi esi a, Ewuradze—hɛn Guanhwɛfo, hɛn Hwɛfo—dze ɔdɔ na ayamuyie bɛnyɛn hɛn. Ɔbɛsã hɛn akoma yarba na ɔdze hɛn akra bɛsan aba nkwa mu bio.”11 Dɛ yɛyɛ Jesus Christ akadofo no, ana ɔnnsɛ dɛ yɛyɛ dɛmara?
Agyenkwa no serɛ hɛn dɛ yensũa No12 na yɛnyɛ ndzɛmba a yeehu No dɛ Ɔyɛ no.13 Ɔno nye ayamuyie na ɔdɔ mapã ho fasusu a ɔkrɔn no. Ber a nkakrakakra yesũa dɛ yɛbɛyɛ dza Ɔse hɛn no—nnyɛ dɛ ɔyɛ hɛn edwuma anaa nhyira bi a yebenya ntsi, mbom ɔnam ɔdɔ a yɛwɔ ma No na hɛn Ɔsor Egya14—No dɔ bɛpem edua hɛn mu na wɔama dza Ɔbɛse hɛn biara nnyɛ dɛ obotum aba nko mbom ewiei no ɔbɛyɛ mberɛw na ɔayɛ har15 na enyigye akyɛn dza yebotum esusu mpo. Ɔgye edwumayɛ, obotum agye mfe pii, dɛ ma wɔayɛ ama me no, naaso ber a yenya pɛ mpo dɛ ɔdɔ bɛyɛ tum a opuhim hɛn no, Obotum afa dɛm pɛ no,16 dɛm aba no, na ewiei no Ɔadaan no abɛyɛ dua kɛse fɛɛfɛw a, eduaba dɛdɛɛdɛw ahyɛ do mã.17
Yɛtow wɔ hɛn Asɔr ndwom no mu kor dɛ: “Emi nye woana na mebua obi fɔ ber a mennantsew yie? Akoma a ayɛ dzinn no awerɛhow suma mu a enyiwa nntum nnhu.”18 Woana wɔ hɛn mu a bia awerɛhow esuma no? Abofra anaa abasirba a ɔyɛ dɛ ɔatsew etua, awargyaa mu mbofra, egya anaa enã ahokwafo, hɔn a wɔwɔ honandua mu anaa adwen mu haw, hɔn a wɔregye hɔn gyedzi ho kyim, hɔn a wohyia ebusua anaa amambra enyimtsiabu, hɔn a wɔayɛ ankonam, hɔn a wɔrehwehwɛ awar, hɔn a wɔwɔ nyarba bɔn, hɔn a wɔwɔ abrabɔ mu ɔhaw ahorow—ɔtaa dɛ hɔn mpo a enyiwa do no hɔn bra yɛdɛ ma ɔyɛ tɔɔtsen.
Hɛn mu biara nnyi abrabɔ tɔɔtsen anaa ebusua tɔɔtsen; emi minnyi bi. Sɛ yenya tsema ma nkorɔfo a hɔn so woenya ɔhaw na sintɔ a, obotum aboa hɔn ma woenya atsenkã dɛ wɔnnyɛɛ ankonam wɔ hɔn aperdzi no mu. Obiara hia dɛ obenya atsenkã dɛ wɔkã ho ampa na wohia hɔn wɔ Christ nyimpadua no mu.19 Satan n’ahwehwɛdze kɛse nye ɔbɛkyekyɛ Nyame ne mba mu, na oedzi nyim ara yie, mbom tum bi wɔ koryɛ mu.20 Na mbrɛ obesi behia dɛ yɛnye hɛnho nantsew abasa dze abasa mu wɔ ɔnnkyebo abrabɔ ɔhaw yi mu!
Hɛn nkɔnhyɛnyi, President Russell M. Nelson, kãa dɛ: “Ewurkadze biara anaa enyimtsiabu wɔ obi do osian no ɔman, ebusuakuw, nkitahodzi nkã-tse, dɛ ɔyɛ banyin anaa ɔbaa, adzesũa abɔdzin, amambra, anaa ahyɛnsewdzi dodow biara yɛ ekyiwadze ma hɛn Yɛfo. Yɛannye binom enndzi no yie dɛm yi a, ɔma hɛn abrabɔ mmfata dɛ yɛyɛ Ne ahyɛmu mbambanyin na mbabaa!”21
President Nelson ato nsa afrɛ obiara dɛ ɔnkɛhɛn na otsim wɔ ahyɛmu anamɔn kwan no do a ogya hɛn san kɔ hɛn Egya a ɔwɔ Sor hɔ, ɔama hɛn afotu a odzi do yi: Sɛ anyɛnkofo anaa ebusuanyi … gyaa Asɔr no a, kɔ do dɔ hɔn. Nnyɛ ɔwo na ibobu obi ne nsanmuyi ho atsɛn tse dɛ ɔwo so ɔsɛ dɛ wɔkasa tsia wo dɛ aka mu.”22
Anyɛnkofo, hom mma yɛnkaa dɛ nyimpa kor biara a ɔwɔ asaase yi do yɛ Nyame ne ba23 na Ɔdɔ kor biara.24 Ana binom wɔ w’akwan mu a atse dɛ ɔsɛ dɛ ibua hɔn atsɛn? Ɔtse dɛm a, hom nkaa dɛ iyinom nye akwan a ɔsom bo ma hɛn dɛ yedzi dwuma dze dɔ dɛ Agyenkwa no.25 Na ber a yedzi Ne fasusu do no, yebotum yɛnye No ato kɔndua na yɛaboa ma ɔdɔ atsenkã na obiara kã ho atahye wɔ hɛn Egya ne mba nyina mu.
“Yɛdɔ, osiandɛ ɔno na odzii kan dɔɔ hɛn.”26 Sɛ Agyenkwa no dɔ hyɛ hɛn mu mã a, No kɔndua botum ayɛ mberɛw ampara, na N’adzesoa botum ayɛ har.27 Megye iyi ho dase wɔ Jesus Christ ne dzin mu, amen.